ꞌLuuka 9

Ĩꞌthõ Yeesu ꞌthooyyiak õmmõtõ hĩ ꞌramma

(Tigiil Maatteeo 10:5-15; Maarko 6:7-13)

1Ma baa ũtũvva Yeesu ꞌthooyyiak ꞌcĩg ĩĩn õmmõtõ hĩ ꞌramma ho hiita ngaatĩ hõdẽẽthõng, ikia aaꞌnyĩk ĩhõõggõ ꞌtirrian hĩ makaaꞌthĩt ꞌcĩ iiggiaĩ loriẽẽt ꞌcĩg abathĩ vẽlẽk heelliaĩĩ eet mooriꞌthioohĩ, 2nẽ ĩꞌthõ ĩhõõggõ hõõt hillimatteek eet thõõth cĩ habuccieet cĩ Nyekuci nẽ aanytĩk ꞌcĩg õmmõõrĩ hũbũttaathõ. 3Nĩngĩtĩ aduhaakĩ ĩhõõggõ annẽẽkĩ, “Õõt haaga. Ma haꞌnyahi eet umwaa hĩbahĩt hode locoburo hode ꞌgẽẽn hode ꞌrabbẽẽta hode ceremwa. 4Ma uduhuttu halang umwa, aallattia nĩngaata ĩꞌthõng ũtũngteek ꞌtaaũn tĩho. 5Nẽ má aburruung eeta ngaamwaanĩ, utuddungteek tuduhaac cĩ ꞌthoo cugguung nĩngaata, hatĩ ũtũngteehu ꞌtaaũn tĩho, hátĩ hĩĩ terethiinit ꞌcĩ utuburru niig ĩhõõggõ.” 6Nĩngĩtĩ ĩꞌngaannĩ ꞌthooyyiaha õõĩ olooyyiohĩ vẽlẽk nẽ illimanit nyeemuut ꞌcĩ abũnnaa nẽ aanytĩk eet hũbũttaathõ mooriꞌthioohĩ lõkõrẽẽt vẽlẽk.

Õmmõthĩ Ẽrõõdẽ

(Tigiil Maatteeo 14:1-12; Maarko 6:14-29)

7Ma baa athĩhĩ Ẽrõõdẽ habuui thooꞌthiok iccig vẽlẽk ko, ikia õmmõthĩ nẽẽ gẽrrẽẽt, hĩnĩngĩtĩ baa aĩ eeta ũgẽẽgĩ, ũrũga Yõaannẽ daahĩtha, 8nẽ tarĩ ĩĩtõ ũgẽẽgĩ õbõda Eliijja nẽ ĩĩtõ ũgẽẽgĩ ũrũga põrõvẽtaacĩ umwaa ꞌcĩ baa baarkit. 9Baa õthõõth Ẽrõõdẽ aĩ, “Baa huruha naa Yõaannẽ ẽlẽk nẽ nganĩ ciee nga hathihi naa aĩ, adĩman thooꞌthiok ꞌcĩg aattĩg hoti ho?” Nĩngĩtĩ adiim acĩnĩ nẽẽ Yeesu.

Aaꞌnyĩk Yeesu eet aalibꞌnya ꞌtur ꞌgẽẽn

(Tigiil Maatteeo 14:13-21; Maarko 6:30-44; Yõaannẽ 6:1-14)

10Ma baa oboddia ꞌthooyyiaha, iita uduktaak Yeesu dtiicanĩ ꞌcĩg baag adĩman nẽẽg ko. Nĩngĩtĩ õkõõĩ nẽẽ ĩhõõggõ ĩĩcĩ ꞌtaaũn cĩ Beꞌthaida. 11Au hinnia aga eeta thõõth icci, nĩngĩtĩ anũĩ ĩnõõnnõ. Nẽ atal Yeesu ĩhõõggõ ngaatĩ auuni nẽ illimaneek ĩhõõggõ thõõth cĩ habuccieet cĩ Nyekuci nẽ aaꞌnyĩk ꞌcĩg õmmõõrĩ hũbũttaathõ.

12Ma baa iggiingi kõrra, iita ꞌthooyyiaha ĩĩttĩk Yeesu, “Duhaak eet hõõt hummuddia ꞌgẽẽn olooyyiohĩĩ ꞌcĩg obokii hĩ nĩngĩtĩ ooginni, hĩnĩngĩtĩ haattĩg naag ngaatĩ aitiõõnnĩ ꞌgii vẽlẽk tõõ.”

13Ẽdẽcĩ hinnia Yeesu anneek, “Aanytĩk niig ĩhõõggõ ꞌgiimwa hadahit.”

Ẽdẽcĩ nẽẽg Yeesu anneek, “Haꞌnyaka naag ũbũnẽẽt ꞌtur hĩ ulugo ꞌramma haaga, occa thĩ mĩĩ nõõ hõõ hũũtanna ꞌgẽẽn cĩ eet iccig vẽlẽk.” 14Baa ũũppan eeta ꞌcĩg maacĩg dioo ĩĩn aalibꞌnya ꞌtur nĩngaata.

Nĩngĩtĩ annẽẽkĩ Yeesu nuyyiook cĩgĩnnĩg, “Aanytĩk eet haauto loota hĩĩtõ hẽẽn ꞌtur, hẽẽn ꞌtur.” 15Nĩngĩtĩ adĩmanĩ ꞌthooyyiaha buúk hĩcĩ aduha nẽẽ ho. 16Ma ho, ittiha Yeesu ũbũnẽẽt ꞌcĩg ĩĩn ꞌtur hĩ ulugo ꞌcĩg ĩĩn ꞌramma ho nẽ ĩcĩnõõthĩ hẽẽtkujjieen nẽ alaõõĩ nẽ ẽꞌngẽra. Nĩngĩtĩ aaꞌnyĩkĩ nuyyiook heꞌngerrieek lothippit. 17Aduk eeta ꞌgẽẽn tĩho ĩꞌthõng hũũppattĩ nẽẽg vẽlẽk, huluttia ꞌthooyyiaha thuruthur ꞌcĩg ũũppan lohoddwa õmmõtõ hĩ ꞌramma.

Uppulana Pẽẽtũrũ Yeesu

(Tigiil Maatteeo 16:13-19; Maarko 8:27-29)

18Kõr umwa, baa õkõ Yeesu ĩĩcĩ burki nẽ ũũk alaõ. Ma nĩngaata, iita ummuddiaak nuyyiooha cĩgĩnnĩg ĩnõõnnõ, nĩngĩtĩ ajini nẽẽ ĩhõõggõ annẽẽkĩ, “Aĩ nõõ ꞌthẽk eeta dẽẽdẽ nganĩ naa?”

19Ẽdẽcĩ nẽẽg anneek, “Aĩ eeta ũgẽẽgĩ ĩĩnĩ nii Yõaannẽ Batitta, nẽ ĩĩtõ ũgẽẽgĩ ĩĩnĩ nii Eliijja nẽ tarĩ ĩĩtõ ũgẽẽgĩ, iini moho nii põrõvẽtaac umwa cĩ baarkit ꞌcĩ ũrũga thõng.”

20Nĩngĩtĩ ajini Yeesu ĩhõõggõ tarĩ annẽẽkĩ, “Ma niig ainnu nganĩ naa?”

Ẽdẽcĩ Pẽẽtũrũ aĩ, “Ĩĩnĩ nii Krĩstõ ꞌcĩ ĩꞌthõõa Nyekuci.”

21Ma ho, itilo Yeesu ĩhõõggõ hiittiõõ hõllõngaa õõ aduhaak eet umwa thõõth icci ũdũt.

Õthõõth Yeesu daahĩth cĩnnĩ

(Tigiil Maatteeo 16:20-28; Maarko 8:30-9:1)

22Ma nĩngaata, uduhaak Yeesu nuyyiook ĩĩnnĩk, “Accananni hatĩ Ngeertĩ Eeto ĩꞌthõng nẽ ũtũbũrĩt makayyiooha cĩg eetuk hĩ makayyiook cĩg paadĩrꞌnyaannu, hĩ ꞌlimmanniook cĩg nyattaalak nẽ hatĩ uruhi. Ma urutaa cĩ waathinniook iyyio, arũgna hatĩ nẽẽ daahĩtha.”

23Ma ho, uduhaak ĩhõõggõ vẽlẽk ĩĩnnĩk, “Ẽẽtĩ ꞌcĩ adiim anũyya nganĩĩta, aꞌnyĩĩk hẽlẽmana ẽlẽ cĩnnĩ nẽ irriongan hurucce#9:23 Hurucce: Baa aruk eeta cĩg ꞌRooma eet hadaahito ꞌgõõlaa ꞌcĩ õdõõddĩkĩ hurucciẽẽtĩĩ ꞌcĩg adĩmannia iggioolĩnĩ. Adaahĩ eeta daahĩth ꞌcĩ aku hĩdĩĩc hĩdĩĩc nẽ ahuci gẽrrẽẽt. cĩnnĩ nẽ ũnũaanĩ. 24Ẽẽtĩ ꞌcĩ adiim aꞌthũũnnĩ rũgẽt cĩnnĩ, adhuheek hatĩ tuu, nẽẽthĩ, ẽẽtĩ ꞌcĩ adhuheek rũgẽt cĩnnĩ tuu, hĩnĩngĩtĩ nganĩĩta, ẽẽla hatĩ nẽẽ rũgẽt cĩnnĩ. 25Ne ꞌyioko ꞌthẽk ꞌcĩ occa ammũda ẽẽtĩ hĩĩ ꞌcĩ aaꞌnyĩhõõthĩkĩ ĩnõõnnõ lõõcĩ nicciee vẽlẽk nẽ udhuheek rũgẽt cĩnnĩ tuu? 26Nẽ má abũrĩ ẽẽtĩ umwaa ngaatĩ ẽlẽmma nganĩĩt hĩ thõõth caannĩ, abũrĩ hatĩ Ngeertĩ Eeto buúk ngaatĩ ẽlẽmmĩ ĩnõõnnõ, hatĩ ikia nẽẽ bulẽẽttaa cĩnnĩ, hĩ ĩĩcĩ Maacõnĩ, hĩ ĩĩcĩ aajĩlẽẽt ꞌcĩg ẽllẽẽmĩthĩ. 27Haduhaakuung dĩdĩ, aattĩg eeta ũgẽẽgĩ hõrggẽẽnaa cunuung ꞌcĩg hatĩ arũgĩ ĩꞌthõng hĩcĩnĩt habuccieet cĩ Nyekuci.”

Tũhũẽẽnĩt cĩ ẽlẽ cĩ Yeesu

(Tigiil Maatteeo 17:1-8; Maarko 9:2-8)

28Ma urutaa cĩ waathinniook turkiyyio, ũtũvvũ nẽẽ Pẽẽtũrũ, hĩ Yõaannẽ, hĩ ꞌJeemith nẽ ũũhĩ ĩhõõggõ muuraa umwaanĩ ĩĩcĩ õõ alaiini. 29Ma baa nga alayyi nẽẽnĩ, ũtũhũĩ muum cĩnnĩ hĩ ceremwa hattaalito hĩĩtõ õõppẽr. 30Ma hĩdĩĩkoothong, uppwaatta Mũũꞌtha hĩ Eliijja 31bulẽẽttaa ꞌcĩ ẽllẽẽmĩth gẽrrẽẽt, hiita hothooꞌthio hĩ Yeesu. Baa atuhan nẽẽg thõõth cĩ ꞌgõõl ꞌcĩ hatĩ õkõ adaaknĩ Yeesu ꞌJeruꞌthalẽma hĩ baa adukiaa. 32Ammũdeek hinnia thõõth ciee aggamta Pẽẽtũrũ hĩ ꞌgõõnõgĩ ũꞌnyaaha. Ma baa acĩnĩ ho, adtuuha hinnia bulẽẽnĩt cĩ Yeesu nẽ ĩcĩnĩt eet ꞌramma abĩlĩ hõdẽĩ hĩ ĩnõõnnõ. 33Ma baa ĩꞌngaathĩ Mũũꞌtha hĩ Eliijja õõ ho, othoothĩk Pẽẽtũrũ Yeesu ĩĩnnĩk, “Makayyioohit, ẽllẽẽmĩth ngaatĩ haattiyyi ngaati gẽrrẽẽt, hẽtẽhẽnyta da ꞌcieethi iyyio, cunni hõdẽĩ, cĩ Mũũꞌtha hõdẽĩ nẽ ĩĩ cĩ Eliijja.” Baa hõllõngaa aga Pẽẽtũrũ thõõth ꞌcĩ aduha ho.

34Ma baa nga õthõõth Pẽẽtũrũ, uppwaanna diith umwaa nẽ ũmmũt ĩhõõggõ, nĩngĩtĩ itieelini ꞌthooyyiaha gẽrrẽẽt. 35Ma ho, õthõõtha mõlõõhĩ umwaa diithatõõ ĩĩ, “Loholeec caannĩ ꞌcĩ hẽbẽra cieeni, ĩthĩhĩt ĩnõõnnõ.”#Tigiil Waraga ꞌcĩ ĩĩn 2 Pẽẽtũrũ 1:17 36Ma baa õthõõth mõlõõhĩ ẽlẽk, iita ĩcĩnĩt ꞌthooyyiaha Yeesu aau ẽmmẽn. Nĩngĩtĩ au ammiꞌthẽẽnĩ nẽẽg thõõth icci korriook nicciag ĩꞌthõng irkiꞌnyia ũgĩ.

Ẽẽla Yeesu buulenit

(Tigiil Maatteeo 17:14-18; Maarko 9:14-27)

37Ma loohoth cĩnnĩ, ulluuccia Yeesu hĩ ꞌthooyyiak cĩgĩnnĩg muuraa nẽ iita ommottio hĩ lothippit cobbi gẽrrẽẽt unaahatõõ. 38Ma nĩngaata noho, õthõõthak eet umwaa Yeesu lothippitatõõ ĩĩnnĩk, “ꞌLimmannioohit, ẽlaahaa baaĩ nuun loholeec caannĩ ꞌcĩ odoyyii ho. 39Loholeec ꞌcĩ accananeeka lorii ꞌcĩ abathĩ, ara ẽttẽẽdĩ looc hẽvẽvvẽr ĩꞌthõng huduu ũtũgĩ. Hõllõngaa alahaneek buúk nẽ iꞌnyiathanaaha loholeec gẽrrẽẽt. 40Baa hala nuyyiook cugunnig hitiggiaacõ, aitiõõ hinnia hõllõngaa ũũlũ ũdũt.”

41Nĩngĩtĩ annẽẽkĩ Yeesu ĩhõõggõ, “Illoorru niig eeta cĩg irkiꞌnyia iccig ko gẽrrẽẽt nẽ nga aitioonnuung lemiiniti tõõ. Adiimmu niig hũrũmtĩ naag hĩ ngagiit ĩꞌthõng hatĩngaan? ꞌNyaha daho loholeec cunni ho ngaati ẽlẽ.”

42Tananga baa nga õkõ buuleniti ĩĩcĩ aayyi Yeesu, ara ẽttẽẽdĩ lorii ꞌcĩ abathĩ ho ĩnõõnnõ looc noho ꞌlir hẽvẽvvẽr. Ma ho, eggerꞌnyeek Yeesu lori ꞌcĩ abathĩ ho, hũbũna buuleniti nĩĩcĩ noho. Ma nĩngaata, õbõdẽẽhĩ Yeesu loholeec maaꞌnyĩ. 43Nĩngĩtĩ abulanĩ ꞌtirriani ꞌcĩ Nyekuci ho eet gẽrrẽẽt.

Ẽppẽẽda Yeesu daahĩth cĩnnĩ tarĩ

(Tigiil Maatteeo 17:22-23; Maarko 9:30-32)

Ma baa nga abulan eet ꞌlẽẽmĩthĩ cĩ thõõth ꞌcĩ adtican Yeesu ho, ĩĩnnĩk nẽẽ nuyyiook cĩgĩnnĩg, 44“Ĩthĩhĩt thõõth ꞌcĩ hẽppẽẽdahuung naa ho jurrung. Õhõppõõcanoothĩk hatĩ Ngeertĩ Eeto athĩnĩĩ cĩg eetuk.” 45Baa hinnia aitiõõ hõllõngaa aga nẽẽg thõõth ꞌcĩ õthõõth Yeesu ho, hĩnĩngĩtĩ baa ammiꞌthi hĩ ĩhõõggõ hiittiõõ hõllõngaa aga. Nẽ tarĩ, baa itieelli nẽẽg ngaatĩ ajini ĩnõõnnõ.

Nganĩ hatĩ ꞌcĩ maka?

(Tigiil Maatteeo 18:1-5; Maarko 9:33-37)

46Ma kõr umwa, ẽppẽhattõõĩ ꞌthooyyiaha cĩg Yeesu thõõth ꞌcĩ aĩ, nganĩ occa hatĩ ꞌcĩ maka hõrggẽẽnaa cĩnĩĩng. 47Baa aga Yeesu muhẽẽnĩt cĩnĩĩng ko. Nĩngĩtĩ attihaanĩ loholeec ꞌcĩ hidici nẽ aaꞌnyĩk hĩbĩl ojoonu hĩ ĩnõõnnõ. 48Nẽ irrioonĩk ĩhõõggõ ĩĩnnĩk, “Ẽẽtĩ ꞌcĩ ẽlẽmĩ ngaatĩ arũmẽẽnĩ hĩ loholeec icci õlõõ cĩnnĩ taliitta ꞌthaarĩĩ cĩgannĩg, ẽlẽmma nganĩĩta nẽ ẽẽtĩ ꞌcĩ ẽlẽmma nganĩĩta, ẽlẽmĩ eet baa ĩꞌthõõannaa nganĩĩt buúk. Ẽẽtĩ ꞌcĩ hidici gẽrrẽẽt hõrggẽẽnaa cunuung vẽlẽk, ĩnõõnnõ ꞌcĩ maka gẽrrẽẽt.”

Eet cĩnaac nganĩ?

(Tigiil Maarko 9:38-40)

49Ma ho, ĩĩnnĩk Yõaannẽ Yeesu, “Makayyioohit baa hacĩnna eet umwa iiggia loriẽẽt ꞌcĩg abathĩ ꞌthaarĩĩ cugunnig, nẽ hĩĩttĩha occa abĩllĩ dtiic cĩnnĩ ho, hĩnĩngĩtĩ hõllõngaa ĩĩn nẽẽ eet cĩnaac.”

50Ẽdẽcĩ hinnia Yeesu anneek, “Ma habĩllu, hĩnĩngĩtĩ ẽẽtĩ ꞌcĩ hõllõngaa aaburreekeet ngagĩĩta, ĩĩn eet cĩnaac.”

Ũtũbũrĩt eeta Yeesu Thamaria

51Ma baa õbõhĩ kõrra ꞌcĩ odongiini Yeesu õkõõĩ hẽẽtahujjieen, ikia ĩrĩnyanoothĩk nẽẽ ngaatĩ õkõõĩ ꞌJeruꞌthalẽma. 52Nĩngĩtĩ ĩꞌthõõĩ eet ũgĩ hutuwattĩ hõõt õlõõ umwaanĩ looccaa cĩ Thamaria,#9:52 Thamaria: Baa ĩĩn hĩbaangĩ cĩg eet cĩg Thamaria ũgẽẽgĩ ꞌJudeei, nẽ iita ũgẽẽgĩ eetinii cĩrrĩĩng. Baa gõõng ala eeta cĩg Thamaria Nyekuc muuraa ꞌcĩ haĩ ꞌGerithim, ꞌgõõlaa ꞌcĩ hõllõngaa aduhõõ hĩ ꞌgõõl ꞌcĩ alaĩ ꞌJudeei Nyekuc. Tigiil thõõth icci ꞌBuuhaa cĩ 2 Habuẽẽt 17:27-40; Yõaannẽ 4:1-42. hátĩ hõõt hũkũmattẽẽhĩ ĩnõõnnõ ꞌgii vẽlẽk. 53Nẽẽthĩ hinnia, baa abũrĩ eeta cĩg õlõ tĩho Yeesu, hĩnĩngĩtĩ baa aku edeceek nẽẽ ĩĩcĩ ꞌJeruꞌthalẽmĩ. 54Ma baa adtuuha nuyyiooha, ꞌJeemithi hĩ Yõaannẽ thõõth ꞌcĩ aaĩ hoti ho, õõt ijinit Yeesu ĩĩttĩk, “Makayyioohit, adiimmeet nii ngagĩĩt hutuvvuyyiaawa ꞌgwoo hẽẽtahujjieen hĩ baa Eliijja, hikia hũtũũth eet iccig?” 55Abbuudi hinnia Yeesu nẽ eggerenyeek ĩhõõggõ, 56nĩngĩtĩ õõĩ õlõõ ꞌcĩ ꞌrĩĩng.

Kõmĩĩth ꞌcĩ hanũĩ Yeesu

(Tigiil Maatteeo 8:19-22)

57Ma baa nga ẽdẽcĩ nẽẽg ꞌgõõla, ĩĩnnĩk eet umwaa Yeesu, “Hanuyyii hatĩ naa nganiit loonyini vẽlẽk ĩcĩg õkõõĩ.”

58Ẽdẽcĩ hinnia Yeesu ĩnõõnnõ anneek, “Aꞌnyak irrieerrwaana tabannwa ꞌcĩg ooginni nẽ aꞌnyak hĩbaallĩ buúk ꞌcieethi cĩggĩĩng, nẽẽthĩ, aitiõõ Ngeertĩ Eeto nĩngĩtĩ aruhaanĩ õõ haaga tõõ.”

59Ma ho, õbõk Yeesu eet umwa nĩngaata noho nẽ ĩĩnnĩk, “Ijjia nũaanĩ.”

Ẽdẽcĩ hinnia ẽẽtĩ tĩho aĩ, “Makayyioohit, aꞌnyaa nõõ hũũk hũmmũt nyakangaan nẽ hõbõda.”

60Ẽdẽcĩ Yeesu ĩnõõnnõ anneek, “Aꞌnyĩĩk daakiak hũmmũtĩt daakiak nyaagwaana. Bĩĩt nẽẽ nii ꞌlimmaneek eet nyeemuut cĩ habuccieet cĩ Nyekuci.”

61Ma nĩngaata, ẽdẽca ẽẽtĩ umwaa tarĩ ĩĩ, “Makayyioohit, hanuyyii nẽẽꞌthẽk hatĩ naa buúk nganiita, ĩꞌnya nõõ hũũk huduhaak eet cĩg halang caannĩ.”

62Ẽdẽcĩ hinnia Yeesu ĩnõõnnõ anneek, “Aitiõõ eet ꞌcĩ aggam hõllaac cĩ taꞌngõõ nẽ ubbuudõthĩ looc uruta, hõllõngaa ũũppan ngaatĩ occa adticaniini habuccieetaa cĩ Nyekuci.”

Currently Selected:

ꞌLuuka 9: did

Highlight

Copy