MATHAI 16

Chiamtehna agen uh

(Mrk. 8.11-13; Luk. 12.54-56)

1Tuachi`n Pharisaite leh Sadukaite a hungpai ua, amah ze-etna dingin van a kipan chiamtehna amaute ensak dingin a ngen ua. 2Aman a dawnga akiang uah, “Nitaklam ahih chiangin, ‘khua apha ding a hinteh meisan hungsuak na chi uhi.’ 3Tualeh, jingsang chiangin, ‘Tuni khua asia ding a hinteh meisan asuak a a ngiamkai,’ na chijel uh. Lepchiahte aw, van omdan na theisiam ngel ua, hinanleh hun chiamtehnate na theisiam theikei uhi. 4Khangthak gilou leh angkawmhatte`n chiamtehna azong ua, hinanleh Jona chiamtehna chihlouh chiamtehna dang mawng mawng akiang uah piak ahikei ding uh, achi a. Huachi`n amauhte anusia a, apaisanta hi.”

Pharisaite leh Sadukaite tol

(Mrk. 8.14-21)

5Tualeh a nungjuite`n galkhat lam atunkhit un, tanghou apua manghilh ua 6Tuachi`n Jesu`n akiang uah, Pharisaite leh Sadukaite tol lak ah kiveng unla, pilvang un, achi hi.

7Tuachiah amauhte aki ngaihtuah chiat ua, tanghou ipuakkhak louh jiak ahi, achi ua.

8Hinanleh Jesu`n hua athei a akiang uah, “Nou ginna tawmte aw, bangding a tanghou na puakkhak louh jiak ua kingaihtuah nahi ua! 9Mi sangnga vakna tanghou phel nga leh lawh bangzah hiam dim naluak uh chih tu nasan a theisiam nailou a, na lungsim ua zong theigige lou nahi uh maw? 10Ahihkeileh, mi sangli tanghou sagih leh lawh tampi naluak uh zong? 11Na kiang ua tanghou thu gen ka hikei a, Pharisaite leh Sadukaite tol lak ah pilvang un chih gen ka hijaw chih bang achia theilou nahi ua?” a chi hi.

12Tuachi`n amau`n tol tanghou lak ah kiveng un chi hilou in Pharisaite leh Sadukaite thugin lak a pilvang dingin ahijaw chih a hung theita uhi.

Peter in Jesu Krist ahi chia agenna

(Mrk. 8.27-30; Luk. 9.18-21)

13Jesu Kaisaria Philippi gam a hungtun in, a nungjuite kiangah, “Mite`n kei, Mihing Tapa kua ahi achi ua?” chi`n a dong a.

14Tuachi`n amau`n, “Khenkhat in baptispa Johan ahi ahung chi ua, khenkhat in Elijah ahi achi ua. A dangte`n Jeremiah ahihkeileh Jawlnei kuahiam khat ahi a hungchi uh,” achi ua.

15Aman akiang uah, “Ahihleh nou, Kei kua ahi nung chi ua?” achi a.

16Simon Peter in, “Krist, Pasian hing Tapa nahi,” achi a, adawng a.

17Jesu`n a dawnga akiang ah, “Simon, Jona tapa, hampha chia! Sa leh sisan in na kiang ah hih ahung theihsak na hikei a, ka Pa van a om in ahung theihsak nahijaw hi. 18Tualeh ken zong na kiangah kung hilh ahi, Nang Peter na hi: hih suangpi tung ah ka saptuam ka lam ding a, misikhua kulh kongkhakte`n hih bangmah alawhjou kei ding uhi. 19Tualeh van gam chabi na kiangah kung pia ding a, leitung a nahen jousiah vantung ah zong hen ahi ding a, leitung a naphel jousiah vantung ah zong phel ahi ding,” achi hi.

20Tuakhit in amah Krist Jesu ahi chih kuamah hilhlou dingin a nungjuite thu apia hi.

Jesu`n gimthuak leh asih ding a genkholh

(Mrk. 8.31—9.1; Luk. 9.22-27)

21“Huahun a kipat in Jesu`n Jerusalem a apai ding dante, siampite leh laigelhmite pan a sil tampi athuak ding dante, thah a aom ding dante tualeh nithum ni a thoukik ding a hihdante a nungjuite ahilh panta hi.”

22Tuachi`n Peter in amah atuam in apaipih a, “Toupa, hih in hung gamlat hen! tualeh hihbang sil na tungah a tungngai kei ding!” chi`n ataihilh hi.

23Hinanleh amah akihei a Peter kiangah, “Setan! Ka nunglam ah om in, Kei a dingin kipalpukna nahi; Pasian silte ngaihsun louin mihing silte na ngaihsun jawk jiak in,” achi hi.

24Tuachi`n Jesu`n a nungjuite kiangah, “Mi khatpeuh in ka nung ajuih-utleh amah ki manghilh in a kross pua in hungjui hen, achi hi. 25Kuapeuh ahinna humbit in ata`n ding a, kuapeuh kei jiak a ahinna ta`n in amu ding hi. 26Mi`n leitung pumpi nei henla, ahinna mansuah taleh, amah a ding in bang aphatuam diai? Ahihkeileh ahinna leinang in bang apiathei dia? 27Mihing Tapa a Pa thupina tawh a vantungmite tawh a hungpai ding a, tuahun chiangin michih ana sepna bangbang un nuamman apia ding hi. 28Adiktak in na kiang uah kung hilh ahi, hihsan a dingte mi khenkhat Mihing Tapa a kumpi lalgam a a hungpai amuh masiah uh sihna chiamlou ding aom uh,” achi hi.

Currently Selected:

MATHAI 16: THKHBSI

Highlight

Copy