Саалтыр 33
33
1Авимелех иннигэр өйө суох буолан кубулуммут Давид, киниттэн үүрүллэн баран, ыллаабыт псалома.
2 Айыы Тойону алгыаҕым хайа да кэмҥэ,
Кинини уруйдуурбун ууратыам суоҕа.
3 Айыы Тойонунан мин дууһам күөн туттуоҕа,
көрсүө-сэмэй дьон маны истэн үөрүөҕэ.
4Уруйдааҥ Айыы Тойону миигин кытта,
бары бииргэ айхаллыаҕыҥ Кини аатын.
5 Айыы Тойону көрдүүрүм иһин Кини миигин иһиттэ,
бары суоһуур кутталтан миигин өрүһүйдэ.
6Хараххытын Киниттэн араарбакка, сырдыы-сыдьаайа сылдьыҥ,
оччоҕо эһиги сирэйгит хаһан да кытарыа суоҕа.
7Бу дьадаҥы киһи Таҥараны ыҥырбыппар,
Айыы Тойон истэн, бары кыһалҕабыттан быыһаата.
8 Айыы Тойонтон куттанар дьону тула
Кини Аанньала сылдьан, кинилэри өрүһүйэн ылар.
9Кэлиҥ, бэйэҕит билиҥ Айыы Тойон хайдахтаах үтүөтүн!
Ким Киниэхэ эрэнэр, ол дьоллоох.
10 Айыы Тойонтон куттаныҥ эһиги, Кини сибэтиэйдэрэ;
Киниттэн куттанар дьон тугунан да тутайбаттар.
11Эдэр хахайдар, аһылык булбакка, аччыктыыллар,
оттон Айыы Тойону көрдөөччүлэр
хайа да үтүөттэн маппаттар.
12Кэлиҥ, оҕолоор, миигин истиҥ:
мин эһигини Айыы Тойонтон толлорго үөрэтиэм.
13Эһигиттэн ким олох олоруон баҕарар,
үтүөнү көрөр туһугар, уһун үйэлэниэн саныыр,
14ол, куһаҕаны саҥарбаттыы, тылын кыана тутуннун,
албыннык тыллаһартан туттуннун.
15Куһаҕантан тэйэн биэриҥ, үтүөнү оҥоруҥ,
или-эйэни көрдөөҥ, онуоха эрэ дьулуһуҥ.
16 Айыы Тойон хараҕа көнө дьону көрөр,
Кини кулгааҕа кинилэр үөгүлэрин истэр.
17Оттон хара дьайдаахтарга Айыы Тойон утары турунар,
кинилэри сир үрдүттэн суола суох соторго сорунар.
18Көнө дьон көмө көрдүүрүн Айыы Тойон истэр,
кинилэри бары кыһалҕаларыттан өрүһүйэр.
19 Айыы Тойон самныбыт санаалаахтарга чугас,
Кини сүөм түспүттэри быыһаан ылар.
20Көнө киһи элбэх эрэйи көрсөр эрээри,
кинини барытыттан Айыы Тойон өрүһүйэр.
21Кини кырдьыксыт бары уҥуоҕун харыстыыр,
онон биирин да тоһуттарыа суоҕа.
22Хара дьайдааҕы бэйэтин дьайа өлөрүөҕэ,
кырдьыксыты абааһы көрөөччү өлүөҕэ.
23 Айыы Тойон кулуттарын олоҕун толуйан ылыаҕа,
Киниэхэ эрэнээччилэртэн ким да буруйданыа суоҕа.
Currently Selected:
Саалтыр 33: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
