Maatteeo 19

Thooꞌthiok ꞌcĩg õõgĩ eeta ngaaĩ

(Tigiil Maarko 10:1-12)

1Ma baa ẽdẽcaak Yeesu ngaatĩ allimanĩ eeta, ikia ũtũngeek nẽẽ ꞌGalileea nẽ ũũk ĩĩcĩ looc cĩ ꞌJudeea, baakĩtaa cĩ hidioo cĩ ꞌJõrdanĩ. 2Baa anũ lothippiti ꞌcĩ maka ĩnõõnnõ, nĩngĩtĩ aaꞌnyĩkĩ eet cĩggĩĩng ꞌcĩg õmmõõrĩ hũbũttaathõ.

3Ma ho, ĩttĩmanit Variꞌtheei ũgẽẽgĩ ĩnõõnnõ ĩĩttĩk, “Ẽlẽmĩ nyattalĩ cĩ Mũũꞌtha ngaatĩ õõgĩ ẽẽtĩ ngaa cĩnnĩ, hatĩ aꞌnyak thõõth ꞌcĩ abathĩ?”

4Ẽdẽcĩ Yeesu anneek, “Nga nooyyia itigiilit niig aĩ, baa iꞌthianaanĩ Nyekuci ẽhẽnyta looc, ‘Baa ẽhẽnyta nẽẽ eet ꞌcĩ maacĩ hĩ ngaa ꞌcĩ ngayyi’?#Tigiil ꞌBuuk cĩ ꞌThianaattõ 1:27 5Nẽ tarĩ ĩĩ, ‘Hĩnĩngĩtĩ thõõth icci, ũũnnĩk hatĩ ẽẽtĩ maaꞌnyĩ hĩ aattĩnnĩ nẽ õõt ũrũmtĩ hĩ ngaa cĩnnĩ nẽ iita ĩĩtõ eeta ꞌcĩg ĩĩn ꞌramma ho ẽlẽ hõdẽẽthõng.’#Tigiil ꞌBuuk cĩ ꞌThianaattõ 2:24 6Nẽẽthĩ hoti ho, iittiõõ nẽẽg hõllõngaa ĩĩn ꞌramma, ĩĩtõ nẽẽg hõdẽẽthõng. Nẽẽthĩ, eeta ꞌcĩg ũrũm Nyekuci hõdẽĩ, anneek eet umwa ma heꞌngeri.”

7Ẽdẽcĩ Variꞌtheei Yeesu anneek, “Inni thĩ baa Mũũꞌtha huduha hĩĩ, ‘Aꞌnyĩĩk eet ꞌcĩ maacĩ hẽtẽhẽẽd waraga ꞌcĩ õõgĩ ngaa cĩnnĩ ho’?”

8Ẽdẽcĩ Yeesu ĩhõõggõ anneek, “Baa ẽlẽmaakuung Mũũꞌtha ngagiit oogit ngaaĩ cugguung, hĩnĩngĩtĩ okommuung ngagiit ooti. Nẽẽthĩ, baa gõõng hõllõngaa aaĩ noho baa hũnũũk. 9Nẽ haduhaakuung dĩdĩ, adĩman ẽẽtĩ ꞌcĩ õõg ngaa cĩnnĩ nẽ ũꞌthũwan ngaa umwa tarĩ ꞌthẽccan. Occa õõg ẽẽtĩ ngaa hatĩ itikto ngaa hĩ eet umwa ꞌcĩ ꞌrĩĩng diooni.”

10Nẽ ĩĩttĩk nuyyiooha ĩnõõnnõ, “Má thĩ ma aaĩ thõõth ꞌcĩ eet ꞌcĩ maacĩ hĩ ngaa ꞌcĩ ngayyi noho, occa thĩ mẽẽn ngaatĩ hĩĩgĩnnĩ bũaarĩna.”

11Nĩngĩtĩ ẽdẽcĩ Yeesu ĩhõõggõ annẽẽkĩ, “Aitiõõ eeta vẽlẽk hõllõngaa occa ẽlẽmĩ thõõth icci, eet ꞌcĩg baag aaꞌnyĩk Nyekuci ꞌbaaninit ꞌcĩ hõllõngaa aꞌthũwaniini dioo, ꞌcĩg occa ẽlẽmĩ thõõth icci. 12Aitiõõ eeta ũgẽẽgĩ hõllõngaa aꞌthũwanni, hĩnĩngĩtĩ ilelĩk nẽẽg ngaanĩngĩtĩ arrittiaanĩ, hode hĩnĩngĩtĩ thõõth ꞌcĩ aaranĩ eeta ũgẽẽgĩ ĩhõõggõ thõng. Aitiõõ ũgẽẽgĩ hõllõngaa aꞌthũwanni, hĩnĩngĩtĩ mĩnnanĩ ꞌcĩ aꞌnyaheek nẽẽg habuccieet cĩ hẽẽtkujjieen. Má aaĩ ẽẽtĩ ꞌcĩ ẽlẽmĩ thõõth icci, aꞌnyĩĩk hẽlẽm.”

Aggatan Yeesu lõhõlĩ ꞌcĩg hidicig

(Tigiil Maarko 10:13-16; ꞌLuuka 18:15-17)

13Ma kõr umwa, aꞌnyakta eeta lõhõlĩ cĩggĩĩng hĩ Yeesu, hátĩ hataadĩk aꞌthiit nẽ alaõõĩ ĩhõõggõ. Eggerenyeek hinnia nuyyiooha eet anneek, ma haccanannu Yeesu.

14Ẽdẽcĩ Yeesu ĩhõõggõ anneek, “Aꞌnyĩĩk lõhõlĩ ꞌcĩg kidicig hiita hĩ nganĩĩta, ma habĩllu ĩhõõggõ! Eet ꞌcĩg aattĩg hĩ lohollia cieeg kidicig ko, ꞌcĩg ĩĩn eet cĩg habuccieet cĩ hẽẽtkujjieen.” 15Ma baa aggatan Yeesu lõhõlĩ ꞌcĩg kidicig ẽlẽk, ikia ĩtĩnga nẽẽ nĩngaata nẽ ũũk ĩĩmwaanĩ.

Eet ꞌcĩ ĩĩn ballioohit

(Tigiil Maarko 10:17-31; ꞌLuuka 18:18-30)

16Baa aku eet umwaa hĩ Yeesu nẽ ijin ĩnõõnnõ ĩĩnnĩk, “ꞌLimmannioohit, ne occa ꞌcĩ abũnnaa ꞌcĩ occa hadĩmanĩ naa, hátĩ hũmmũda rũgẽt ꞌcĩ aalla ooo?”

17Ẽdẽcĩ Yeesu ĩnõõnnõ anneek, “Inni jinaa thõõth ꞌcĩ abũnnaa ho? Nyekuc dioo ꞌcĩ abũnnaa. Má adiimi nii aduhuni habuccieet cĩ hẽẽtkujjieen, thĩĩk tilooinit cĩ Nyekuci.”

18Ẽdẽcĩ ẽẽtĩ nicciee Yeesu anneek, “Tilooinit iina?”

Ẽdẽcĩ Yeesu ĩnõõnnõ anneek, “Ma haruhi, ma hattihi ngaa cĩ eet umwa, ma hĩgõrꞌthĩ, ma haduha õlõng lokihooa, 19tingõlĩ maaꞌnyu hĩ ngaanu nẽ ‘Mĩnnan eet ꞌcĩ aaronnu haau hĩcĩ ammĩnani ẽlẽ cunni.’ ”#Tigiil ꞌBuuk cĩ Levitiko 19:18; ꞌLuuka 10:27-37

20Ẽdẽcĩ nyahaappanĩ nicciee Yeesu anneek, “Baa hũnũa naa tilooinit icci ẽlẽk. Ne umwaa ꞌcĩ occa hadĩmani naa?”

21Ẽdẽcĩ Yeesu ĩnõõnnõ anneek, “Má adiimi ĩĩ eet ꞌcĩ abũnnaa, bĩĩt tũũõĩ hẽlẽggĩ vẽlẽk ꞌcĩg aꞌnyahi! Nẽ aaꞌnyĩhuu ꞌrabbẽẽt eet ꞌcĩg appĩĩrna nẽ thĩ hatĩ ũmmũda baliinit hẽẽtahujjieen. Nẽ thĩ ikia ũnũwaa nganĩĩta.”

22Ma baa athĩhĩ nyahaappanĩ nicciee thõõth cĩ Yeesu ho, ikia õmmõthĩ nẽẽ gẽrrẽẽt nĩngĩtĩ õkõõĩ, hĩnĩngĩtĩ baa aballi nẽẽ gẽrrẽẽt.

23Nĩngĩtĩ aduhaakĩ Yeesu nuyyiook cĩgĩnnĩg annẽẽkĩ, “Õkõmĩ gẽrrẽẽt ũdũt ngaatĩ occa adukni ẽẽtĩ ꞌcĩ aballi habuccieet cĩ hẽẽtkujjieen! 24Nẽ tarĩ haduhaakuunga, ammũjĩ ngaatĩ occa adukni nyaakaalĩ hutuli cĩ lĩbbĩraaõ, hĩllõõan ngaatĩ occa adukni ẽẽtĩ ꞌcĩ ĩĩn ballioohit habuccieet cĩ Nyekuci.”

25Ma baa athĩhĩ nuyyiooha thõõth icci ho, iita ukullieek ꞌjieen gẽrrẽẽt nẽ ijinit Yeesu ĩĩttĩk, “Nganĩ thĩ ꞌcĩ occa eelliaa loota nĩnga?”

26Nĩngĩtĩ akannĩ Yeesu ĩhõõggõ hẽbẽrĩ nẽ ĩĩnnĩk, “Aattĩg thooꞌthioha ũgẽẽgĩ ꞌcĩg aꞌnyaman eet ngaatĩ adticanĩ, nẽẽthĩ, aitiõõ ꞌgii ꞌcĩ aꞌnyaman Nyekuc tõõ.”

27Ma ho, ẽdẽc Pẽẽtũrũ ĩnõõnnõ ĩĩnnĩk, “Hũtũngteeha naag thooꞌthiok vẽlẽk nẽ hunuyyi nganiita! Ne hatĩ ꞌcĩ aaꞌnyeet Nyekuci ngagĩĩt ko?”

28Ẽdẽcĩ Yeesu ĩnõõnnõ anneek, “Eei, iittu niig vẽlẽk nuyyiook cĩgannĩg nẽ haduhaakuung dĩdĩ, ma iccioloongan Ngeertĩ Eeto dtaabawaa cĩnnĩ ĩĩcĩ bulẽẽttõ, iccioloongannu hatĩ niig buúk dtaabĩtĩĩ ꞌcĩg ĩĩn õmmõtõ hĩ ꞌramma nẽ etteeddu thooꞌthiok cĩg habuccieeꞌnya õmmõtõ hĩ ꞌramma cĩg Ĩꞌthĩraẽlĩ. 29Ẽẽtĩ ꞌcĩ ũtũngeek õlõ cĩnnĩ hode ꞌgõtõõnõgĩ hĩ ngõõnõgĩ hode maaꞌnyĩ hĩ aattĩnnĩ, hode manẽẽn cĩgĩnnĩg, hĩnĩngĩtĩ nganĩĩta, ammũda hatĩ nẽẽ ꞌbaaninit tabattĩ ꞌmiia hõdẽĩ nẽ hatĩ ũmmũda rũgẽt ꞌcĩ aalla ooo. 30Nẽẽthĩ, mẽẽlĩg hatĩ eeta ꞌcĩg ꞌyioko uwwattĩ ꞌcĩg hatĩ au adtuurna nẽ mẽẽlĩg hatĩ ꞌcĩg ꞌyioko adtuurna, ꞌcĩg hatĩ au uwwattĩ.”

Currently Selected:

Maatteeo 19: did

Highlight

Copy