Taeka n Rabakau 4
4
Taian Reirei Nakoia Roro n Rikirake
1Natiu, kakaauongo raoi
nakon au reirei
ao reireiniko te iangoraoi.
2A rangi ni boongana au reirei,
ma ngaia ae, ko na aki tannako.
3Ngke I uarereke ngkoa
man rangi n taatangiraki iroun tinau
ao e taku 4tamau nako iu:
“Ngkana ko karaoa are I reireiniko
ma ni kaawakin inanom,
ao ko na maiu.
5Ko na wanawana ma n reireiniko te iangoraoi;
ururing au reirei nako,
ao karaoa ae I tuangko.
6Ngkana ko tangira te wanawana
ao ko na aki kaaki taekana,
e na bon tararuaiko. 7Te kabanea n tamaroa i bukin te Wanawana
bon te Wanawana n ti ngaia;
e rangi n tamaroa riki te iangoraoi
nakon b'aai riki tabeua.
8Ngkana ko m'annanoa te Wanawana
ma n baimatoaia,
ao bon am b'ai te karineaki.
9E na riki b'a kaanga ai aron katokaan
te baunuea ae e mimitong
aika kaue aika a tamaroa.
Te Kawai ae e Eti ao te Kawai ae e Bure
10Natiu, ngkana ko kakauongo
ma n ongotaeka nako au reirei,
ao e na anaanau maium
11I a tia ni kaota te kawai nakoim
ae e na karekea am iango;
I a tia ni kairiko
i nanon te kawai ae e eti.
12E na bon aki tuukaki kawaim,
ao e na bon aki toki waem
ngkana ko biri.
13Baimatoa au reirei
ao ko na aki kanakoi.
E na bon anganiko kakaawakin te maiu aei.
14Ko na aki katotoong maiu aika a buakaka
mairouia aomata aika a iowawa.
15Tannako mairouia ao waakina nako kawaim.
Kararoako mairouia.
16A bon aki mamatu ke ni motirawa
ni karokoa a tia ni karaoa te kaairua ke ni kamarakiia
tabeman aika akea aia bure.
17Kanaia ma nimaia
bon te tiritiri ma te iowawa.
18Katein maiuia aomata aika a raoiroi
kaanga ai aron ootan taai n te kaarangaina
are e tabe n rikirake ootana
ni karokoa e a boni ngaina raoi.
19Katein maiuia aomata aika a buakaka
kaanga ai aron te rotongitong ae e korakora,
ao a na bon aki konaa n ataia
b'a tera ae e toki waeia iai.
20Natiu, kakauongo raoi
nakon te b'ai ae I taekinna.
21Ko na aki m'aninga naba au taeka teuana,
ma kam na iaiangoi ni kabane.
22Ataakin taian reirei aikai
e na bon anganiko te maiu ni koaua
ao te marurung ae e raoiroi.
23Karaua raoi kaawakin am iango
b'a bon anne boton
te maiu ni koaua.
24Ko na aki tataekina te kewe ke n taetae
ni kam'anea temanna n te b'ai ae ko taekinna.
25Kaeta matam n taraa moam,
ao tai rairaira atuum
26Ko riai n ataa te tabo ane ko kainetia
ke ko riai n tiku
n te tano ae e matoa.
27Ko na tai karekeko n te kaairua n rairaki nakon
te atai ke te maing.
Currently Selected:
Taeka n Rabakau 4: KNVB
Highlight
Share
Copy
Want to have your highlights saved across all your devices? Sign up or sign in
