Luke 13

Lungheilou Thina

1Hiche pettah chun akoma um phabepmin, Pilate'in Galilee miho atha-a, athisanu a-Pathen hou nahou toh achopel thu chu ajah-a aseijun ahi. 2Chuin Jesu'n adonbutnin, ajah uva, Chutobang athoh jeh uva chu amaho chu Galilee miho jouse sanga chonse deh ahiuve, tia nangaitou vem? 3Kaseipeh nahiuve, ahipoi: nangho jong lung nahei louvule chutobangma chu namanthah dingu ahi. 4Chule Siloam insang achima mi somleget adel lihho jong chu Jerusalem'a cheng jouse sanga suhkhel neideh-a nangaitou vem? 5Kaseipeh nahiuve, ahipoi: nangho jong lung nahei louvule chutobangma chu namanthah dingu ahi, ati.

Agabei Theichang Phung Thulem

6Chuin aman thulem hiche hi aseijin ahi: Mikhat hin alengpi leijah theichang phung khat kiphut aneijin; chuin aga ahung holin ahile, khatcha jong amupon ahi. 7Chuin aman lengpilei lhoupa jah-a, Ven, hiche kum thum sung hin kahungin, theichang phunga aga kahung holjin khatchala kamupoi; phuh lhutan; hiche hin idinga alei manmo aso dingham? ati. 8Chuin aman adonbutnin ajah-a, Pakai, tu kum-in jong hoitadin; keiman akimvel lai jingting, bong-eh sunginge; 9Chukala agale apha; aga lou vangle phuhtan, ati.

Jesu'n Cholngah Ni-a Atingbong Numei Khat Adamsah

10Chuin cholngah nin kikhopna in khatnah thu ahilin ahi.

11Hia chun veuvin, kum somle kum get chamona lhagao vop numei khat aumin; amanu chu atingbonga, achama dingjang thei louhel ahi. 12Chuin Jesu'n amanu chu amu phatnin, akouvin, ajah-a, Numei, nachamona-a kona kilhadoh nahitai, ati. 13Chuin amanu chungah akhut angamin ahile chupettah chun ajangpaihel jengin, Pathen avahchoitan ahi.

14 # Pot 20:9-10; Danb 5:13-14. Chuin cholngah ni-a Jesu'n adamsah jeh chun, kikhopna in vaipopa chun lunghang tah-in adonbutnin, miho jah-a, Mihemin na atohna ding ni gup uma ahin; hiche sung chun hungun lang kibol damuvin; cholngah ni vangle hungji hih-un, ati.

15Ahinla Pakaiyin ama chu adonbutnin, Nangho mi miphalhem ho, nanghon nabongchalu hijongle, nasangan'u hi jongle cholngah ni-a a-ankonga kona nasutlhah uva twi dona napui chehji hih-um? 16Achutile Abraham son hiche numeinu hi, veuvin, kum somle kum get Satan'in ahen na-a kona cholngah ni-a sutlhah angai hilouham? ati. 17Thu chucheng asei phatnin adouho chu ajahcha taovin; mipi chengse vang chu athilbol loupi jouse jeh chun akipah sohkeijun ahi.

Ankam Mu Thulem

(Matt 13:31-32; Mrk 4:30-32)

18Hijeh chun aman hitin seije, Pathen lenggam chu itobang ham? Ipitoh katekah ding ham? 19Ankam mu chang khat mikhatnin alah-a ahona athea, akhandoh-a thingphung asoa, abah lah-a chunga leng vachaho age tobang ahi, ati.

Chol Thulem

(Matt 13:33)

20Chuin aman aseiben, Pathen lenggam chu ipitoh katekah ding ham? 21Numei khatnin chol alah-a, changbong dan thum lah-a aboncha apomsoh kahse-a avui tobang ahi, ati.

Kot Jim

(Matt 7:13-14,21-23)

22Chutichun aman khopihole khoneoho ajotnin, thu ahilpeh-in, Jerusalem ajonin ahi. 23Chuin mikhatnin ajah-a, Pakai, huhhing-a umding hohi lhom uvam? ati. 24Chuin aman amaho jah-a, Kot jima lut ding kichu-uvin: ijeh-inem itile keiman nangho kaseipeh nahiuve, mi tamtah lut kigo ding, ahivanga lut thei lou ding ahi. 25Ahivangin a-inneipu akipatdoh-a kot akha nungle nangho polama nadin uva, Pakai, Pakai, kot neihonun, tia kot nakiu tengule; aman, Hoilam kon mi nahiu kahepoi ati ding; 26Chutengle nanghon, Na-ang sungtah-a jong kaneuvin kadonun, chule kakhosung lamlenuva jong neihilui nati dingu; 27#Labu 6:8. Chule aman, Keiman nangho hoilam kon nahiu kahepoi; kakoma konin chemangun, nangho chonset bolteho, ati ding ahi. 28#Matt 22:13; 25:30. Abraham, Isaac, Jacob chule themgaoho jouse Pathen lenggama a-umu namuva, nangho pama nakiledoh-u namu tengule, hikoma chu kale hagel umding ahi. 29#Matt 8:11-12. Chule amaho solamle lhum lama kon, sahlam le lhanglama kona hunguva, Pathen lenggama tou ding ahiuve. 30#Matt 19:30; 20:16; Mrk 10:31. Chule, veuvin, anukhahho chu masa ding, chule amasaho chu nukhah ding ahi, ati.

Jesu'n Jerusalem Angailut

(Matt 23:37-39)

31Hiche pettah chun Pharisai ho phabep ahungun, ajah-a, Hikoma konin potdoh-in; chemangtan, ijeh-inem itile Herod'in tha dingin natupme, atiuve.

32Chuin aman amaho jah-a, Cheovinlang chuche Sial jah-a chun gaseijun, Ven, keiman tunile jinga thilhaho kanodoh-a, anaho kadamsah ahin, athum ni leh kachaisoh ding ahi. 33Ahoi hijongle tunile jinga, chule akitni leh kachena dinga kachepeh ding ahi; ijeh-inem itile Jerusalem louva themgao thi thei ahipoi.

34Vo Jerusalem, Jerusalem, themgaoho that le ahenga kisol teho songa seplih; ahpin anoute alha noija a-opkhum banga, keiman jong nachate ijatvei opkhum dinga kagot hitam! Ahin nangho nanompouve. 35#Labu 118:26; Jer 22:5. Veuvin, na-in chu akamhel dinga nangho kidalhah peh nahiuve; chule tahbeh-a kaseipeh nahiuve, Pakai mina hungpa chu anunnome nati masang seuva, keima neimu lou dingu ahi, ati.

Currently Selected:

Luke 13: THADBSI

Highlight

Copy