MARKA 1

Baptispa Johan thugen

(Mat. 3.1-12; Luk. 3.1-18; Jhn. 1.19-28)

1Pasian Tapa Jesu Krist tangthupha kipatna; 2Jawlnei Isaiah laibu ah:

“Ngaiin, ‘ka sawltak na maiah ka sawl a,

aman na lampi abawl ding.’ #Mal. 3.1.

3Gamdaia kikou aw khat in,

‘Toupa lamlian sial unla;

a lampite tangsak un!’ ”

achi, chia gelh bang in. #Isa. 40.3.

4Johan in gamdai ah a baptis a, “sil bawlkhialhte ngaihdamna ding a kisikna baptis thu gen in a hungpawt hi.” 5Tualeh Judea gam a mi jousiah leh Jerusalem a omte a pawt ua, a kiangah apai ua, a khialhna uh phuangkhia in, Jordan luiah akiang ah baptisma atangchiat uhi.

6Tualeh Johan in sangawngsau mul puan in asilh a savun kawng-gak in akawng a gak a, kauphe leh khuaiju ane hi. #2 Kum. 1.8. 7Tualeh, “Ka nung a hungpaipa kei sang a hatjaw ahi. Kun-a ama khedap khau sutding nangawn chinlou ka hi. 8Ken tuiin nou kung baptis a, hinanleh aman Khasiangthou in noute a hung baptis ding chi`n thu agen hi.”

Jesu Baptisma tanna leh khem a omna

(Mat. 3.13—4.11; Luk. 3.21,22; 4.1-13)

9Tualeh huahun laiin hichi ahi a, Jesu Galili gam Nazareth khua a kipan in a hungpai a, Johan kiangah Jordan luiah baptisma a tangta a. 10Tualeh tui a pat ahung pawttak in, van akihong a, Khasiangthou vakhu bang a hung kumsuk, atung a tuang amu a. 11Tualeh van a pan aw khat a hungging a; “Nang ka Tapa deihtak na hi, na tungah ka kipak mahmah hi,” achi hi. #Gen. 22.2; Psa. 2.7; Isa. 42.1; Mat. 3.17; 12.18; Mrk. 9.7; Luk. 3.22.

Jesu khem a omna

12Tuakhit phet in kha-in amah gamdai ah a-sawl khia pai a, 13Tuachi`n Setan khem a om in gamdai ah ni sawmli a om a. Gamsa gilou lak ah a om a, vantungmite`n a nna a sepsak uhi.

Jesu`n nasep apan

(Mat. 4.12-22; Luk. 4.14,15; 5.1-11)

14Johan thong a akhum nung un, Jesu Pasian gam tangthupha gen in Galili gam ah a hungpai a. 15“Ahun a tungta, Pasian gam anaita hi! kisik unla tangthupha gingta un!” chi-in. #Mat. 3.2.

16Tualeh Jesu Galili tuipi piau a avak na ah, Simon leh a sanggampa Andru dil a ngenkhuh a mu a, amauhte ngamanmi ahi uhi. 17Tuachi`n Jesu`n a kiang uah, “Kei hungjui un, mihing man dingin nou kungbawl ding hi,” achi hi. 18Tuatakin amau`n a ngente uh nusia in amah ajuipai uhi.

19Hua a kipan themkhat a paibehlaileh, Zebedi tapa Jakob leh a sanggampa Johan amu a, amau a ngen uh phawh a gunkuang sung a om ahi ua. 20Tualeh aman amauhte a sam pai a; amauh tegel in zong apa uh Zebedi pen a migoihte utawh gunkuang sungah nusia in ajuita uhi.

Dawimat Pasal khat

(Luk. 4.31-37)

21Tuachi`n Kapernaum khua ah avalut ua; khawlni-in kikhopna inn ah alutpai a, thu ahilh hi. 22Tualeh laigelhmite banglou a, thuneihna neimi bang a amauh thu ahilhjiak in, a thuhilh lamdang asa mah mah uhi. #Mat. 7.28,29.

23Tualeh a kikhopna inn uah dawinin pai pasal khat a om a; a kikoukhia a, 24ka tang un hung omsak in, “Nazareth Jesu nang tawh kou bang bawl ding nei ihia? Koute hih mangthang ding a hungpai nahi maw? Nang kua nahia chih kungthei hi. Pasian Misiangthou nahi!” achi hi.

25Hinanleh Jesu`n a phawk a, “Dai inla, asung a kipan in hungpawt in!” achi a.

26Dawinin in amah engbawl a ngaihtak a kikou in asung a kipan ahung pawtkhia hi. 27Tualeh aun un lamdang asa mahmah ua, tuachi`n, “Hih bang ahia? Bang chibang thuhilhna thak ahia? Aman thuneitakin dawininte nasan thu apia a, athu amangjel uh!” chi in, a kidong tuah uhi.

28Tualeh Galili gam kim tengah gamchin ah atanchin a thangsuak pai hi.

Jesu`n mi tampi adamsak

(Mat. 8.14-17; Luk. 4.38-41)

29Tualeh kikhopna inn a pan ahung pawtkhiat khit un Simon leh Andru inn ah, Jakob leh Johan tawh alutpai ua. 30Simon sungnu nattun a damlou in lupna ah ana lum a, tuathu Jesu ahilhpai uhi. 31Tuachi`n amah hungpai in, akhut a tuin a phongtou a, tuachi`n a nattun adamta a, a nna uh a sepsakta hi.

32Tualeh nitaklam nitum nung in damlou jousiah leh dawimatte a kiangah ahung paipih uhi. 33Tualeh khuapi sung a mi jousiah kotpi bul ah ahung ki khawmkhawm ua. 34Aman mi tampi natna tuamtuam a nate a damsak a, dawite tampi zong a hawlkhia a; hinanleh dawite`n amah kua hihiam chih thei ahihman in, aham uh aphalkei hi.

Jesu`n Galili ah thu agen

(Luk. 4.42-44)

35Jingsang baihtak in, khuavak ma in, Jesu athou a, a pawtkhia a, munsip ah apai a, huamun ah athumta ahi. 36Tualeh Simon leh akiang a omten azong ua, 37Amah amuhtak un a kiangah, “Mi jousiahin nang a hungjong uhi!” achi uhi.

38Aman akiang uah, “Aban a khuate ah paini. Hualak ah zong ka thupuak ka phuankhiat theih nang in, tua mah kungpaina san ahi,” achi hi. 39Tuachi`n a kikhopna inn uah a thupuak gen in Galili gam teng ah apai kawikawi a, dawite a hawlkhia hi. #Mat. 4.23; 9.35.

Phak damsakna

(Mat. 8.1-4; Luk. 5.12-16)

40Phak mi khat a kiangah a hungpai a, amai a khupdin in; “Na ut leh nung siangthousak thei hi, chi`n ahung ngen ngutngut a.” 41Tuachi`n Jesu`n amah a lainat mahmah a, akhut ajan a, akhoih a, “Ka ut hi, na siangthouta in!” achi hi. 42Hihthu agen khitkhit in, phak in amah a nusiapai a, ahung siangthouta hi. 43Jesu`n khauhtak a khamna tawh amah a sawlkhiata hi. 44“Kuamah kiang ah bangmah genlou dingin pilvang in. Hinanleh Siampu kiang ah vakilak inla, na kisiansuahna dingin Mosi-in sil a sehte lan in, a theihchet na ding un,” achi hi. #Lev. 14.1-32.

45Hinanleh amah a paikhia a tua thu mipi lak ah a genjakta hi. Tuabang ahihman in Jesu a langtang in khuapi ah a lutthei takei a, gamdai kuamah omlouhna ah a omjawta hi. Hinapi`n munteng a pat in a kiangah mite a hungpaijel uhi.

Currently Selected:

MARKA 1: THKHBSI

Highlight

Copy