Саалтыр 38
38
1Хуор салайааччытыгар Идифумҥа. Давид псалома.
2«Аньыыны саҥарбат туһугар, – диэбитим мин, –
аны суолбун-ииспин кэтэниэм;
аттыбар хара саҥнаах баарын тухары
айахпын хам хатанан сылдьыам».
3Тылбыттан матаммын, ылы-чып бараммын,
мин үтүөнү даҕаны саҥарбат буолбутум,
оттон кутурҕаным өссө ордук дириҥээбитэ,
4сүрэҕим төлөннүү сирэлийбитэ;
санаам-оноом уот кутаа буолбута.
5Дьэ онуоха мин хоммут уоспун хоҥнорбутум:
«Этэн кулу дуу миэхэ, Айыы Тойон, бүтэр уһукпун,
олоҕум күнэ төһө ордубутун;
үйэм хайдаҕын мин билиэхпин баҕарабын.
6Эн миэхэ биэрбит күнүҥ-дьылыҥ баара-суоҕа
биир-икки сүөм эрэ буолуоҕа,
мин үйэм Эн хараххар дуона суох.
Чахчы даҕаны, киһи олоҕо сиккиэр тыал эрэ. Села
7Чахчы даҕаны, киһи күлүк курдук күлүгүлдьүйэр,
туһата суохха сүпсүгүрэр,
мунньар-мунньар да, онто кимиэхэ тиксэрин билбэт.
8Оттон билигин, Айыы Тойон, тугу кэтэһэбин?
Эйиэхэ эрэ мин эрэнэбин.
9Бары буруйбуттан-сэмэбиттэн миигин өрүһүй,
өйө суохтар күлүүлэригэр биэримэ.
10Бу Эн оҥорууҥ буоларын билэн, мин саҥарбаппын,
уоспун сэгэтэ да барбаппын.
11Оо, уурат миигин охсоргун,
Эн охсор илиигиттэн ийэ этим илдьирийдэ.
12Эн киһини, аньыытын иһин дьарыйан,
кини тугу күндүргэппитин барытын,
үөн быһа сиэбит таҥаһыныы, эһэҕин;
чахчы даҕаны, киһи диэн сиккиэр тыал эрэ. Села
13Иһит, Айыы Тойон, мин үҥэрбин,
болҕой мин энэлийэрбин;
хараҕым уутун көрөн, саҥата суох киэр хайыһыма;
Эйиэхэ мин ааһан иһэр ыалдьыт эрэ кэриэтэбин,
бары өбүгэлэрим курдук, кэлии эрэ киһибин.
14Букатын барыам, суох буолуом иннинэ
кыратык үөрүүнү билэ түһэрим туһугар,
кытаанах хараххын миигиттэн араар».
Currently Selected:
Саалтыр 38: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
