2.I-Korinto 2

1Ma e a tia i nanou b'a a na akea riki rokou i roumi ae e na karika te rawawata n nano. 2B'a ngkana I karawawataingkami, ao antai ae na kakukureiai ma ti te aomata are I a tia ni karawawataa? 3Ao I korea au reta aei, b'a e kawa n reke i rou te rawawata mairouia te koraki akana a na kakukureiai ngkana I nakowati; ao I aki nanokokoraki i roumi ni kabane b'a kakatongau boni kakatongami ni kabane. 4B'a I koroboki nako imi ma nanou ae e taonaki n te rawawata ma te korakai ae bati, ma rannimatau aika bati; tiaki b'a kam aonga ni karawawataki iai, ma kam aonga n ataia b'a e bati tangirami i rou.

Kab'aran ana Bure te Tia Iowawa

5Ma ngkana iai ane karika te rawawata, ao e aki karaoia nako iu, ma e karaoia nako imi; tao tiaki nako imi ni kabaneingkami, ma nakoia tabem'aang i buakomi, ao I atonga aei b'a I aki kani karawawata au taeka n ekianako. 6E bon tau te rekenikai anne i bukin teuanne mairouia m'aitin ami koraki; 7ma ngaia ae kam bon riai ni kab'ara ana bure ma ni karaua nanona, b'a e kawa teuanne ni b'ara nanona n rawawatana ae bati. 8Ma ngaia ae I butingkami b'a kam na kaotia nako ina b'a bon iai tangirana i roumi. 9B'a bon aei bukin are I koroboki iai ngkoa, b'a I aonga n atai baika kam na kakoauaki iai b'a kam ongeaba ni b'aai ni kabane. 10Ma ane kam kab'ara ana bure, ao Ngai I kab'ara naba; b'a ane I a tia ni kab'ara, ngkana tao iai, ao I boni kab'ara i bukimi i matani Kristo, 11b'a e aonga n aki reke ana tai Tatan ni m'aaka i aora; b'a ti atai aron ana iango nako.

Raraomani B'auro ao Karauan Nanona

12 # M'akuri 20.1 Ma ngke I roko i Teroa i bukin tataekinan euangkerioni Kristo, ao E a tia ni kauka te kawai nako iu te UEA i bukin au m'akuri ikekei; 13ma e aki rau tamneiu ngke e aki reke i rou Tito are tariu. Ma ngaia are I kabo ma ngaiia ao I nako M'aketonia.

14Ma e na katituaraoaki te Atua, are Ngaia ae aki toki ni kairira irouni Kristo n te m'aati n tokanikai; ao E kabonganaira ngaira aika taani kabuta ataakini Kristo nakon taabo nako b'a kanga ai aron te boi ae boiarara. 15I bukini Kristo ao ti a riki nakon te Atua b'a te boi ae boiarara, ae e kiakia nako boina i buakoia aika nang kamaiuaki,#2.15 nang kamaiuaki; e a nanonaki riki iai aomata aika i aoni kawaia nakon te maiu are akea tokina. ao i buakoia naba aika nangi mate;#2.15 nangi mate; e a nanonaki riki iai aomata aika i aoni kawaia nakon te mate are akea tokina. 16bon te boi ae kamamate ae tiritiri nakoia aika nangi mate, ao te boi ae kamaiu ae uota te maiu nakoia aika nang kamaiuaki. Ao ai antai ae tau i bukini baikai? 17B'a tiaki aroia aomata aika bati ngaira, ake a b'aini bob'aia ana taeka te Atua b'a a aonga ni kaub'ai iai; ma ti kanakoaki iroun te Atua, ao ti taetae i matana ma te nano ae itiaki i bukini Kristo.

Currently Selected:

2.I-Korinto 2: KNVB

Highlight

Copy