Mathew 27

Pilate Anga Jesu Apuiju

(Mrk 15:1; Luk 23:1-2; Jhn 18:28-32)

1Chuin jingkah ahi phatnin, thempu pipuiho chengsele upaho jouse Jesu thana dingin akihoutoh taovin ahi; 2Chuin Ama chu akanun, akaijun, gamvaipo Pontius Pilate khutnah apedoh taovin ahi.

Juda Thi

(Sol 1:18-19)

3 # Sol 1:18-19. Chutah-in apedoh-a panga Juda Iscariot chun athi dinga themmo achansah-u chu amun ahile akisih-in, dangka somthum chu thempu pipuiho le upaho alepeh kitnin, 4Themona neilou thisan kapehdoh chu kachon kheltai, ati. Ahinla amahon, Hichu keiho ka ithu-u umam? Nangman nalo nomnom lotan, ati taovin ahi.

5Hichun aman dangka chu houin sunga asep lhan, chukoma kon chun achemangin, ama akikhai lihtan ahi.

6Chuin thempu pipuihon hiche dangka chu alauvin, Hiche hi thisan man ahi jeh-in, housum kholna-a koi angai ahipoi, atiuvin ahi. 7Hichun amaho akihoutoh-un, gamdang miho vuina dingin, hichun beldengpa leiset achou vin ahi. 8Hiche jeh chun tugeijin hiche leiset chu thisan leiset akitin ahi.

9 # Zech 11:12-13. Hichu themgao Jeremiah thusei,

Israel chate lah-a kona aman asahsao,

aman kisahpa man chu dangka somthum alauvin ahi;

10Chule, Pakaiyin eithupeh dungjuijin,

beldengpa leiset manin apetaovin ahi, ati chu guilhunga ahitai.

Pilate'in Jesu Thu Adoh

(Mrk 15:2-5; Luk 23:3-5; Jhn 18:33-38)

11Chujouvin Jesu chu gamvaipo angah adingtan ahi: chuin gamvaipo chun adongin, Nangma Juda te lengpa nahim? atin ahile, Jesu'n ajah-a, Naseikhai, ati. 12Ahin thempu pipuiho le upahon ahehsetna thu ijat asei vangun, aman imachan adonbutpon ahi.

13Chutah-in Pilate'in ajah-a, Hitehon nangma douna hettohsahna asei chengseu hi najah louham? ati.

14Ahin Aman cheng khatcha jong adonbut lou jeh chun, gamvaipo chun adatmo lheh jengin ahi.

Jesu Tha Dinga Athu Kitanlhah

(Mrk 15:6-15; Luk 23:13-25; Jhn 18:39—19:16)

15Hiche kut sunga chu sohchang koi hile mihon agotpen penu chu gamvaipo chun alhadohji angai ahi. 16Hichepet chun sohchang amin Barabbas atiu, sohchang minthang tah khat aumin ahi. 17Hijeh chun amaho akikhop phatnun, Pilate'in amaho chu adongin, Koijoh lhadoh pehleng nalungu ham? Barabbas ha, Christa kiti Jesu joh ham? ati. 18Ijeh-inem itile thangset suma apehdoh-u ahi chu aman ahen ahi.

19Chuin ama thutanna mun'a atoupetnin, a-inneipin thu ahin thotnin, Hiche michonpha pa chu limsah hih-in; ijeh-inem itile Ama jeh chun tunin kamangin kathohgim lheh jengin ahi, ati.

20Ahinla thempu pipuiho le upahon Barabbas chu angeh uva, chule Jesu chu asuhmangsah dingin mipi chu atilse taovin ahi. 21Chuin gamvaipo chun adonbutnin, Hichete ni hi koijoh lhadoh pehleng nalungu ham? atin ahile; amahon, Barabbas, atiuvin ahi.

22Chuin Pilate'in ajah uva, Achutile Christa kiti Jesu hi i-kalo dingba hitam? ati. Chuin amahon, Thingpel'a kikhenbeh hen, atiuvin ahi.

23Chuin aman, Ibolinem, ipi suhset aneiham? ati. Ahivangin amahon hasaptah-in asamun, Thingpelah kikhenbeh hen, atiuvin ahi.

24 # Danb 26:6-9. Chuin Pilate'in ananlela abol ima phatsahna ahilou, thunoh baotam asojoh chu amu phatnin, twi alan, mipi angsungah akhut asillhan, Hiche michonpha pa thisan kisona-a themona nei lou kahi; nanghon nalolo lotaovin, ati.

25Chuin mihon abonchauvin adonbutnun, Ama thisan phu chu keiho le kachateu chungah chuhen, atiuvin ahi.

26Chutah-in aman amaho chu Barabbas alhadohpeh-un; Jesu vang chu ajepmin, thingpel'a khetbeh dingin apedohtan ahi.

Sepaihon Jesu Totnopna Aneiju

(Mrk 15:16-20; Jhn 19:2-3)

27Chutah-in gamvaipo sepai ho chun Jesu chu Pretorium sungah apui lutnun, akomah sepaiho jouse akikhom sohkeijun; 28Chule aponsil chu ahoh lha uvin, ponsandup asilpeh taovin ahi. 29Chule ling lukhuh aphanun, alu-a akhuhpeh-un, chule akhut jet lamah pengtenggol khat achoisah-un, a-angah adilsuvin, Vo Juda te Lengpa, Chibai, atiuvin, totnopnan ael-elin abolun ahi. 30Chuin chil asetkhumun, apumpeng choi chu alauvin, alu avoh naovin ahi. 31Chutia chu totnopna-a a-el ela abol jouvun, pon san chu ahoh lha uvin, ama pon asilpeh-un thingpel'a khetbeh dingin apuitaovin ahi.

Jesu Thingpel'a Akhetbeh-u

(Mrk 15:21-32; Luk 23:26-43; Jhn 19:17-27)

32Chujouvin apotdoh uva acheule, amin Simon atiu, Cyrene gam mi khat amuvin, ama athingpel puding chun acham louvin amanun ahi. 33Chuin Golgotha (Hichu lugumun tina ahi) atiu mun chu alhunun, 34#Labu 69:21. Amahon Jesu chu gilkhatoh kihal lengpitwi thuh adonsah-un ahile, aman atepmin adon nomtapon ahi.

35 # Labu 22:18. Chujouvin amachu thingpel'a akhenbeh-un; themgao thusei, kapon akihom taovin, chule kasangkhol chol vang vetnan amang taove, atichu guilhun nan, apon chu akihomun, chule vang avetaove. 36Chule hikoma chun atouvun, ama chu angah taovin ahi. 37Chule HICHEPA HI JESU JUDA TE LENGPA AHI, tin ahehnau hetsahna asunun, alu chungah atah-un ahi. 38Hiche pet chun amatoh thakhatnin gucha michom ni, khat ajet lamah khat avei lamah thingpelah akhen beh-un ahi.

39 # Labu 22:7; 109:25. Chuin achele avahle jousen akhasuh khumun, a-el elin ahouvun, 40#Matt 26:62; Jhn 2:19. Nang houin suse-a ni thuma sadoh kit, nangma kihuh hing tangem! nangma Pathen Chapa nahile, thingpel'a konin hung kumlhan, atiuvin ahi.

41Thempu pipuihon jong, danthu sunho le upaho toh chutima chun totnopnan abolun, 42Aman midang ahuhhingjin; ama akihuhhing theipoi. Ama Israelte Lengpa ahileh, tun thingpel'a konin hung kumlha temhen, achutile tahsanunge. 43#Labu 22:8. Aman Pathen asongin; Pathen'in adei ahile tun huhhing hen; ijeh-inem itile aman, Pathen Chapa kahi ati, atiuvin ahi.

44Chule amatoh thingpel'a kikhetbeh tha gucha michomte ni jong chun, chutobangma chun ahouse lhonin ahi.

Jesu Athi

(Mrk 15:33-41; Luk 23:44-49; Jhn 19:28-30)

45Chuin nidan gupma pat Nidan ko geijin, gam jouse chungah mu athim tan ahi. 46#Labu 22:1. Chuin nidan ko donin Jesu'n, Eli, Eli, lama sabachthani, tin hapenin apengin ahi. Hichu, Ka Pathen, ka Pathen, ibola neidalhah ham, tina ahi.

47Chukoma dingho lah-a abang bangin chutia ati chu ajauvin, Hichepan Elijah akouve, atiuvin ahi. 48#Labu 69:21. Chupettah chun alah uva khat alhaijelin, twichop phon khat alan, lengpitwi thuh adelhopmin, pengtenggol leh-a atah-in, agahdonsah-in ahi.

49Ahin adangho chun, Limsah hih-in; Elijah ahuhhinga hunga hung hih-am, veohite, atiuvin ahi.

50Chuin Jesu hapenin apengin, alhagao alhadohtan ahi.

51 # Pot 26:31-33. Chuin, veuvin, houin'a pondal len chu achunga pat anoi geijin a-ehlha paijin keh ni akison; chule ling akihotnin, songpiho akeh-in ahi. 52Chule lhankhuh ho akihongin, a-imu mithengho long tamtah kaithouvin aumin ahi; 53Chule ama thokit nung chun amaho chu lhankhuh-a konin apotdoh-un, khopi thenga ache lutnun, mi tamtah akimusah uvin ahi.

54Chuin sepai jalamkai le aumpi Jesu ngah-a pangho chun ling kihot le thilsoh umchanje chu amuvin, akicha lheh jengun, Hichepa hi Pathen Chapa tahbeh mong ahi, ati taovin ahi.

55 # Luk 8:2-3. Chule Galilee gama kona Jesu nung hinjuija ajenlea pang numei tamtah aumun, amaho chun galkanga pangin ave jingun ahi. 56Alah uva chun Magdalene Mariam, Jacob le Joses nu Mariam, chule Zebedee chapate ni nu aumun ahi.

Jesu Avuiju

(Mrk 15:42-47; Luk 23:50-56; Jhn 19:38-42)

57Chuin nilhah ahi phatnin, Jesu seijuija pang Arimathea kho-a amin Joseph atiu mihaotah khat Pilate henga ahungin, Jesu long chu athumin ahi. 58Hichun Pilate chun apeh dingin thu apetan ahi. 59Chuin Joseph chun along chu alan, tupat ponnem ngimseh chan atomin, song alaihom ama lhan thah sunga chun alupsah-in, 60Lhan kotna chun song lentah khat atanglutnin, achemang tan ahi. 61Chule Magdalene Mariam le Mariam chom nu chu hikoma chun aumun, lhan maija chun atou jingun ahi.

Lhan Ngah Ho

62Ajingin, hichu kigot ni ahin, thempu pipuiho le Pharisai ho Pilate hengah akikhomun, 63#Matt 16:21; 17:23; 20:19; Mrk 8:31; 9:31; 10:33-34; Luk 9:22; 18:31-33. Ajah-a, Kapu, hiche milhemlhapa chun ahinlaijin, Ni thum joule thoukit ding kahi, ati chu tun kalunguva alange. 64Hijeh chun ni thum geija alhan ngah ding thu pen; ajole jannin aseijuite hunguntin, gumang untin, miho jah-a, Athi lah-a konin athoukit tai tiget nunte; chutile suhkhel masah sanga suhkhel nunung chu setchehna hi ding ahi, atiuvin ahi.

65Pilate'in ajah uva, Nanghon santri hon khat naneiju chu; cheovinlang nanga thei theijun ganga phatsah taovin, ati.

66Chuin amaho angah ding santri hon chutoh alhonun, song chunga chun mohor anamun, lhan chu phatah-in angasah taovin ahi.

Currently Selected:

Mathew 27: THADBSI

Highlight

Copy