Maraki 3
3
Te tia uarongorongo ae e beritaaki
1Bon te UEA Ngai ae Moan te M'aaka,
ae N na kanakoa te tia uarongorongo
are e na katauraoa te kawai i buku.
ao E na karina ni kaoti te UEA
are kam kakaaea
i nanon ana Tembora.
E na roko te tia uarongorongo are kam tangiria
ma au berita,
ao ae i aon kawaina.
Bongin te bitaki
2Ao ngkana e roko te bong aei, e na riki b'a kaanga te ura ae e korakora are e karana te tirewa ke kaanga te toobu ae e korakora i nanon te betin n uaati. Bon akea ae e na konaa n teirake ni kaaitaraa. 3E na kaitiakia ana kariki Rewi,#3.3 Ana kariki Rewi: Ibonga. te UEA kaanga ai aron te tirewa. Ao ane a na uota te angab'ai ae e kaantaningaaki nakon te UEA. 4ao e na kukurei iai aia angab'ai kaain Iuta ma Ierutarem, n aron are a karaoia ngkoa n taai ake ngkoa.
Kam na aki kewea te Atua
5E taku te UEA ae Moan te M'aaka:
I aoni kawaiu ngkai ni motika taekami. N na kabuakakaia ni kabane aika a kakaraoa te tabunea ke ni kewe n tain te mare ke n taekina te kewe i nanon te kabowi ke taani m'akuri aika a kimoaaki booia ke aine aika a mate buuia aika a aki karauaki ao naati aika akea aia karo ke iraean aia b'ai ianena ke aika a rawa ni karineai.
6Kanoan Iakob'a, bon te UEA Ngai ae Moan te M'aaka, ao I aki konaa ni bitaki. Bon anne bukina ngkai kam tuai man uotaki nako, 7e ngae ngke kam a tia n aki ongotaeka nakon Au tua nako man aia tai ami bakatibu. Ma ngkana kam okirai, N na manga oki nakoimi.
Ao kam a manga titiraki ni kaangai, “Ti na kangaa n oki?”
8Kam kimoai Ngai ae Atuami ngkami aika aomata. Ikai are kam titiraki iai nako iu ni kaangai, “Ti kimoaiko n te aro raa?”
Kam kimoaai n te angab'ai ao n te kabwianib'ai are bon Au b'ai.#3.8 te kabwianib'ai are bon Au b'ai: A kaantaningaaki Iteraera b'a a na anga kabwianib'ain aia tai ao aia nanai ni kao ao aia nanai n tiibu nakon te UEA (noora Nakoaia ibonga 27.30-33; Te Tuakaua 14.22-29). 9Ao anne bukina ngkai e maraia ami botannaomata ni kabane. 10Bon te UEA Ngai ae Moan te M'aaka, ae I kaewenakoingkami b'a kam na kataai. Uoti mai ni kabane taiani kabwianib'ai nakon te auti n am'arake, b'a e aonga n reke te am'arake n au auti. Ao i mwiina, N na kauki wintoon karawa ma ni kaonrakeingkami n te kab'aia teuana ma teuana. #3.10 kauki wintoon karawa... kab'aia teuana ma teuana: E na bae n nanonaki iai te karau, b'a e taraa n ae iai te rongo ae e moan te korakora n te tai aei. 11N na katoki taian rookati#3.11 rookati: Te aekaki n taake ae a m'am'ananga ni m'aiti ae e korakora ma ni karika te kangaanga nakon maiun taian aroka. 12Ane a na bane botannaomata n taetaekina arou ngke I kakab'aiaingkami ma abami ae e tamaroa. Bon aei Au taeka Ngai ae te UEA ae Moan te M'aaka!
13Kam a tia taetaekinai n aki akaaka, ao kam a manga kaangai, “Tera te b'ai ae ti taekinna?”
14Aio te b'ai ae kam a tia taekinna, “Bon te waaki n nanobaba te m'akuri iroun te UEA ae Moan te M'aaka. Tera manenan te ongotaeka i rouna ma te nanakonako ni mata ni kananoanga? 15Bon noori kukureia aomata aika a buakaka aikai. A teetekeraoi aomata nako aika a karaoa ae e kaairua, ao bon akea naba te kangaanga ae e riki nakoia ngkana a kataa te Atua.”
A kaniwanganaki aomata aika a kakaonimaki
16Ao ngke a moanna aomata aika a karinea UEA ma nanoia ma ni karinea arana ni maroroakin baikai, ao E koroi araia#3.16 araia: Ke “baika aika a tia ni karaoaki”. b'a a aonga n ururingaki n ana boki te UEA ngke e noora te b'ai are e riki.
17Ao e taku te UEA ae Moan te M'aaka:
Kam rangi ni boongana irou ngkami aika aomata, ao N na bon tei i bukimi ngkana I roko n uota te motikitaeka ae eti, kaanga kaaro ngkana a kaawakiniia natiia aika a ongotaeka. 18Ao ane a na manga noora te kaokoro aomata nako i marenaia aomata aika a ongotaeka irou ni karaoa ae e raoiroi ma aomata aika a katinanikuai ni karaoi b'aai aika a buakaka.
Currently Selected:
Maraki 3: KNVB
Highlight
Share
Copy
Want to have your highlights saved across all your devices? Sign up or sign in
