Саалтыр 32
32
1 Айыы Тойонтон үөрүҥ, кырдьыктаахтар:
көнө дьон Таҥараны айхаллыыра сиэрдээх.
2Айхаллааҥ Айыы Тойону лира тыаһынан,
ыллааҥ Киниэхэ уон кыллаах арфа доҕуһуолунан.
3Саҥа ырыаны эһиги Киниэхэ ыллааҥ;
кылы имигэстик тардыалааҥ, ньиргиччи саҥа аллайыҥ.
4 Айыы Тойон тыла-өһө кырдьыктаах,
Кини дьайыыта барыта эрэбиллээх.
5Кини кырдьыгы, көнө дьүүлү таптыыр;
Айыы Тойон таптала сири биир гына тайыыр.
6 Айыы Тойон тылынан халлааннар айыллыбыттара,
күн, ый, сулус бары Кини эппитигэр баар буолбуттара.
7Кини байҕал уутун барытын, симииргэ кутардыы, мунньубута,
түгэҕэ биллибэт чүөмпэлэри хасааһыгар уктубута.
8Сир үрдэ бүттүүнэ Айыы Тойонтон саллыахтын;
аан дойду олохтооҕо барыта Кини иннигэр уҥуоҕа хамсыахтын.
9Кини эппитигэр барыта айыллыбыта;
Кини дьаһайбытыгар барыта баар буолбута.
10 Айыы Тойон омуктар сүбэлэрин үрэйэр,
норуоттар былааннарын бурайар.
11 Айыы Тойон сүбэтэ үйэттэн үйэҕэ барар,
Кини сүрэҕин санаата көлүөнэттэн көлүөнэҕэ бэриллэр.
12 Айыы Тойон Таҥаралаах омук,
Кини Бэйэтигэр талан ылбыт норуота, дьоллоох.
13 Айыы Тойон халлаантан сири анаарар,
киһи аймаҕы бүттүүнүн көрөр.
14Кини, бүрүстүөлүгэр олорон,
сир олохтооҕун барытын чинчилиир.
15Барыларын сүрэхтэрин айбыт буолан,
бары дьайыыларын ырыҥалыыр.
16Ыраахтааҕыны халыҥ сэриитэ быыһыа суоҕа,
сэрииһити сүҥкэн күүһэ көмүскүө суоҕа.
17Быыһанарга ат эмиэ эрэбилэ суох,
модун да күүһүнэн өрүһүйүө суоҕа.
18-19 Айыы Тойон хараҕа көрөр Киниттэн куттанааччылары –
дууһабытын өлүүттэн быыһыа, сут кэмигэр аһатыа диэн,
Кини бигэ тапталыгар эрэнээччилэри.
20Биһиги дууһабыт Айыы Тойону кэтэһэр;
Кини биһиэхэ көмөлөһөр, биһиэхэ куйах буолар.
21Кини сибэтиэй аатыгар эрэнэммит,
биһиги сүрэхпит Киниттэн үөрэр.
22Эйиэхэ эрэммиппит курдук, Айыы Тойон,
Эн бигэ тапталыҥ биһиэхэ тосхойдун.
Currently Selected:
Саалтыр 32: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
