LUKA 24

Jesu thohkikna

(Mat. 28.1-10; Mrk. 16.1-8; Jhn. 20.1-10)

1Tualeh nipikal ni masa ni-in jingsang matakin a gimnamtui bawlte uh tawiin, numei dang kuate hiam tawh han ah ahung pai ua. 2Hinanleh suang han a pat likkhiatsa in amu ua, 3tuachi`n asung ah alut ua Toupa Jesu luang amu kei uhi. 4Tualeh hichi ahung hi a, huajiaka a lungbuai laiun ngaiin, mi nih puan teselhsolh silh in agei uah ahung ding a. 5Tuachi`n amauh laua leia a khupbok laiun, amau`n akiang uah, “Bangding a misi lak a mihing zong nahi ua? 6Hihsan ah aom nawn kei a, a thoukikta hi; Galili gam a aom laia na kiang ua agen thei un: #Mat. 16.21; 17.22,23; 20.18,19; Mrk. 8.31; 9.31; 10.33,34; Luk. 9.22; 18.31-33. 7‘Mihing Tapa ahihleh mikhialte khut ah matsak in aom ding a, kross ah akilhden ding ua, tualeh nithum ni-in a thoukik ding,’ ” achih achi a.

8Tualeh amau`n athugente ahung theidokta uhi. 9Tuachi`n anung paikikta ua, hih silte jousiah sawmlehnihte leh midangte jousiah kiangah ahilhta uhi. 10Amauhte Mari Magdalini tawh Joanna leh Jakobnu Mari tawh tualeh akiang ua om numei dangte tawh ahi ua. Hih silte sawltakte kiangah ahilhta uhi. 11Tualeh athugen uh thu maimai bangin a ngaihsut ua; ana taksan kei uhi. 12Hinanleh Peter a dingkhia a, han ah avatai a, tualeh kun a a et leh puannemte guak om amu a, sil omdante lamdang asak takin a paimangta hi.

Emmau lampi a Jesu kilakna

(Mrk. 16.12-13)

13Tualeh ngaiin, alak ua mi nih Emmau kichi khua khat Jerusalem a pat mel sagih a gamla ah hoh dingin apai ua. 14Amauh hih sil hung omte jousiah thu ah ahoulim ua. 15Tualeh hichi ahung hi a, houlim a aki doktuah laiun, Jesu`n ahung naih a amauh tawh a zawkkhawmta a; 16hinanleh amah atheih louhna ding un amit uh sukvaihsak in aom hi. 17Tualeh aman akiang uah, “Na paikawm ua na kihoulimna uh leh na dahna thu uh bang ahia?” achi a. 18Tuachi`n khatpa amin Kleopa kichi pen in adawng a akiang ah, “Tulai a sil omdante na theihlouh, Jerusalem a nangguak mikhual nahi hiam?” achi hi.

19Aman akiang uah, “Bang silte ahia?” achi a.

Tualeh amau`n a kiangah, “Nazareth Jesu, Pasian leh mijousiah mitmuh a asilbawl leh thugen Jawlnei minthang tak tungtang thu.” 20“Amah siampite leh ka lamkaite un sitak a siamlouh atansak ding un a piakkhiat ua, kross-a akilhden thu uh. 21Hinanleh kou Israelte tantu ding amah ahi chih ka kinem uhi! Tualeh hihte lou zong, hihte atunzoh tuni anithum ni ahita hi. 22Tualeh ka lawilak ua numei khenkhat han a matak a vapaite`n lamdang satakin ahung koih uhi, 23a luang amuhlouh takun ahung kinungleh kik ua, ahing kikta chia hunghilh vantungmite zong kamu uh, achi ua. 24Tualeh ka ompihte lak ua khenkhat han ah avapai ua, numeite gen bang takin ava mu ua, hinanleh amah amu tuankei uhi,” achi ua.

25Tuachi`n aman akiang uah, aw mimawte leh, Jawlneite thugen jousiah taksan nuamloute (taksan ding a lung ngongte) 26“Krist in hih silte thuak a athupina a alut ding mawng hilou amaw?” achi hi. 27Tualeh Mosi leh Jawlneite laibu a pan in Laisiangthou pumpi a amah tungtang kigelhte akiang uah a hilhchianta hi.

28Tuachi`n apaina ding khua uh tungpai ding ahita ua, amah gamla tak a paisuak sawm bangin aom a; 29hinanleh amau`n akhouh ua, “Ka kiang uah ta`m maiin, nitaklam ahita a, tualeh ni zong tum ding ahita hi,” achi ua. Tuachi`n akiang ua om dingin alutta hi. 30Tualeh hichi ahung hi a, amauh tawh dohkan a atouin, tanghou ala a, agualjawl a, tualeh abalkek a, akiang uah apia a. 31Tuachi`n amit uh ahung vakta a, amah atheita uhi; tuatakin amah amit muh uapat amangta hi. 32Tualeh amau`n, “Lampi a ahung houpih a, Pasian Laisiangthou thute ahung hilhchian laiin ilungtang sung ah akuang hial hilou amaw?” a kichi ua.

33Tualeh huahun laitak mah in athoukhia ua, Jerusalem khua ah aki nungleh ua, sawmlehkhat omkhawmte leh akiang ua omte amu uhi. 34Amau`n, “Toupa tuh athoukik taktak ahi! Simon kiangah zong akilakta!” ana chi ua.

35Tuatakin amau`n zong lampi a sil hung omte leh tanghou abalkek a amah atheihkhiat dante uh ahilh uhi.

Sawltakte kiang a Jesu kilakna

(Mat. 28.16-20; Mrk. 16.14-18; Jhn. 20.19-23; Nst. 1.6-8)

36Tualeh hihthute agen laiun Jesu ngei alak uah ahung ding a, “Na kiang uah khamuanna om hen,” achi hi.

37Hinanleh amauh a chija mahmah ua, tualeh alau ua: sikha mu bangin aki ngaihsun ua. 38Tualeh aman akiang uah, “Bangding a mangbang nahi ua? Tualeh bangding a na lungtang ua ginglahna hung om ahi hiam? 39Ka khutte leh ka kengte en-un, kei mahmah hilou ka hi hiam? Hung tham unla en-un; sa leh guh nei a nungmuh bang un, kha in sa leh guh aneikei hi,” achi hi.

40Hihte agen zoh in amauh a ensak a. 41Hinanleh akipak seng jiak ua agingtat louh uleh lamdang asaklai un aman akiang uah, “Hiah nek ding nanei uh hiam?” achi a. 42Tualeh amau`n a kiangah nga kikang gaw khat leh khuaiju khalkhat apia ua, 43aman hua ala a, amai uah aneta hi.

44Tuachi`n aman akiang uah, “Mosi dan leh Jawlneite laibute leh Psam bu a ka tungtang kigelh jousiah ahung tangtun ding dan nou tawh ka omkhawm lai a na kiang ua ka thugente hihte ahi,” achi hi.

45Tualeh Pasian laibute a theihtheihna ding un a lungtang uh ahonsakta hi.

46Tuachi`n aman akiang uah, “Hichi bang a gelh ahi: Krist in gim athuak ding a, nithum nia misi lak a kipan a thoukik ding mawng ahi, 47Tualeh kisik na leh khialh ngaihdamna tuh amah min in Jerusalem a pat in namchin lak ah gen ahi ding. 48Nou hih silte theihpihtu nahi uhi. 49Ngaiun, ka Pa silchiam natung uah ka sawl ding hi; hinanleh tunglam a kipan a sil bawltheihna a thuam nahih masiah uh Jerusalem khuapi ah om kinken un,” achi hi. #Nst. 1.4.

Jesu van kahna

(Mrk. 16.19-20; Nst. 1.9-11)

50Tualeh amauh Bethani tanpha in apaipih a, aban ajak a, amauh agualjawl a. #Nst. 1.9-11. 51Tualeh hichi ahung hi a, a gualjawl laitakin amauh apaisanta hi. 52Tualeh amau`n amah abia ua, kipak mahmah in Jerusalem ah akileh kik ta uhi. 53Tualeh Pasian tempul ah Pasian phat leh pahtawiin a omjingta uhi.

Currently Selected:

LUKA 24: THKHBSI

Highlight

Copy