Yõaannẽ 12

Uud Maria Yeesu õlõõ cĩ Bẽthani

(Tigiil Maatteeo 26:6-13; Maarko 14:3-9)

1Ma waathinnioohĩĩ ꞌcĩg ĩĩn tõrkõnõn õõa cĩ Kõr cĩ Haangittõõ, ikia ũũk Yeesu ĩĩcĩ õlõ cĩ Bẽthani, nga baa aaꞌnyĩkĩ nẽẽ Laaꞌtharõ hũrũga daahĩtha. 2Ma nĩngaata, ikia aaꞌnyĩhoothĩk ꞌgẽẽn Yeesu bulẽẽttaa baa arũgthaanĩ nẽẽ Laaꞌtharõ. Baa Maarta ꞌcĩ ẽꞌngẽr ꞌgẽẽn baa aauto eeta vẽlẽk loota hĩ Laaꞌtharõ. 3Nĩngĩtĩ attihaanĩ Maria ngõõrrõ umwa ꞌcĩ õꞌngõlĩ ẽmmẽdĩ nẽ udduutik ꞌthõõnĩĩ cĩg Yeesu. Ma ho, upuppuucan ĩmaa cĩgĩnnĩg, nĩngĩtĩ allũnganĩ muyuuhi ꞌcĩ ngõõrrõ nicci ꞌcieeth hũtũrũũr.

4Baa aaĩ nuyyioohiti umwaa ꞌcĩ haĩ ꞌJuuda Ithkarioote nĩngaata, ĩnõõnnõ ꞌcĩ hatĩ õkõ õhõppõõcan Yeesu nẽ ijino ĩĩ, 5“Má occa baa hũtũũĩ ngõõrra ciee ꞌdinaarꞌnya ꞌmiiaꞌnya iyyio nẽ aanytĩhoothĩk ꞌrabbẽẽta pĩĩrnattiaak?” 6Baa õthõõth ꞌJuuda hoti, hõllõngaa hĩnĩngĩtĩ ammĩnan nẽẽ eet ꞌcĩg appĩĩrna thõng, baa ĩĩn nẽẽ igorriaahit nẽ ĩĩn eet ꞌcĩ itiangĩth ꞌrabbẽẽta, gõõng attiha nẽẽ ꞌrabbẽẽt ꞌcĩg itiangꞌthĩ, adticanĩ thooꞌthiok ꞌcĩg adiim nẽẽnĩ.

7Ẽdẽcĩ Yeesu ĩnõõnnõ anneek, “Tũngeek loholeec icci ẽmmẽn, baa adiim occa itiangĩth nẽẽ ngõõrrõ icci, hẽrẽ kõr ꞌcĩ hatĩ hadaiini naana. 8Arũmeennu hatĩ niig hõdõõkõthĩ hĩ eet ꞌcĩg appĩĩrna, nẽẽthĩ, aitiõõ hatĩ hõllõngaa harũmĩ hĩ nganĩĩt ũdũt.”

9Ma baa ĩthĩhĩt eeta cĩg ꞌJudeei vẽlẽk aĩ õdõlan Yeesu, iita uluttia nẽẽg hiita hĩcĩnĩt Yeesu hĩ Laaꞌtharõ baa arũgtha nẽẽ daahĩtha buúk. 10Ma ho, iita utuhanit makayyiooha cĩg paadĩrꞌnyaannu thõõth ꞌcĩ aruhi Laaꞌtharõ buúk, 11hĩnĩngĩtĩ thõõth baa arũgthaanĩ Yeesu ĩnõõnnõ daahĩtha, ꞌcĩ baa aaꞌnyĩk eeta cĩg ꞌJudeei ꞌcĩg mẽẽlĩg hũtũngteek makayyiook cĩg paadĩrꞌnyaannu nẽ elemit Yeesu.

Bulẽẽnĩt ꞌcĩ adukni Yeesu ꞌJeruꞌthalẽm

(Tigiil Maatteeo 21:1-11; Maarko 11:1-11; ꞌLuuka 19:28-40)

12Ma loohoth cĩnnĩ, ikia ĩthĩk lothippiti cobbi gẽrrẽẽt ꞌcĩ baa aku Karramaawa aĩ, ovvooyyia Yeesu ꞌgõõla, aku aduhun ꞌJeruꞌthalẽm. 13Ma nĩngaata, itikta nẽẽg taba cĩg mĩlĩlaannu nẽ õõt ithirriamattõõthĩ Yeesu nẽ awacaktõõthĩ ꞌjieena ĩĩtõ,

“Hĩdĩhĩthĩt Nyekuc!”

“Aꞌnyĩĩk Nyekuc haggatan eet ꞌcĩ aku ꞌthaarĩĩ cĩg Makayyiookto!”#Tigiil ꞌBuuk cĩ Tegellwaanu 118:25-26

“Aꞌnyĩĩk haggatan Nyekuci habu cĩ Ĩꞌthĩraẽlĩ!”

14Ma ho, ũmmũda Yeesu moolĩt cĩ thigiiro nẽ ataadoothĩk hĩcĩ eheeddi ꞌBuuhaa cĩ Nyekuci aĩ,

15“Tĩnaatĩ ꞌThionĩ,#12:15 ꞌThion: ꞌThaara ꞌcĩg haĩ ꞌThion ko, ĩĩn ꞌthaar ũgĩ cĩg ꞌJeruꞌthalẽmĩ. ma hiꞌngolli,

cĩĩn nõõ habu cunni ngaatĩ

ovvooyyianĩ moolĩtaa cĩ thigiiro.”#Tigiil ꞌBuuk cĩ ꞌThakaria 9:9

16Ĩĩcĩ oou, baa hõllõngaa aga nuyyiooha cĩg Yeesu thõõth icci. Ma baa ubuluthi Yeesu ẽlẽk, iita agayyiõõthĩ nẽẽg ngaatĩ baa eheedini thõõth ciee ꞌBuuhaa cĩ Nyekuci nẽ ĩdĩmatteek eeta ĩnõõnnõ thooꞌthiok iccig.

17Ikia ĩꞌthaanĩk lothippiti baa arũmĩ hĩ Yeesu kõr baa arũgthaanĩ nẽẽ Laaꞌtharõ daahĩtha, eet nyeemuut. 18Ma baa athĩhĩ eeta ꞌcĩg mẽẽlĩg ngaatĩ adticanĩ Yeesu thõõth ꞌcĩ ĩnaat eeta, ꞌcĩ arũgthaanĩ nẽẽ Laaꞌtharõ daahĩtha ho, iita õõt ommottio nẽẽg hĩ Yeesu. 19Nĩngĩtĩ õthõõthõnĩ Variꞌtheei ẽmmẽn aĩnnĩ, “Iittiõõ ꞌgii ꞌcĩ occa nga hadĩman naag tõõ. Ĩcĩnĩt nõõ ngaatĩ anũĩ eeta vẽlẽk Yeesu!”

Uduha Yeesu kõr cĩ daahĩth cĩnnĩ

20Baa aattĩg eeta ũgẽẽgĩ ꞌcĩg ĩĩn ꞌGirik eetinii ꞌcĩg baag õõ alayyi Karramaawa ꞌJeruꞌthalẽma. 21Baa aaĩ ẽẽtĩ umwaa ꞌcĩ haĩ Pilippo, ꞌcĩ aku ꞌtaaũnaa cĩ Beꞌthaida looccaa cĩ ꞌGalileea. Nĩngĩtĩ ajini nẽẽg ĩnõõnnõ annẽẽkĩ, “Ẽlẽ! Hadiimma hacĩnna Yeesu.” 22Ma ho, uduhaak Pilippo Andrea thõõth nicci nẽ õõt nẽẽg vẽlẽk uduktaak Yeesu.

23Nĩngĩtĩ ẽdẽcĩ Yeesu ĩhõõggõ annẽẽkĩ, “Õdõlan kõrra ꞌcĩ occa edeeꞌnyianĩ bulẽẽnĩtĩ cĩ Ngeertĩ Eeto. 24Haduhaakuung dĩdĩ, má hõllõngaa adhuhoothĩk hinyomooc cĩ ꞌgẽẽmẽ loota nẽ õtõngõla, aalla hatĩ idiongan odoyyii noho. Nẽ má õtõngõla, aku hatĩ abũtha hĩtĩlĩth haꞌnyaha ꞌgẽẽmẽ ꞌcĩg mẽẽlĩg. 25Ẽẽtĩ ꞌcĩ amĩna rũgẽt cĩnnĩ, adhuheek hatĩ tuu nẽ ẽẽtĩ ꞌcĩ aaburreek rũgẽt cĩnnĩ looccaa nĩĩcĩ, aꞌthũũnnĩ hatĩ rũgẽt cĩnnĩ ho ooo. 26Ẽẽtĩ ꞌcĩ adticanoothĩkaa nganĩĩta, aꞌnyĩĩk hũnũa nganĩĩta nẽ nĩngĩtĩ haayyi naana, aaĩ hatĩ dticciannioohiti caannĩ buúk nĩngaata. Abuluth hatĩ Baaba eet ꞌcĩ adticanoothĩkaa nganĩĩta.

27“Homoꞌthi naa ꞌyioko gẽrrẽẽt nẽ occa ꞌyioko hĩĩ ne? Occa ꞌyioko hĩĩ, ‘Baaba ẽlaawaa kõr nicci?’ Aitiõõ tõõ, dĩdĩ baa hakuu naa loota nĩnga hikia haccananĩ kõr nicci. 28Baaba ꞌnyahaak ꞌthaar cugunnig bulẽẽnĩt!”

Ma ho, ikia mõlõõhĩ umwaa hẽẽtahujjieen ꞌcĩ õthõõth aĩ, “Hubulutha naa ꞌthaar cĩgannĩg ẽlẽk nẽ habuluthi hatĩ tarĩ.” 29Ma baa athĩhĩ lothippiti cĩ eetu molook nicci ho, ammuk hinnia ũgẽẽgĩ aĩ, boroheec ꞌcĩ ẽggẽrẽny ho nẽ ĩĩtõ ũgẽẽgĩ, õthõõthõõ aajĩlõ umwaa hĩ Yeesu.

30Nĩngĩtĩ aduhaakĩ Yeesu lothippit annẽẽkĩ, “Ĩĩn mõlõõhĩ ciee athiknu niig ko, ꞌcĩ eelluung ngagiita, hõllõngaa nganĩĩta. 31Õdõlan kõrra ꞌcĩ etteedini thooꞌthioha cĩg eet cĩg looc nicci nẽ itiggiaoothĩk habuui cĩ looc nicci tuu! 32Nẽẽthĩ, má hõdõngĩ naa hẽẽtahujjieen, halũta hatĩ eet vẽlẽk hiita hĩ nganĩĩta.” 33Baa aduha Yeesu thõõth icci, hẽtẽrẽtha ꞌgõõl ꞌcĩ hatĩ õkõ adaaknĩ nẽẽnĩ.

34Nĩngĩtĩ õthõõthĩ lothippiti aĩnnĩ, “Baa hathĩkna naag aĩ nyattalĩ, aalla hatĩ Krĩstõ ũdũt. Nẽ inni ĩĩ nii odoꞌngi hatĩ Ngeertĩ Eeto hẽẽtahujjieen ko? Nganĩ ꞌcĩ ĩĩn Ngeertĩ Eeto ho?”

35Ẽdẽcĩ Yeesu ĩhõõggõ anneek, “Aaĩ hatĩ lanyit hĩ ngagiit ꞌthaa ꞌcĩ huturi haaga. Õtõõc nga aꞌnyaku lanyit, nga hikia muguuri hĩ ngagiita. Ẽẽtĩ ꞌcĩ õvvõ muguratõõ, ẽrẽk nĩngĩtĩ õkõõĩ. 36Elemit lanyit nga arũmeennu ho nẽ hatĩ iita iittu lõhõlĩ cĩg lanyitaak.” Ma baa ẽdẽcaak Yeesu thõõth, ikia ũũk nẽẽ utuguny ẽlẽ cĩnnĩ.

Aalla nga abũrĩ eeta Yeesu noho

37Tananga baa ĩdĩman Yeesu thooꞌthiok ꞌcĩg ĩnaat eeta ho hẽbẽrẽẽnnĩĩ cĩggĩĩng ẽlẽk, aalla nga abũrĩ nẽẽg ĩnõõnnõ noho. 38Baa aku thõõth ciee aĩ, hátĩ hikia hedeeꞌnyia thõõth cĩ põrõvẽtaac Iꞌthaia baa aĩ,

“Makayyioohit, nganĩ baa ꞌcĩ ẽlẽm nyeemuut cĩnaang,

nẽ nganĩ baa ꞌcĩ ĩcĩn ꞌtirrian cunni cobbi?”#Tigiil ꞌBuuk cĩ Iꞌthaia 53:1

39Baa hõllõngaa ẽlẽmĩ eeta Yeesu, hĩnĩngĩtĩ thõõth baa aĩ põrõvẽtaacĩ Iꞌthaia nẽẽ,

40“Akata Nyekuci hẽbẽrĩ cĩggĩĩng,

nẽ aaꞌnyĩk ooti cĩggĩĩng hilloorito.

Adĩman Nyekuci thõõth icci,

hátĩ hiittiõõ hõllõngaa acĩnĩ nẽẽgĩ,

nẽ iittiõõ hõllõngaa athĩknĩ,

nẽ iittiõõ hõllõngaa õbõda hĩ nganĩĩt nẽ haaꞌnyĩha ĩhõõggõ hũbũttaathõ.”#Tigiil ꞌBuuk cĩ Iꞌthaia 6:10

41Baa aduha põrõvẽtaacĩ Iꞌthaia thõõth icci, hĩnĩngĩtĩ baa ĩcĩn nẽẽ thõõth cĩ bulẽẽnĩt cĩ Yeesu horumwa nẽ õthõõth bulẽẽnĩt cĩ Elliookto.#Tigiil ꞌBuuk cĩ Iꞌthaia 53:1-12

42Nẽẽthĩ, kõr niccia noho, baa mẽẽlĩg makayyiooha cĩg ꞌJudeei ꞌcĩg ẽlẽmĩ Yeesu. Nẽẽthĩ hinnia, baa hõllõngaa ẽdẽẽnya nẽẽg lemiinit cĩnĩĩng, hĩnĩngĩtĩ iꞌngolli Variꞌtheei ꞌcĩg occa iiggiawaak ĩhõõggõ battaala ꞌCieethaa cĩ Laiitto. 43Accamana makayyiooha cĩg ꞌJudeei dĩhĩthẽẽnĩt cĩ eetu hĩllõõan dĩhĩthẽẽnĩt cĩ Nyekuci.

Aku ẽẽla Yeesu eeta

44Baa irrioonĩk Yeesu lothippit moloohaa cobbi anneek, “Ẽẽtĩ ꞌcĩ ẽlẽmma nganĩĩta, hõllõngaa ẽlẽmma nganĩĩt diooni, ẽlẽmĩ eet baa ĩꞌthõõannaa nganĩĩta.” 45Nẽ ẽẽtĩ ꞌcĩ ĩcĩna nganĩĩta, ĩcĩn eet baa ĩꞌthõõannaa nganĩĩta. 46Baa hakuu naa loota nĩnga hĩĩ lanyit, hatĩ hiittiõõ eeta ꞌcĩg ẽlẽmma nganĩĩt hõllõngaa aattĩg muguratõõ.

47“Ẽẽtĩ ꞌcĩ athĩhĩ thooꞌthiok cĩgannĩg nẽ hõllõngaa aꞌthũũnnĩ ĩhõõggõ, hõllõngaa hetteedi naa thõõth cĩnnĩ. Hĩnĩngĩtĩ baa hõllõngaa hakuu naa hikia hẽttẽẽd thõõth cĩ lootu, baa hakuu naa hikia hẽẽla looc nicci. 48Aaĩ ꞌgaadĩ ꞌcĩ hatĩ ẽttẽẽd thõõth cĩ eet ꞌcĩ abũrra nganĩĩta nẽ ũtũbũr ꞌlimman caannĩ. Ẽttẽẽd hatĩ thõõth ciee hothoothi naa ho thõõth cĩnnĩ, kõr cĩ decciaanĩt cĩ lootu. 49Hõllõngaa hothoothi naa ẽmmẽn, haduha naa thõõth ꞌcĩ aduhaaka Baaba baa ĩꞌthõõannaa nganĩĩt hikia huduha. 50Haga naa õkõõĩ thõõth ꞌcĩ aduha Baaba ho eet rũgẽtaa ꞌcĩ aalla ooo. Nẽ thõõth ꞌcĩ haduhaakuung naa ho, ĩĩn thõõth baa aduhaaka nẽẽ nganĩĩt hõthõõthõ.”

Currently Selected:

Yõaannẽ 12: did

Highlight

Copy