MATHAI 24

Tempul siatna ding Jesu`n a genna

1Tuachi`n Jesu tempul a pat pawtkhia in apaita a; tualeh tempul kibawldante ensak dingin a nungjuite akiang ah ahung pai ua. 2Tualeh Jesu`n akiang uah, “Hih silte tengteng namu uh maw? Adiktak in kung hilh ahi: sukchip louh a suang kichiang mawng mawng hihsan ah nutsiat ahi kei ding,” achi a, adawng a.

Buaina leh gimthuakna

(Mrk. 13.3-13; Luk. 21.7-19)

3Tualeh Olive mualtung a atoulai in, a nungjuite aguk in a kiangah a hungpai ua, “Hih silte bangchik chiangin ahung om dia, Nung paikik nang leh leitung tawpna ding chiamtehna bang ahi dia, hunghilh in,” achi ua.

4Tuachi`n Jesu`n adawng a akiang uah, “Mi kuamah in ahung khemlouhna dingin pilvang un. 5Mi tampi`n, ‘Krist ka hi!’ chi`n ka min in a hungpai ding ua, mi tampi akhemjou ding uhi. #24.5 Messiah (Heb.) khenkhat ah jakin a om a, Krist (Grik) khenkhat ah jak in a om, a kibang ahi. 6Tualeh kidou leh kidou thuthang naja ding ua, na mangbat louhna ding un pilvang un, hih silte ahung om ding mawng ahi; hinanleh atawpna ahinai kei ding. 7Namtuam leh namtuam, gamtuam leh gamtuam, a kidou ding ua, tualeh mun tuamtuam ah kial atung ding a; natna hi aleng ding a; mun tuamtuam ah jin aling ding. 8Hihte tengteng nausuak nat bang a gentheihna kipatna ahi nalai hi.”

9Huahun chiang in gimthuak dingin ahung mansak ding ua, ahung that ding uh; tualeh kamin jiakin namjousiah huat nahi ding uhi. #Mat. 10.22. 10Huahun chiangin mi tampi apuk ding ua, a kimansak tuah ding ua, a kihua tuah ding uhi. 11Tuachi`n Jawlnei taklou tampi a hungpawt ding ua, mi tampi a khemjou ding uhi. 12Tualeh gitlouhna a hungpung ding jiakin mi tamjaw itna ahung dai ding. 13Hinanleh kuapeuh atawp dong a thuakjoute pen hundam in aom ding. 14Tualeh hih kumpi gam tangthupha nam jousiah theihsakna dingin leitung pumpi ah hilh in aom ding; tuazoh chiangin tawpna a hung om ding hi.

1 Gimthuakna thupi

(Mrk. 13.14-23; Luk. 21.20-24)

15“Tuajiakin buahsaktu ‘kihdakhuai’ Jawlnei Daniel in anagen mun siangthou a ding na muhchiang un,” (asimkha jousiahin theisiam uhen!) #Dan. 9.27; 11.31; 12.11. 16“Huachih hun chiangin Judea gam a omte mual ah tai uhen. 17A inntung a omte a innsung a banghiam lading in hung kumsuk kei uhen. 18Tualeh loua om zong apuante lading in hungkik kei uhen. 19Tualeh huani chiangin agaite leh naungek neite tung agik hi! 20Hinanleh na taimang hun ding uh phalbilai hiam nipilai hiam ahihlouhna dingin thum un! 21Huahun chiangin gimthuakna thupitak ahung om ding a, hichibang gimthuakna thupi leitung pianchil a kipan tunitan in a omngai kei a; om zong a omnawn kei ding hi. #Dan. 12.1; Kln. 7.14. 22Tualeh hih nite suktom hikeileh, mihing kuamah dam in asuakta kei ding; hinanleh telte jiakin huani suktom ahi ding.”

23“Huahun chiangin kuapeuhin na kiang uah, ‘En in! hiah Krist a om!’ ahihkeileh ‘Huah a om!’ achih uleh taksan kei un. 24Krist taklou leh Jawlnei takloute a hungpawt ding a, mikhem nang in chiamtehna thupi leh sillamdang taktak ahung ensak ding ua, ahihtheih liai leh telte nangawn zong ahung khem ding uhi. 25Ngaiun! Ama in kung hilhkholhta ahi.

26“Tuajiakin, na kiang uah, ‘En un! gamdai ah a om!’ achih uleh, pawtkhia kei un; ahihkeileh, ‘En un, Inndan sung ah a om!’— achih uleh taksan kei un. #Luk. 17.23,24. 27Suahlam a kipan a tunphe ahung phet a tumlam tan a asalh bangin, Mihing Tapa a hungpai chiangin zong huachimah bangding ahi.”

28“Sapul omna teng ah langta zong a om ding hi. #Luk. 17.37.

Mihing Tapa hungpai na

(Mrk. 13.24-27; Luk. 21.25-28)

29“Hua gimthuakna nite zohzoh chiangin, ni ahung mial ding a, kha avak nawn kei ding a; van a pat in aksite a hungkia ding a, tualeh vantung silbawl theihnate a kiling ding hi. #Isa. 13.10; Jol. 2.10,31; 3.15; Kln. 6.12; Isa. 13.10; Ezk. 32.7; Jol. 2.10; 3.15; Isa. 34.4; Kln. 6.13. 30Tuahun chiangin Mihing Tapa chiamtehna van ah a hunglang ding a, tuatak chiangin leitung a nam jousiahin asu`n ding ua, tualeh Mihing Tapa sil bawltheihna leh gualzohna thupi tawh van meipi tung a hungpai amu ding uhi. 31Tualeh aman vantungmi pengkul ging ngaihtak tawh a sawlkhia ding a, amau`n atelte lei ningli a kipan, van tawp a kipan alehlam tawp tanpha in akhawm ding uhi.

Theipi kung a gentehna

(Mrk. 13.28-31; Luk. 21.29-33)

32“Tuin theipi kung a kipan hih gentehna jil un: aba ahung meng a, ateh a hungsel chiangin, doupi anai chih nathei uhi. 33Huachimah bangin, nou zong hih silte tengteng na muhchiang un, anaita a, kotbul mahmah ah a omta chih thei un. 34Adiktak in kung hilh ahi, hih silte atunkim masiah tulai khangthakte amang kei ding uhi. 35Van leh lei amang ding a, hinanleh ka thu amang kei ding hi.

Kivengjing a om akulna

(Mrk. 13.32-37; Luk. 17.26-30,34-36)

36“Hinanleh huani leh hun ding pen van a vantungmite in zong theilou, Tapa in zong theilou, ahihhang in Pa bek in athei hi. 37Hinanleh Noah damlai bangin Mihing Tapa hung paikikna zong ahi ding hi. #Gen. 6.5-8. 38Tuijin tun mateng in, Noah gunkuang a alutni tan in ane un, adawn ua, zi leh pasal in akinei uhi. 39Tualeh tuijin atun a, aun ua atawhmang masiah bangmah atheikei uhi. Mihing Tapa hung paikikna zong huachimah bang ahi ding hi. #Gen. 7.6-24. 40Huahun chiangin lou ah pasal mi nih a om ding ua; khat lakmang in a om ding a, khat nutsiat in a om ding. 41Numei nih sumphung ah ansu in a om ding ua, khat lakmang in a om ding a, khat nutsiat in a om ding hi. 42Huajiakin kiging un, bang hun in ahia na Toupa uh a hungpai ding chih na theihlouh jiak un. 43Hinanleh hih thei un: inn neipa`n guta hungpai hun ding theileh, aveng ding a, a inn aluhsak kei ding hi. #Luk. 12.39,40. 44Tuajiakin nou zong kiging zingin om un, na gintaklouh laitak un Mihing Tapa a hungpai ding hi.

Sila gin-om leh gin-omlou gentehna

(Luk. 12.41-48)

45“Tualeh apu in ahunteng a atan ding uh hawmsak ding a a inkuanpihte tung a vaihawm a akoih sila muanhuai leh piltak kuapen ahita diam le? 46Apu a hungpai chiang a sila huachibang a bawl ahung muh, hua silapa ahampha hi! 47Adiktak in kung hilh ahi, aman aneih jousiah tung a thunei dingin abawl ding hi. 48Hinanleh sila gilou in a lungsim in, Ka pu ahung paizok kei ding chi in, 49a silapihte na vuata henla, uain khamte kiangah ne-in dawn in na om taleh. 50Hua silapa pu agintat louhni, a kivenlouh laitak in a hungpai ding a. 51Tualeh amah tunnih asuah ding a, milepchiahte tan bangbang a tangsak ding a, huasan ah kahleh hagawina aom ding hi.

Currently Selected:

MATHAI 24: THKHBSI

Highlight

Copy