Titus 1

I. CHAIBIDEAL.

Na daoine dhe ʼn dian e sagairt: gum beil cruaidh achasan ri thoirt do chuid de dhaoine.

1Pol, seirbhiseach Dhe, us ostal Iosa Criosta, a reir creideamh dhaoine taghte le Dia, ʼs aideachadh na firinne, a tha a reir diadhachd:

2Gu dochas na beatha siorruidh, a gheall Dia, nach dian briag, roimh thimean an t-saoghail:

3Ach a shoilleirich ʼna amannan fhein fhacal fhein leis an teagasg, a dhʼ earbadh riumsa a reir fainte Dhe ar Slanair:

4Gu Titus mo mhac gradhach a reir a chreidimh choitchionn, grasan agus sith dhut bho Dhia an t-Athair, ʼs bho Iosa Criosta ar Slanair.

5Air son so dhʼ fhag mi ann an Crete thu, gus thu chur air doigh na tha a dhʼ easbhuidh, ʼs gu sagairt orduchadh anns a h-uile baile, mar a dhʼ orduich mise thusa.

6Ma tha h-aon sa bith gun choire, fear aona mhna, ʼsa chlann creideach, gun raoitearachd a bhith ga cur as a leth, no as-umhlachd:

7Oir is còir gum bi easbuig gun choire, mar stiubhart Dhe: gun a bhith ardanach, gun a bhith air a thoirt do dhʼ fheirg no do dhʼ fhion, no ʼna fhear-bualaidh, gun a bhith sanntach air buannachd shalaich:

8Ach a cleachdadh aoidheachd, caoimhneil, stuama, ceart, naomh, geamnaidh,

9A gabhail ris an fhacal fhirinneach sin, a tha a reir teagaisg, gus e bhith comasach air comhairle a thoirt ann an teagasg fallain, ʼs air comhdach orrasan a tha cur ʼna aghaidh.

10Oir tha iad lionor a tha as-umhailt, ʼnan luchd faoin-chainnte, agus ʼnam mealltairean: gu h-àraidh iadsan, a tha de ʼn timchioll-ghearradh;

11A dhʼ fheumar cur ʼnan tosd; a tha tilgeadh thighean iomlan bun os cionn, a teagasg nichean nach còir air son buannachd mosaiche.

12Thuirt fear dhiu fhein, faidh dhiu: Tha na Cretich an comhnuidh briagach, ʼnan droch bheistean, ʼnam bronnaichean leisg.

13Tha an teisteanas so fior. As leth so cronaich gu giar iad, gus iad a bhith fallain sa chreideamh,

14Gun iad a bhith a toirt feairt air sgialachdan Iudhach, ʼs air faintean dhaoine, a tha gan tionndadh fhein bho ʼn fhirinn.

15Tha h-uile ni glan dhaibh-san a tha glan: ach dhaibh-san, a tha salach us mi-chreideach, cha n-eil nì glan, ach tha an inntinn mar-aon ʼs an cogais truaillidh.

16Tha iad a gabhail orra fhein gur aithne dhaibh Dia, ach ʼnan dianadas tha iad ga aicheadh, le iad a bhith graineil, ʼs mi-chreideach, agus fuathach air a h-uile deagh obair.

Currently Selected:

Titus 1: MacETN

Highlight

Copy