MATHAI 26

Jesu thahding sawmna

(Mrk. 14.1,2; Luk. 22.1,2; Jhn. 11.45-53)

1Tualeh hichi ahung hi a, Jesu`n hihthu tengteng a genzoh in a nungjuite kiang ah, 2“Ninih zoh chiangin paikan ankuang luina ahung om ding ahi, tualeh Mihing Tapa kilhden ding a matsak in aom ding hi, chih nathei uhi,” achi hi. #Exo. 12.1-27.

3Tuatakin siampite leh laigelhmite, vantang upate siampi lianpen Kaiapha achih uh inn ah a kikhawm ua, 4tualeh Jesu lungsim a bawl a, man a a thahtheihna ding un akihou ua. 5“Hinanleh ankuang lui ni-in hihdah heh, ahuachih keileh mipi lak ah buaina ahung om khading,” achi uhi.

Bethani a Jesu thaunuhna

(Mrk. 14.3-9; Jhn. 12.1-8)

6Tualeh Jesu Bethani khua a miphak Simon inn a aom laiin, 7Numei khat Alabastar bawm a sathau namtui mantam tak tawiin a kiangah a hungpai a, dohkan a atoulai in, a lutung ah a hungbuak hi. #Luk. 7.37,38. 8Hinanleh a nungjuite`n hih amuhtak un, aheh ua, “Bangding a namawk sukthelthang a hiam?” 9“Hih sathau mantam juak a mijawngte kiang a piaktheih ahi!” achi ua.

10Jesu`n hih atheih in akiang uah, “Bangding a hih numei subuai nahi ua? Amahnu`n ka tung ah silhoihtak abawl hi. 11Mijawngte na kiang uah a omjing ua, hinanleh kei na kiang uah omjing ka hikei hi. #Deut. 15.11. 12Hih thau namtui katung a abuak pen, vuia ka omni a ding a abawl ahi. 13Adiktak in kung hilh ahi, khoimun peuh ah, leitung pumpi ah hih tangthupha akigenna teng ah hih numeinu silbawl zong amah theihjingna dingin agen jel ding uhi,” achi hi.

Juda gin-omlouhna

(Mrk. 14.10,11; Luk. 22.3-6)

14Tuanung in sawmlehnihte lak a khat Juda Iskariot achih uh siampite kiang ah avapai a 15tualeh akiang uah, “Amah na kiang uah hung piakhia leng nou kei bang nung pia ding ua?” avachi a, tualeh amau`n dangka sawmthum piak akhamta ua. #Zek. 11.12. 16Huanung siah amah matsak nang lemtang a zongta hi.

Jesu`n a nungjuite tawh paikan an ane uh

(Mrk. 14.12-21; Luk. 22.7-13,21-23; Jhn. 13.21-30)

17Tanghou tol sawhlouh ankuang luini masapen in, nungjuite Jesu kiang ah a hungpai ua, “Paikan ankuang lui nekna dingin khoiah hung bawlsak le ung na ut ei?” achi ua.

18Tuachi`n aman, “Khuapi ah pai unla, mi khat kiangah: ‘Siapa`n ka hun anaita a, ka nungjuite tawh na inn ah paika`n ankuang ka nekhawm ding uh achi hi, vachi un,’ ” achi a.

19Tuachi`n a nungjuite`n Jesu`n akiang ua ahilh bangin abawl ua, paikan ankuang a bawljouta uhi.

20Tualeh nitak lam a hunghih in nungjui sawmlehnihte tawh an a im ua. 21Anek laiun aman, “Adiktak in kung hilh ahi, nalak ua mi khat in kei ahung mansak ding hi,” achi hi.

22Tuatakin amauh a lungkham mahmahta ua, aban ban in akiang ah, “Toupa kei kahi hiam?” a chichiat ua.

23Tualeh aman adawng a akiang uah, “Ankuang hung sawkpihpa in kei ahung mansak ding hi. #Psa. 41.9. 24Mihing Tapa a tanchin kigelh bang jel in apai ding hi, hinanleh Mihing Tapa mansak ding pa tung agik hi! Huapa piang kei leh amah a dingin ahoihjaw ding hi!” achi hi.

25Tuachi`n amansak dingpa Juda in adong a, “Siapa keimah ka hi hiam?” achi hi.

Aman a kiangah, “Nang man na chita hi,” achi hi.

Toupa nitak an

(Mrk. 14.22-26; Luk. 22.14-20; 1 Kor. 11.23-25)

26Tualeh anek laiun, Jesu`n tanghou ala a, gual ajawl a, abalkek a; tuachi`n nungjuite kiangah apia a, “La unla ne un, hih ka taksa ahi,” achi a.

27Tuazoh in aman nou ala a, kipahthu agen a, a kiang uah apia a, “Na un un, dawn un,” 28“Khialhnate ngaihdamna ding a mi tampi a ding a pawt, hih ka sisan a thukhunthak ahi,” achi hi. #Exo. 24.8; Jere. 31.31-34. 29Hinanleh kung hilh ahi, ka Pa gam a nou tawh athak ka dawnni atun masiah tuban hih grepgah tui ka dawnnawn kei ding, achi hi.

30Tualeh la asak zoh un apawt ua, Olive mual ah apaita uhi.

Peter kitheihmoh bawl nang genkholhna

(Mrk. 14.27-31; Luk. 22.31-34; Jhn. 13.36-38)

31Tuachi`n Jesu`n akiang uah, “Tuja`n chiangin na un un ka tungthu ah lungkia in na omsiang ding ua; ‘Belampu ka jep ding a, belam honte a kithehjak ding uh chih gelh ahi.’ #Zek. 13.7. 32Hinanleh ka thohkik zohnung chiangin, Galili gam ah namai uah ka pai ding,” achi hi. #Mat. 28.16.

33Peter in adawng a, akiang ah, “Mi jousiah na tungthu ah lungkia in omnanle uh, kei pen lungkia in ka omkei ding!” achi hi.

34Jesu`n a kiangah, “Adiktak in kung hilh ahi, tuja`n chiangin, ak khuan ma-in thumvei nung kitheihmoh bawl ding”, achi hi.

35Peter in a kiang ah, “Nang tawh sikhawm ding hinanleh zong kung kitheihmoh bawl kei ding hi!” achi a.

Huachimah bangin nungjuite jousiahin zong a chichiat uhi.

Jesu`n Gethsemani huan ah athum

(Mrk. 14.32-42; Luk. 22.39-46)

36Tuazoh in Jesu amauhte tawh munkhat Gethsemani achih uh atung ua, tualeh a nungjuite kiangah, “Pa`m a ka vathum kal in hiah nanatou un,” achi a. 37Tualeh aman Peter leh Zebedi tapate nih azohpih a, lungkham in ahung mangbang mahmahta hi. 38Tuachi`n aman akiang uah, “Ka kha a lungkham mahmah a, sihna khop hial ahi. Hiah om unla hung venpih un,” achi hi.

39Amah themkhat avapai gamla deuh a, khupbok in a thum a, “Pa aw, ahihtheih liaileh hih nou in hungpel hen! Ahihhangin kei deihna bang hilou in, nang deihna bang hijaw hen,” achi hi.

40Tuachi`n amah nungjuite kiangah a hungpai a, amauhte ihmu in amu a; Peter kiangah, “Bangchi, nou dakkal khat sung zong hung venpih zoulou nahi uh maw? 41Khemna a na lutlouhna ding un kiveng gige in thum un; kha injaw a ngap a, hinanleh taksa pen ahatkei hi,” achi a.

42Anihveina ding in ava paikhia kik a, athum a, “Pa aw, hih nou ka dawn louh a, hung peltheilou ahihleh, nadeih lam kibawl hen,” achi a. 43Tualeh amah a hungpai a, amauhte ihmu in a mukik a, a ihmut uh asuak mahmah jiak in.

44Tualeh amauhte nusia in avapai kik a, athumveina ding in ava thum kik a, agen ngaiteng mah agen hi. 45Tuakhit in amah a nungjuite kiangah a hungpai a, akiang uah, “Noute ihmu lailai a tawlnga lailai nahi uh maw? En un! Ahun a hungtungta, Mihing Tapa mikhialte khut a matsak in aom ding. 46Thou un, ipai ding uh; En un, kei hung mansak dingpa a hungtungta hi!” achi hi.

Jesu mat a omna

(Mrk. 14.43-50; Luk. 22.47-53; Jhn. 18.3-12)

47Tualeh aman hihthu agen laiin, en-in, sawmlehnihte lak a khat, Juda; siampite leh upate kiang a kipan mipi thupitak namsau leh khetbuk tawite tawh a hungpai a. 48Tualeh amansak ding pa in amauh chiamtehna ahilh masa a: “Ka tawp penpen amah ahi ding hi. Amah man un!” chi-in.

49Tuachi`n amah kintakin Jesu kiangah avapai a, “Chibai, Siapa,” chi`n atawp a.

50Tualeh Jesu`n a kiangah, “Lawm, bang ding a hungpai nahia!” achi a. Tuachi`n Jesu tungah khut akha ua, amanta uhi. 51Tualeh ngaiin, Jesu ompihte lak a mi khat in akhut in asawk a a namsau adokkhia a, siampi silapa asat a, abil a satkhiatsak hi. 52Tuachiah Jesu`n a kiang ah, “Na namsau akoihna ah koih in, Namsau zangmi namsau in asi ding hi. 53Tuin zong vanmite sangguk mun sawmlehnih sang a tamjaw hung sawlsak dingin ka Pa kiang a ngentheilou hungsa nahi uh hiam? 54Hinanleh tuabang hitaleh Laisiangthou bangchi`n ahia ahung tangtuntheih ding?” achi hi.

55Tuahun mah in Jesu`n mipite kiangah, “Guta man ding bangin namsau leh khetbuk tawiin kei man dingin nung pawt uh maw? Niteng in tempul ah noutawh thuhilh in katou a nungman kei ua. 56Hinanleh Jawlneite Laisiangthou thute ahung tangtun theihna ding a, hihte jousiah hung om ahi,” achi hi.

Tuakhit in nungjuite tengteng in a nusia ua, a taimangta uhi.

Vaihawmpawl mai ah Jesu

(Mrk. 14.53-65; Luk. 22.54,55,63-71; Jhn. 18.13,14,19-24)

57Tualeh Jesu mante`n amah siampi Kaiapha inn a laigelhmite leh upate kikhopna ah apaipih ua. 58Hinanleh Peter in siampi inn dong in gamlatak in amah ajui a, avalut a, atawptan theihsawm in silate lak ah avatou hi. 59Tuachi`n siampite leh upate leh vaihawmmite jousiahin, Jesu a thahtheihna ding un, theihpihtu diklou a zong ua; 60hinanleh amukei uhi, theihpihtu diklou tampi hungpai nanle uh amutuan kei uhi. Atawp in theihpihtu diklou nih a hungpai ua 61“Hihpa`n, ‘Pasian tempul hihsia in nithum sung in lamthakthei ka hi achi hi,’ ” achi ua. #Jhn. 2.19.

62Tualeh siampi a dingdok a, “Nang bangmah a dawnglou ding maw? Hihte hung hekna bang chidan ahia?” achi hi. 63Hinanleh Jesu daidide in a om a, tuatak in siampi in a kiang ah, “Pasian hing min in kungvau ahi: Pasian Tapa Krist nahihleh hihlouh hunghilh in,” achi hi.

64Jesu`n a kiang ah, “Na chita hi. Hinanleh kung hilh ahi: tunung chiangin Mihing Tapa silbawltheihna jiatlam a tou leh van meipi tung a hungpai na mu ding uhi!” achi hi.

65Tuachi`n siampi in apuan a botkek a, “Pasian agensia hi! Theihpihtu dang bang i poimoh lai dia! Ngaiun Pasian agensiatna tuin naja uhi! achi hi. #Lev. 24.16. 66Bang na chingaih ua?” achi a.

Amauhte`n adawng ua, a kiangah, “Sitak ahi,” achi uhi.

67Tuachi`n amaiah chil aphih ua; a khuttum un atum ua, khenkhat in akhutphang ua beng in, #Isa. 50.6. 68“Nang Krist! Hunghilh in kua ahia hungbeng!” achi uhi.

Peter in Jesu a kitheihmoh bawlna

(Mrk. 14.66-72; Luk. 22.56-62; Jhn. 18.15-18,25-27)

69Tualeh Peter pualam ah huangsung ah atou a; nungak khat a kiangah a hungpai a, “Nang zong Galilimi Jesu tawh lawikhat nahi,” achi a.

70Hinanleh aman, “Na thugen ka theikei chi`n aun ua amai uah theimoh akipang a.” 71Tualeh innlim a avapawt khiat tak in nungak dang khat in amah ana mu a, huamun a omte kiangah, “Hihpa zong Nazareth Jesu kiang a om ahi,” achi a.

72Hinanleh aman, “Hihpa ka theingai kei achia, kichiam in a kitheihmoh bawl kikta hi!”

73Tualeh tomkhat zoh in huamun a dingte a hungpai ua Peter kiangah, “Nang zong alak ua mikhat hi ngel teh, na ham in akithei hi!” achi ua.

74Tuachi`n aman, “Hihpa ka theingai kei! chi`n hamsia kiloh in a kichiamta hi!”

Tuatakin ak ahung khuangpaita hi. 75Tuatakin Peter in Jesu thugen, “Ak khuanma in nang thumvei nung kitheihmoh bawl ding, achih ahung theikhiata a.” Tuachi`n pualam ah apawt a, akap ngutngutta hi.

Currently Selected:

MATHAI 26: THKHBSI

Highlight

Copy