ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 1
1
ꠢꠎꠞꠔ ꠁꠍꠣꠞ ꠛꠦꠢꠦꠡ꠆ꠔꠅ ꠚꠤꠞꠔ ꠎꠣꠅꠀ (১:১-১১)
1ꠝꠢꠣꠝꠣꠁꠘ꠆ꠘ ꠕꠤꠅꠚꠤꠟꠣꠍ,
ꠢꠎꠞꠔ ꠁꠍꠣꠞꠦ ꠛꠦꠢꠦꠡ꠆ꠔꠅ ꠔꠥꠟꠤꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ ꠔꠣꠁꠘ ꠎꠦꠔꠣ ꠔꠣꠟꠤꠝ ꠖꠤꠍꠂꠘ ꠀꠞ ꠎꠦꠔꠣ ꠎꠦꠔꠣ ꠇꠞꠍꠂꠘ ꠁ ꠢꠇꠟꠔꠣꠃ ꠀꠝꠤ ꠀꠉꠞ ꠇꠤꠔꠣꠛꠅ ꠟꠦꠈꠍꠤ। 2ꠎꠦ ꠍꠣꠢꠣꠛꠤ ꠅꠇꠟꠞꠦ ꠔꠣꠁꠘ ꠛꠣꠍꠤꠀ ꠟꠁꠍꠟꠣ, ꠔꠣꠘꠞꠦ ꠔꠥꠟꠤꠀ ꠘꠦꠅꠀꠞ ꠀꠉꠦ ꠙꠣꠇ ꠞꠥꠢꠥ ꠖꠤꠀ ꠄꠞꠣꠞ ꠉꠦꠍꠦ ꠅꠍꠤꠅꠔ ꠇꠞꠣꠁ ꠉꠦꠍꠂꠘ। 3ꠔꠣꠘ ꠔꠇꠟꠤꠚ ꠇꠣꠁꠝꠞ ꠛꠣꠖꠦ ꠔꠣꠁꠘ ꠎꠦꠘ ꠎꠤꠘ꠆ꠖꠣ ꠀꠍꠂꠘ ꠁꠐꠣꠞ ꠛꠃꠔ ꠇꠤꠍꠤꠝꠞ ꠀꠟꠣꠝꠔ ꠖꠦꠈꠣꠁꠍꠂꠘ। ꠌꠣꠟ꠆ꠟꠤꠡ ꠖꠤꠘ ꠗꠞꠤ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠖꠦꠈꠣ ꠖꠤꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠛꠤꠡꠄꠄ ꠛꠣꠔꠌꠤꠔ ꠇꠞꠍꠂꠘ। 4ꠁꠍꠣꠄ ꠔꠣꠞꠣ ꠢꠇ꠆ꠇꠟꠞ ꠟꠉꠦ ꠄꠇꠈꠣꠘꠅ ꠡꠞꠤꠇ ꠅꠁꠀ ꠅꠃ ꠢꠥꠇꠥꠝ ꠖꠤꠟꠣ, “ꠔꠥꠝꠞꠣ ꠎꠦꠞꠥꠎꠣꠟꠦꠝ ꠕꠣꠇꠤ ꠎꠣꠁꠅ ꠘꠣ, ꠀꠝꠣꠞ ꠉꠣꠁꠛꠤ ꠛꠣꠚꠞ ꠅꠀꠖꠣ ꠇꠞꠣ ꠎꠦ ꠖꠣꠘꠞ ꠇꠕꠣ ꠔꠥꠝꠞꠣ ꠀꠉꠦ ꠀꠝꠣꠞ ꠉꠦꠍꠦ ꠢꠥꠘꠍ, ꠄꠞꠟꠣꠉꠤ ꠅꠘꠅ ꠛꠣꠞ ꠌꠣꠅ। 5ꠢꠎꠞꠔ ꠄꠢꠤꠀꠄ ꠔ ꠙꠣꠘꠤꠞ ꠝꠣꠎꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ, ꠅꠁꠟꠦ ꠛꠦꠡ ꠖꠦꠞꠤ ꠅꠁꠔ ꠘꠣꠄ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠤꠀ ꠉꠥꠍꠟ ꠇꠞꠣꠁꠛꠣ।”
6ꠔꠣꠞꠣ ꠢꠇ꠆ꠇꠟ ꠄꠇꠈꠣꠘꠅ ꠖꠟꠣ ꠅꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠁ ꠡꠝꠄ ꠇꠤꠔꠣ ꠛꠘꠤ ꠁꠍꠞꠣꠁꠟ ꠅꠇꠟꠞ ꠀꠔꠅ ꠞꠣꠁꠎ꠆ꠎ ꠚꠤꠞꠔ ꠀꠘꠛꠣ ꠘꠤ?” 7ꠁꠍꠣꠄ ꠎꠥꠀꠙ ꠖꠤꠟꠣ, “ꠎꠦ ꠅꠇ꠆ꠔ ꠛꠣ ꠎꠝꠣꠘꠣ ꠀꠝꠣꠞ ꠉꠣꠁꠛꠤ ꠛꠣꠚꠦ ꠔꠣꠘ ꠘꠤꠎꠞ ꠄꠈꠔꠤꠀꠞꠅ ꠞꠣꠈꠍꠂꠘ, ꠁꠔꠣ ꠔꠥꠝꠞꠣ ꠎꠣꠘꠣꠞ ꠉꠞꠎ ꠘꠣꠁ। 8ꠅꠁꠟꠦ ꠙꠣꠇ ꠞꠥꠢꠥ ꠔꠥꠝꠞꠣꠞ ꠃꠙꠞꠦ ꠇꠣꠁꠝ ꠅꠁꠀ ꠢꠣꠞꠟꠦ ꠔꠥꠝꠞꠣ ꠉꠣꠁꠛꠤ ꠛꠟ ꠙꠣꠁꠛꠣꠄ, ꠅꠃ ꠛꠟꠦ ꠎꠦꠞꠥꠎꠣꠟꠦꠝ, ꠀꠡ꠆ꠔꠣ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣ, ꠀꠞ ꠖꠥꠘꠤꠀꠞ ꠢꠦꠡ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠀꠝꠣꠞ ꠡꠣꠇ꠆ꠇꠤ ꠅꠁꠛꠣꠄ।” 9ꠅꠃ ꠝꠣꠔꠞ ꠛꠣꠖꠦꠃ ꠍꠣꠢꠣꠛꠤ ꠅꠇꠟꠞ ꠌꠃꠈꠞ ꠍꠣꠝꠘꠦ ꠁꠍꠣꠞꠦ ꠔꠥꠟꠤꠀ ꠘꠦꠅꠀ ꠅꠁꠟ, ꠀꠞ ꠔꠣꠁꠘ ꠝꠦꠊꠞ ꠐꠥꠇꠞꠣꠞ ꠀꠅꠠ ꠅꠁꠉꠦꠟꠣ। 10ꠁꠍꠣ ꠎꠦꠛꠟꠣ ꠀꠍꠝꠣꠘꠅ ꠃꠑꠤꠞꠣ ꠁ ꠡꠝꠄ ꠍꠣꠢꠣꠛꠤ ꠅꠇꠟꠦ ꠌꠃꠈ ꠘꠣ ꠚꠤꠞꠣꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠞꠂꠟꠣ, ꠅꠃ ꠡꠝꠄ ꠗꠟꠣ ꠇꠣꠙꠠ ꠚꠤꠘ꠆ꠖꠣ ꠖꠥꠁꠎꠘ ꠛꠦꠐꠣ ꠝꠣꠘꠥꠡ ꠔꠣꠞꠣꠞ ꠇꠣꠘ꠆ꠖꠣꠔ ꠃꠛꠣꠁꠀ 11ꠇꠁꠟꠣ, “ꠅ ꠉꠣꠟꠤꠟꠞ ꠝꠣꠘꠥꠡ ꠅꠇꠟ, ꠁꠈꠣꠘꠅ ꠃꠛꠣꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠞꠤꠍ ꠇꠦꠘꠦ? ꠎꠣꠞꠦ ꠔꠥꠝꠞꠣꠞ ꠉꠦꠍ ꠕꠣꠇꠤ ꠔꠥꠟꠤꠀ ꠘꠦꠅꠀ ꠅꠁꠟ, ꠅꠃ ꠁꠍꠣꠞꠦ ꠎꠦꠟꠣꠈꠣꠘ ꠔꠥꠝꠞꠣ ꠛꠦꠢꠦꠡ꠆ꠔꠅ ꠎꠣꠁꠔꠦ ꠖꠦꠈꠟꠣꠄ, ꠅꠃ ꠟꠣꠈꠣꠘ ꠔꠣꠁꠘ ꠚꠤꠞꠤꠀꠅ ꠀꠁꠛꠣ।”
ꠎꠦꠞꠥꠎꠣꠟꠦꠝ ꠁꠍꠣꠄꠁ ꠎꠝꠣꠔꠞ ꠎꠘꠝ (১:১২-৫:৪২)
ꠘꠄꠀ ꠍꠣꠢꠣꠛꠤ ꠙꠍꠘ꠆ꠖ ꠇꠞꠣ
12ꠅꠃ ꠍꠣꠢꠣꠛꠤ ꠅꠇꠟ ꠎꠄꠔꠥꠘ ꠘꠣꠝꠞ ꠙꠣꠠꠅ ꠕꠣꠇꠤ ꠎꠦꠞꠥꠎꠣꠟꠦꠝꠅ ꠚꠤꠞꠤꠀ ꠀꠁꠟꠣ। ꠁ ꠙꠣꠠ ꠎꠦꠞꠥꠎꠣꠟꠦꠝ ꠐꠣꠃꠘ ꠕꠘꠦ ꠕꠥꠠꠣ ꠖꠥꠞꠁ। 13ꠐꠣꠃꠘꠅ ꠚꠤꠞꠤꠀ ꠔꠣꠞꠣ ꠎꠦ ꠊꠞꠞ ꠃꠙꠞꠞ ꠔꠣꠟꠣꠔ ꠞꠁꠔꠣ ꠢꠃ ꠊꠞꠅ ꠉꠦꠟꠣ। ꠔꠣꠞꠣ ꠅꠁꠟꠣ ꠙꠤꠔꠞ, ꠢꠣꠘ꠆ꠘꠣꠘ, ꠁꠀꠇꠥꠛ, ꠀꠘ꠆ꠖꠞꠤꠀꠍ, ꠚꠤꠟꠤꠚ, ꠕꠥꠝꠣꠍ, ꠛꠞ꠆ꠕꠟꠝꠄ ꠀꠞ ꠝꠕꠤ, ꠀꠟꠚꠤꠞ ꠙꠥꠀ ꠁꠀꠇꠥꠛ, ꠝꠥꠇ꠆ꠔꠤꠎꠥꠖ꠆ꠖꠣ ꠍꠣꠁꠝꠘ, ꠀꠞ ꠁꠀꠇꠥꠛꠞ ꠙꠥꠀ ꠁꠢꠥꠖꠣ। 14ꠊꠞꠅ ꠢꠣꠝꠣꠁꠀ ꠢꠇꠟꠦ ꠝꠤꠟꠤꠀ ꠈꠣꠍ ꠖꠤꠟꠦ ꠖꠥꠀ ꠇꠞꠣꠔ ꠞꠁꠟꠣ, ꠄꠞꠣꠞ ꠟꠉꠦ ꠀꠍꠟꠣ ꠁꠝꠣꠘꠖꠣꠞ ꠛꠦꠐꠤꠘ, ꠁꠍꠣꠞ ꠝꠣ ꠝꠞꠤꠅꠝ ꠀꠞ ꠔꠣꠘ ꠜꠣꠁꠀꠁꠘ।
15ꠢꠃ ꠡꠝꠄ ꠄꠇꠖꠤꠘ ꠙꠤꠔꠞꠦ ꠅꠘꠥꠝꠣꠘ ꠄꠇ-ꠡ ꠛꠤꠡꠎꠘ ꠝꠥꠝꠤꠘ ꠅꠇꠟꠞ ꠝꠣꠎꠦ ꠃꠛꠣꠁꠀ ꠇꠁꠟꠣ, 16“ꠜꠣꠁ ꠅꠇꠟ, ꠁꠍꠣꠞꠦ ꠎꠦꠞꠣ ꠗꠞꠣꠔ ꠀꠁꠍꠤꠟ ꠔꠣꠞꠣꠞꠦ ꠙꠕ ꠌꠤꠘꠣꠁꠀ ꠘꠤꠍꠤꠟ ꠁꠢꠥꠖꠣ, ꠔꠣꠞ ꠛꠦꠙꠣꠞꠦ ꠛꠃꠔ ꠀꠉꠦ ꠖꠣꠃꠖ ꠘꠛꠤꠞ ꠝꠥꠈꠅ ꠙꠣꠇ ꠞꠥꠢꠦ ꠎꠦꠔꠣ ꠇꠁꠍꠟꠣ, ꠙꠣꠇ ꠇꠣꠟꠣꠝꠞ ꠁ ꠇꠕꠣ ꠙꠥꠞꠣ ꠅꠀꠞ ꠖꠞꠇꠣꠞ ꠀꠍꠤꠟ। 17ꠢꠦ ꠔ ꠀꠝꠞꠣꠞꠃ ꠄꠇꠎꠘ ꠀꠍꠤꠟ, ꠀꠞ ꠀꠝꠞꠣꠞ ꠟꠉꠦ ꠔꠞꠤꠇꠣꠞ ꠈꠦꠎꠝꠔꠞ ꠟꠣꠉꠤ ꠔꠣꠞꠦꠅ ꠍꠣꠢꠣꠛꠤ ꠢꠤꠡꠣꠛꠦ ꠙꠍꠘ꠆ꠖ ꠇꠞꠣ ꠅꠁꠍꠤꠟ।” 18ꠅꠃ ꠘꠣꠙꠣꠇꠤ ꠇꠣꠝꠞ ꠐꠦꠇꠣ ꠖꠤꠀ ꠢꠦ ꠄꠇꠎꠞꠣ ꠎꠝꠤ ꠟꠁꠍꠤꠟ, ꠀꠞ ꠅꠃ ꠎꠝꠤꠘꠅ ꠃꠚꠁꠔ ꠅꠁꠀ ꠙꠠꠤꠀ ꠔꠣꠞ ꠙꠦꠐ ꠚꠣꠐꠤꠀ ꠀꠔ-ꠜꠠ ꠛꠣꠞ ꠅꠁꠟ। 19ꠎꠦꠞꠥꠎꠣꠟꠦꠝꠞ ꠢꠇꠟ ꠝꠣꠘꠡꠦ ꠁꠔꠣ ꠢꠥꠘꠍꠤꠟ, ꠄꠞꠟꠣꠉꠤ ꠢꠇꠟꠦ ꠅꠃ ꠎꠝꠤꠘꠞꠦ ꠒꠣꠇꠂꠘ ꠀꠇꠦꠟꠖꠣꠝꠣ ꠛꠣ ꠟꠃꠞ ꠎꠝꠤꠘ।
ꠙꠤꠔꠞꠦ ꠀꠞꠅ ꠇꠁꠟꠣ, 20“ꠅꠃ ꠇꠕꠣ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ:
ꠔꠣꠞ ꠛꠡꠔ ꠈꠣꠘꠣ ꠈꠣꠟꠤ ꠞꠃꠇ,
ꠢꠘꠅ ꠞꠅꠀꠞ ꠇꠦꠃ ꠘꠣ ꠕꠣꠇꠃꠇ।
ꠔꠣꠞ ꠉꠖꠤ ꠀꠞꠇ ꠎꠘꠦ ꠙꠣꠃꠇ।
21-22ꠄꠞꠟꠣꠉꠤ ꠄꠢꠤꠀꠄ ꠎꠦꠛꠟꠣ ꠔꠃꠛꠣꠞ ꠉꠥꠍꠟ ꠇꠞꠣꠁꠔꠣ ꠢꠃ ꠡꠝꠄ ꠕꠣꠇꠤ, ꠁꠍꠣꠞꠦ ꠀꠝꠞꠣꠞ ꠉꠦꠍ ꠕꠘꠦ ꠔꠥꠟꠤꠀ ꠘꠦꠅꠀꠞ ꠀꠉ ꠙꠞ꠆ꠎꠘ꠆ꠔ, ꠎꠔꠖꠤꠘ ꠁꠍꠣ ꠀꠝꠞꠣꠞ ꠟꠉꠦ ꠌꠟꠣ-ꠚꠤꠞꠣ ꠇꠞꠍꠤꠟꠣ, ꠅꠔꠖꠤꠘ ꠎꠦꠞꠣ ꠀꠝꠞꠣꠞ ꠖꠟꠅ ꠀꠍꠤꠟ, ꠄꠞꠣꠞ ꠝꠣꠎ ꠕꠘꠦ ꠁꠍꠣ ꠎꠦꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ, ꠄꠞ ꠡꠣꠇ꠆ꠇꠤ ꠢꠤꠡꠣꠛꠦ ꠅꠁꠘ꠆ꠘ ꠀꠞꠇ ꠎꠘꠞꠦ ꠀꠝꠞꠣ ꠍꠣꠢꠣꠛꠤ ꠅꠇꠟꠞ ꠖꠟꠅ ꠢꠣꠞꠣꠘꠤ ꠟꠣꠉꠛ।”
23ꠔꠦꠃ ꠔꠣꠞꠣ ꠅꠃ ꠖꠥꠁꠎꠘꠞꠦ ꠃꠛꠣ ꠇꠞꠣꠁꠟꠣ, ꠁꠃꠍꠥꠚ ꠛꠣꠞ꠆ꠡꠣꠛ꠆ꠛꠣ, ꠔꠣꠘ ꠀꠞꠇ ꠘꠣꠝ ꠁꠃꠍꠔꠥꠍ; ꠀꠞ ꠝꠣꠔꠤꠀꠍ। 24-25ꠛꠣꠖꠦ ꠔꠣꠞꠣ ꠖꠥꠀ ꠇꠞꠟꠣ, “ꠅ ꠝꠣꠛꠥꠖ, ꠔꠥꠝꠤ ꠢꠇꠟꠞ ꠖꠤꠟꠞ ꠈꠛꠞ ꠎꠣꠘ, ꠁꠢꠥꠖꠣꠄ ꠔ ꠔꠣꠞ ꠘꠤꠎꠞ ꠎꠣꠉꠣꠔ ꠎꠣꠅꠀꠞ ꠟꠣꠉꠤ ꠈꠦꠎꠝꠔ ꠀꠞ ꠍꠣꠢꠣꠛꠤ ꠙꠖꠞ ꠇꠣꠝ ꠛꠣꠖ ꠖꠤꠟꠣꠁꠍꠦ, ꠁꠢꠥꠖꠣꠞ ꠛꠖꠟꠣ ꠁ ꠖꠥꠁꠎꠘꠞ ꠝꠣꠎꠦ ꠔꠥꠝꠤ ꠇꠣꠞꠦ ꠙꠍꠘ꠆ꠖ ꠇꠞꠅ ꠀꠝꠞꠣꠞꠦ ꠌꠤꠘꠣꠁꠀ ꠖꠦꠅ।” 26ꠢꠦꠡꠦ ꠔꠣꠞꠣ ꠖꠥꠁꠎꠘꠞ ꠘꠣꠝꠦ ꠟꠐꠣꠞꠤ ꠝꠣꠞꠟꠦ ꠝꠣꠔꠤꠀꠍꠞ ꠘꠣꠝ ꠃꠑꠟ; ꠔꠦꠃ ꠝꠣꠔꠤꠀꠍ ꠅꠃ ꠄꠉꠣꠞꠅ ꠎꠘ ꠍꠣꠢꠣꠛꠤꠞ ꠟꠉꠦ ꠎꠥꠉ ꠅꠁꠟꠣ।
Currently Selected:
ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 1: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
