Mareko 8
8
A Kaam'arakeaki Aomata aika Angaa M'aitiia
(Mataio 15.32-39)
1Ni boong akekei, ngke a m'aiti aomata ao akea kanaia, ao Iesu E weteia ana reirei nako Ina, ao E taku, 2“Iai nanoangaia aomata i Rou, b'a ai tenibong aia bong n titiku i rarikiu, ao akea te b'ai ae a na kanna; 3ao ngkana I kanakoia nakoni mwengaia ngkae a mate ni baki, ao a na kiro i aoni kawaia; ao iai i buakoia aika roko man taabo aika raroa.”
4A kaekaa ana reirei ni kangai, “Maiaa i nanon te rereua aei, ae e na kona temanna ni kakaaea iai te am'arake ae tau b'a e na kaam'arakeia aomata aikai iai?”
5Ao E titirakiniia ni kangai, “Iraai te kariki i roumi?”
A taku, “Itiai.”
6E tuangiia aomata b'a a na tekateka i aontano; ao E anai kariki ake itiai, ao ngke E a tia n tataro ni katituaraoi, ao E urui kariki ao E anganiia ana reirei b'a a na kaki i mataia aomata; ao ana reirei a kaki i mataia aomata. 7Iai naba i rouia tabeman te ika; ao ngke E a tia n tataro ni katituaraoi i bukiia, ao E tuangiia ana reirei b'a a na kaki naba i mataia aomata. 8A am'arake, ao a ngae; ao a anai n tabeki nikira n am'arake ao a on iai b'aene aika itiua m'aitiia. 9M'aitiia aomata tao aua tengaa. Ao E kaokiia nako Iesu. 10Ao Ngaia, E waekoa n toka n te booti ma ana reirei ao E nako n aaba ake i Taramanuta.#8.10 B'aib'ara ni kawai tabeua, a korea “M'akatan” ke “M'akatara” ma tiaki Taramanuta.
A Tangira te M'akuri ae Kamimii B'aritaio mairoun Iesu
(Mataio 16.1-4)
11 #
Mataio 12.38; Ruka 11.16 Iai B'aritaio tem'angina ake a roko iroun Iesu ao a moanna ni kauntaeka ma Ngaia. A kani kam'anea, ma ngaia are a tuangnga b'a E na karaoa te m'akuri ae kamimii mai karawa, are na kakoauaki iai b'a iai onimakinana iroun te Atua. 12#Mataio 12.39; Ruka 11.29Ma Iesu, E kaota nanona ae rotaki, ao E taku, “E aera ngkae a ukoukora te m'akuri ae kamimii te roro aei? E koaua ae I tuangngkami, b'a akea te b'ai ni kakoaua ae a na anganaki!”
13E kitaniia, ao ngke E a manga toka i aon te booti, ao E nako n iteran te nama are teuana.
Aia Iti B'aritaio
(Mataio 16.5-12)
14A tia ni m'aninga ana reirei n uoti kariki aika tau, ao ti teuana ae iai i rouia i aon te booti. 15#Ruka 12.1E taku Iesu nako ia, “Kam na tarataraingkami ao kawakiningkami man aia iiti B'aritaio ao ana iti Erote.”
16A maroroo i rouia ao a kangai, “E atonga aei i bukina b'a akea i roura te kariki.”
17Ao Iesu, E ata te b'ai are a taekinna, ma ngaia are E taku nako ia, “E aera ngkai kam karabakauakina taekan te akea ni kariki? A tuai n oota nanomi? Kam roo n nano? 18#Mareko 4.12Iai matami, kam aki noraaba? Ao iai taningami, kam aki ongo? 19Kam aki uringa te tai are I urui iai kariki ake nimaai i bukiia aomata ake nimangaa? Irakora b'aene ake a on n nikira ake kam anai?”
A kaekaa ao a taku, “Tengauni ma uakora.”
20“Ao ngke I urui kariki ake itiai i bukiia aomata ake aua tengaa m'aitiia, ao irakora b'aene ake a on n nikira ake kam anai?”
A taku nako Ina, “Itikora.”
21Ao E taku nako ia, “Ao kam tuai naba n oota?”
E a Noraba te Aomata ae Mataki i Betetaita
22A roko i Betetaita, ao iai aomata ake a kaira temanna ae mataki nakon Iesu, ao a butiia Iesu b'a E na riingnga. 23E taua bain teuare mataki, ao E kairia nako tinanikun te kawa; ngke E tia Iesu ni bawarei matan teuarei, ao E katokai baina i aona, ao E titirakinna ni kangai, “Iai te b'ai ae ko noria?”
24E tara rake teuarei ao e taku, “I noriia aomata, ma kaanga ai aron taraani kaai aika nakonako.”
25E a manga kaki riki baina Iesu i aoni matan teuarei; ao ngaia, e kamatoai kanoani matana b'a e kan taratara, ao e oki ana taratara, ao e nori raoi b'aai nako. 26Ao Iesu E kaoka nako teuarei nakoni mwengana, ao E kangai, “Tai rin n te kawa.”#8.26 Tai rin n te kaawa; B'aib'ara tabeua a korea Tai tuanga temanna n te kaawa.
Ana Kaotioti Betero i bukin Iesu b'a te Kristo Ngaia
(Mataio 16.13-20; Ruka 9.18-21)
27Ao E nako Iesu ma ana reirei nakoni kaawa ake i Kaitareia Biribi. I aoni kawaia, ao E titirakiniia ana reirei ni kangai, “A taku aomata b'a antai Ngai?”
28 #
Mareko 6.14,15; Ruka 9.7,8 A kaeka ao a taku, “A taku b'a Ioane Ngkoe, are te tia B'abetito; ao tem'angina a taku b'a Eria; ao tem'angina, b'a temanna Ngkoe i buakoia burabeti.”
29 #
Ioa 6.68,69 E a manga titirakiniia riki ao E taku, “Ao ngkami, kam taku b'a antai Ngai?”
E kaeka Betero ao e taku, “Bon te Kristo Ngkoe.”
30Ao E tuangiia b'a a na aki tuanga temanna taekana.
E Kaota Taekani B'ainikirinana ma Kamateana Iesu
(Mataio 16.21-28; Ruka 9.22-27)
31Ao Iesu, E moanna n reireiniia ana reirei n ana taeka aika kangai: “E riai b'a E na karawawataaki Natin te Aomata, ao b'a E na ribaki irouia unimm'aane ao irouia ibonga ake a kakannato ma taani koroboki; ao b'a E na kamateaki, ao i mwin tenibong, E na manga uti.” 32E kamatata raoi taekinan aei nako ia. Ao Betero, e kairia ni kaokoroa ao e takuia. 33E rairaki Iesu ao E taraia ana reirei, ao E takua Betero n ana taeka aika kangai: “Naako akuu Tatan! B'a tiaki aron nanon te Atua nanom, ma ai aron nanoia aomata.”
34 #
Mataio 10.38; Ruka 14.27 Ao E weteia aomata aika bati ma ana reirei; ao ngke a roko, ao E taku nako ia, “Ngkana iai ane kan ri mwiu, ao e na kakeaa i bon i rouna; e na uota ana kaibangaki ao e na irirai. 35#Mataio 10.39; Ruka 17.33; Ioa 12.25B'a ane kani kawakina maiuna, ao e na kabua; ma ane e na kabua maiuna i buku ao i bukin te euangkerio, ao e na kawakinna. 36B'a tera te raka ae e na karekea te aomata ngkana e b'aina te aonnaba ae b'anin ma e kabua maiuna mai rouna? 37B'a tera ae e kona n anga te aomata b'a e na manga kaoka maiuna iai? 38B'a ane mamaa i Rou ao n au taeka n te roro ae kakeaa te Atua, ae te roro ae buakaka aei, ao Natin te Aomata E na mamaa naba i rouna ngkana E roko ma mimitongin Tamana, ao raona anera ake a tabu.”
Currently Selected:
Mareko 8: KNVB
Highlight
Share
Copy
Want to have your highlights saved across all your devices? Sign up or sign in
