Taian Areru 9
9
(Ana Areru Tawita i bukin te tia kaira te katangitang. E kaineti tangina ma “Maten te Nati te Mm'ane.”)
Anenea Katituaraoan te UEA
1N na katituaraoiko te UEA,
ma nanou ni kabanea
N na tataekini b'aai ni kabane aika kamimii
ake Ko a tia ni karaoi.
2N na anene ma te kim'areirei i bukim.
N na anene ni karaoiroa aram,
Ngkoe ae Ko Moan te M'aaka.
3Ngke a noriko taan ribaai,
ao a kerikaki ma ni b'aka,
ao a mate.
4Ko tekateka i aon am Kaintoka ni motikitaeka,
Ao Ko kakoauaki n am Moti
ae aki nanonano.
5Ko boaiia botannaomata akana aki onimakiniko,
Ko kamateia akana buakaka,
ao a na bon aki manga ururingaki
ni karokoa akea tokina.
6A mauna nako taan riribai
n aki manga noraki mataia.
Ko a tia n urubekei aia kaawa ake a buubura;
ao e na bon akea
manga ururingakiia.
7Te UEA, Ko tautaeka n aki toki,
ao Ko toka i aon am Kaintokanuea,
i bukin te motikitaeka.
8Ko motika taekan te aba n akea te nanonano,
ao Ko karaoa te riai
nakon te botannaomata.
9Bon te tabo ni kamaiu te UEA
i bukiia akana a karawaawataaki,
ao bon te nne ni kamanomano ni bongin te rawaawata.
10A na onimakiniko
akana a ataa aram,
ao Ko aki kitaniia
akana nakoim.
11Kam na anenea karaoiroan te UEA
are maeka i Tion!
Kam na tataekin ana M'akuri
i buakoia botannaomata.
12Ko aki m'aninga
taekan katuaaeaia akana a buakaka
ke ni kakauongo nakon tangiia
akana a kainano.
13Te UEA, Ko na nanoangaai!
Noora b'ainikirinau irouia ake a ribaai.
Kararoaai man te mataroa
are e kaineta te mate,
14b'a I aonga n aneneiko
ni mataroan Tion.
N na kim'areirei
i bukina ngkai Ko kamaiuai.
15A b'aka botannaomata ake a aki onimakiniko
i nanon kinono ake a ken.
A boni manga bae waeia
n aia b'ai ni kam'aam'ane.
16E kaotia te UEA n arona
ae boni kororaoi
ni motikitaeka n te eti,
ao a manga boni m'ane aomata akana buakaka
n oin aia m'akuri.
17A na nako Tiore akana buakaka,
nakon abaia maate
n raoniia akana a rawa
nakon te Atua.
18E na aki m'anuokinaki n taai nako taekan
ane e kai nanona;
ao e na aki mauna n aki toki
ana kaantaninga ane akea ana b'ai.
19Karaoa ane ko taku, te UEA!
Tai kariaia botannaomata b'a a na tokanikai i aon am Babaaire.
Kateia i matam akana aki onimakiniko,
b'a Ko na motiki taekaia.
20Te UEA, Ko na kakamakuia botannaomata;
ao kaotai nanoia b'a a aonga n ataia
ae bon aomata aika a mamaara ngaiia.
Currently Selected:
Taian Areru 9: KNVB
Highlight
Share
Copy
Want to have your highlights saved across all your devices? Sign up or sign in
