Mark 16

Jesu Thodoh

(Matt 28:1-8; Luk 24:1-12; Jhn 20:1-10)

1Chuin cholngah ni kichai phatnin Magdalene Mariam, Jacob nu Mariam, chule Salome hicheng chun ahunguva thao anu theina dingun, thao namtui ahin choijun ahi. 2Chuin hapta ni masa ni jingpitah-in niso jou jouvin lhan lama chun ahunguvin ahi. 3Chuin amahole amaho akihouvun, Lhankotna song chu kon eitahdoh peh taovinte? akitiuvin ahi. 4Ahinla agah vetnule song chu tahdohsa anaum amutaove; asong chu lentah hija ahi. 5Chuin lhan sunga alutnun ahile gollhang khat ponbangleh choltah kisila jetlam sanga tou amuvin; chuin amaho chu atija lheh jengun ahi.

6Ahivangin ama chun amaho jah-a, Tija hih-un; thingpel'a kithat Nazareth Jesu chu naholu ahi: ama athoudohtai; hikoma aumtapoi: alupna hi hung vetaovin. 7#Matt 26:32; Mrk 14:28. Amavang cheovinlang aseijuite le Peter jah-a gaseijun, Aman najah uva aseibangin Galilee gam lamah namasanguva achei; chukom chu nanghon Ama namu dingu ahi, ati.

8Chutichun kidang satah-in akihot hot jengun; gangtah-in ahung potdoh-un, lhanphunga kon chun ajamtaove. Akichat jeh-un, koima jah-a aseipouvin ahi.

Jesu Magdalen Mariam Henga Akilah

(Matt 28:9-10; Jhn 20:11-18)

9Chuin hapta ni masapen ni jingpi-a athodoh jou chun, Magdalene Mariam, asunga kona thilha sagi anodohnu henga chun akilah masapenin ahi. 10Chuin amanu chun Jesu umpiji teho, ama thi jeh-a kapkaple kingaisese teho henga chun achen agaseijin ahi. 11Ahin athoudoh-in, amanu chun amui ti ajah vanguvin atahsan pouvin ahi.

Jesu Seijui Ni Henga Akilah

(Luk 24:13-35)

12Chujouvin Aman alah uva mi ni gamlam jona achena lhona limchom beh-in akimusah-in ahi. 13Chuin amani ache lhonin seijui dangho agahil lhonle, amahonla amani sei jong chu anatahsan dehpouvin ahi.

Jesu Somlekhat Henga Akilah

(Matt 28:16-20; Luk 24:36-49; Jhn 20:19-23; Sol 1:6-8)

14Chuin chujou kitman ankong aum laitah-un, somlekhat ho hengtah-a akilah-in; athodoh kit nunga amuho thusei atahsan lou jeh-u chun, atahsan louvule alungtah-u chu asosalin ahi. 15#Sol 1:8. Chuin Aman ajah uva, Nangho vannoi leiset gam jouse-a cheovinlang, thilsem namkim jah-a hiche Kipana Thupha hi gahil lhang leuvin. 16Atahsana baptize chang chu sohcha ding ahi; atahsan lou vang chu themmo changa umding ahi. 17Chule atahsante chu melchihna hicheng hin ajuipeh dingu ahi; keima mina thilha anodoh dingu, paothah paothah-a pao dingu, 18Gul akhutna adop dingu; thina thei ima donjong leu ima ti lou dingu; chule ana damlou chunga akhut angap diu, ana chu dam ding ahi, ati.

Jesu Van'a Lahtouva Aum

(Luk 24:50-53; Sol 1:9-11)

19 # Sol 1:9-11. Chuin Pakai Jesu'n ajah uva chucheng asei jouvin, van'ah lahtouvin aumin, Pathen jet lamah atoutai. 20Chuin amaho achedoh-un, muntin-ah ahillhang leuvin, anatohna chanuvah Pakaiyin akitho piuvin, chule melchihna-in ajuisah-in athu chu aphut detpeh-in ahi. Amen.

Currently Selected:

Mark 16: THADBSI

Highlight

Copy