Karikani B'aai 10

Kanoaia natin Nooa ake mm'aane

(1 Rongo 1.5-23)

1Aikai kanoaia natin Nooa ake mm'aane aika: Tem, Aam, ao Iabeta. A karikiia natiia mm'aane i mwiin te ieka.

2Natin Iabeta mm'aane bon Komera, Makoka, Matai, Iawan, Tubara, Meteka, ao Tirati. Boni ngaiia aia bakatibu aomata ake a ingoanaki araia iai. 3Kanoan Komera bon kaain taabo aika Atikenati, Rib'ata, ao Tokarema. 4Kanoan Iawan bon kaain taabo ake Eritia, Taretiti, Kubero, ao Roriti; 5Bon ngaiia aia bakatibu aomata ake a maeka i mataniwiin taari, ao i aon taian abam'akoro. Ao aikai kanoan Iabeta, ake a maeka n aia baronga, ao abaia aika kakaokoro. A bon kakaokoro aia taetae n aia m'akoro nako.

6Natin Aam mm'aane---Kuti, Aikubita, Ribia, ao Kanaan---boni ngaiia aia bakatibu botannaomata akana bon kaotaki araia iai. 7Ana kariki Kuti boni ngaiia akana kaain taabo aika Teba, Awira, Tabeta, Raama, ao Tabeteka. Kanoan Raama boni ngaiia kaain taabo aika Tieb'a, ao Tetan. 8Iai natin Kuti te mm'aane ae arana Nimrota, are boni ngaia te moan tia buaka ae korakora n te aonnaba. 9Ao n ana buobuoki te UEA, ao e bon riki ngaia b'a te tia kaeman ae bane arona, ao bon anne bukina are a kakaangai iai aomata, “Ke E karikiko te UEA b'a kaanga ai aron te tia kaeman ae bane arona are Nimrota.” 10A reke ngkoa i nanon abana B'aburon, Ereka, ao Akata, a bane ni mena ni katenua i nanon B'aburon. 11Ao e nako man te aba anne nako Aturia, ao e katei kaawa aika buubura aika Ninewe, Reobota-Ira, Kara, 12ao Reten, are e mena i marenan Ninewe ma te kaawa ae buubura are Kara.

13Ana kariki Aikubita boni ngaiia kaain taabo aika Rurim, Anam, Reaba, Nebutu, 14Bateru, Katiru, Kirete, are boni ngaiia ake a riki mai iai kaaini Biritia. 15Natin Kanaan mm'aane bon Titon are te karimoa, ao Eta are boni ngaiia aia bakatibu aomata akana a bon ingoani araia. 16Bon aia bakatibu naba kaain Iebuti, kaain Amora, kaain Kirekata, 17kaain Iwa, kaain Areka, kaain Tini, 18kaain Arewata, kaain Temara, ao kaain Amata. A uamaae nako barongan Kanaan aika kakaokoro, 19ni karokoa e roko tian Kanaan i Titon are nakoiang nako Kera i rarikin Kaata, ao ni waerake naba nako Tootom, Komora, Atema, ao Teboiim i rarikin Ratia. 20Ao aikai kanoan Am, ake a maeka ni baronga, ao aaba aika kakaokoro, ao a boni kakaokoro aia taetae n aia m'akoro nako.

21Karimoan Iabeta are Tem boni ngaia aia bakatibu kaain Ebera. 22Natin Tem mm'aane---Eram, Atura, Arebaketiata, Ruuta, ao Aram---boni ngaiia aia bakatibu aomata akana a boni kaotaki araia iai. 23A nako mani kanoan Aram Kaain aaba aika Uti, Ura, Ketera, ao Mati. 24Taman Teera bon Arebaketiata, are taman naba Ebera. 25Iai natin Ebera uoman mm'aane: aran temanna bon Bereka, i bukina ngke a tib'auaaki aomatan te aonnaba n ana tai ni maiu; ao aran are temanna bon Ioketan. 26Ana kariki Ioketan boni ngaiia kaain taabo aika Aremotata, Tereba, Ataremaweta, Iera, 27Atoram, Utara, Rikera, 28Obara, Abimaera, Tieba, 29Obira, Awira, ao Iobaba. A bane n nako man kanoan Ioketan. 30A maeka n te aba are e moa mai Metia ni karokoa Teba n aaba ake a tabukibuki ake i mainiku. 31Ao aikai kanoan Tem ake a maeka ni baronga, ao aaba aika kakaokoro, a kakaokoro aia taetae n aia m'akoro nako.

32Bon kanoan Nooa aomata aikai ni kabane n aron kateirikiaia n aia botannaomata n te roro teuana ma teuana. I mwiin te ieka, ao a bane n riki botannaomatan te aonnaba mairoun natin Nooa mm'aane.

Currently Selected:

Karikani B'aai 10: KNVB

Highlight

Copy