Саалтыр 37
37
1Давид псалома. Санатыы.
2 Айыы Тойон, абарбыккын аһардан баран, миигин дьарыйаар,
уордайбыккын уҕарытан баран, буруйдаар.
3Миэхэ Эн охторуҥ хатаннылар,
Эн илииҥ ыараханнык тайанна.
4Эн уордайаҥҥын, эппэр өлүөр сирим орпото,
аньыым-харам таарыйан, уҥуохтарым кыйытталлар.
5Буруйум-сэмэм оройбунан буолла,
ыар сүгэһэрдии ыйанна.
6Өйө суохтук быһыыланаммын,
бааһым сытыган ириҥэнэн туолла.
7Мин, бүк баттатан, санньыйан сырыттым,
уһун күнү быһа санаарҕаатым;
8икки өттүгүм уотунан умайар,
барым барыта бүттэтэ суох.
9Сэниэм эстэн, сырам-сылбам быстан,
сүрэҕим ааспат эрэйиттэн үөгүлээн ылабын.
10 Айыы Тойон, мин баҕарар баҕабын Эн барытын билэҕин,
мин өрүтэ тыынарым Эйигиттэн кистэммэт.
11Сүрэҕим сүүдүйдэ, күүһүм-күдэҕим өһүлүннэ,
хараҕым уота кытта өлбөөдүйэ өстө.
12Доҕотторум, ыалларым, бааспын көрөн, тэйэ тутталлар,
чугас дьонум эмиэ ыраах тураллар.
13Мин тыыммар турунааччылар миигин үктэтэ сатыыллар;
куһаҕаны баҕарааччылар өлөрбүн түстүүллэр,
хайа да күн уодаһыннааҕы саныыллар.
14Оттон мин дьүлэй курдук, истибэппин,
тыла суох курдук, саҥарбаппын.
15Онон тугу да истибэт,
утары этэрэ суох киһи буоллум.
16Эйиэхэ мин эрэнэбин, Айыы Тойон;
Эн хардарыаҕыҥ, Айыы Тойон Таҥарам.
17Ол иһин үҥэбин: «Өстөөхтөрүм сэтэрээбэтиннэр,
бүдүрүйэр кэммэр улахамсыйар этилэр», – диэн.
18Охтон түһэрим миэхэ бу кэллэ,
ыарыым ааһан-араҕан биэрбэт.
19Буруйбун-сэмэбин мин билинэбин,
аньыыны оҥорбуппун кэмсинэбин.
20Оттон өстөөхтөрүм олорбуттарын курдук олороллор,
дьэ өссө ордук бөҕөргөөтүлэр;
төрүөтэ суох миэхэ өстүйээччилэр үксээтилэр.
21Үтүөнү эрэ тутуһарым иһин,
үтүөбүн куһаҕанынан төлөөччүлэр миэхэ өһүрэллэр.
22Оо, хаалларыма миигин, Айыы Тойон;
Таҥарам, миигиттэн тэйимэ.
23Тиэтэй миэхэ көмөлөһөргө,
Айыы Тойон, Быыһааччым миэнэ!
Currently Selected:
Саалтыр 37: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
