MARKA 3

Khut jeng mi khat

(Mat. 12.9-14; Luk. 6.6-11)

1Tuachi`n kikhopna inn ah a lutkik a, huasan ah khutjeng mikhat a om hi. 2Tualeh mi pawlkhat in amah a hektheihna ding un khawlni-in a damsak leh damsaklouh adap-et ua. 3Jesu`n khut jengpa kiangah, “Mipi maiah ding in,” achi a, 4Tuachi`n Jesu`n amauhte kiang ah, “Khawlni a silhoih bawl maw asiang, silsia maw? Hundamna maw asiang, hihlup maw?” chi in adong hi.

Hinanleh amauh a daidide ua. 5A lungtang uh atakjiak a lungkham leh hehkawm a amauhte a et kawikawi nung in, “Khut jengpa kiangah na khut jan in,” achi a. Aman a jankhia a, tuachi`n a langkhat bangin ahung damsiangta hi. 6Tuachi`n Pharisaite a pawtkhia ua Jesu thah ding dan Herod pawl a mite tawh a kikum uhi.

Mi tampi`n a zui uh

7Hinanleh Jesu a nungjuite tawh dil lam ah apaita ua; Galili gam a kipan mipi tamtak in anung ajui ua, 8a silbawl thupidan ajak un, Judea gam a kipan, Jerusalem khua a kipan, Idumai gam a kipan, Jordan gal a kipan Tura leh Sidon khuakim a kipan in, mipi tamtak a kiangah a hungpai ua. 9Mipite jiakin amah a ding a gunkuang neu khat mansa a koih ding in a nungjuite thu ahilh a, atuachih keileh ahung nehgawp ding uh, achi hi. #Mrk. 4.1; Luk. 5.1-3. 10Aman mi tampi ana damsakta a, tuachi`n natna nei jousiahin amah a khoihkhak theihna ding un abawh lutlut uhi. 11Kha giloute`n amah amuhtak un amai a puk in, “Nang Pasian Tapa nahi chi in a kikoujel uhi!”

12Hinanleh aman amah kua hihiam chih gendoklou dingin khauhtak in akham hi.

Jesu`n Nungjui Sawmlehnihte atel

(Mat. 10.1-4; Luk. 6.12-16)

13Jesu mualtung lam ah a kahtou a, adeihtuamte a sam a, amau a kiangah avapai ua. 14“Tualeh a kiang a om ding leh a thupuak gen a asawl ding in sawmlehnihte a namdet a, 15tualeh damloute damsak theihna leh, dawite nohdok theihna thuneihna nei ding in.”

16Ama seh sawnlehnihte hihte ahi uh: Simon (Peter chia amin aphuak pa); 17Zebedi tapa Jakob leh a sanggampa Johan, (Aman Bonerges a sa, “Huapen van ging tapa chihna ahi”); 18Tualeh Andru, Philip, Bartholomai, Mathai, Thoma, Alphai tapa Jakob, Thaddai, Kananmi Simon, 19tualeh a mansakpa Juda Iskariot zong ahi uh; Tuachi`n amauhte innsung ah alut uhi.

Jesu leh Beelzebul

(Mat. 12.22-32; Luk. 11.14-23; 12.10)

20Tualeh amauhte an na-ngawn netheilou khop in mipi ahung kikhawm kik ua. 21A inkuanpihte`n hihthu ajaktak un, “A lungsim venglou ahita chi in pummat asawm uhi.”

22Tualeh Laigelhmite Jerusalem a pat a hungpaisukte`n, “Beelzebul pai ahi, dawimangpa jiakin ahi dawite adelhdok achi ua.” #Mat. 9.34; 10.25.

23Tuachi`n Jesu`n amauhte asam a akiang uah gentehna in thu agen a, “Bangchi`n Setan in Setan adelhdok diai? 24Gamkhat kilangkhen in kidouleh agam ading thei kei ding. 25Tualeh innsung khat kilangkhen in kidouleh, hua inkuan zong adingdok kei ding hi. 26Setan zong amah leh amah kidou in kilangkhen leh adingdok jou kei ding a, a mangthang jaw ding hi.

27“Mi kuaman mihatpa ka`n masa loupi in mihatpa inn a lut in avan a hihsiatsak ngaikei, a ka`ntawm jawh chiangin ahihsiatsak thei pan ding hi.

Ngaihdam theihlouh khialhna.

28“Adiktak in kung hilh ahi, mihing tate akhialhna jousiah uh leh Pasian gensiatna lam a a gensiatna jousiahte uh ngaihdam ahi ding ua. 29Hinanleh kuapeuh khasiangthou gensia bangchiktan in ngaihdam ahikei ding a, tangtawn khialhna a lauhhuai ah aomjaw ding,” achi hi. #Luk. 12.10. 30“Dawinin-pai ahi achihjiak ua hihthu agen ahi.”

Jesu nu leh a sanggamte

(Mat. 12.46-50; Luk. 8.19-21)

31Tuanung in anu leh a sanggamte a hungpai ua, inn Pualam a dingin amah sam dingin mi asawl uhi. 32Tualeh akim ah mipi atou diamduam ua, a kiangah, “Inn pualam ah nanu leh na sanggamte`n ahung jong uh,” achi ua.

33Tualeh aman akiang uah, “Ka nu leh ka sanggamte kuate ahia?” achi a. 34Tuachi`n akim a toute a en kawikawi a, “En un! Ka nu leh ka sanggamte! achi hi. 35Kuapeuh Pasian deihlam bawl taphot ka sanggampa, ka sanggamnu leh kanu ahi,” achi hi.

Currently Selected:

MARKA 3: THKHBSI

Highlight

Copy