JOHAN 5

Bethsaida dil a mijeng damsakna

1Hih nungin Judate ankuang luina khat aom a, Jesu Jerusalem ah apaitou a. 2Tualeh Jerusalem ah belam kongkhak geiah dil khat Hebrai ham a Bethesda kichi inlim nga nei aom hi. 3Tuate ah damloute, mittawte, keng baite tualeh jengte tampitak alum ua, tui hungtak ngak in, 4ajiak, hun chih khat chiangin vantungmi hua dil ah ava paisuk a tui avatok jel a, tualeh kuapeuh tui kitok zoh a lut masa penpen bang chibang natna nei hinanleh zong, sukdam in aom jel hi. 5Tualeh huasan ah kum sawmthum leh giat damlou mi khat aom hi. 6Jesu`n amah huasan a lum amuh in, tualeh huachibang in hun sawtpi om ahita chih atheih in akiang ah, “Sukdam na ut hiam?” achi a.

7Damlou pa`n, “Pu, tui kitok chiang a dil a hungkoih ding mi kanei kei a, kapai chiangin mi`n ahung makhelh jel hi,” achi a.

8Jesu`n akiang ah thou inla, “Na netphah la inla nakeng in paita in,” achi a. 9Thakhat in amah ahung damta a, anetphah ala a, kengin apaita hi.

Tualeh tuani khawlni ahi a, 10Tuajiakin Judate`n adampa kiangah, “Khawlni ahi a, na netphah na puak asiang kei,” achi ua. #Neh. 13.19; Jere. 17.21.

11Aman akiang uah, “A hung damsakpa in na netphah la inla, nakeng in paita in ahung chi hi,” achi a adawng a.

12Tuachi`n amau`n akiang ah, “Na netphah la inla paita in hungchi kua ahiam?” achi ua, adong ua.

13Hinanleh adampa in kua ahiam chih ka theikei a, huasan ah mi tampi a om a, Jesu lah apai mangta a.

14Tuakhit in, Jesu`n amah tempul ah amu a akiang ah, “Ngaiin, damsak in na omta hi, khialkik nawn ken, atuachih keileh sil hoihloujaw natung ah a hungtung kha ding,” achi hi.

15Tuachi`n huapa apaita a, a damsakpa Jesu ahi chih Judate ava hilhta hi. 16Tuajiakin Judate`n Jesu a gawtbawl ua, thah asawmta uhi, hih silte khawlni a abawl jiakin. 17Hinanleh Jesu`n amauh adawng a, “Ka Pa in tutan in nna asemjing a, tualeh ken zong nna kasem jing,” achi hi.

18Tuajiakin Judate`n amah thah asawm semsem ua, aman khawlni asuksiat guak hilou a, Pasian ka pa ahi achih a, Pasian tawh kibang a akibawl man in.

Tapa thuneihna

19Tuachi`n Jesu`n adawng a akiang uah, “Adiktak in kung hilh ahi: Tapa in amah thu in bangmah a bawlthei kei, Pa in abawl amuhte loungal, ajiak Aman abawl jousiah, huate Tapa in zong a bawljel hi. 20Ajiak Pa in Tapa a it a, a silbawl jousiah akiang ah a musakjel hi, tualeh lamdang nasak ding uh hihte sang a thupijaw a musak ding hi. 21Pa in misite akaihthawh a, ahinsak mahbang in, Tapa in zong a ut jousiah a hingsak jel hi. 22Pa in kuamah vai ahawmsak ngai kei a, hinanleh vaihawmna jousiah Tapa kiangah apiata hi. 23Mi tengteng in Pa azah bang ua, Tapa zong azah ding uh ahi. Kuapeuh Tapa zahlou in Pa asawlpa zong azah kei uhi.

24“Adiktak in kung hilh ahi: kuahileh ka thu ja a ahung sawlpa gingta in tangtawn hinna aneita; siamlouh tansakin a omnawn kei ding a, hinanleh sihna a pat hinna ah alutjawta hi. 25Adiktak in adiktak in kung hilh ahi: misite`n Pasian Tapa aw ajakna ding uh hun hungtung ding ahita, tu leh tu in zong a hungtung hi, tualeh aja jousiah ahing ding uhi. 26Ajiak Pa in amah a hinna akineih mahbang in Tapa in zong amah a hinna akineih na dingin apiata hi. 27Tualeh Mihing Tapa ahihman in kiangah vaihawmna apiata hi. 28Hih lamdang sakei un, ajiak ahun tung ding ahita, huahun chiangin hankhuk a om jousiahin a aw aja ding ua. 29Tualeh ahung pawtdok ding ua, silhoih bawlte tangtawn hinna tang dingin a thoukhia ding ua; tualeh silgilou bawlte siamlouh tang dingin a thoukik ding uhi. #Dan. 12.2.

Jesu tanchin theihpihte

30“Ken kathu in bangmah ka bawlthei kei a; ka ja`k bangin vai ka hawmjel hi, tualeh ka vaihawm adik hi, ajiak keima deihdan zonglou in, Pa ahung sawlpa deihdan ka zongjaw hi.

31“Keimah tanchin ki theihpih hitaleng, ka thu theihpih adik ahikei ding. 32Ka tanchin theihpih khat a om, tualeh aman ka tanchin atheihpih pen adik ahi, chih ka thei hi. 33Nou Johan kiangah mi nasawl uh, aman thutak tanchin atheihpih hi. #Jhn. 1.19-27; 3.27-30. 34Tua theihsak kasa`n pen mihing a kipan ahi kei a; hinanleh hundam a na omtheihna ding un hih silte ka gen ahi. 35Johan amah ahihleh meivak kuangtak leh va`ktak ahi a, tualeh nou avak ah tomkhat nopsak tadih na ut uhi. 36Hinanleh Johan a sang a theihpihna lianjaw ka nei hi: ka Pa`n ka sepjawh ding a ahungpiak ka nasepte amah in, Pa in ahungsawl chih ka tanchin ahung theihpih hi. 37Tualeh Pa, ahung sawlpa, mah in zong ka tanchin ahung theihpih hi. Nou bangchiklai in zong a aw na jangai kei ua, amel zong na mungaikei uhi, #Mat. 3.17; Mrk. 1.11; Luk. 3.22. 38hinanleh athu nasung uah aom kei a, amah ahung sawlpa na gintatlouh jiak un. 39Laisiangthou na hoihsim ngel ua, ajiak asung ah tangtawn hinna neiin na kingaihsun ua. Huate ahihleh ka tanchin theihsakna ahi! 40Hinanleh hinna naneih na ding un ka kiangah nung painuam kei uhi.

41“Mihingte pahtawina ka zongkei hi. 42Hinanleh Pasian hehpihna na kiang uah a om kei chih kung thei hi. 43Ka Pa min in kungpai a, hinanleh nou nung ki pahpih kei uhi; adang khat, amah min in hungpai lehlah, na kipahpih ding uhi. 44Nou khat leh khat kipahtawi tuahna ngaina a, Pasian guak; a kipan a hungpawt pahtawina zongloute`n, bangchi`n, na gingtathei ding ua? 45Pa kiang a nou hunghek dingin hung ngaihtuah kei un. Nou hunghektu khat aom, amah nataksan uh Mosi ahi. 46Bang jiakin ahia achihleh Mosi ana gingta hile uchin kei zong nung gingta ding uhi, ajiak aman ka tanchin ahi ana gelh. 47Hinanleh amah thugelh nagintat kei uleh bangchi`n kei thute na gingta ding ua?” achi hi.

Currently Selected:

JOHAN 5: THKHBSI

Highlight

Copy