Yõaannẽ 6
6
Irohĩt Yeesu eet aalibꞌnya ꞌtur
(Tigiil Maatteeo 14:13-21; Maarko 6:30-44; ꞌLuuka 9:10-17)
1Ma baa urutaa cĩ thooꞌthiok iccig, ikia abaahĩ Yeesu bũlũc ꞌcĩ haĩ ꞌGalileea, ꞌcĩ haĩ ꞌthaar ũgĩ Tiberia. 2Baa anũ ĩnõõnnõ lothippiti cobbi gẽrrẽẽt ꞌgõõlaa ꞌcĩ õkõõĩ nẽẽnĩ, hĩnĩngĩtĩ ĩcĩn lothippiti thooꞌthiok ꞌcĩg ĩnaat eeta ꞌcĩg aaꞌnyĩkĩ Yeesu eet ꞌcĩg õmmõõrĩ hũbũttaathõ. 3Nĩngĩtĩ õtõdĩ Yeesu hĩ nuyyiook cĩgĩnnĩg muura lõmẽrra nẽ õõt aauto loota. 4Hĩnĩngĩtĩ baa õbõhĩ Kõrra cĩ Haangittõõ cĩ eet cĩg ꞌJudeei.
5Ma baa acĩn Yeesu au eeta ĩĩcĩ aayyi nẽẽ ho, ijin nẽẽ Pilippo ĩĩnnĩk, “Ẽlẽ Pilippo, hammũda occa hatĩ ũbũnẽẽt ꞌcĩg haaꞌnyĩk lothippit ꞌcĩ ĩĩn noho vẽlẽk ko ĩĩna?” 6Baa ajin Yeesu Pilippo hoti, aĩ hĩttĩman ĩnõõnnõ thõng, hĩnĩngĩtĩ baa aga nẽẽ ꞌgii ꞌcĩ hatĩ õkõ adtican ẽlẽk.
7Ẽdẽcĩ Pilippo ĩnõõnnõ anneek, “Aitiõõ ꞌdinaarꞌnya#6:7 ꞌDinaar: Haĩ ꞌrabbẽẽt cĩg eet cĩg ꞌRooma ꞌdinaar. Nẽ ũũppan ꞌrabbaacit hõdẽẽthõng ꞌcĩ haĩ ꞌdinaar ko, dtiic ꞌcĩ adũmaniini ẽẽtĩ ꞌcĩ adticanni kõr hõdẽẽthõng. ꞌmiiaꞌnya ꞌramma, hõllõngaa ũũppan ngaatĩ ũũtanĩ ũbũnẽẽt ꞌcĩg ẽllẽẽnnõõ hĩ eet iccig hõdẽĩ hõdẽĩ tõõ.”
8Ma nĩngaata, ẽdẽc nuyyioohiti cĩnnĩ umwaa ꞌcĩ haĩ Andrea ꞌgõtõnĩ ꞌThimõõnẽ Pẽẽtũrũ ĩĩ, 9“Aaĩ nyahaappanĩ umwaa ngaati ꞌcĩ aꞌnyak ũbũnẽẽt ꞌtur hĩ ulugo ꞌramma, ũũppan occa hatĩ ꞌgẽẽn ciee eet niccig vẽlẽk?”
10Ma ho, uduhaak Yeesu nuyyiook cĩgĩnnĩg ĩĩnnĩk, “Uduktaak eet haauto loota.” Baa ĩĩn lõõcĩ nĩngaata arteenit. Nĩngĩtĩ au aattiyyi eeta vẽlẽk loota, baa occa ĩĩn eeta ꞌcĩg maacĩg dioo aalibꞌnya ꞌtur (5,000). 11Ma nĩngaata, aggama Yeesu ũbũnẽẽt niccig nẽ aggatana, nĩngĩtĩ ẽꞌngẽrẽẽkĩ eeta. Ma urutaa cĩnnĩ, ikia aggatan nẽẽ ulugo buúk nẽ eꞌngereek eet. Nĩngĩtĩ aduhẽẽnĩ eeta vẽlẽk hũũppattĩ.
12Ma baa udukto eeta vẽlẽk hũũppattĩ, ikia uduhaak Yeesu nuyyiook cĩgĩnnĩg ĩĩnnĩk, “Uluttia ũbũnẽẽt ꞌcĩg anyiꞌthiaa vẽlẽk, hátĩ hiittiõõ ꞌcĩg adhuhoothĩk tuu tõõ.” 13Baa alũta nuyyiooha thuruthur ꞌcĩg anyiꞌthia eeta ho, abbĩꞌthĩĩ lohoddwa ꞌcĩg obbitig õmmõtõ hĩ ꞌramma, ũbũnẽẽtĩĩ cĩg baag ĩĩn ꞌtur ko.
14Ma baa ĩcĩnĩt eeta Yeesu ngaatĩ adĩmanĩ thõõth icci ĩnaat eeta ho, iita othoothito nẽẽg ĩĩtõ, “Dĩdĩ ĩko ĩĩn ẽẽtĩ ciee põrõvẽtaac ꞌcĩ hatĩ aku loota nĩnga!” 15Ma baa õrõõta Yeesu ngaatĩ adiim aggamĩ eeta ĩnõõnnõ nẽ idiimito ĩttĩngatteek haarrik hĩĩ habu cĩnĩĩng ko, ikia ũũk nẽẽ muura hujjieen ngaatĩ baa adiim õkõ aayyi ẽmmẽn.
Õvvõ Yeesu maamĩ hujjieen
(Tigiil Maatteeo 14:22-27; Maarko 6:45-52)
16Ma ꞌjiaatĩn niccia, iita ulluucci nuyyiooha cĩg Yeesu õõt ĩĩcĩ Bũlũc cĩ ꞌGalileea hõõt hẽrẽẽcõ Yeesu. 17Ma baa ĩĩ baalin lõõcĩ nẽ nga hõdõlan Yeesu ĩhõõggõ buúk, iita otodit nẽẽg haahũl ꞌcĩ abaaki õkõ ĩĩcĩ ꞌtaaũn cĩ Kapernaumi. 18Ma nĩngaata, ikia ulubaak nuyyiook ngõõtĩ ꞌcĩ attiran ꞌcĩ aaꞌnyĩk maam hõtõmõõcõ gẽrrẽẽt ũdũt. 19Ma baa uꞌthuhanit nẽẽg haahũl bũlũcatõõ õõt maaĩlꞌnya#6:19 Maaĩlꞌnya: Occa õvvõ ẽẽtĩ maaĩlꞌnya iyyio ꞌthaa hõdẽĩ. iyyio hode iyyio hĩ ꞌnuth, iita udtuukta nẽẽg Yeesu ovvooyyia maamĩ hujjieen aku ĩĩcĩ aayyi haahũlĩ nẽ iita itingolli nẽẽg gẽrrẽẽt ũdũt. 20Ma nĩngaata, ikia uduhaak Yeesu ĩhõõggõ ĩĩnnĩk, “Nganĩĩt Yeesu! Ma hiꞌngolinnaangu!” 21Baa adiim aaꞌnyĩk nuyyiooha cĩgĩnnĩg ĩnõõnnõ hõtõda haahũlatõõ, ma hĩdĩĩkoothong õdõlan hinnia haahũlĩ dẽmẽt cĩ looc ꞌcĩ õõĩ nẽẽg ko.
Ĩĩn Yeesu rũgẽt ꞌcĩ aalla ooo
22Ma loohoth cĩnnĩ, ikia iiyyiela lothippiti baa aaĩ dẽmẽtaa cĩ bũlũcõ baakĩta aĩ, ootti nuyyiooha haahũl ꞌcĩ ĩĩn hõdẽẽthõng dioo nẽ agayyiõõthĩ ngaatĩ nga hookorri Yeesu hĩ nuyyiook. 23Baa au haahũlĩta ũgẽẽgĩ ĩĩcĩ ꞌtaaũn cĩ Tiberia hiita hõdõlanit nĩngĩtĩ õbõhõõ hĩ nĩngĩ baa aggatanĩ Makayyioohiti ũbũnẽẽt nẽ udukto eeta. 24Ma baa iiyyela lothippiti ngaatĩ aitiõõnnĩ Yeesu hĩ nuyyiook cĩgĩnnĩg tõõ ho, iita otodit nẽẽg haahũlĩt nẽ abaaktĩ õõt ĩĩcĩ ꞌtaaũn cĩ Kapernaumĩ, õõ adiimothi Yeesu. 25Ma baa õõ ammũda nẽẽg Yeesu baakĩtaa cĩ bũlũcõ ho, õõt ijinit ĩnõõnnõ ĩĩttĩk, “ꞌLimmannioohit, õdõlanĩ nii ngaati nĩngaan?”
Ĩĩn Yeesu ũbũnĩ cĩ rũgẽtõ
26Ẽdẽcĩ Yeesu ĩhõõggõ anneek, “Haduhaakuung dĩdĩ, adiimmaangu niig nganĩĩt, hĩnĩngĩtĩ ꞌgẽẽn baa haaꞌnyuung ngagiit uduhit ũũppattĩ, hõllõngaa, hĩnĩngĩtĩ thooꞌthiok baag ĩnaattu hadĩmani naana. 27Ma harrĩcanaannu dtiic, hĩnĩngĩtĩ ꞌgẽẽn ꞌcĩ ugguba, nẽẽthĩ, ĩrrĩcatta dtiic ꞌcĩ aꞌnyak rũgẽt ꞌcĩ aalla ũdũt, ꞌcĩ hatĩ aaꞌnyuung Ngeertĩ Eeto ngagiita. Baa aaꞌnyĩk Maaꞌnyia Nyekuci ĩnõõnnõ ꞌtirrian ꞌcĩ adĩmanĩ thooꞌthiok ꞌcĩg ĩnaat eeta.”
28Nĩngĩtĩ ajini eeta Yeesu annẽẽkĩ, “Ĩcca occa hadĩmanna hutuno, hátĩ hidticatta dtiicanĩ ꞌcĩg adiim Nyekuci?”
29Ẽdẽcĩ Yeesu ĩhõõggõ anneek, “Adiimmuung Nyekuci ngagiit aꞌnyahit lemiinit hĩ eet baa ĩꞌthõõa nẽẽnĩ.”
30Nĩngĩtĩ ajini nẽẽg Yeesu annẽẽkĩ, “Thõõth ꞌyioko iina ꞌcĩ ĩnaat eeta ꞌcĩ occa eterꞌtheekeet nii ngagĩĩt, hátĩ helemtiina? Ne occa ꞌyioko ꞌcĩ occa adĩmani nii? 31Baa aduk nyakangaaꞌnya cĩggaang ꞌgẽẽn baa haĩ manna, baa õvvõ nẽẽg horrwaa ꞌcĩ õdõhõhĩĩ kak, hĩcĩ eheeddi ꞌBuuhi cĩ Nyekuci aĩ, ‘Aaꞌnyĩk Nyekuci ĩhõõggõ ũbũnẽẽt ꞌcĩg au hẽẽtahujjieen huduhit.’ ”#Tigiil ꞌBuuk cĩ Luugithõõ 16:4; Nehemia 9:15; Tegellwaanu 78:24-25
32Nĩngĩtĩ annẽẽkĩ Yeesu ĩhõõggõ, “Haduhaakuung dĩdĩ, baa hõllõngaa Mũũꞌtha ꞌcĩ aaꞌnyuung ngagiit ũbũnẽẽt ꞌcĩg au hẽẽtahujjieen ko, baa Baaba ꞌcĩ aaꞌnyuung ngagiit ũbũnẽẽt ꞌcĩg ĩĩn dĩdĩ, ꞌcĩg au hẽẽtahujjieen ko. 33Nẽ ũbũnĩ ꞌcĩ aaꞌnyĩk Nyekuci eet ko, ĩnõõnnõ ꞌcĩ alluuccia hẽẽtahujjieen hikia haaꞌnyĩk eet cĩg looc nicci rũgẽt.”
34Nĩngĩtĩ annẽẽkĩ nẽẽg Yeesu, “Makayyioohit! Anyeet hatĩ gõõng ũbũnẽẽt iccig hõdõõkõthĩ.”
35Ma ho, ẽdẽc Yeesu ĩĩ, “Hĩĩnĩ naa ũbũnĩ cĩ rũgẽtõ! Ẽẽtĩ ꞌcĩ aku hĩ nganĩĩta, aitiõõ hatĩ hõllõngaa adak ĩnõõnnõ magĩthĩ nẽ ẽẽtĩ ꞌcĩ ẽlẽmma nganĩĩta, hõllõngaa hatĩ aam kõrra. 36Nẽẽthĩ, hĩcĩ huduhaahuung naa ho, ĩcĩttaangu niig nganĩĩt ẽlẽk nẽ aalla hõllõngaa ẽlẽmmaangu buúk. 37Eeta vẽlẽk ꞌcĩg aaꞌnya nganĩĩt Baaba, au hatĩ hĩ nganĩĩta nẽ ẽẽtĩ ꞌcĩ aku hĩ nganĩĩta, hõllõngaa hatĩ hiiggiaeehi tuu. 38Hĩnĩngĩtĩ baa hõllõngaa halluuccia naa hẽẽtahujjieen hikia hĩdĩman tabiinit caannĩ, nẽẽthĩ, baa hakuu naa hikia hĩdĩman tabiinit cĩ eet baa ĩꞌthõõannaa nganĩĩta. 39Nẽ tabiinit ꞌcĩ adiim ẽẽtĩ ꞌcĩ ĩꞌthõõannaa nganĩĩt ko cieeni. Occa hõllõngaa hadhuheehi eet umwa tuu, eetinii baag aaꞌnya nẽẽnĩ. Nẽẽthĩ, harũgtha hatĩ ĩhõõggõ kõr cĩ decciaanĩt cĩ lootu. 40Hĩnĩngĩtĩ tabiiniti cĩ Baaba, adiim eet vẽlẽk ꞌcĩg acĩn Ngeerĩnĩ nẽ elemit ĩnõõnnõ, humuddia rũgẽt ꞌcĩ aalla ooo nẽ hũrũgũthaa ĩhõõggõ kõr cĩ decciaanĩt cĩ lootu.”
41Ma nĩngaata, iita ongoongoyyieek eeta cĩg ꞌJudeei ĩnõõnnõ, hĩnĩngĩtĩ aĩ nẽẽ, “Hĩĩnĩ ũbũnĩ ꞌcĩ aku hẽẽtahujjieen.” 42Nĩngĩtĩ aĩnnĩ nẽẽg, “Hõllõngaa nooyyia Yeesu ngeertĩ Yothebo cieeni, ꞌcĩ haga naag maaꞌnyĩ hĩ aattĩnnĩ? Inni gõõng hĩĩ nẽẽ, ‘Hakuu hẽẽtahujjieen ko’?”
43Ma ho, edecoothĩk Yeesu ĩhõõggõ ĩĩnnĩk, “Ibilli thõõth ꞌcĩ ongoongoonnu nyaagwaana ho. 44Aitiõõ eet ꞌcĩ aku hĩ nganĩĩt, hatĩ nga hĩꞌthõõa Baaba baa ĩꞌthõõannaa nganĩĩt tõõ nẽ harũgtha hatĩ naa ĩnõõnnõ kõr cĩ decciaanĩt cĩ lootu. 45Eheeddi ꞌBuuhaa cĩ Põrõvẽtaaꞌnyanu aĩ, ‘Alliman hatĩ Nyekuci ĩhõõggõ vẽlẽk.’#Tigiil ꞌBuuk cĩ Iꞌthaia 54:13 Nẽ eeta vẽlẽk ꞌcĩg athĩhĩ Maaꞌnyĩ nẽ illimatta thõõth hĩ ĩnõõnnõ, au hatĩ hĩ nganĩĩta. 46Nga hĩcĩn eet umwaa Baaba, nẽẽthĩ, eet baa aku hĩ Nyekuc dioo ꞌcĩ ĩcĩn ĩnõõnnõ.
47“Haduhaakuung dĩdĩ, ẽẽtĩ ꞌcĩ ẽlẽmma nganĩĩta, ammũda hatĩ nẽẽ rũgẽt ꞌcĩ aalla ooo. 48Hĩĩnĩ naa ũbũnĩ ꞌcĩ rũgẽtõ. 49Baa aduk hĩbaangĩ baagguung baarkit ꞌgẽẽn baa haĩ manna#6:49 Manna: Ĩĩn manna ꞌgẽẽn ꞌcĩ baa ĩꞌthõõak Nyekuci eet cĩg Ĩꞌthĩraẽlĩ baa aattĩg horrwaa ꞌcĩ õdõhõhĩĩ irkiꞌnyia hẽẽn ꞌwec. Tigiil ꞌBuuk cĩ Luugithõõ 16:1-36. horrwaa ꞌcĩ õdõhõhĩĩ kak nẽ baa aalla adaahĩ noho. 50Nẽẽthĩ ꞌyioko, ũbũnĩ ꞌcĩ alluuccia hẽẽtahujjieen cieeni ꞌcĩ occa aduk ẽẽtĩ nẽ hõllõngaa adaahĩ ũdũt. 51Hĩĩnĩ naa ũbũnĩ cĩ rũgẽtõ baa alluuccia hẽẽtahujjieen. Eeta ꞌcĩg aduk ũbũnĩ icci, arũgĩ hatĩ nẽẽg ũdũt. Ĩĩn ũbũnĩ ciee ẽlẽ caannĩ ꞌcĩ hatĩ haaꞌnyihi eet cĩg looc nicci, hátĩ hũrũgĩt.”
52Nĩngĩtĩ ẽppẽhanõõnĩ eeta cĩg ꞌJudeei ẽmmẽn aĩnnĩ, “Occa gõõng aaꞌnyeet ẽẽtĩ ciee ẽlẽ cĩnnĩ hadahit hutuno?”
53Nĩngĩtĩ annẽẽkĩ Yeesu ĩhõõggõ, “Haduhaakuung dĩdĩ, má hõllõngaa aduku ẽlẽ cĩ Ngeertĩ Eeto nẽ uhuddu biyyi cĩgĩnnĩg, aitiõõ rũgẽtĩ hĩ ngagiit tõõ. 54Ẽẽtĩ ꞌcĩ aduk ẽlẽ caannĩ nẽ ũhũd biyyi cĩgannĩg, ammũda hatĩ rũgẽt ꞌcĩ aalla ooo nẽ harũgtha hatĩ naa ĩnõõnnõ kõr cĩ decciaanĩt cĩ lootu. 55Hĩnĩngĩtĩ ĩĩn ẽlẽ caannĩ ꞌgẽẽn dĩdĩ nẽ ĩĩtõ biyyieeta cĩgannĩg biyyi ꞌcĩg ahũdĩ dĩdĩ. 56Nẽ ẽẽtĩ ꞌcĩ aduk ẽlẽ caannĩ nẽ ũhũd biyyi cĩgannĩg, aalla hatĩ nẽẽ hĩ nganĩĩta nẽ haalla hatĩ naa buúk hĩ ĩnõõnnõ.
57“Baa ĩꞌthõõannaa nganĩĩt Baaba ꞌcĩ arũgĩ nẽ harugi naa buúk, hĩnĩngĩtĩ ĩnõõnnõ. Nẽ ẽẽtĩ ꞌcĩ aduk ẽlẽ caannĩ, arũgĩ hatĩ nẽẽ buúk, hĩnĩngĩtĩ nganĩĩta. 58Ũbũnĩ baa aku hẽẽtahujjieen cieeni. Baa aduk hĩbaangĩ cugguung manna nẽ aalla adaahĩ noho, nẽẽthĩ, ẽẽtĩ ꞌcĩ aduk ũbũnĩ icci, arũgĩ hatĩ nẽẽ ũdũt.”
59Baa õthõõth Yeesu thooꞌthiok iccig, baa nga alliman nẽẽ eet ꞌCieethaa cĩ Laiitto#6:59 ꞌCieeth cĩ Laiitto: Baa gõõng aꞌnyak eeta cĩg ꞌJudeei ꞌCieethi ꞌcĩg mẽẽlĩg cĩg Laiittak ꞌtaaũnnioohĩĩ cĩggĩĩng. Baa gõõng aluttiaak nẽẽg ꞌCieeth cĩ Laiitto Kõrraa cĩ ꞌYiommaanõ halaacõ Nyekuc nẽ itigiilito Thõõth cĩnnĩ. Kapernauma.
Thooꞌthiok cĩg rũgẽt ꞌcĩ aalla ooo
60Ma baa athĩhĩ nuyyiooha cĩgĩnnĩg thõõth icci ho, iita othoothito ꞌcĩg mẽẽlĩg ĩĩtõ, “Õkõmĩ ꞌlimmanĩ ciee gẽrrẽẽt, nganĩ ꞌcĩ occa ẽlẽmĩ?”
61Ma baa aga Yeesu ngaatĩ õngõõngõĩ nuyyiooha cĩgĩnnĩg ko, ikia ĩĩnnĩk ĩhõõggõ, “Ĩtĩkĩanuung ngagiit thõõth ciee thõng? 62Ma hatĩ ꞌyioko icittu Ngeertĩ Eeto ngaatĩ õtõdĩ õkõõĩ hẽẽtahujjieen ĩĩ baa akuuni! 63Lori ꞌcĩ aaꞌnyĩk eet rũgẽt, ĩĩn ẽlẽ iding haaga. Nẽ thooꞌthioha ꞌcĩg haduhaakuung naa ho, ĩĩn lori nẽ ĩĩn rũgẽt. 64Nẽẽthĩ, aattiyyu niig ũgẽẽgĩ ꞌcĩg hõllõngaa elemmu thõõth caannĩ.” Baa õthõõth Yeesu hoti, hĩnĩngĩtĩ baa aga nẽẽ ĩĩcĩ oou, ngaatĩ aattiyyi nuyyiooha ꞌcĩg hõllõngaa ẽlẽmĩ ĩnõõnnõ nẽ aga eet ꞌcĩ hatĩ õhõppõõcan ĩnõõnnõ ho. 65Nĩngĩtĩ õthõõthĩ Yeesu aĩnnĩ, “Ĩnõõ ꞌcĩ haduhaakuung naa ngagiit hanneekuung, aitiõõ ẽẽtĩ ꞌcĩ aku hĩ nganĩĩt, nga hĩꞌthõõa Baaba tõõ.”
66Ma ngaati, iita ũtũbũrĩt nuyyiooha ũgẽẽgĩ ꞌcĩg mẽẽlĩg ngaatĩ anũĩ Yeesu.
67Nĩngĩtĩ ajini Yeesu nuyyiook cĩgĩnnĩg ĩĩn õmmõtõ hĩ ꞌramma ho annẽẽkĩ, “Aitiõõ niig buúk hõllõngaa adiimmu ũũnnĩkaangu?”
68Ẽdẽcĩ ꞌThimõõnẽ Pẽẽtũrũ ĩnõõnnõ anneek, “Makayyioohit! Nganĩ umwaa tarĩ ꞌcĩ occa hooyyia naag ko? Thõõth cunni dioo ꞌcĩ aaꞌnyeet rũgẽt ꞌcĩ aalla ooo! 69Helemmi naag nganiit nẽ hagayyia ngaatĩ ĩĩnnĩ nii Loholeec ꞌcĩ Odoyyii ꞌcĩ Elleemi cĩ Nyekuci.”
70Ẽdẽcĩ Yeesu ĩhõõggõ anneek, “Nga nooyyia hẽbẽraauung naa ngagiit ꞌcĩg iiginnu õmmõtõ hĩ ꞌramma ho? Nẽẽthĩ hinnia, aaĩ eet umwaa hõrggẽẽnaa cunuung ꞌcĩ ĩĩn lori ꞌcĩ abathĩ!” 71Baa õthõõth Yeesu ꞌJuuda, ngeertĩ eet ꞌcĩ haĩ ꞌThimõõnẽ Ithkarioote, ꞌcĩ hatĩ õhõppõõcan ĩnõõnnõ kõr umwa. Tananga baa aaĩ ꞌJuuda buúk nuyyiõõhĩĩ ꞌcĩg ĩĩn õmmõtõ hĩ ꞌramma ho.
Currently Selected:
Yõaannẽ 6: did
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc., All rights reserved.