ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 3

ꠟꠦꠋꠠꠣ ꠢꠇꠤꠞꠞꠦ ꠡꠤꠚꠣ ꠇꠞꠣ

1ꠄꠇꠖꠤꠘ ꠀꠍꠞ ꠅꠇ꠆ꠔꠞ ꠘꠝꠣꠎꠞ ꠟꠣꠉꠤ ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠣꠅꠀꠔ ꠀꠍꠟꠣ; 2ꠝꠣꠘꠡꠦ ꠙꠞꠔꠦꠇ ꠖꠤꠘ ꠄꠇꠎꠘ ꠝꠣꠘꠡꠞꠦ ꠛꠁꠀ ꠀꠘꠤꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ‘ꠡꠥꠘ꠆ꠖꠞ’ ꠘꠣꠝꠞ ꠉꠦꠁꠐꠞ ꠉꠦꠍꠦ ꠕꠁꠔꠣ, ꠢꠦ ꠎꠘꠝꠉꠔ ꠟꠦꠋꠠꠣ-ꠀꠔꠥꠞ ꠀꠍꠤꠟ, ꠎꠦꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠎꠣꠁꠘ ꠔꠣꠞꠣꠞ ꠉꠦꠍꠦ ꠜꠤꠇ ꠌꠣꠅꠀꠞ ꠟꠣꠉꠤ ꠔꠣꠞꠦ ꠢꠤꠈꠣꠘꠅ ꠕꠅꠀ ꠅꠁꠔ। 3ꠙꠤꠔꠞ ꠀꠞ ꠢꠣꠘ꠆ꠘꠣꠘꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠘꠤꠔ ꠖꠦꠈꠤꠀ ꠢꠦ ꠔꠣꠞꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠜꠤꠇ ꠈꠥꠎꠤꠟ। 4ꠙꠤꠔꠞ ꠀꠞ ꠢꠣꠘ꠆ꠘꠣꠘ ꠔꠣꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠀ ꠇꠁꠟꠣ, “ꠀꠝꠞꠣꠞ ꠛꠣꠄ ꠌꠣꠅ।” 5ꠔꠦꠃ ꠢꠦ ꠔꠣꠞꠣꠞ ꠉꠦꠍ ꠕꠣꠇꠤ ꠇꠥꠘ꠆ꠔꠣ ꠙꠣꠅꠀꠞ ꠟꠣꠟꠌꠦ ꠗꠤꠀꠘ ꠗꠞꠤ ꠌꠣꠁꠞꠂꠟ। 6ꠙꠤꠔꠞꠦ ꠔꠣꠞꠦ ꠇꠁꠟꠣ, “ꠀꠝꠞꠣꠞ ꠉꠦꠍꠦ ꠔ ꠡꠥꠘꠣ-ꠞꠥꠙꠣ ꠇꠥꠘ꠆ꠔꠣ ꠘꠣꠁ ꠞꠦꠛꠣ, ꠅꠁꠟꠦ ꠎꠦꠔꠣ ꠀꠍꠦ ꠔꠥꠝꠣꠞꠦ ꠖꠣꠘ ꠇꠞꠞꠣꠝ। ꠘꠣꠍꠣꠞꠔꠞ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠀꠐꠤꠀ ꠎꠣꠅ।” 7ꠇꠁꠀ ꠢꠣꠞꠤ ꠔꠣꠁꠘ ꠄꠞ ꠒꠣꠁꠘ ꠀꠔꠅ ꠗꠞꠤꠀ ꠃꠌꠣ ꠇꠞꠟꠣ, ꠀꠞ ꠟꠉꠦ ꠟꠉꠦꠃ ꠔꠣꠞ ꠙꠣꠅ ꠀꠞ ꠉꠥꠍꠤꠔ ꠛꠟ ꠀꠁꠟ। 8ꠢꠦ ꠚꠣꠟꠖꠤ ꠃꠑꠤꠀ ꠃꠛꠣꠁꠟ ꠀꠞ ꠀꠐꠣ ꠡꠥꠞꠥ ꠇꠞꠟ, ꠀꠐꠤ ꠀꠐꠤ ꠚꠣꠟꠣꠁ ꠚꠣꠟꠣꠁ ꠀꠟ꠆ꠟꠣꠞ ꠔꠣꠞꠤꠚ ꠇꠞꠔꠦ ꠇꠞꠔꠦ ꠄꠞꠣꠞ ꠟꠉꠦ ꠅꠁꠀ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠉꠦꠟ। 9ꠢꠇ꠆ꠇꠟ ꠝꠣꠘꠡꠦ ꠔꠣꠞꠦ ꠀꠐꠣꠔ ꠀꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠔ ꠖꠦꠈꠤꠀ 10ꠄꠞꠦ ꠌꠤꠘꠤꠟꠤꠟ, ꠁꠉꠥ ꠖꠦꠈꠤ ꠅꠃ ꠝꠣꠘꠥꠡ, ꠎꠦꠉꠥꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠡꠥꠘ꠆ꠖꠞ ꠘꠣꠝꠞ ꠉꠦꠁꠐꠅ ꠛꠁꠀ ꠜꠤꠇ ꠇꠞꠔ! ꠔꠣꠞ ꠢꠣꠟꠔ ꠖꠦꠈꠤꠀ ꠝꠣꠘꠥꠡ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠉꠦꠟ।

ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠎꠞꠔ ꠙꠤꠔꠞ ꠀꠞ ꠢꠣꠘ꠆ꠘꠣꠘ

11ꠅꠁꠟꠦ ꠟꠦꠋꠠꠣ ꠢꠇꠤꠞꠦ ꠙꠤꠔꠞ ꠀꠞ ꠢꠣꠘ꠆ꠘꠣꠘꠞ ꠈꠞꠦ ꠅꠁꠀ ꠊꠥꠞꠣꠄ, ꠝꠣꠘꠡꠦ ꠙꠤꠔꠞꠞ ꠁ ꠇꠣꠝꠦ ꠔꠣꠁꠎ꠆ꠎꠥꠛ ꠅꠁꠀ ꠖꠃꠠꠤꠀ ꠍꠥꠟꠣꠁꠝꠣꠘ ꠘꠣꠝꠞ ꠛꠣꠞꠤꠘ꠆ꠖꠣꠔ ꠔꠣꠘ ꠉꠦꠍꠦ ꠀꠁꠟ। 12ꠁꠔꠣ ꠖꠦꠈꠤꠀ ꠙꠤꠔꠞꠦ ꠝꠣꠘꠡꠞꠦ ꠇꠁꠟꠣ, “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠄꠞꠦ ꠖꠦꠈꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ ꠇꠦꠘꠦ? ꠀꠝꠞꠣꠞ ꠘꠤꠎꠞ ꠙꠤꠞꠣꠇꠤ ꠛꠣ ꠙꠞꠦꠎꠉꠣꠞꠤꠞ ꠉꠥꠘꠦ ꠔꠣꠞꠦ ꠌꠟꠣꠞ ꠡꠇ꠆ꠔꠤ ꠖꠤꠍꠤ ꠝꠘꠦ ꠇꠞꠤꠀ, ꠇꠦꠘꠦ ꠀꠝꠞꠣꠞ ꠛꠣꠄ ꠗꠤꠀꠘ ꠗꠞꠤ ꠌꠣꠁꠞꠂꠍ? 13ꠁꠛ꠆ꠞꠣꠢꠤꠝ, ꠁꠍꠢꠣꠇ ꠀꠞ ꠁꠀꠇꠥꠛꠞ ꠀꠟ꠆ꠟꠣ, ꠀꠝꠞꠣꠞ ꠛꠣꠚ-ꠖꠣꠖꠣ ꠅꠇꠟꠞ ꠀꠟ꠆ꠟꠣ, ꠔꠣꠘ ꠀꠙꠘ ꠛꠘ꠆ꠖꠣ ꠁꠍꠣꠞ ꠝꠢꠤꠝꠣ ꠎꠣꠁꠞ ꠇꠞꠍꠂꠘ, ꠎꠦꠘꠞꠦ ꠀꠙꠘꠣꠞꠣ ꠖꠥꠡꠝꠘꠞ ꠀꠔꠅ ꠡꠙꠤ ꠖꠤꠍꠟꠣ। ꠀꠞ ꠢꠣꠇꠤꠝ ꠙꠤꠟꠣꠔꠦ ꠎꠦꠛꠟꠣ ꠔꠣꠘꠞꠦ ꠍꠣꠠꠤ ꠖꠤꠔꠣ ꠇꠞꠤ ꠘꠤꠅꠔ ꠇꠞꠍꠟꠣ, ꠁ ꠡꠝꠄ ꠀꠙꠘꠣꠞꠣ ꠁꠍꠣꠞꠦ ꠖꠥꠞꠁ ꠢꠞꠣꠁ ꠖꠤꠍꠂꠘ। 14ꠀꠙꠘꠣꠞꠣ ꠅꠃ ꠙꠣꠇ-ꠙꠞꠦꠎꠉꠣꠞ ꠝꠣꠘꠡꠞꠦ ꠢꠞꠣꠁ ꠖꠤꠀ ꠄꠇꠎꠘ ꠈꠥꠘꠤꠞꠦ ꠍꠣꠠꠣꠘꠤꠞ ꠟꠣꠉꠤ ꠡꠥꠙꠣꠞꠤꠡ ꠖꠤꠍꠂꠘ। 15ꠎꠦꠁꠘ ꠎꠤꠘ꠆ꠖꠦꠉꠤ ꠖꠣꠘ ꠇꠞꠂꠘ ꠔꠣꠘꠞꠦ ꠀꠙꠘꠣꠞꠣ ꠎꠣꠘꠦ ꠝꠣꠞꠤꠟꠤꠍꠂꠘ, ꠅꠁꠟꠦ ꠀꠟ꠆ꠟꠣꠄ ꠔꠣꠘꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ, ꠀꠝꠞꠣ ꠄꠞ ꠡꠣꠇ꠆ꠇꠤ। 16ꠀꠞ ꠔꠣꠘ ꠃꠙꠞꠦ ꠁꠝꠣꠘ ꠀꠘꠣꠄ, ꠅꠃ ꠎꠦ ꠛꠦꠐꠣꠞꠦ ꠀꠙꠘꠣꠞꠣ ꠌꠤꠘꠞꠣ ꠀꠞ ꠖꠦꠈꠞꠣ, ꠢꠃ ꠁꠍꠣꠞ ꠘꠣꠝꠃ ꠔꠣꠞꠦ ꠛꠟꠀꠟꠣ ꠇꠞꠍꠦ। ꠁꠍꠣꠞ ꠝꠣꠎꠦꠖꠤ ꠎꠦꠔꠣ ꠁꠝꠣꠘ ꠙꠄꠖꠣ ꠅꠄ, ꠅꠃ ꠁꠝꠣꠘꠞ ꠛꠟꠦꠃ ꠀꠙꠘꠣꠞꠣ ꠢꠇꠟꠞ ꠍꠣꠝꠘꠦ ꠔꠣꠞꠦ ꠜꠣꠟꠣ ꠇꠞꠣ ꠅꠁꠍꠦ।

17“ꠅ ꠜꠣꠁ ꠅꠇꠟ, ꠀꠝꠤ ꠅꠈꠘ ꠎꠣꠘꠤ ꠀꠙꠘꠣꠁꠘ꠆ꠔꠞ ꠝꠥꠞꠛ꠆ꠛꠤ-ꠡꠣꠟꠤꠡ ꠅꠇꠟꠞ ꠟꠣꠈꠣꠘ ꠀꠙꠘꠣꠞꠣꠅ ꠘꠣ-ꠛꠥꠎꠤꠀ ꠁ ꠇꠣꠝ ꠇꠞꠤꠟꠤꠍꠂꠘ। 18ꠅꠁꠟꠦ ꠀꠟ꠆ꠟꠣꠄ ꠔꠣꠘ ꠔꠣꠝꠣꠝ ꠘꠛꠤ ꠅꠇꠟꠞ ꠝꠣꠎꠖꠤ ꠀꠟ-ꠝꠍꠤꠞ ꠔꠇꠟꠤꠚꠞ ꠛꠦꠙꠣꠞꠦ ꠀꠉꠦ ꠎꠔꠔꠣ ꠎꠣꠘꠣꠁꠍꠂꠘ, ꠁ ꠢꠇ꠆ꠇꠟꠔꠣ ꠅꠃ ꠟꠣꠈꠣꠘ ꠇꠞꠤ ꠙꠥꠞꠣ ꠇꠞꠍꠂꠘ। 19ꠄꠞꠟꠣꠉꠤ ꠀꠙꠘꠣꠞꠣ ꠝꠘ ꠚꠤꠞꠣꠃꠇ꠆ꠇꠣ ꠀꠞ ꠀꠟ꠆ꠟꠣꠞ ꠝꠥꠈꠤ ꠅꠃꠇ꠆ꠇꠣ, ꠎꠣꠔꠦ ꠀꠙꠘꠣꠁꠘ꠆ꠔꠞ ꠉꠥꠘꠣ ꠅꠇꠟ ꠚꠥꠍꠤꠀ ꠍꠣꠚ ꠇꠞꠣ ꠅꠄ। 20ꠔꠦ ꠅꠃ ꠟꠣꠈꠣꠘ ꠅꠇ꠆ꠔ ꠀꠁꠛ, ꠎꠦꠛꠟꠣ ꠝꠣꠛꠥꠖꠦ ꠢꠃ ꠁꠍꠣꠞꠦ ꠝꠣꠘꠤ ꠔꠣꠘ ꠙꠍꠘ꠆ꠖ ꠇꠞꠣ ꠀꠟ-ꠝꠍꠤꠞꠦ ꠛꠦꠎꠤꠀ ꠀꠙꠘꠣꠁꠘ꠆ꠔꠞꠦ ꠔꠞꠔꠣꠎꠣ ꠇꠞꠛꠣ। 21ꠀꠟ꠆ꠟꠣꠄ ꠢꠇꠟꠔꠣꠞꠦ ꠀꠉꠞ ꠢꠣꠟꠔꠅ ꠚꠤꠞꠣꠁꠛꠣ, ꠁꠔꠣ ꠛꠃꠔ ꠖꠤꠘ ꠀꠉꠦꠃ ꠙꠣꠇ ꠘꠛꠤ ꠅꠇꠟꠞ ꠎꠛꠣꠘ ꠖꠤꠀ ꠇꠁꠍꠂꠘ। ꠎꠔꠖꠤꠘ ꠔꠣꠘ ꠁ ꠅꠀꠖꠣ ꠙꠥꠞꠣ ꠘꠣ ꠇꠞꠛꠣ, ꠅꠔ ꠖꠤꠘ ꠁꠍꠣꠅ ꠛꠦꠢꠦꠡ꠆ꠔꠞ ꠝꠣꠎꠦ ꠞꠁꠛꠣ। 22ꠝꠥꠍꠣꠄ ꠔ ꠇꠁꠍꠟꠣ, ‘ꠝꠣꠛꠥꠖ ꠀꠟ꠆ꠟꠣꠄ ꠔꠥꠝꠞꠣꠞ ꠟꠣꠉꠤ ꠔꠥꠝꠞꠣꠞ ꠘꠤꠎꠞ ꠝꠣꠘꠥꠡ ꠅꠇꠟ ꠕꠣꠇꠤ ꠀꠝꠣꠞ ꠟꠣꠈꠣꠘ ꠄꠇ ꠘꠛꠤ ꠙꠄꠖꠣ ꠇꠞꠛꠣ, ꠔꠣꠁꠘ ꠔꠥꠝꠞꠣꠞꠦ ꠎꠦꠔꠣ ꠇꠁꠛꠣ, ꠔꠥꠝꠞꠣ ꠁ ꠢꠇꠟꠔꠣꠃ ꠀꠝꠟ ꠇꠞꠤꠅ। 23ꠎꠦꠉꠥꠄ ꠔꠣꠘ ꠇꠕꠣ ꠢꠥꠘꠔ ꠘꠣꠄ, ꠀꠟ꠆ꠟꠣꠄ ꠄꠞꠦ ꠘꠤꠎꠞ ꠛꠘ꠆ꠖꠣꠞ ꠈꠣꠔꠣ ꠕꠣꠇꠤ ꠚꠥꠍꠤꠀ ꠚꠣꠟꠣꠁ ꠖꠤꠛꠣ।’ 24ꠀꠞ [ꠛꠣꠖꠡꠣ ꠖꠣꠃꠖꠞ ꠀꠝꠟꠞ] ꠡꠣꠝꠥꠄꠟ ꠘꠛꠤ ꠕꠣꠇꠤ ꠡꠥꠞꠥ ꠇꠞꠤ ꠎꠔ ꠘꠛꠤ ꠅꠇꠟꠦ ꠇꠣꠟꠣꠝ ꠛꠣꠔꠣꠁꠍꠂꠘ, ꠄꠞꠣ ꠢꠇꠟꠦꠃ ꠁ ꠅꠇ꠆ꠔꠞ ꠇꠕꠣ ꠇꠁꠍꠂꠘ। 25ꠀꠙꠘꠣꠞꠣ ꠔ ꠁ ꠘꠛꠤ ꠅꠇꠟꠞ ꠅꠀꠞꠤꠡ, ꠀꠞ ꠢꠃ ꠇꠣꠘꠥꠘꠞꠅ ꠅꠀꠞꠤꠡ ꠎꠦꠔꠣ ꠀꠟ꠆ꠟꠣꠄ ꠀꠙꠘꠣꠁꠘ꠆ꠔꠞ ꠛꠣꠚ-ꠖꠣꠖꠣ ꠅꠇꠟꠞ ꠟꠉꠦ ꠇꠣꠁꠝ ꠇꠞꠍꠤꠟꠣ। ꠀꠟ꠆ꠟꠣꠄ ꠢꠎꠞꠔ ꠁꠛ꠆ꠞꠣꠢꠤꠝꠞꠦ ꠇꠁꠍꠟꠣ, ‘ꠔꠥꠝꠣꠞ ꠅꠀꠞꠤꠡꠞ ꠝꠣꠎꠦꠖꠤ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠄ ꠛꠞꠇꠔ ꠙꠣꠁꠛꠣ।’ 26ꠢꠃ ꠅꠀꠞꠤꠡ, ꠝꠣꠘꠤ ꠔꠣꠘ ꠈꠣꠍ ꠉꠥꠟꠣꠝ ꠁꠍꠣꠞꠦ, ꠀꠟ꠆ꠟꠣꠄ ꠙꠄꠟꠣꠃ ꠀꠙꠘꠣꠁꠘ꠆ꠔꠞ ꠉꠦꠍꠦ ꠛꠦꠎꠤꠍꠂꠘ, ꠎꠣꠔꠦ ꠔꠣꠁꠘ ꠀꠙꠘꠣꠞꠣꠞꠦ ꠛꠦ-ꠖꠤꠘꠤ ꠇꠣꠝ ꠅꠇꠟ ꠕꠣꠇꠤ ꠚꠤꠞꠣꠁꠀ ꠢꠣꠞꠤ ꠛꠞꠇꠔ ꠖꠦꠁꠘ।”

Currently Selected:

ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 3: sylN

Highlight

Copy