Luke 17

Chonset

(Matt 18:6-7,21-22; Mrk 9:42)

1Chuin aman aseijuite jah-a, kipal lhuh umlou thei ahipoi, ahinla kipal lhuh sahpa chu ada ahi! 2Hichepa chun hiche aneochaho lah-a khat akipal lhuhsah sangin, angonga sumhei song kikhaihen, twikhanglen'ah kileh lutle ama dinga phajo ahi. 3#Matt 18:15. Nangho kichih theijun, nasopi nangdouna-a achonsetle phoh-un; chua alung aheija ahile ngaidamun. 4Chule ama nachunga ni khat sunga sagivei achonsetna, chule sagivei nahenga ahung kiheija, Kakisih-e, atile, ngaidamin ati.

Tahsan

5Chuin solchah hon Pakai jah-a chun, Pakai, katahsanu khansahben atiuve.

6Chuin Pakaiyin, Nanghon tahsan na ankam-mu te beh nanei uva ahile, hiche thingtheimi phung jah-a hin, Kibotdoh inlang twikhanglen'a kiphut in tileu chun, nathuva nung ding ahi.

Soh Natoh Ding

7Ahinla nangho lah-a koi nahiuvem, asohpan lou kaija, ahiloule gan chinga louva kona ahungleh henga, tule tuhin hungin, an nedingin touvin tia sei dinga? 8Chutia titah sanga, Kaneh ding an neigot peh-in, keiman kaneh jou kadon jou kahsen natai kigeh-inlang neijenin; chujoule nangin naneh-a nadon dingbou ahi, atijoh lou dingham? 9Chuche sohpa chun thupeh dungjuija abol jeh-a chu a-pakaipan apachat ngaijem? Katahsanpoi. 10Chutobanga chu nanghon jong nakithupeh chengseu nabol jousoh tengule, Soh phachom lou kahiuve, kabol dingdol bep kabolu ahi, tiuvin, ati.

Jesu'n Miphah Som Adamsah

11Chuin ahitin ahi, Jerusalem jonin achen ahile, Samaria le Galilee gam ajotpan ahi. 12Chuin ama kho khatna alutnin ahile, miphah somin anakimutopin, amaho chu gamlata-a adingun, 13Pipu Jesu, neilungsetnun, tin hasaptah-in asamun ahi. 14#Thmpu 14:1-32. Chuin aman amaho chu amu phatnin, ajah uvah, Cheovinlang thempuho gakivetsah uvin, ati. Chuin ahitin ahi, acheuva ahile adam thengpa taove. 15Chuin alah uva khat chun adamthengtah chu ahet phatnin, akinunglen, aw sangtah-in Pathen avahchoijin; 16Chuin akengphang bulah aboh khupmin, athangvah tai; ama chu Samaria mi ahi. 17Jesu'n adonbutnin, Som kisutheng hi louham? Mi ko hoibaham? 18Hiche chidang namdangpa tailou adangho Pathen vahchoi dinga hung kinungle-a akimupoi, ati. 19Chuin aman ajah-a, Thouvin, chetan; natahsanin nadamsah ahitai, ati.

Lenggam Hung Lhun Ding

(Matt 24:23-28,37-41)

20Chuin, Pathen lenggam itih-a ahung lhun ding Pharisai hon adongun ahile, aman adonbutnin, Pathen lenggam chu mu theijin ahungpoi. 21Veuvin, hikomah, ahiloule khukomah kiti lou ding ahi; ijeh-inem itile veuvin, Pathen lenggam nalah uva aume, ati.

22Chuin aman aseijuite jah-a, Nanghon Mihem Chapa hinlai nikhoho khat beh namu nom dingu, ahivanga namu lou dingu nikho chu hung lhung ding ahi. 23Chutengle, veuvin, khukomah; veuvin, hikomah tia najah uva asei dingu ahi; ahivangin nangho che hih-un, amaho nung jong jui hih-un; 24Ijeh-inem itile kolphe vannoi kolmong lang khat lama aphetna, kolmong lang khat geija asalvahji banga, Mihem Chapa hung ni jong chutobang ding ahi. 25Ahivangin hiche masanga chu thil tamtah athoh ding, chule hiche khang mite paija umtei ding ahi. 26#Semt 6:5-8. Chule Noah hinlai thilsoh umchan bang chu, Mihem Chapa nikho jongle hi ding ahi. 27#Semt 7:6-24. Noah kong'a alut ni gei chun amahon aneuvin, adonun, akichengun, chule akichensah-un; chuin twisang ahung lenin, abonchauvin asumang heltan ahi. 28#Semt 18:20—19:25. Chutobangma chun Lot hin laijin jong asoh-in: mihon aneuvin, adonun, thil ajoh-un, thil achouvin, aphutnun, chule in asauvin; 29Ahivangin Sodom kho-a kona Lot apotdoh nitah-in van'a konin mei le kath ahung lhan, abonchauvin asumanghel tan ahi. 30Hiche tobanga chu Mihem Chapa hung kiphondoh ni jongle hi ding ahi.

31 # Matt 24:17-18; Mrk 13:15-16. Hiche ni chule in chunga uma chu insunga athil um kilah dingin hungkum hihhen; chutima chun loujaova uma jong hung kinungle kit dahen. 32#Semt 19:26. Lot inneipi chu geldoh-un. 33#Matt 10:39; 16:25; Mrk 8:35; Luk 9:24; Jhn 12:25. Koihile ahinna huhdoh nading hola chun achan ding ahi; chule ahinna chana chun akihuhbit ding ahi. 34Kaseipeh nahiuve, chuche jan chule mi ni jalkhun khatna lumding; khat chu kila-a, khat chu kidalha ding ahi. 35Numei nin sumhei khatna agoi khom ding; khat kila-a, khat kidalha ding ahi. 36Mi ni louva umding; khat kila-a, khat kidalha ding ahi, ati.

37Chuin amahon adonbutnun, ajah-a, Hoija-em, Pakai? atiuve. Chuin aman, Thilong umna-a chu muthong kikhom ding ahi, ati.

Currently Selected:

Luke 17: THADBSI

Highlight

Copy