ꞌLuuka 21

ꞌBaaninit cĩ ngaatĩbõyyĩ

(Tigiil Maarko 12:41-44)

1Ma baa õdõng Yeesu hẽbẽrĩ ho, adtuuha hinnia balliook ũgĩ adhuheek ꞌbaaninit locoburoatõõ ꞌcĩ aarĩkĩ eeta ꞌrabbẽẽt cĩg ꞌCieeth cĩ Nyekuci. 2Ẽbẽk ĩꞌthõng, nĩngĩtĩ adtuuhanĩ ngaatĩbõyyĩ umwa ꞌcĩ ĩĩn ꞌguurthettiaahit, ngaatĩ õkõ adhuhẽẽkĩ ꞌrabbẽẽt ꞌcĩg kũtũrĩg ꞌcĩg kidicig ꞌramma. 3Nĩngĩtĩ annẽẽkĩ eet, “Haduhaakuung dĩdĩ, adhuheek ngaatĩbõyyĩ ciee ĩĩn ꞌguurthettiaahit ko, ꞌrabbẽẽt ꞌcĩg ĩllõõan cĩg eet vẽlẽk. 4Ẽꞌngẽra eeta cieeg vẽlẽk ꞌbaaninit ꞌcĩ adhuheek ko, ꞌrabbẽẽtĩĩ cĩggĩĩng thõng, nẽẽthĩ, ꞌguurthetaa cĩ ngaatĩbõyyĩ icci, udhuheek nẽẽ ꞌgii vẽlẽk ꞌcĩ occa arũgnĩ nẽẽnĩ.”

ꞌThaaninit cĩ ꞌCieeth cĩ Nyekuci

(Tigiil Maatteeo 24:1-2; Maarko 13:1-2)

5Baa athithan nuyyiooha ũgẽẽgĩ ꞌgõõl ꞌcĩ ehenytiini ꞌCieeth cĩ Nyekuci biyyiẽẽnĩĩ cĩg ẽllẽẽmĩth gẽrrẽẽt nẽ tarĩ, ithithanit ꞌbaaninit ꞌcĩ aaꞌnyĩhoothĩk Nyekuc. Edecoothĩk hinnia Yeesu ĩhõõggõ anneek, 6“Acinnu niig biyyiẽẽn niccig? Aku hatĩ kõrra ꞌcĩ ĩꞌthaanini nẽẽg vẽlẽk hiittiõõ ꞌcĩ atattadoothik ꞌgoonnia tõõ. Ĩꞌthaanni hatĩ nẽẽg vẽlẽk hĩĩ lõõcĩ ꞌthĩĩ.”

Pĩĩrnanĩt ꞌcĩ hatĩ aku

(Tigiil Maatteeo 24:3-14; Maarko 13:1-13)

7Nĩngĩtĩ ajini nuyyiooha Yeesu annẽẽkĩ, “ꞌLimmannioohit, aku hatĩ edeeꞌnyia thõõth ciee hatĩngaan? Hau occa hatĩ hagayya kõr ꞌcĩ adĩmaniini thõõth ciee hutuno?”

8Ẽdẽcĩ Yeesu anneek, “Uꞌthuutti eleeti, hátĩ hiittiõõ hõllõngaa iggoolluung eeta. Au hatĩ eeta ꞌcĩg mẽẽlĩg ꞌthaarĩĩ cĩgannĩg ꞌcĩg au õthõõth aĩ, ‘Hĩĩnĩ naa Krĩstõ,’ nẽ ‘Õbõhĩ kõrra.’ Ma hanuyyu ĩhõõggõ. 9Ma ĩthĩktu jõrẽẽna, ma hiteelinnu. Au nõõ hatĩ ꞌthẽk edeeꞌnyia hẽlẽggĩ cieeg ĩĩcĩ oou nga hedeeꞌnyia dtuurnanĩtĩ cĩ lootu.”

10“Aruhõõ hatĩ loonyini hĩ loonyin nẽ urukto habuccieeꞌnya hĩ habuccieeꞌnya. 11Au hatĩ hirihidtikꞌnya ꞌcĩg attiran hĩ nyarõn hĩ mooriꞌthiook ꞌcĩg abathĩ dtẽc nẽ ẽdẽẽnyta hatĩ hẽlẽggĩ ũgẽẽgĩ hẽẽtahujjieen ꞌcĩg itieelli eeta gẽrrẽẽt.

12“Nẽẽthĩ, õõa ꞌcĩ nga hẽdẽẽnytaĩ hẽlẽggĩ cieegi, aggammuung hatĩ nẽẽg ngagiit nẽ õhõggõõrattuunga. Ooyyuung hatĩ lokihẽẽtĩ ꞌCieethinii cĩg Laiittak nẽ aarrihuung baabuuthnyanĩ nẽ aꞌnyaktaauung hẽbẽrẽẽnnĩĩ cĩg habueetu hĩ ꞌgaala ꞌcĩg obbitig, hĩnĩngĩtĩ ꞌthaar cĩgannĩg. 13Aku hatĩ ĩĩn thõõth ciee terethiinit ꞌcĩ eterꞌtheeku niig ĩhõõggõ lemiinit cunuung. 14Nẽẽthĩ, ma haallaku thõõth ꞌcĩ hatĩ õõ aduhaannu, hátĩ eelliaaĩ eleeti cugguung lokihooa. 15Haaꞌnyuung hatĩ naa ꞌgẽẽnyĩth ꞌcĩ hõllõngaa ũũlũ eeta ꞌcĩg abilluung ko, ngaatĩ athĩknĩ hode ngaatĩ ilocanĩ. 16Õhõppõõcannuung hatĩ maajihu hĩ ꞌgotoonogu hĩ ittioonniok hĩ ꞌgoonogu dẽẽdẽ nẽ hatĩ uruktuung ngagiit ũgĩ adaahit. 17Aaburreekuung hatĩ eeta vẽlẽk, hĩnĩngĩtĩ nganĩĩta. 18Nẽẽthĩ, hiꞌthihi hatĩ ĩmaacit cĩ ooti cugguung ꞌcĩ aꞌnginoothi. 19Ĩbĩlĩt kõmĩĩtha hatĩ ummuddia rũgẽt.

ꞌThaaninit cĩ ꞌJeruꞌthalẽmĩ

(Tigiil Maatteeo 24:15-21; Maarko 13:14-19)

20“Ma ĩcĩttu ꞌJeruꞌthalẽm irriamatteek athegereeꞌnya, agayyiooth ꞌthẽk ngaatĩ õbõhõõĩ ꞌribbanĩ cĩ ꞌJeruꞌthalẽmĩ. 21Aanytĩk eet cĩg aattĩg ꞌJudeea, hukulit hotodit muurriok nẽ aanytĩhu ꞌcĩg aattĩg ꞌtaaũnatõõ hõõt battaala. Aanytĩk ꞌcĩg aattiyyiaa olooyyiohĩ ngadiiha, hiittiõõ hõllõngaa au aduhun ꞌtaaũnatõõ. 22Hĩnĩngĩtĩ ĩĩn ciee kõr ꞌcĩ ukẽẽnĩt ꞌcĩ hatĩ aku hĩ baa eheeddi ꞌBuuhaa cĩ Nyekuci baarkit.#21:22 Eheeddi ꞌBuuhaa cĩ Nyekuci baarkit: Tigiil thõõth baa aduha põrõvẽtaacĩ Danieele hĩnĩngĩtĩ Yeesu Krĩstõ hĩ ꞌJeruꞌthalẽm. Tigiil ꞌBuuk cĩ Danieele 9:25-27. 23Abathĩ hatĩ gẽrrẽẽt korrioohĩĩ tĩko hĩ ngaaĩ ꞌcĩg aꞌnyaki, hode hĩ ꞌcĩg õrõõktĩ lohollia! Aaĩ hatĩ pĩĩrnanĩtĩ hĩ ukẽẽnĩt cobbi gẽrrẽẽt hĩ eet iccig. 24Aruhi hatĩ eeta ũgẽẽgĩ nyetubooꞌnyanĩ. Nẽ hatĩ õõt ũgẽẽgĩ baabuutha loonyinii cĩrrĩĩng. Au hatĩ aggam ꞌJeruꞌthalẽm eeta ꞌcĩg hõllõngaa ĩĩn ꞌJudeei, ĩꞌthõng hũttũbanoothĩk kõrra cĩnĩĩng.

Hatĩ uppwaanna Ngeertĩ Eeto

(Tigiil Maatteeo 24:29-31; Maarko 13:24-27)

25“Edeeꞌnyia hatĩ hẽlẽggĩ ꞌcĩg nga hẽdẽẽnyta kõrra hĩ nyĩlõõha hĩ mũnyũnyĩ. Nẽ loonyini loota nĩnga, itieelli hatĩ eeta ꞌgerenyi hĩ ꞌrohi ꞌcĩ ĩꞌngaanna bũlũccwaanĩtõõ, ĩꞌthõng hanyaman ꞌgii ꞌcĩ occa adĩmanĩ. 26Awaalĩth hatĩ eeta, hĩnĩngĩtĩ tẽẽlꞌthĩt hĩ ngaatĩ iꞌngoliini ꞌgii ꞌcĩ hatĩ aku edeeꞌnyiak looc hũtũrũũr, hĩnĩngĩtĩ õmmõõtĩ hatĩ ꞌgii vẽlẽk ꞌcĩ aaĩ hẽẽtahujjieen. 27Ma kõr tĩho, edeenyothi hatĩ eeta Ngeertĩ Eeto ngaatĩ alluuccianĩ diiꞌthiohĩĩ cĩg hẽẽtkujjieen, makaaꞌthĩta hĩ bulẽẽttaa cobbi.#Tigiil ꞌBuuk cĩ Danieele 7:13 28Ma icittu iꞌthiattaaĩ hẽlẽggĩ cieeg ẽdẽẽnyta, ĩtĩngaac aaut dĩkĩĩm, hĩnĩngĩtĩ õbõhĩ kõrra ꞌcĩ eelliannu niiga.”

ꞌLimman cĩ ꞌmũũnĩcõ

(Tigiil Maatteeo 24:32-35; Maarko 13:28-31)

29Nĩngĩtĩ aduhaakĩ Yeesu ĩhõõggõ thõõth ꞌcĩ awantoothĩk annẽẽkĩ, “Ummuhuttooth da ꞌmũũnĩc hĩ hẽẽn niccig vẽlẽk. 30Ma icittu õõt ũtũrrũũmatta bõllõõha, agayyu iittu õbõhĩ ũrraatĩ. 31Noho buúk, ma icittu ẽdẽẽnyta hẽlẽggĩ cieegi, agaac ngaatĩ õbõhõõĩ habuccieet cĩ Nyekuci.

32“Haduhaakuung dĩdĩ, aitiõõ hatĩ hõllõngaa adaahĩ eeta cĩg irkiꞌnyia niccig ko vẽlẽk, ĩꞌthõng hiita hẽdẽẽnyta hẽlẽggĩ cieegi. 33Aitiõõ hatĩ hẽẽtkujjieen hĩ looc hõllõngaa aalla ũdũt, nẽẽthĩ, aalla hatĩ thõõth caannĩ ũdũt.

34“Aaut jurrung, ma hattumaniinnu ꞌgõõlaa ꞌcĩ ara aduunnu nẽ ĩdĩmattu thooꞌthiok ꞌcĩg abathĩ hĩ ngaatĩ apuppuddu, hĩnĩngĩtĩ rũgẽt cĩ looc nicci. Má adĩmannu noho, alubaakuung hinnia hatĩ kõrra ꞌcĩ decciaanĩt cĩ lootu nyahamalliak hĩ nyerite. 35Hĩnĩngĩtĩ alubaak hatĩ ꞌthẽk eet vẽlẽk ꞌcĩg aattĩg loota nĩnga hũtũrũũr. 36Aaut hõdõõkõthĩ dĩkĩĩm nẽ alayyioou, hátĩ horoong iliittia hẽlẽggĩ ꞌcĩg au nẽ, hátĩ horoong iita uuluyyu ngaatĩ abillu muumaa cĩ Ngeertĩ Eeto.”

37Baa õkõ alliman Yeesu eet ꞌCieethaa cĩ Nyekuci waathinniook vẽlẽk korriook tĩko, ma ꞌjiaat, ũũk atanguuyyia Muuraa cĩ Olivi. 38Nẽ baa au eeta vẽlẽk ngerrenita hiita hĩthĩhĩt ĩnõõnnõ ꞌCieethaa cĩ Nyekuci.

Currently Selected:

ꞌLuuka 21: did

Highlight

Copy