Mataio 27
27
E Tei Iesu i Matani Birato
(Mareko 15.1; Ruka 23.1-2; Ioa 18.28-32)
1Ngke e a tib'a ingabong, ao ibonga ake mataniwi ma aia unimm'aane aomata a iangoa aron Iesu b'a a na kamatea. 2Ao a kabaea, ao a kairia nako, ao a angani Birato are te tia tau-taeka.
Maten Iuta
(M'akuri 1.18-19)
3 #
M'akuri 1.18,19 Ao Iuta, are kam'anea Iesu, ngke e noria b'a E kabuakakaki Iesu ao b'a E na kamateaki, ao e rotaki n te nanokawaki i bukin te baere e a tia ni karaoia. E uoti m'ane ake tirewa ake tenibwi ao e kaoki nakoia ibonga ake mataniwi ma unimm'aane; 4ao e taku, “I a tia ni bure ngke I kam'anea te aomata ae akea ana bure.”
Ao a taku, “Tera ara b'ai iai? Ai bon am b'ai anne!”
5Ao Iuta e karenako m'aane ake tirewa ake tenibwi nako aontano i nanon te ruu are tabu n te um'antabu, ao e kitana ikekei; ao e nako ni kabaea roroana.
6Ao ibonga ake mataniwi a anai m'ane ake tirewa, ao a taku, “E aki riai i aan te tua b'a a na katukaki m'aane aikai n te um'antabu, i bukina ngkai m'aane aika booni maiun te aomata.” 7Ngke e a reke aia iango iai, ao a kamanena ni kaboa iai aban te tia karao-b'aata,#27.7 tia karao-b'aata; ke tia karao b'aai n am'arake man te bokaboka. b'a nneia iruwa n taunaki. 8Ma are e a atoatongaki te aba arei b'a “te Aba n Raraa” ni karokoa te bong aei. 9E a kakoroaki ngkanne bukin are e a tia n taekinna te burabeti are Ieremia, ngke e kangai,
“Ao a anai m'aane
aika tirewa aika tenibwi,
b'a boon temanna te aomata
i buakoia te botannaomata ae Iteraera.
10Ao a kamanena ni kaboa iai
aban te tia karao-b'aata,
n ai aron ana taeka
te Uea nako iu.”
E Titirakinaki Iesu irouni Birato
(Mareko 15.2-5; Ruka 23.3-5; Ioa 18.33-38)
11E tei Iesu i matan te tia tau-taeka; ao e titirakina Iesu, ni kangai, “Aia Uea I-Iutaia Ngkoe?”
E taku Iesu, “Ngaia ane ko taku!” 12Ma ngke a tabeki aia taeka ni bukibuki ibonga ake mataniwi ma unimm'aane, ao akea ana kaeka Iesu ae anga.
13E taku ngkanne Birato nako Ina, “Ko aki ongo aia taeka aika bati ae a bukiniko iai?”
14Ma akea ana kaeka ae E anga naba teutana; ma ngaia are e rangi ni mimi i Rouna Birato.
E a Motikaki Taekan Iesu b'a E na Kamateaki
(Mareko 15.6-15; Ruka 23.13-25; Ioa 18.39—19.16)
15E tataneiai te tia tau-taeka ni katoa tain te Toa are te Riao ni kainaomata te bure temanna are a tangiria. 16N te tai anne ao iai te bure temanna ae bati n atoatongaki ae arana B'arab'a.#27.16 B'arab'a; B'aib'ara tabeua a korea “Iesu B'arab'a.” 17Ao ngke a botaki aomata aika bati, ao e taku Birato nako ia, “Antai ae kam tangiria b'a N na kainaomata i bukimi, B'arab'a ke Iesu are atongaki b'a te Kristo?” 18B'a e ataia n ae a tia aomata ake a kakannato, ake aia aomata I-Iutaia n anga Iesu nako nanoni baina i bukina b'a a bakantang.
19Ngke e tekateka Birato n ana tabo are e momotiki taeka iai, ao e kanakoa ana rongorongo buuna nako ina, ae kangai, “Akea te bae kam na karaoia nakon te aomata ane raoiroi anne, b'a I miia ngke e tairiki ao I aki rau iai.”
20A kairoroia aomata ibonga ake mataniwi ma unimm'aane b'a a na bubuti B'arab'a, ao a na tua b'a E na kamateaki Iesu. 21E a manga titirakiniia naba aomata te tia tau-taeka, ao e taku, “Antai i rouia uaake uoman aikai ae kam tangiria b'a N na kainaomata i bukimi?”
Ao a kangai, “B'arab'a!”
22E taku Birato nako ia, “Ao tera ngkanne ae N na karaoia nakon Iesu are atongaki b'a Kristo?”
A bane n taku, “E na kamateaki n te kaibangaki!”
23Ao ngaia e taku, “Ao? B'a tera ae buakaka ae E karaoia?”
Ao a kanenei riki b'anaaia n takarua ni kangai, “E na kamateaki n te kaibangaki!”
24Ngke e noria Birato b'a akea riki te bae e kona ni karaoia, ao b'a e a moanna n riki te kiriwe, ao e anaa te ran, ao e teboki iai baina i mataia aomata, ao e taku, “N na aki bukinaki ni maten te aomata aei;#27.24 aomata aei; B'aib'ara tabeua a korea raraan te aomata ae raoiroi aei ke raraa ae raoiroi. kam na bukinaki iai!”
25Ao a bane ni kaeka aomata ni kangai, “E na mena i aora, ao i aoia ara kariki, te bukinaki i bukini matena!”
26E a kainaomataki ngkanne B'arab'a irouni Birato n aron are a tangiria aomata. Ao ngke E a tia ni kataereaki Iesu, ao e anga b'a E na kamateaki n te kaibangaki.
E Kakanikoaki Iesu irouia Taani Buaka
(Mareko 15.16-20; Ioa 19.2-3)
27Ao E kairaki Iesu irouia ana tautia mataniwin te tautaeka nako nanon te Beritoriam, ao a baneakinna tautia ake a mena ikekei. 28Ao a buuti kunnikaina, ao a kaki te ninira ae ura-roo i aona. 29A karaoa te m'ae ni kaai aika kateketeke, ao a katokaa i aon atuna; ao a kaki te kai i baina ae angaataina; a katorobubua ngkanne i matana, ao a kakanikoa ni kangai, “Ko na mauri aia Uea I-Iutaia!” 30Ao a bawareia, ao a anaa te kai ao a orea atuna iai. 31Ao ngke a tia ni kakanikoa, ao a buuta te ninira mai aona, ao a manga karini kunnikaina i aona, ao a kairia nako b'a a na kamatea n te kaibangaki.
E a Tauraki Iesu i aon te Kaibangaki
(Mareko 15.21-32; Ruka 23.26-43; Ioa 19.17-27)
32Ngke a toua kawaia n oti nako, ao a bo ma te I-Kurene temanna, ae arana Timon; ao a kairoroa tautia b'a e na uota te kai are E na tauraki iai Iesu. 33Ao ngke a roko n te tabo ae arana Korokota#27.33 “Korokota” e reke te ara aei man taraan te tabo, b'a e taraa n tei n tab'anou. ae nanona, te “Tabo n Tab'anou”. 34Ao a angan Iesu te wain, ae renganaki ma te b'ai ae mao. Ma ngke E katongnga teutana, ao E aki kan nimma.
35Ao ngke a tia n taura Iesu n te kaibangaki, ao a tib'ai kunnikaina i marenaia n te aro ni kaiwa. 36A tekateka ngkanne ikekei, ao a tantani i rarikina. 37A kaki i etan atuna te koroboki ae taekani bukinana, ae kangai, “Iesu Teuaei Ae Aia Uea I-Iutaia.” 38Ao a tauraki ma Ngaia uoman taani kam'arua, temanna i angaataina ao temanna i angamaingina.
39Ao aomata ake a rikekei a taetae n iowawa nako Ina, ao a kaenaena 40#Mataio 26.61; Ioa 2.19ao a kangai, “Ngkoe are Ko na urua te um'antabu ni manga kateia i nanon tenibong, Ko na kamaiuko! Ngkana Natin te Atua Ngkoe, ao Ko na ruo man te kaibangaki!”
41Ao ai aroia naba ibonga ake mataniwi, ma taani koroboki, ma unimm'aane a kakanikoa Iesu ni kangai, 42“E kamaiuia tem'angina, ma E aki kona te kamaiua. Ngkana aia Uea Iteraera, ao ke E ruo man te kaibangaki ngkai, ao ti na onimakinna. 43E onimakina te Atua; ke E kamaiua te Atua ngkai ngkana E tangiria, b'a E kangai ana taeka, Natin te Atua Ngai.”
44Ao a taetae naba n iowawa nako Ina taani kam'arua ake a tauraki ma Ngaia.
Maten Iesu
(Mareko 15.33-41; Ruka 23.44-49; Ioa 19.28-30)
45Ngke e a tawanou, ao e roo aon te aba ni kabane ni karokoa te aoa tenua n te tanimaeaontaai. 46Ao ngke tao te aoa tenua, ao E takarua Iesu n te b'ana ae korakora, ni kangai, “Eri, Eri, ram'a tab'aketani?”#27.46 Eri… tab'aketani: Aikai taetae n Ebera. ae nanona, “Atuau, Atuau, E aera ngkai Ko kitanai?”
47Ao aomata tabem'aang ake a teitei n ua kaan ma ikekei, ngke a ongo, ao a taku, “E wetea Eria Teuaei!” 48Ao temanna i buakoia e biri ngkekei naba n anaa te tib'anti, ao e katibua n te wain ae kamangingi, ao e kaki i tabon te kai, ao e anganna b'a E na moi iai.
49Ma a taku ake raona, “Tataninga, b'a ti na mataku b'a tao e na nako mai Eria ni kamaiua.”#27.49 kamaiua; i mwin te taeka aei, ao B'aib'ara tabeua a karin riki taeka aikai: Ao temanna e anaa te kainiwai ao e ewara rarikina, ao e waa nako maiai te ran ma te raraa.
50Ao E a manga takarua naba Iesu n te b'ana ae korakora, ao E anga tamneina.#27.50 anga tamneina; te taeka n Erene i bukin te aomata ae mate.
51Ao noria, e raeuaki nakoni m'akoro aika uoua te kunnikai are rokin te ruu are tabu n te um'antabu, mai eta nako nano; ao e m'aeiei aon te aba, ao a tabwenaua taiani b'a; 52a kaukaki nneia maate, ao a m'aiti aomata aika raoiroi ake a tia ni matu#27.52 “matu,” te taeka n Erene i bukin te aomata ae mate. aika manga kamaiuaki. 53A oti nako mani nneia maate i mwini manga-utin Iesu, ao a nako n te kawa are tabu,#27.53 kawa are tabu; bon taekan Ierutarem. ao a kaoti nakoia aomata aika bati.
54Ngke e nora m'aeiein te aba ma baike a riki mataniwin te taanga ni buaka are tebubua kaaina, ao a noria naba raona ake a tantani i rarikin Iesu, ao a taonaki n te maaku ae korakora; ao a taku, “Bon te koaua b'a Natin te Atua Teuaei!”
55 #
Ruka 8.2,3 A m'aiti naba ikekei aine aika mataku mai kiraroa; ao aine akekei a ira Iesu mai Kariraia ni buokia. 56I buakoia aine akekei bon Nei Maria are te I-M'aketara, ma Nei Maria are tinan Iakobo ma Ioteb'a, ao ai te aine are tinaia mm'aane ake natin Tebetaio.
E a Taunaki Iesu
(Mareko 15.42-47; Ruka 23.50-56; Ioa 19.35-42)
57Ngke e a tairiki, ao e roko temanna te aomata ae kaub'ai mai Arimataia; aran teuaei Ioteb'a, ao bon temanna naba ngaia ana reirei Iesu. 58E nako ni Birato, ao e butiia rab'atan Iesu. E tua ngkanne Birato b'a e na anganaki Ioteb'a rab'atan Iesu. 59Ao Ioteb'a e anaa rab'atan Iesu, ao e niria n te kunnikai ae itiaki, 60ao e kawenea n ana nne ni mate ae boou, ae e ekea i nanon te b'a; ao e karabinoa te atibu ae rangi ni buubura ni kaki i matan te nne ni mate, ao e nako.
61A tekateka ikekei Nei Maria are te I-M'aketara ma Nei Maria are temanna, ni kaitaraa te nne ni mate.
Tautia i Rarikin te Ne ni Mate
62N te bong are i mwina, are bongin te Taabati,#27.62 Taabati; Aia Taabati Iutaia are te Kaonobong. ao a botaki ma Birato ibonga ake mataniwi ma B'aritaio, 63#Mataio 16.21; 17.23; 20.19; Mareko 8.31; 9.31; 10.33,34; Ruka 9.22; 18.31-33ao a taku, “Teuae karineaki, ti uringa ana taeka te tia bureburea-te-aba arei, ngke E kangai n ana tai ni maiu: I mwin tenibong, ao N na manga uti. 64Ma ngaia ae ko na tua b'a e na tararuaki raoi te nne ni mate ni karokoa te katenibong, b'a a kawa n roko ana reirei n iraea, ma ni kangai nakoia aomata: E a manga uti mai buakoia maate; ao ane na buakaka riki te aro ni bureburea te aba aei nakon are mai m'aina.”
65E taku Birato nako ia, “Kaira te tautia, ao kam na nako n taraia b'a e teiakinaki raoi rarikin te nne ni mate n aron ae kam kona.”
66Ao a nako, ao a kamatoa te nne ni mate arei, ao a kaki te kanikina i aona ni kaotia iai b'a akea ae na kam'akura te atibu; ao a katikuia tautia ikekei b'a a na tantani i rarikin te nne ni mate.
Currently Selected:
Mataio 27: KNVB
Highlight
Share
Copy
Want to have your highlights saved across all your devices? Sign up or sign in
