Иона 3
3
Иона АЙЫЫ ТОЙОҤҤО бас бэринэр
1АЙЫЫ ТОЙОН Ионаҕа иккиһин эппитэ: 2«Айаҥҥа тур! Улахан куоракка Ниневияҕа баран, Мин эйиэхэ тугу этэрбин олохтоохторго иһитиннэр». 3Бу сырыыга Иона туох да уталытыыта суох айаҥҥа турбута: АЙЫЫ ТОЙОН соруйбутун курдук, Ниневияҕа аттаммыта.
Ниневия буоллаҕына сүүнэ улахан куорат этэ: усталаах туоратын киһи үс күнүнэн эрэ кэрийэн бүтэрэрэ. 4Иона куоракка киирэн биир күннүк суолу ааһан баран: «Аны түөрт уон хонугунан Ниневия урусхал буолуоҕа!» – диэн биллэрбитинэн барбыта.
5Онон Ниневия олохтоохторо Таҥараны итэҕэйэн, ким да аһыа да, иһиэ да суохтаах кураанах күннэрин биллэрэн, кыратыттан улаханыгар тиийэ бука бары кутурҕан таҥаһын#3:5 …кутурҕан таҥаһын… – Былыр дьон, аньыыларын билинэн үҥэллэригэр, сыгынньах эттэригэр тэбиэн түүтүттэн өрүллүбүт хатыылаах, мара-сара таҥаһы кэтэн баран, астан аккаастанан кураанах күннэнэллэрэ. таҥныбыттара. 6Ити туһунан сурах Ниневия ыраахтааҕытыгар тиийбитигэр ыраахтааҕы, бүрүстүөлүттэн туран, мааны таҥаһын устан кэбиспитэ, кутурҕан таҥаһын таҥнан баран, күл кутуллубут сиригэр олорбута. 7Кини бэйэтин уонна үрдүк сололоохторун ааттарыттан Ниневияҕа маннык ыйааҕы таһаарбыта: «Ким да аска-үөлгэ чугаһаабатын, ууну испэтин. Дьиэ сүөһүтүн эмиэ, ынахтары да, барааннары да, мэччитэ ыыппатыннар, уулаппатыннар. 8Дьон барыта кутурҕан таҥаһын таҥнан, сүөһүтүн эмиэ оннук таҥаһынан бүрүйэн баран, туох баар күүһүн ууран туран Таҥараны ыҥырдын. Хас биирдии киһи аньыылаах суолу тутуһарын, күүһүнэн өттөйөрүн уураттын. 9Туох билэр, баҕар, Таҥара санаата уларыйан уордайбыта уҕарыйыа, оччоҕо биһиги өлүөхпүт суоҕа».
10Ниневия олохтоохторо аньыылаах суолларыттан туораан быһыылара-майгылара көммүтүн көрөн, Таҥара, санаата уларыйан, кинилэргэ ыытыах буолбут алдьархайын ыыппатаҕа.
Currently Selected:
Иона 3: СБК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2008-2022
