Maarko 12

Dticcianniook cĩg manu

(Tigiil Maatteeo 21:33-46; ꞌLuuka 20:9-19)

1Baa iꞌthianaanĩ Yeesu aduhaak makayyiook cĩg ꞌJudeei thõõth ꞌcĩ awantoothĩk anneek, “Baa aaĩ ẽẽtĩ umwaa ꞌcĩ atiboolan hẽẽn cĩg viinoaak,#12:1 Hẽẽt cĩ viinoo: Baa tiir hẽẽt cĩ viinoo hĩ eet cĩg Ĩꞌthĩraẽlĩ gẽrrẽẽt, hĩnĩngĩtĩ bura cĩgĩnnĩg ꞌcĩg ẽmmẽdĩ, baa gõõng attur eeta cĩg ꞌJudeei bura hammacũyyiaaĩ mẽrtĩ. Nẽ baa ĩthakꞌtheek Nyekuci eet cĩg Ĩꞌthĩraẽlĩ hẽẽt cĩ viino ꞌcĩ baa atiboolan nẽẽnĩ, nẽẽthĩ hinnia, baa hõllõngaa õddõngta bura ũdũt. Ĩnõõ baa agaõõꞌthĩ ꞌlimmanniooha cĩg nyattaalak hĩ paadĩrꞌnya ꞌcĩg obbitig ngaatĩ õthõõthĩ Yeesu ĩhõõggõ. Tigiil ꞌBuuk cĩ Tegellwaanu 80:8-16; Iꞌthaia 5:1-7; ꞌJeremia 2:21. nẽ ũlũk araan hirriaman nẽ ada ꞌlook ꞌcĩ ammaccĩ viino#12:1 ꞌLook ꞌcĩ ammacciini viino: Adayyi ꞌlook ciee hilonganaa cĩ mana cĩ viinoo, ngaatĩ aarĩhõõthĩkĩ viino cĩ ibbiira nẽ ammacũyyiaaĩ mẽrta cĩ viinoo. nẽ ẽttẽẽd lobelĩ ꞌcĩ behiitto. Nĩngĩtĩ ũũnnĩkĩ mana cĩnnĩ ho kattiook nẽ ũũk hẽẽrõna. 2Ma baa õdõlanit waathinniooha cĩg janiittak, ikia ĩꞌthooĩk nẽẽ dticciannioohit hũũk hĩ bekiook, hátĩ haanytĩk baattĩ manu viino cĩnnĩ. 3Baa õõ hinnia aggam bekiooha tĩko dticciannioohit thõng nẽ uukito gẽrrẽẽt nẽ alahatteek hõbõdõõthĩ athĩnĩ ꞌtẽl. 4Ma ho, ĩꞌthõ baattĩ manu dticciannioohit umwa tarĩ, aalla hinnia õõ uuk niccia buúk nẽ ohoddia õõ lokor, õdõõm ĩnõõnnõ nẽ ĩdĩmanit ꞌbuth ngaaoniitta. 5Baa aalla ĩꞌthõ baattĩ manu dticciannioohit umwa tarĩ noho, õõ hinnia aruk ĩnõõnnõ hadaak. Nẽ aalla aku ĩꞌthõ baattĩ manu dticcianniook ũgĩ ꞌgõõlaa nĩĩcĩ dioo noho, õõ hinnia uuk ũgĩ nẽ uruhit ũgĩ thõng.

6“Baa nga aꞌnyak baattĩ manu ngeerĩnĩ hõdẽẽthõng ꞌcĩ ammĩnan nẽẽ gẽrrẽẽt. Ma baa urutaa cĩ thooꞌthiok iccig vẽlẽk, ikia aattĩ ĩꞌthõ nẽẽ ngeerĩnĩ dẽẽdẽ. Baa ammuk hinnia nẽẽ aĩ, ‘Õõ hatĩ iꞌngolli nẽẽg loholeec caannĩ.’

7“Au hinnia õthõõth bekiooha niccieeg aĩ, ‘Loholeec aattĩ cĩnnĩ dẽẽdẽ niccieeni, hiita huruhit ĩnõõnnõ, hátĩ hirigithit mana cĩnĩĩng ko hĩĩ cĩnaac.’ 8Ma nĩngaata, iita aggamit nẽẽg ngeertĩ baattĩ manu nẽ uruhit ĩnõõnnõ nẽ udhukteek ẽlẽ cĩnnĩ ho tẽrẽtẽraa cĩ mana cĩ viinoo.”

9Ma nĩngaata, ikia ijin Yeesu makayyiook cĩg ꞌJudeei ho ĩĩnnĩk, “Adĩman occa hatĩ baattĩ manu bekiook cĩg manu ho hutuno? Aku hatĩ aruk nẽẽ bekiook niccig vẽlẽk nẽ aaꞌnyĩk mana nicci eet ꞌcĩg ꞌrĩĩng hebehit mana cĩnnĩ ho. 10Ma ho, ĩĩnnĩk Yeesu ĩhõõggõ, nga nooyyia itigiilit niig thõõth baa eheeddi ꞌBuuhaa cĩ Nyekuci aĩ,

“ ‘Bẽẽ baa abũrĩ teheꞌnyiooha,

ikia ĩĩ bẽẽ ꞌcĩ ĩllõõan gẽrrẽẽt ꞌgoonoginni vẽlẽk?

11Baa Makayyioohit ꞌcĩ adĩman thõõth icci ho,

nĩngĩtĩ athithanĩ eeta aĩnnĩ, ẽllẽẽm ngaatĩ hacĩnĩ bẽẽ icci.’ ”#Tigiil ꞌBuuk cĩ Tegellwaanu 118:22-23

12Ma nĩngaata, iita idiimito makayyiooha cĩg ꞌJudeei ꞌgõõl ꞌcĩ aggamĩ Yeesu, hĩnĩngĩtĩ baa aga nẽẽg ngaatĩ awantẽẽkĩ nẽẽ ĩhõõggõ thõõth. Nẽẽthĩ, baa hinnia iꞌngolli nẽẽg lothippit cĩ eetu, nĩngĩtĩ ũũnnĩkĩ ĩnõõnnõ nẽ ammanyattĩ õõta.

Jinẽẽnĩt cĩ dũman cĩ occoro

(Tigiil Maatteeo 22:15-22; ꞌLuuka 20:20-26)

13Ma baa uruta, iita ĩꞌthõõcõ makayyiooha Variꞌtheei ũgĩ hĩ eet ũgĩ ꞌcĩg ĩĩn lothippit cĩ habu Ẽrõõdẽ hõõt hotogollieek Yeesu, thooꞌthiohĩĩ ꞌcĩg õthõõth nẽẽnĩ. 14Ma ho, ummuddieek nẽẽg Yeesu nẽ ijinit ĩĩttĩk, “ꞌLimmannioohit, hagayyĩa naag aduha nii thõõth ꞌcĩ ĩĩn dĩdĩ nẽ hõllõngaa itieelli thooꞌthiok ꞌcĩg ammuk eeta. Nẽ tarĩ hõllõngaa aallahi makaaꞌthĩt cĩ eetu, nẽẽthĩ, allimani eet thõõth cĩ Nyekuci ꞌcĩ ĩĩn dĩdĩ. Duhaaheet da, abathĩ occa nyattaalaa cĩnaang ngaatĩ hadũmaneeka habu cobbi cĩ ꞌRooma#12:14 Habu cobbi cĩ ꞌRooma: Baa aggam habuui cobbi cĩ ꞌRooma habuẽẽt cĩg loonyin mẽẽlĩg nẽ aggam eet cĩg ꞌJudeei ꞌcĩg aattĩg ꞌJudeea hĩ ꞌcĩg aattĩg ꞌGalileea buúk. Eetinii cĩg ꞌRooma, avvĩ eeta habu cobbi anneek ꞌCẽẽthẽrẽ. occoro, hode abũnnaa ngaatĩ hadũmaneeka? 15Hũdũmatta occoro hode hiittiõõ hõllõngaa hadũmanna?”

Nẽẽthĩ, baa aga Yeesu ngaatĩ aꞌnyahĩ nẽẽg muhẽẽnĩt ꞌcĩ abathĩ nẽ ẽdẽc ĩhõõggõ ĩĩnnĩk, “Inni idiimit niig otogollieehaangu nganĩĩt ko? Aꞌnyakta da ꞌdinaar hõdẽẽthõng hĩcĩn naana.” 16Ma ho, aꞌnyaktaak nẽẽg Yeesu ꞌrabbaacit ꞌcĩ hũtũrĩ, nĩngĩtĩ ajini Yeesu ĩhõõggõ annẽẽkĩ, “ꞌCĩ nganĩ ꞌthooura ciee hĩ ꞌthaar iccig?”

Ẽdẽcĩ nẽẽg aĩ, “ꞌThoura hĩ ꞌthaar cĩg habu cobbi cĩ ꞌRooma.”

17Nĩngĩtĩ aduhaakĩ Yeesu ĩhõõggõ annẽẽkĩ, “Aanytĩk habu cobbi cĩ ꞌRooma ꞌgii cĩnnĩ nẽ aanytĩhu Nyekuc ꞌgii cĩ Nyekuci.” Ma nĩngaata, iita idhirriaangtĩ nẽẽg gẽrrẽẽt, hĩnĩngĩtĩ thõõth cĩ Yeesu ho.

Thõõth ꞌcĩ harũgnaanĩ daahĩtha

(Tigiil Maatteeo 22:23-33; ꞌLuuka 20:27-40)

18Baa õõ ajin Thadutheei#12:18 Thadutheei: Ĩĩn Thadutheei eet cĩg ꞌJudeei ꞌcĩg aꞌthũũnnĩ nyattal cĩ Mũũꞌtha diooni nẽ hõllõngaa aꞌnyak lemiinit ꞌcĩ aĩ arũgna hatĩ eeta ꞌcĩg adaahito daahĩtha. Baa hõllõngaa ẽlẽmĩ nẽẽg loriẽẽt hĩ aajĩlẽẽt. Tigiil ꞌBuuk cĩ Dtiicanĩ cĩg ꞌThooyyiahu 23:8. ũgẽẽgĩ ꞌcĩg ẽppẽhan aĩ hõllõngaa arũgna eeta daahĩtha Yeesu anneek, 19“ꞌLimmannioohit, baa eheedĩkeet ngagĩĩt Mũũꞌtha nyattal icci aĩ, má adaahĩ ẽẽtĩ ũũnnĩk ngaa hiꞌthihi lõhõlĩ, aku ꞌgotonnia nẽ õlõm ngaatĩbõyyĩ nicci, hátĩ hittiraak lõhõlĩ ꞌcĩg hatĩ ĩĩn cĩg ꞌgõtõnĩ ꞌcĩ adaak ko.#Tigiil ꞌBuuk cĩ Ditoronomi 25:5-6 20Nẽ baa aattĩg eeta tũkĩramma ꞌcĩg ĩĩn ꞌgõtõn, ma ho, ikia ũꞌthũwanõõ ꞌgotonnia cobbiẽẽnĩ nẽ adaak hiꞌthihi lõhõlĩ. 21Ma nĩngaata, ikia õlõm ꞌgotonnia ꞌcĩ anũẽẽkĩ ngaatĩbõyyĩ tĩho, aku hinnia adaahĩ nẽẽ buúk nga haꞌnyak lõhõlĩ. Aku anũẽẽkĩ ꞌgotonnia ꞌcĩ ĩĩn iyyio buúk ꞌgõõl nicci dioo noho. 22Ma ho, adaahito ꞌgõtõnĩ ꞌcĩg ĩĩn tũkĩramma ho vẽlẽk hiꞌthihi lõhõlĩ. Ma dtuurnattaa cĩnnĩ, ikia adaak ngaa nicciee buúk. 23Nẽẽthĩ, ma occa hatĩ kõr ꞌcĩ arũgnaanĩ eeta vẽlẽk ꞌcĩg adaahito, ĩĩn occa hatĩ ngaa nicciee ꞌcĩ nganĩ? Hĩnĩngĩtĩ baa olomit ꞌgõtõnĩ ꞌcĩg ĩĩn tũkĩramma ho vẽlẽk ĩnõõnnõ.”

24Baa hinnia ẽdẽcĩ Yeesu Thadutheei tĩko anneek, “Ẽꞌthẽcannu niig, hĩnĩngĩtĩ hõllõngaa agayyu thõõth ꞌcĩ eheeddi ꞌBuuhaa cĩ Nyekuci nẽ tarĩ hõllõngaa agayyu ꞌtirrian cĩ Nyekuci. 25Ma ũrũgũtha Nyekuci eet ꞌcĩg adaahito, iittiõõ hatĩ nẽẽg hõllõngaa au aꞌthũwanni tarĩ, iita hatĩ aauto nẽẽg hĩ aajĩlẽẽta cĩg hẽẽtkujjieen. 26Agayyu niig thõõth ꞌcĩ arũgthaanĩ Nyekuci eet daahĩtha nẽ agayyu dtẽẽllẽn cĩg Mũũꞌtha hĩ thõõth baa atũũthẽnĩ tumuth nẽ ĩĩnnĩk Nyekuci ĩnõõnnõ, ‘Hĩĩnĩ naa Nyekuc cĩ Abũrahamĩ#12:26 Abũrahaamõ: Baa avvĩ Nyekuci ĩnõõnnõ hũtũngeek eet cĩg halang cĩnnĩ hĩ looc cĩnnĩ nẽ ũnũõõthĩ Nyekuc ĩĩcĩ looc ꞌcĩ ĩĩn ngeju. Baa ikia ĩĩ Abũrahamĩ maaꞌnyĩ eet cĩg ꞌJudeei. Baa arũgĩ nẽẽ irkiꞌnyia 1,800 baa nga hittirria Yeesu. Tigiil thõõth cĩnnĩ ꞌBuuhaa cĩ ꞌThianaattõ 17-26. hĩ cĩ Iꞌthaako#12:26 Iꞌthaako: Baa ĩĩn ciee ngeertĩ Abũrahamĩ ꞌcĩ baa aduhaak Nyekuci Abũrahaamõ. Tigiil thõõth cĩnnĩ ꞌBuuhaa cĩ ꞌThianaattõ 17-35. nẽ hĩĩna Nyekuc cĩ Yakobo.#12:26 Yakobo: Baa ĩĩn nẽẽ ngeertĩ loholeec cĩ Abũrahamĩ ꞌcĩ baa aꞌnyak lõhõlĩ ꞌcĩg maacĩg õmmõtõ hĩ ꞌramma. Baa ẽgẽẽran Nyekuci ꞌthaar cĩgĩnnĩg nẽ akateek ꞌthaar ꞌcĩg kaĩ Ĩꞌthĩraẽl. Haĩ lõhõlĩ cĩg lõhõlĩ cĩgĩnnĩg lõhõlĩ cĩg Ĩꞌthĩraẽlĩ nẽ korrioohĩĩ baag Yeesu, baa avvĩ eeta ĩhõõggõ anneek eeta cĩg ꞌJudeei.’#Tigiil ꞌBuuk cĩ Luugithõõ 3:6 27Ĩĩn nẽẽ Nyekuc cĩ eet ꞌcĩg arũgĩ, hõllõngaa cĩ daakiahu. Nẽ aitiõõ niig hõllõngaa athiknu thõõth icci jurrung!”

Tilooinit ꞌcĩ tiiri gẽrrẽẽt

(Tigiil Maatteeo 22:34-40; ꞌLuuka 10:25-28)

28Baa õthõõthõõ Yeesu hĩ Thadutheei, baa aaĩ ꞌlimmannioohiti cĩ nyattal cĩ Mũũꞌtha buúk nĩngaata. Baa acĩn nẽẽ ngaatĩ ẽdẽcĩ Yeesu thõõth cĩnĩĩng ko jurrung. Nĩngĩtĩ ẽẽjẽhõõthĩkĩ nẽẽ Yeesu nẽ ijin ĩĩnnĩk, “Tilooinit iina dẽẽdẽ ꞌcĩ tiiri ꞌgoonoginni vẽlẽk?”

29Baa ẽdẽcĩ Yeesu ĩnõõnnõ anneek, “Tilooinit ꞌcĩ tiiri ꞌgoonoginni vẽlẽk cieeni, ‘Ĩthĩktõ niig eeta cĩg Ĩꞌthĩraẽlĩ! Ĩĩn Makayyioohiti cĩnaac Nyekuc hõdẽẽthõng diooni. 30Mĩnnan Makayyioohit Nyekuc cunni ꞌthĩnĩtaa cunni vẽlẽk, hĩ loriiaa cunni vẽlẽk, hĩ muhẽẽttaa cunni hĩ ꞌtirriaanaa cunni vẽlẽk.’#Tigiil ꞌBuuk cĩ Ditoronomi 6:4-5 31Nẽ tilooinit ꞌcĩ ĩĩn ꞌramma cieeni, ‘Mĩnnan eet ꞌcĩ aaronnu haau hĩcĩ ammĩnani ẽlẽ cunni.’#Tigiil ꞌBuuk cĩ Levitiko 19:18; ꞌLuuka 10:27-37 Aitiõõ tilooiniti umwaa ꞌcĩ ĩllõõan tilooinit icci ĩĩn ꞌramma ho tõõ.”

32Ma ho, uduhaak ꞌlimmannioohiti cĩ nyattaalõ Yeesu ĩĩnnĩk, “Ẽbẽaneehu ꞌlimmannioohit! Ĩĩn thõõth ꞌcĩ aduha nii ho, thõõth dĩdĩ ꞌcĩ aĩnnĩ, ĩĩn Makayyioohiti Nyekuci hõdẽẽthõng diooni nẽ aitiõõ umwaa tarĩ tõõ. 33Haga naa aaddi ngaatĩ hammĩnanĩĩ Nyekuc ꞌthĩnĩtaa caannĩ vẽlẽk hĩ muhẽẽttaa caannĩ vẽlẽk hĩ ꞌtirriaanaa caannĩ vẽlẽk, hĩ ngaatĩ hammĩnanĩĩ eet ꞌcĩ haaronna haau hĩcĩ hammĩnani ẽlẽ caannĩ. Ĩĩn cieeg thooꞌthiok ꞌcĩg õkõmĩ gẽrrẽẽt ĩllõõan ngaatĩ occa hĩbbõõrĩ ꞌgaarriẽẽn ꞌcĩg mẽẽlĩg ꞌcĩg adiim nyattalĩ.”

34Ma baa athĩhĩ Yeesu ĩnõõnnõ ngaatĩ õthõõthĩ ꞌgẽẽnyĩtha ho, ĩĩnnĩk ĩnõõnnõ, “Obohoonnu niig hĩ habuccieet cĩ Nyekuci. Ma baa urutaa cĩ, iittiõõ eet umwaa ꞌcĩ nga ajin Yeesu thõõth umwa tarĩ tõõ.”

Ĩĩn Krĩstõ Ngeertĩ nganĩ?

(Tigiil Maatteeo 22:41-46; ꞌLuuka 20:41-44)

35Ma baa nga alliman Yeesu eet halangatõõ cĩ ꞌCieeth cĩ Nyekuci, ikia ijino nẽẽ ĩĩ, “Inni gõõng hĩĩtõ ꞌlimmanniooha cĩg nyattal cĩ Mũũꞌtha, ‘Ĩĩn Krĩstõ Ngeertĩ Daavide ho?’#12:35 Nẽ tarĩ, ikia ĩĩ nẽẽ ngeertĩ Daavide hutuno: Ĩĩn Yeesu ngeertĩ Daavide hĩnĩngĩtĩ baa arrittiaa nẽẽ ĩĩn eet ꞌcĩ holli õõ nẽ baa maaꞌnyĩ maacõnĩ ꞌcĩ baa haĩ Daavide. Baa nga hittirria nẽẽ hĩĩ eet ꞌcĩ holli õõ, baa arũmĩ nẽẽ hĩ Nyekuc hẽẽtahujjieen nẽ ĩĩ Ngeertĩ Nyekuci. Baa ẽhẽnyta nẽẽ hẽlẽggĩ vẽlẽk, nẽẽthĩ hoti ho, ikia ĩĩ nẽẽ Makayyioohit cĩ Daavide. Tigiil ꞌBuuk cĩ Yõaannẽ 1:1-18. 36Baa aduhaak Lorii ꞌcĩ Ẽllẽẽmĩth Daavide thõõth anneek,

“ ‘Aduhaak Makayyioohiti Makayyioohit caannĩ#12:36 Makayyioohit caannĩ: Avvĩ Makayyioohiti Nyekuci Yeesu anneek, Makayyioohit caannĩ. anneek,

“ꞌCioloongan ngaati attiaa caannĩ cobbi

ĩꞌthõng huruk mĩrõk cugunnig.” ’#Tigiil ꞌBuuk cĩ Tegellwaanu 110:1

37Má nõõ aũ Daavide dẽẽdẽ ĩnõõnnõ anneek, ‘Makayyioohit,’ nẽ occa hatĩ ĩĩn Krĩstõ Ngeertĩ Daavide hutuno?”

Nẽ tarĩ baa accamana eeta ꞌcĩg mẽẽlĩg ĩnõõnnõ nẽ ĩthĩhĩt thõõth cĩnnĩ ho taliitta.

Uuk Yeesu Variꞌtheei hĩ ꞌlimmanniook cĩg nyattaalak

(Tigiil Maatteeo 23:1-36; ꞌLuuka 20:45-47)

38Baa alliman Yeesu eet anneek, “Ĩcĩnĩt ꞌlimmanniook cĩg nyattal cĩ Mũũꞌtha ho jurrung. Ẽmmẽddaanĩ nẽẽg ngaatĩ ahimti ceremwa cĩg uuttik nẽ idiimito hĩꞌthaacõ eeta ĩhõõggõ tẽẽlꞌthĩta ꞌcuuhatõõ. 39Nẽ tarĩ etemeddiaaĩ ngaatĩ adiim iccioloonganĩ dtaabĩtĩĩ ꞌcĩg oou ꞌCieethini cĩg Laiittak, hĩ ngaatĩ aattiyyi dtaabĩtĩĩ ꞌcĩg obbitig ngaatĩ karrameetu. 40Ĩĩn nẽẽg eet ꞌcĩg arratana ngaatĩbõyyĩꞌnya ijjio olooyyiohĩĩ cĩggĩĩng nẽ etereꞌthia eleeti cĩggĩĩng ngaatĩ aꞌnyahĩ laiinit ꞌcĩ uuni. Nẽẽthĩ, uuk hatĩ Nyekuci eet ꞌcĩg aattĩg noho gẽrrẽẽt!”

ꞌBaaninit cĩ ngaatĩbõyyĩ

(Tigiil ꞌLuuka 21:1-4)

41Ma baa aau Yeesu loota ngaatĩ aarĩkĩ eeta ꞌbaaninit cĩnĩĩng, ikia ẽbẽk nẽẽ eet ngaatĩ adhuhẽẽkĩ ꞌrabbẽẽt cĩggĩĩng cadduhaa cĩ ꞌrabbẽẽt cĩg ꞌCieeth cĩ Nyekuci. Baa adhuheek balliooha ꞌrabbẽẽt ꞌcĩg mẽẽlĩg gẽrrẽẽt. 42Nẽ baa aaĩ ngaa umwaa buúk ꞌcĩ ĩĩn ngaatĩbõyyĩ ꞌcĩ baa aku adhuheek ꞌrabbẽẽt ꞌcĩg kũtũrĩg ꞌcĩg kidicig ꞌramma.

43Ma ho, ikia ũtũvvũ Yeesu nuyyiook cĩgĩnnĩg nẽ ĩĩnnĩk, “Haduhaakuung naa ngagiit dĩdĩ, aarĩk ngaatĩbõyyĩ ciee nucẽẽt ꞌcĩg mẽẽlĩg ꞌcĩg ĩllõõan cĩg eet vẽlẽk. 44Hĩnĩngĩtĩ aarĩk balliooha ꞌrabbẽẽt ꞌcĩg ẽꞌngẽra ꞌrabbẽẽtĩĩ cĩggĩĩng. Nẽẽthĩ, ngaatĩbõyyĩ cieeni, ẽdẽca nẽẽ nucẽẽt vẽlẽk ꞌcĩg occa arũgnĩ nẽẽnĩ.”

Currently Selected:

Maarko 12: did

Highlight

Copy