Mark 1

John Baptist le Athupeh thangkou

(Matt 3:1-12; Luk 3:1-18; Jhn 1:19-28)

1Pathen Chapa Jesu Christa Kipana Thupha kipatna;

2 # Mal 3:1. Themgaoho lekhabua kisun bangin,

Ven, keiman kasottol namasang sang-ah kasole;

Ama chun nalampi anasem ding ahi;

3 # Isai 40:3. Gamthipma khosam aw khatnin,

Pakai lamlen semtohsan koijun,

Alampi semjangun,

tia kisun bang chun,

4John Baptist chun gamthipmah twi alutsah-in, chonset suhmangna dinga lungheija baptize chan ding thu lhangsamin ahi. 5Chuin Juda gama mi jouse le Jerusalem'a mi jouse ama henga acheuvin, achonsetnu aphongun, Jordan luija ama khutna abonun baptize achang taove.

6 # 2 Leng 1:8. Chule John chu sangongsang mul ponin akivonin, savun konggah-in akong akigeh-in, chule a-anneh chu khaokho le gam khoiju ahi. 7Chule thu ahil lhanglen, Kanungah keima sanga hat chungnungjo ahunge, keima hi kuna akengchot khao sutlham dinga jong kilom kahipoi. 8Keiman nangho twija baptize kachansah nahiuvin; amavang Ama chun nangho Lhagao Thenga baptize nachansah dingu ahi, ati.

Jesu Baptize Chan le Lhep Patepma Aum

(Matt 3:13—4:11; Luk 3:21-22; 4:1-13)

9Hilai chun ahitin ahi, Galilee gam sunga Nazareth kho-a konin Jesu ahungin, Jordan luija John khutna baptize achangtan ahi. 10Chuin twi lah-a kona ahungdoh doh-in, van akikehso-a, Lhagao vakhu bang achunga ahung kumlhah amun: 11#Semt 22:2; Labu 2:7; Isai 42:1; Matt 3:17; 12:18; Mrk 9:7; Luk 3:22. Van'a konin aw khat ahung gingin, Nangma ka-Chapa deitah nahi, nachungah kalung alhai tangeije, ati.

12Chuin Lhagao chun gamthipma apui mang paijin, 13Chua chun nisomli Satan lhep patepmin aumin, gamsa lah-a aumin; chuin vantil hon ahung jenleuvin ahi.

Jesu'n Ngaman Mi Li Akou

(Matt 4:12-22; Luk 4:14-15; 5:1-11)

14Chujouvin John songkul'a akikhum jouvin, Jesu Galilee gama ahungin, Pathen lenggam Kipana Thupha ahil lhanglen, 15#Matt 3:2. Phat alhingtai, chule Pathen lenggam jong anaitai; nalung heijun, Kipana Thupha hi tahsanun tin alhangsamin ahi. 16Chuin Galilee dillen pang ajotpa na-a, Simon le asopipa Andrew dillena lensep amun; amani chu ngaman mi ahi lhone. 17Chuin Jesu'n amani jah-a chun, Kanung hinjui lhonin; keiman nangni mi man lensep hisah lhoninge, ati. 18Chuin amanin alen adalha lhonin, anung ajui pai jeng lhontai.

19Chuin themkhat achechon jeple, Zebedee chapate ni Jacob leh anaopa John amani jong chu kong sunga len anakhui phat pet lhon amun; 20Chuin amani chu akou paileuvin ahile, amanin apa lhon Zebedee chu athalah soh ho toh kong sunga chun adalha lhonin, ajui lhontai.

Jesu'n Thilhavop Mi Khat Adamsah

(Luk 4:31-37)

21Chuin amaho Capernaum'a achelutnun; cholngah nin kikhopna in'ah alutnin, thu ahil paijenin ahi. 22#Matt 7:28-29. Aman danthu sunho banga hil louva, thuneitah banga ahil jeh-in miho chun athuhil chu kidang asa lheh-un ahi.

23Chuin akikhopnao in'a chun lhagao boh vop mi khat anaumin, chule ama chun ahinsam paijenin, 24Nazareth Jesu, nangle keiho ikimatnao i-um em? Eisumang uva hunga nahim? Nangma koi nahi kahenai, Pathen'a kon Atheng chu nahi, ati.

25Chuin Jesu'n ama chu aphoh-in, Thipmin, ama-a kon chun hung doh-in, ati.

26Chuin lhagao boh chun mipa chu aheh-in, hapenin apengin, ahung potdoh tai. 27Chuin mi jousen kidang asan alungdong lheh jengun; chutichun khatle khat akidongun, Hiche hi iti hintem? Hiche hi thuhil thah ahi! Aman thunei tah-in lhagao bohho thu apen, chule amaho jong athun anung jenguve, atiuvin ahi.

28Chuin Galilee gam kimvel chengse-a amin akithang pai jengtan ahi.

Jesu'n Mi Tamtah Adamsah

(Matt 8:14-17; Luk 4:38-41)

29Chule kikhopna in'a kona ahungdoh doh-in, Simon le Andrew insunga chun Jacob le John toh alut paijun ahi. 30Ahin Simon nupanu chu khosih-in anan analumin; chuin amahon anat thu chu Jesu ahetsah paijun ahi. 31Chutichun amanu koma chun achen, akhutnin atuh-in, akaithou tai; hichun akhosih chun alha jengin, chuin amanu chu amaho jenlen apangtai.

32Chuin nilhah ahia, nisa alhum jouvin, mihon ana damlou jouse le thilhavop ho ahin puijun; 33Chule khopi sunga mi jouse kotpi phung-ah akikhomun ahi. 34Chuin Aman hiveichom chom veija damlou mi tamtah adamsah-in, chule thilha tamtahma adeldoh-in; ama Christa ahi chu ahet jeh-un thilhaho chu apao sahpon ahi.

Jesu'n Galilee'a Thupha Alhangsap

(Luk 4:42-44)

35Chuin jing khovah lhah masang peh-in athouvin, apotdoh-in gamthip munah achen, chua chun agataovin ahi. 36Chuin Simon le agoldangho chun anung ajuijun, 37Amudoh phatnun ajah-a, Mi jouse hinla nang nahol cheh-un, atiuve.

38Chuin Aman, Naidunga khopi dang danga jong kahil lhangle theina dingin cheohite; hiche dinga chu hung kahi, ati.

39 # Matt 4:23; 9:35. Chuin ama Galilee gamsese-ah achelen, akikhopnao in tinah thu ahil lhanglen, chule thilha adeldoh peh-in ahi.

Jesu'n Miphah Adamthengsah

(Matt 8:1-4; Luk 5:12-16)

40Chuin miphah khat Jesu henga ahungin, ajah-a, Nalung ahile neidam thengsah thei ahi tin a-angah adilsun ataotan ahi.

41Chuin Jesu'n alungset behseh-in, akhut alhangin, athamin, Kalung ahi; dam thengtan, ati. 42Chuin hiche thu chu aseijou jouvin, chupettah chun aphah chun adalha paijin, athengsel tai. 43Chuin Aman amapa chu akhamchah kheh-in, asolmang paijin; 44Ajah-a, Ven, koima jah-a sei hihbeh-in, ahin chenlang thempu gakimusah-in, chule nadam theng thu dol chu amaho hettohsahnan Mosi thupehsa thilpeh ding chu gapetan, ati.

45Ahivangin amapa apotdoh-in, hiche thu chu asamlen, aha phonjal cheh tan; achuti jehchun chukalin Jesu lhangphong in koima khopi sungah alut theita hih-in, gamthip thipma aumjotai: chule muntina konin ahengah miho ahungjiuve.

Currently Selected:

Mark 1: THADBSI

Highlight

Copy