Maatteeo 26

Adiim aruk eeta Yeesu

(Tigiil Maarko 14:1-2; ꞌLuuka 22:1-2; Yõaannẽ 11:45-53)

1Ma baa ẽdẽcaak Yeesu ngaatĩ aduhaanĩ thooꞌthiok iccig vẽlẽk, ikia uduhaak nẽẽ nuyyiook cĩgĩnnĩg ĩĩnnĩk, 2“Hĩcĩ agayyu niig buúk, idiongattaa waathinniooha ꞌramma thõng nẽ hatĩ ĩĩ Kõr cĩ Haangittõõ,#26:2 Kõr cĩ Haangittõõ: Ĩĩn ciee kõr ꞌcĩ ammuhaanĩ eeta cĩg ꞌJudeei kõr baa urwacanĩ nẽẽg hõdẽĩ hõdẽĩ, ngadihẽẽt cĩg hattũũgetu biyyiẽẽtĩĩ cĩg mĩꞌnyoonnu. Ĩnõõ baa aku ahaangĩ Makayyioohiti olooyyiok cĩggĩĩng looccaa cĩ Ijjibi baarkit nẽ tarĩ ummukta kõr baa aduhi nẽẽg ũbũnẽẽt ꞌcĩg aitiõõ abũũlana tõõ. Tigiil ꞌBuuk cĩ Luugithõõ 12:17-28. aaꞌnyĩhoothĩk hatĩ Ngeertĩ Eeto eet ꞌcĩg õõ odooddĩk ĩnõõnnõ hurucceea.”

3Ma ho, iita ulutti makayyiooha cĩg paadĩrꞌnyaannu hĩ makayyiook cĩg eetuk ꞌcieethaa cĩ Kaĩava, eet ꞌcĩ baa ĩĩn paadĩr cobbi.#26:3 Paadĩr cobbi: Maka paadĩrĩ cobbi ĩllõõan paadĩrꞌnya vẽlẽk, hĩnĩngĩtĩ paadĩr cobbi dioo ꞌcĩ aduhun Nĩngĩtĩ ꞌcĩ Aꞌngirannii ꞌcĩ Ẽllẽẽmĩth Gẽrrẽẽt ꞌCieethaa cĩ Nyekuci tabattĩ hõdẽẽthõng irkita. Baa aayyi Nyekuci Nĩngĩtĩ icci Aꞌngirannii ho bulẽẽtta, ĩnõõ ꞌcĩ adukni paadĩrĩ cobbi Nĩngĩtĩ icci nẽ ũũk urwacan biyyiẽẽtĩ hátĩ hatamaatĩk Nyekuci eet, hĩnĩngĩtĩ ꞌthẽccanẽẽt cĩggĩĩng ko. Tigiil ꞌBuuk cĩ Levitiko 16; Ebereei 9. 4Baa õngõmĩt nẽẽg ꞌgõõl cĩ occa õgõllõõthĩkĩ nẽẽg Yeesu burkiitina, hátĩ haggamit nẽ uruhit ĩnõõnnõ. 5Nẽẽthĩ aĩ nẽẽg, “Occa hõllõngaa hadticanna thõõth icci, kõrraa cĩ karramaaõ, hátĩ hiittiõõ hõllõngaa ĩkõõtha lothippiti thõõth ꞌcĩ abathĩ.”

Uudi Yeesu ꞌtaaũnaa cĩ Bẽthani

(Tigiil Maarko 14:3-9; Yõaannẽ 12:1-8)

6Ma baa nga aaĩ Yeesu ꞌtaaũnaa cĩ Bẽthani, õlõõ cĩ eet umwa ꞌcĩ baa adak helleggeri hũnũũk ꞌcĩ haĩ ꞌThimõõnẽ, 7ikia ngaa umwaa ꞌcĩ baa aꞌnyaha ngõõrrõ umwa deera, ꞌcĩ õꞌngõlĩ ẽmmẽdĩ gẽrrẽẽt ꞌcĩ uuttiaa ꞌrabbẽẽtĩĩ ꞌcĩg mẽẽlĩg nẽ ikia udduutik õõaa cĩ Yeesu, baa nga aduhi nẽẽ tẽrẽmẽẽjawa.

8Ma baa acĩn nuyyiooha cĩgĩnnĩg thõõth icci ho, iita ĩlĩĩllẽẽcõ nẽ ĩĩtõ, “Inni occa hudduutĩk ngaa ciee ngõõrrõ tuu ho? 9Occa baa ũũtĩ ngõõrra ciee ꞌrabbẽẽtĩĩ ꞌcĩg mẽẽlĩg gẽrrẽẽt nẽ aanytĩhoothĩk ꞌrabbẽẽta eet ꞌcĩg ĩĩn pĩĩrnattiaak.”

10Baa aga Yeesu muhẽẽnĩt cĩnĩĩng ko nẽ uduhaak ĩhõõggõ ĩĩnnĩk, “Inni accananit ngaa icci ho? Adĩmaneeka nẽẽ nganĩĩt ꞌgii ꞌcĩ abũnnaa gẽrrẽẽt. 11Arũmeennu hatĩ gõõng niig hĩ hullaha hõdõõkõthĩ, nẽẽthĩ, hõllõngaa hatĩ harũmĩ naag hĩ ngagiit hõdõõkõthĩ. 12Adduutik nẽẽ ngõõrrõ icci ẽllaa caannĩ, hátĩ hũkũmaneeha nganĩĩt hadaĩ ꞌloohatõõ. 13Haduhaakuung dĩdĩ, loonyini vẽlẽk ĩcĩg hatĩ othoothini nyeemuut ciee abũnnaa ho, adukiaa hatĩ thõõth ciee, hátĩ humuhuttõõthĩ eeta thõõth ꞌcĩ adĩman nẽẽ ho.”

Õhõppõõcan ꞌJuuda Yeesu

(Tigiil Maarko 14:10-11; ꞌLuuka 22:3-6)

14Nĩngĩtĩ aku õkõõĩ nuyyioohiti umwaa ꞌcĩ haĩ ꞌJuuda Ithkarioote, ꞌgoonoginnii ꞌcĩg ĩĩn õmmõtõ hĩ ꞌramma, ammũdõõthĩkĩ makayyiook cĩg paadĩrꞌnyaannu, 15nẽ ijin ĩhõõggõ ĩĩnnĩk, “Ne hatĩ ꞌcĩ occa aaꞌnyaangu niig nganĩĩt, hátĩ heteretheehuung naa eet tĩho?” Nĩngĩtĩ agiilakĩ nẽẽg ĩnõõnnõ ꞌrabbẽẽt ꞌcĩg hũtũrĩg ꞌcĩg ĩĩn maccĩrẽẽn hẽẽn iyyio. 16Ma baa nĩngaata, ikia iꞌthianaaĩ ꞌJuuda atarraaban ꞌgõõl ꞌcĩ occa ẽtẽrꞌthẽẽkĩ ĩhõõggõ Yeesu.

ꞌGẽẽn cĩ ꞌjiaatinu ꞌcĩ udtuura

(Tigiil Maarko 14:12-21; ꞌLuuka 22:7-13; Yõaannẽ 13:21-30)

17Ma baa kõr ꞌcĩ oou cĩ Karrama cĩ Ũbũnẽẽt ꞌcĩg aitiõõ Abũũlana tõõ,#26:17 Karrama cĩ Ũbũnẽẽt ꞌcĩg aitiõõ Abũũlana tõõ: Baa adak eeta cĩg ꞌJudeei Karrama cĩ Ũbũnẽẽt ꞌcĩg aitiõõ Abũũlana tõõ, hummuktaaĩ kõr baa õõganĩ Nyekuci hĩbaangĩ cĩggĩĩng baag ĩĩn appahacaaꞌnya Ijjiba. Baa aꞌnyak karrama ciee waathinniook tũkĩramma. Waathinnioohĩĩ ꞌcĩg ĩĩn tũrkĩramma ho, aꞌngirannii hĩ eet cĩg ꞌJudeei ngaatĩ aduhi ũbũnẽẽt ꞌcĩg aarĩhoothĩk abũũlana. Tigiil ꞌBuuk cĩ Luugithõõ 13:1-10. iita ijinit nuyyiooha Yeesu ĩĩttĩk, “Adiimmeet nii ngagĩĩt hoottia hũkũmatteeha nĩngĩtĩ õkõ adahĩ ꞌgẽẽn cĩ Kõr cĩ Haangittõõ ngaana?”

18Ẽdẽcĩ Yeesu ĩhõõggõ anneek, “Õõt ꞌtaaũna, ummuddioothĩk eet umwa, uduktaak ĩnõõnnõ ĩĩttĩk, ‘Aĩ ꞌlimmannioohiti, õbõhĩ kõrra caannẽẽnĩ. Hõkõ hadahi naa Kõr cĩ Haangittõõ hĩ nuyyiook cĩgannĩg õlõõ cunni.’ ” 19Nĩngĩtĩ adticanĩ nuyyiooha cĩg Yeesu hĩ baa aduhaak nẽẽ ĩhõõggõ hũkũmatteek Kõr cĩ Haangittõõ.

20Ma baa õdõlan ꞌjiaatĩnĩ niccia, iita aauto Yeesu hĩ nuyyiook cĩgĩnnĩg ꞌcĩg ĩĩn õmmõtõ hĩ ꞌramma tẽrẽmẽẽjawa. 21Ma baa nga aduhi nẽẽgĩ, ikia õthõõth Yeesu ĩĩ, “Haduhaakuung dĩdĩ, aaĩ eet umwaa hõrggẽẽnaa cunuung ꞌcĩ hatĩ õhõppõõcannaa nganĩĩta.”

22Baa ommoꞌthi nẽẽg gẽrrẽẽt nẽ iꞌthiattaaĩ nẽẽg hõdẽĩ hõdẽĩ ĩĩttĩk ĩnõõnnõ, “Nganĩĩt occa Makayyioohit?”

23Ẽdẽcĩ Yeesu aĩ, “Õhõppõõcannaa hatĩ nganĩĩt ẽẽtĩ ꞌcĩ hatĩ haduheenna hĩ nganĩĩt hẽddẽẽma hõdẽẽthõng. 24Adaahĩ hatĩ Ngeertĩ Eeto hĩ baa aduha ꞌBuuhi cĩ Nyekuci. Nẽẽthĩ, appĩĩrna hatĩ ẽẽtĩ ꞌcĩ õhõppõõcan Ngeertĩ Eeto ho gẽrrẽẽt! Occa baa mẽẽn hĩ ĩnõõnnõ ngaatĩ hõllõngaa arrittiaanĩ.”

25Nĩngĩtĩ ẽdẽcĩ ꞌJuuda ꞌcĩ hatĩ õkõ õhõppõõcan ĩnõõnnõ ho aĩnnĩ, “Nganĩĩt occa ꞌlimmannioohit?”

Ẽdẽcĩ Yeesu aĩ, “Eei nganiit ꞌthẽk!”

ꞌGẽẽn cĩ ꞌjiaatinu cĩ Makayyiookto

(Tigiil Maarko 14:22-26; ꞌLuuka 22:14-23; 1 Korinthia 11:23-25)

26Ma baa nga aduhi nẽẽgĩ, ittiha Yeesu ũbũnĩ, aggatana nẽ appak hĩĩ ꞌramma, nĩngĩtĩ aaꞌnyĩkĩ nuyyiook cĩgĩnnĩg nẽ ĩĩ, “Erito uduhit ẽlẽ caannĩ cieeni.”

27Nẽ ittiha hooppo nẽ aggatana, nĩngĩtĩ aaꞌnyĩkĩ ĩhõõggõ nẽ ĩĩ, “Erito ũhũdĩt niig vẽlẽk. 28Biyyi cĩgannĩg cieegi ꞌcĩg ĩĩn lõhõt#26:28 Biyyi cĩg lõhõt: Baa aaꞌnyĩk Nyekuci eet cĩg Ĩꞌthĩraẽlĩ hibboorito ꞌgaarriẽẽn cĩg olĩꞌnyaannu hĩ cĩg ẽẽthak, hátĩ hũtũũnyĩtõ ĩhõõggõ ꞌthẽccanẽẽtĩĩ cĩggĩĩng. Ẽtẽrꞌtha ꞌgaarriẽẽna cieeg daahĩth ꞌcĩ hatĩ õkõ adaaknĩ Yeesu Krĩstõ hurucceea hĩ Mĩꞌnyõõn cĩ Nyekuci. Ũũny hatĩ Yeesu ꞌgaarrieettaa cĩnnĩ ĩcĩ ĩĩn hõdẽẽthõng, ꞌthẽccanẽẽt cĩg eet vẽlẽk ꞌcĩg ẽlẽmĩ ĩnõõnnõ. Tigiil ꞌBuuk cĩ Luugithõõ 24:8; Levitiko 16:11-19; Maatteeo 14:24; Ebereei 9:15-22. cĩ Nyekuci hĩ eet cĩgĩnnĩg. Ẽrrẽnnaa, hĩnĩngĩtĩ eet ꞌcĩg mẽẽlĩg, hátĩ hũtũngtoothĩk ꞌthẽccanẽẽta. 29Haduhaakuung dĩdĩ, hõllõngaa hatĩ hahudi naa mẽrtĩ icci viinoo ho tarĩ, ĩꞌthõng hõdõlan kõrra ꞌcĩ hatĩ hahũdĩ hĩ ngagiit mẽrtĩ cĩ viinoo ꞌcĩ ĩĩn ngeju, habuccieetaa cĩ Baaba.”

30Ma baa ebenit nẽẽg tẽgẽl umwa, iita õõt nẽẽg ĩĩcĩ Muur cĩ Olivi.

Uduha Yeesu pẽkan cĩ Pẽẽtũrũ

(Tigiil Maarko 14:27-31; ꞌLuuka 22:31-34; Yõaannẽ 13:36-38)

31Nẽ uduhaak Yeesu ĩhõõggõ ĩĩnnĩk, “Baalin nicci noho, ĩꞌthaaninnu hatĩ niig vẽlẽk ũtũngteehaangu nganĩĩt ẽmmẽn, hĩnĩngĩtĩ eheeddi aĩ,

“ ‘Huuki hatĩ naa tũhayyioohit,

hĩꞌthaanĩ nyalõmaar cĩ aꞌthaannu.’#Tigiil ꞌBuuk cĩ ꞌThakaria 13:7

32Nẽẽthĩ, ma urutaa ꞌcĩ hũrũgaaĩ daahĩtha, huwwatteekuung hatĩ naa ngagiit ĩĩcĩ ꞌGalileea.” 33Ẽdẽcĩ Pẽẽtũrũ aĩ, “Tananga hĩꞌthaattĩ eeta vẽlẽk hũtũngteehi ẽmmẽn, hõllõngaa hatĩ huunnikii naa ũdũt.”

34Ẽdẽcĩ Yeesu aĩ, “Haduhaaki dĩdĩ, baalin nicci noho, õõa ꞌcĩ nga hõrõhĩ tũhũlũca, ẽppẽhannaa hatĩ nii nganĩĩt tabattĩ iyyio.”

35Ẽdẽcĩ Pẽẽtũrũ aĩ, “Aitiõõ, tananga hadaahit hõdẽĩ, hõllõngaa hatĩ hẽppẽhannii naa nganiit ũdũt.” Nĩngĩtĩ õthõõthĩ nuyyiooha vẽlẽk buúk noho.

Alaõ Yeesu manaa cĩ ꞌJethemani

(Tigiil Maarko 14:32-42; ꞌLuuka 22:39-46)

36Ma nĩngaata, õõt Yeesu hĩ nuyyiook cĩgĩnnĩg ngaatĩ haĩ ꞌJethemani nẽ ĩĩnnĩk ĩhõõggõ, “Aaut loota ngaati, nga nõõ hõkõ halayyi naa ĩĩca.” 37Baa õõkõr nẽẽ hĩ Pẽẽtũrũ hĩ lõhõlẽẽtĩg ꞌThebedeeo ꞌramma, ꞌJeemith hĩ Yõaannẽ, nĩngĩtĩ iꞌthianaanĩ nẽẽ ahayũnganiini nẽ õmmõthĩ gẽrrẽẽt. 38Nẽ ĩĩnnĩk Yeesu ĩhõõggõ, “Hommoꞌthi naa gẽrrẽẽt haau hĩcĩ hatĩ hadaaha thõng. Haaut ꞌjieena hĩ nganĩĩt hõdẽĩ.”

39Ma baa ẽẽjẽk Yeesu ngadiiha hĩdĩhĩdĩĩc, ũũk akat huruꞌnyia nẽ akatĩ hẽbẽrĩ looc nẽ alaõ ĩĩ, “Baaba, má adiimi niina, aꞌnyĩĩk hooppo icci hittihi hĩ nganĩĩt battaala. Nẽ hõllõngaa hĩcĩ hadiimi naana, aꞌnyĩĩk haau hĩcĩ adiimi niina.”

40Ma baa õbõda nẽẽ ĩĩcĩ aattiyyi nuyyiooha cĩgĩnnẽẽgĩ, ũmmũdoothĩk atagguutho ohoddia ũꞌnyaaha. Nĩngĩtĩ annẽẽkĩ nẽẽ Pẽẽtũrũ, “Hõllõngaa uuluyyu niig ngaatĩ hacĩnẽẽnĩ hĩ nganĩĩt ꞌthaa hõdẽĩ haaga buúk? 41Ĩcĩttĩ nẽ alayyioou, hátĩ hiittiõõ hõllõngaa attĩmaniinnu. Abũraneek lorii nẽ ahar ꞌcĩ ĩĩn ẽlẽ.”

42Nĩngĩtĩ ĩꞌngaannĩ nẽ tarĩ õkõõĩ ngadiiha nẽ ũũk alaõ ĩĩ, “Baaba, má aitiõõ ꞌgõõl umwaa ꞌcĩ attihi hooppo icci ꞌcannaanõ ho battaala hĩ nganĩĩta, aalla nga hatĩ hadĩmani naa tabiinit cunni noho.”

43Ma baa ikia õbõda Yeesu tarĩ, ũmmũdeek ĩhõõggõ atagguutho tarĩ, hĩnĩngĩtĩ baa adũngĩ ĩhõõggõ hẽbẽrĩ gẽrrẽẽt. 44Nĩngĩtĩ ũũnnĩkĩ nẽẽ ĩhõõggõ nẽ ũũk ngadiiha tarĩ nẽ alaõ laiinit ꞌcĩ ĩĩn iyyio ꞌgõõla hõdẽẽthõng hĩ aa aangaani.

45Ma ho, ikia õbõda Yeesu ũmmũdeek nuyyiook cĩgĩnnĩg ko tarĩ nẽ ĩĩnnĩk ĩhõõggõ, “Nga ooginnu noho? Ĩcĩnĩt nõõ, õbõhĩ ꞌthaa ꞌcĩ hatĩ õhõppõõcanõõthĩkĩ Ngeertĩ Eeto eet ꞌcĩg ĩĩn ꞌthẽccanniook. 46Ĩtĩngaac hõõtõ! Ikia ẽẽtĩ ꞌcĩ hatĩ õhõppõõcannaa nganĩĩt ko ẽlẽk!”

Aggamĩ Yeesu

(Tigiil Maarko 14:43-50; ꞌLuuka 22:47-53; Yõaannẽ 18:3-12)

47Ma baa nga õthõõth Yeesu hoti, uppwaanna ꞌJuuda baa ĩĩn ꞌthooyyiahit ꞌgoonoginnii ꞌcĩg baag ĩĩn õmmõtõ hĩ ꞌramma, õõkõra hĩ lothippit cĩ eet ꞌcĩg aꞌnyak nyetubooꞌnya hĩ hĩbahĩꞌnya, ꞌcĩg baag ĩꞌthõõa makayyiooha cĩg paadĩrꞌnyaannu hĩ makayyiook cĩg eetuk. 48Baa uduhaak ꞌJuuda lothippit nicci ĩĩcĩ oou ẽlẽk ĩĩnnĩk, “Aggamit eet ꞌcĩ hatĩ hõkõ hĩꞌtha naana.” 49Nĩngĩtĩ aku athũkcõõthĩkĩ ꞌJuuda Yeesu cũrũmũũm nẽ ũũk ĩĩnnĩk, “Hiꞌthaayyiina ꞌlimmannioohit!” Nĩngĩtĩ ĩꞌthaaĩ ĩnõõnnõ.

50Ẽdẽcĩ Yeesu ĩnõõnnõ anneek, “Ẽlẽ, dticcian nẽẽ nii ꞌgii ꞌcĩ hatĩ ꞌthẽk akuuni ho.”

Nĩngĩtĩ au aggamĩ eeta Yeesu nẽ ababuuthanit ĩnõõnnõ. 51Ma ho, ittiha nuyyioohiti cĩ Yeesu umwaa nyetuboot nẽ aꞌthalacana ĩtat cĩ dticciannioohit cĩ paadĩr cobbi.

52Ẽdẽcĩ Yeesu ĩnõõnnõ anneek, “Bõdẽẽhĩ nyetuboot ngaatĩnnĩ, hĩnĩngĩtĩ eeta cĩg acuhan eet nyetuboota, adaahĩ hatĩ acuhanni nyetuboota. 53Hõllõngaa agayyu niig aĩ, occa hajini naa Baaba nẽ occa ĩꞌthõõakaa nẽẽ nganĩĩt lothippiꞌnya õmmõtõ hĩ ꞌramma cĩg aajĩleetu hĩdĩĩkoothong? 54Nẽ occa hatĩ adticanni thooꞌthioha cĩg ꞌBuuk cĩ Nyekuci hutuno, ꞌcĩ aĩ adiim ꞌthẽk adticanni hoti?”

55Ma baa kõr niccia, ikia uduhaak Yeesu lothippit ĩĩnnĩk, “Inni iita aggamtaangu nyetubooꞌnyanĩ hĩ hĩbahĩꞌnyannĩ hĩ eet ꞌcĩ hĩĩnĩ ꞌloorriahit ko? Hallimannuung naa ngagiit hõdõõkõthĩ hĩ gõõng haaĩ loota halaangatõõ cĩ ꞌCieeth cĩ Nyekuci nẽ gõõng hõllõngaa aggammaangu inni? 56Nẽẽthĩ, baa adĩmanni thooꞌthioha cieeg vẽlẽk, hátĩ hikia thõõth baa ẽhẽẽd põrõvẽtaaꞌnya hĩĩ dĩdĩ.” Ma ho, iita ivvirit nuyyiooha vẽlẽk ũtũngteek Yeesu.

Aau Yeesu muumaa cĩ lothippit cĩ makayyioohu

(Tigiil Maarko 14:53-65; ꞌLuuka 22:54-55, 63-71; Yõaannẽ 18:13-14, 19-24)

57Ma nĩngaata, iita ootti eeta Yeesu, ꞌcieethaa cĩ paadĩr cobbi ꞌcĩ haĩ Kaĩava, ngaatĩ arũmẽẽnĩ ꞌlimmanniooha cĩg nyattaalak hĩ ngaatĩ õmmõtõõnĩ makayyiooha. 58Nẽẽthĩ, baa anũ Pẽẽtũrũ ĩnõõnnõ ngadiiha hĩdĩhĩdĩĩc, ĩꞌthõng hõdõlan ꞌcieeth ꞌcĩ aayyi paadĩrĩ cobbi ho. Baa aduhun nẽẽ nẽ ũũk aau loota ũrũmtĩ hĩ bekioohit, aĩ hatĩ hĩcĩn õõ occa hatĩ adahĩ eeta Yeesu neegi.

59Baa adiim makayyiooha cĩg paadĩrꞌnyaannu hĩ eet cĩg lokihooak vẽlẽk, ammũda ꞌgõõl ꞌcĩ õhõppõõcanĩ Yeesu, hátĩ huruhit ĩnõõnnõ hadaak. 60Baa hinnia hõllõngaa ammũda nẽẽg ꞌgõõl umwa ũdũt, tananga baa mẽẽlĩg eeta gẽrrẽẽt ꞌcĩg au aduha thooꞌthiok ꞌcĩg õhõppõõcanĩ ĩnõõnnõ.

Ma urutaa cĩnnĩ, iita ẽdẽẽnyta eeta ꞌramma, 61ꞌcĩg au aduha cũrũmũũm aĩ, “Aĩ ẽẽtĩ ciee, ‘Occa hĩꞌthaani ꞌCieeth cĩ Nyekuci nẽ hẽtẽhẽnya waathinnioohĩĩ ꞌcĩg ĩĩn iyyio.’ ”

62Nĩngĩtĩ ĩꞌngaannĩ paadĩrĩ cobbi ꞌjieena nẽ ĩĩnnĩk Yeesu, “Aitiõõ nii hõllõngaa edeci thõõth ꞌcĩ aduha eeta cieeg ko? Aini ꞌyioko nii neegi, thõõthaa ꞌcĩ õhõppõõcanni nẽẽg nganiit ko?” 63Baa aalla Yeesu ĩjjaaki kim.

Nĩngĩtĩ annẽẽkĩ paadĩrĩ cobbi ho ĩnõõnnõ, “Hajinnii naa nganiit ꞌthaarĩĩ cĩg Makayyioohit Nyekuc ꞌcĩ aalla arũgĩ ũdũt hanneekii, duhaaheet da hatĩ ĩĩnĩ nii Krĩstõ Ngeertĩ Nyekuci dĩdĩ.”

64Ẽdẽcĩ Yeesu aĩ, “Eei, aaĩ hĩcĩ aduha nii ho. Nẽẽthĩ, haduhaakuung ngagiit vẽlẽk, horumwa acinnu hatĩ niig Ngeertĩ Eeto iccioloongan attiaa cobbi ĩcĩ Nyekuc Gayyioohit vẽlẽk nẽ ulluuccia diiꞌthiohĩ hẽẽtahujjieen.”#Tigiil ꞌBuuk cĩ Danieele 7:13

65Nĩngĩtĩ ẽrrẽẽcĩ paadĩrĩ cobbi ceremwa cĩgĩnnĩg nẽ ĩĩ, “Õdõõm ẽẽtĩ ciee Nyekuc! Iittiõõ hõllõngaa occa hadiim eet umwa tarĩ! Ithiktu ꞌyioko niig buúk ngaatĩ õdõõmĩ nẽẽ Nyekuc. 66Ammuku ꞌyioko niig ainnu neegi?”

Ẽdẽcĩ nẽẽg aĩ, “Ẽꞌthẽcan nẽẽ gẽrrẽẽt, aꞌnyĩĩk hadaak.”

67Nĩngĩtĩ attũũrĩkĩ nẽẽg Yeesu ammũt nẽ ĩddaacõ ĩnõõnnõ athĩnĩĩ cĩggĩĩng, atabaang ũgẽẽgĩ ĩnõõnnõ thõng, 68nẽ ĩĩttĩk, “Duha da Krĩstõ, nganĩ ꞌcĩ atabaaꞌngi ho?”

Ẽppẽhan Pẽẽtũrũ Yeesu

(Tigiil Maarko 14:66-72; ꞌLuuka 22:56-62; Yõaannẽ 18:15-18, 25-27)

69Ma baa nga aaĩ Pẽẽtũrũ loota halaangatõõ, ikia ũmmũdeek bũhẽẽcĩ ꞌcĩ ĩĩn dticciannioohit ĩnõõnnõ nẽ ĩĩnnĩk, “Baa ookorru niig hĩ Yeesu cĩ ꞌGalileea hõdẽĩ.”

70Ẽppẽhan hinnia nẽẽ muumaa cĩ eet vẽlẽk aĩ, “Hõllõngaa haga naa thõõth ꞌcĩ othoothi nii ho.”

71Ma baa uruta, ikia ũũk nẽẽ ĩĩcĩ hattũũg cobbi, ngaatĩ baa õkõ acĩnĩ loholeec umwaa ꞌcĩ ngayyi ĩnõõnnõ nẽ ĩĩnnĩk eet nĩngaata, “Baa õõkõr ẽẽtĩ ciee hĩ Yeesu cĩ Naaꞌtharẽtĩ hõdẽĩ.”

72Ma nĩngaata, ikia ẽppẽhan Pẽẽtũrũ Yeesu tarĩ, abũtan aattĩ ꞌthaa icci thõng aĩ, “Hõllõngaa haga naa eet tĩho!”

73Ma uruta hĩdĩhĩdĩĩc, iita eeta ꞌcĩg baag abĩlĩ nĩngaata hĩ Pẽẽtũrũ nẽ ĩĩttĩk, “Nganiit umwaanĩ, hagayyi naag nganiit, hĩnĩngĩtĩ õkõdan ũtũgĩ hĩ ẽẽtĩ ꞌcĩ aku ꞌGalileea.”

74Nĩngĩtĩ aĩnnĩ Pẽẽtũrũ, “Bũtĩ hĩ Nyekuci, hõllõngaa haga naa eet tĩho!”

Ma hĩdĩĩkoothong, õrõk tũhũlũca. 75Ma ho, ikia ummuhõõthĩ Pẽẽtũrũ thõõth baa aduhaak Yeesu ĩnõõnnõ annẽẽkĩ, “Õõa ꞌcĩ nga hõrõhĩ tũhũlũca, ẽppẽhannaa hatĩ nii nganĩĩt tabattĩ iyyio.” Nĩngĩtĩ ũũnnĩkĩ Pẽẽtũrũ nĩngĩtĩho nẽ ũũk utulu gẽrrẽẽt ũdũt.

Currently Selected:

Maatteeo 26: did

Highlight

Copy