JOHAN 13

Jesu`n nungjuite keng asilna

1Tualeh paikan kut ankuang luima in, Jesu`n hih leitung a pat paimang a Pa kiang a apai ding hun hungtungta chih athei a, leitung a amite a it ngutngutta a, atawptan in a it hi. 2Tualeh nitak annek laiin setan in Simon tapa Juda Iskariot lungtang ah Jesu matsak ding a ngaihtuah sak a. 3Jesu`n Pa in sil bangkim a khut ah apiata chih leh, Pasian a kipan a hungpai a, Pasian kiang a paikik ding ahihdan thei in. 4Nitak an imlai ading a, apuansilh akoih a; tualeh kinawtna puan ala a, ateng a. 5Kisilna kuang a tui asunzoh in a nungjuite keng asilsak a, kinawtna puan aten in anawtjel hi. 6Tuachi`n Simon Peter kiangah a hungtung a, Peter in akiang ah, “Toupa nangmaw ka keng nasil ding?” achi a.

7Jesu`n adawng a, akiang ah, “Ka silbawl tu in na theikei, hinanleh tunung chiangin nung thei ding hi,” achi hi.

8Peter in akiang ah, “Ka keng nasil ngaikei ding!” achi a.

Jesu`n adawng a, “Ka sil kei a ahihleh, ka kiang ah tan bangmah nanei kei ding hi,” achi hi.

9Simon Peter in akiang ah, “Toupa ka keng guak hilou in! ka khut leh ka luvum zong hungsil in!” achi a.

10Jesu`n akiang ah, “Kuapeuh silsa in a kengguak lousiah sil apoimoh kei, hinanleh apum in asiang hi, na un un hilou in,” achi hi. 11Ajiak aman a mansak dingpa athei a; tuajiakin, “Na un un nasiang kim kei uh,” achi hi.

12Tuachi`n a keng uh asil zoh a, apuansilh la a atoukik zoh in akiang uah, “Na tung ua ka silbawl bang ahih nathei uh hiam?” #Luk. 22.27. 13“Nou kei Siapa leh Toupa nungchi ua, nung chidik ngut uh, ajiak ka hi him ahi. 14Tuachi a kei na Toupa uleh Siapa-un bawn nakeng uh kasil a ahihleh nou zong khat leh khat nakeng uh na kisilsak ding uh ahi. 15Na tung ua ka bawl bang a na bawlna ding un na etton ding uh kung pia ahi. 16Adiktak in kung hilh ahi: sila apu sangin alianjaw kei a, a kisawlpa zong asawltu sangin alianjaw kei hi. #Mat. 10.24; Luk. 6.40; Jhn. 15.20. 17Hih silte natheih uleh, bawl le uchin mi hampha na hi ding uhi!

18“Na un ua thu ka genkei a; katelte ken kathei hi. ‘Hinanleh tua ka tanghou nekpihpa in ka tungah a khetul a khangtouta,’ chih Pasian Laisiangthou a tangtun theihna ding ahi. #Psa. 41.9. 19A hungtunma in tuin hih kung hilh ahi, a hungtun chiang a ‘Amah ka hi,’ chih na gintat theihna ding un. 20Adiktak in kung hilh ahi: kuahileh kasawl taphot ki pahpih, kei hung kipahpih ahi; tualeh kuahileh kei hung kipahpih in a hungsawlpa a kipahpih ahi,” achi hi. #Mat. 10.40; Mrk. 9.37; Luk. 9.48; 10.16.

Jesu`n amansak dingpa agenkholh

21Jesu`n hichibang a agenzoh in a lungsim a mangbangta a, “Adiktak in kung hilh ahi: nalak ua khat in ahung mansak ding,” chi`n atheisak ta hi.

22Nungjuite`n kuapen ahia agen chih theilou in aki entuah ua. 23Tualeh a nungjuite lak a khat Jesu`n a itpa Jesu ang ah kingam in a om a. 24Tuajiakin Simon Peter in, “Kua thu ahia agen chih dong ding in mit in a houpih a.”

25Tuachi`n Jesu awm a kingam in akiang ah, “Toupa, kuapen ahia?” achi a.

26Jesu`n adawng a, “Tanghou them kadiah a, kapiak penpen amah ahi,” achi a. Tualeh tanghou them a diahzoh in Simon tapa Juda Iskariot kiang ah apia hi. 27Tualeh tanghou them apiak zoh in setan asung ah a lutta a, Jesu`n akiang ah, “Na bawl bawl ding kintak in bawl in!” achi hi. 28Hinanleh dohkan kim a toute kuamah in bang chihna a hihthu akiang a agen ahia chih a theikei uhi. 29Ajiak alak ua khenkhat in, Juda in dangka-ip akep jiak a Jesu`n akiang a, ankuang luina a i silpoimoh dingte lei in, chi ahia, ahihkeileh migentheite kiang a banghiam khat piak ding ahiam in a ngaihtuah uhi.

30Tualeh aman tanghou them ala a, tuachi`n a pawtkhia pai a, tuahun pen janlai ahi.

Thupiak thak

31Tuachi`n apawt nungin Jesu`n, “Tu in jaw mihing Tapa pahtawi in a omta, tualeh Pasian zong amah ah pahtawi in aom hi. 32Amah a Pasian pahtawi a aom leh Pasian in zong amah ah amah apahtawi ding a, apahtawi paingal ding hi. 33Naute aw, tomnou khat nalak uah ka om tadih hi. Nou nungjong ding ua, Judate kiang a, ‘Ka paina ah nungthei kei ding uh,’ ka chihmah bangin, tuin na kiang uah ka chi ahi. #Jhn. 7.34. 34Thuchiam thak kungpia ahi, nou khat leh khat ki it un, ken nou kung it bangin, nou khat leh khat ki it pelmoh un. #Jhn. 15.12,17; 1 Jhn. 3.23; 2 Jhn. 5. 35Khat leh khat na ki it uleh mi jousiahin ka nungjuite na hi uh chih tua-ah athei ding uhi,” achi hi.

Peter kitheihmoh bawl ding Jesu`n a genkholhna

(Mat. 26.31-35; Mrk. 14.27-31; Luk. 22.31-34)

36Simon Peter in akiang ah, “Toupa khoi ah ahia napai ding?” achi a.

Jesu`n amah adawng a, “Ka painang ah tuin nung juithei naikei ding,” achi hi.

37Peter in a kiangah, “Toupa bangjiak ahia tu a kung juihtheih louh ding? Nang jiakin ka hinna ka piakhia ding,” achi a.

38Jesu`n amah adawng a, “Keimah jiakin na hinna na piakhia ding maw? Adiktak in kung hilh ahi: nang thumvei nung kitheihmoh bawlma in ak akhuang kei ding hi.” achi hi.

Currently Selected:

JOHAN 13: THKHBSI

Highlight

Copy