Semtilbu 35

Pathen'in Bethel'a Jacob Phatthei Aboh

1 # Semt 28:11-17. Chuin Pathen'in Jacob henga, Kipat doh-in, Bethel'a chetou vinlang, chua chun gachengin; chule na-upa Esau'a kona najam mang laija nahenga hung kilah Pathen dingin chua chun maicham khat semin, ati.

2Chujouvin Jacob'in a-insung mite le aumpiho jouse henga chun, Nalah uva gamdang Pathen umho chu koidoh-un, kisuthengun, chule navonu kikhelun, 3Chule eiho kipatnu hitin, Bethel'a chetouvu hite; chua chu kahesoh laija eina donbutna, kachena lam chana eiumpi jinga Pathen dingin maicham khat kasem ding ahi, ati. 4Chuin amahon akhutnuva um gamdang pathen jouse le abiluva bilba jouse Jacob apetaovin; chuin Jacob'in hiho chu Shechem koma gangpi phung noija chun aselin ahi.

5Chuin amaho acheuvin ahile, aveluva um khopi ho jouse chunga chun Pathen'a kona tijatna achutan, chule amahon Jacob chapate chu anungdel tapouvin ahi. 6Chutichun Jacob chu ama le aumpi miho jouse chutoh Canaan gama Luz, hichu Bethel ahin, ahunglhung taove. 7Chuin aman chukoma chun maicham khat asemin, hichu El-Bethel asahtai. Ajehchu a-upa-a kona ajammang laija chumuna chu Pathen ahenga hung kilah-a ahi.

8Ahin Rebekah jennu Deborah athitan, chule amanu chu Bethel mun'a gangpi phung noija chun akivuitan ahi. Chule chuche minchu Allon-bacuth akisah tai.

9Chuin Padan-Aram'a kona ahung potdoh chun, Pathen Jacob henga ahung kilah kitnin, amachu phatthei aboh-in ahi. 10#Semt 32:28. Chuin Pathen'in ama henga, Namin hi Jacob ahin: namin hi Jacob kiti kit lou ding, amavang namin Israel kiti joding ahitai, ati. Chuin aman amin chu Israel asahtai. 11#Semt 17:4-8. Chuin Pathen'in ahenga, Keimahi hat chungnung Pathen kahi, chi tamtah lhah inlang, hapunin pungin; nampikhat chule nam chom chom loijong nanga konin hung doh intin, chule lengho jong nanga kona hung pengdoh dingu ahi. 12Chule Abraham le Isaac henga kanapeh gamchu nangma pengting, chule nangma nungsanga nachilhahte jong hiche gamhi kapeh ding ahi, ati. 13Chuin akihoulimpi na mun'a chun Pathen ama-a konin akaltou tai. 14#Semt 28:18-19. Chuin akihoulimpi na mun'a chun Jacob'in khompi khat, songkhompi chu aphutnin; hiche chunga chun donding thilpeh alheilhan, chuin aman chuche chunga chun thao asungin ahi.

15Chuin Jacob'in Pathen'in ahoulim pina mun chu Bethel asah tai.

Rachel Thi

16Chuin amaho Bethel'a konin achetauvun, chuin Ephrath lhunna ding chu phabep aum nalaijin ahi. Chuin Rachel naosonat nin anatan, nasatah-in athohgim tan ahi. 17Chuin ahitin ahi, amanu athohgim behseh phatnin, nao domnu chun ahenga, Kicha hih-in, nangman hiche chapa jonghi naneiding ahi, ati. 18Chuin ahitin ahi, alha achedoh to lhonin, (ajehchu amanu thia ahitai) amanun amin Ben-oni asah-in ahi. Ahivangin apan Benjamin asah-in ahi.

19Chuin Rachel athitan, Bethlehem kiti Ephrath jotna lampia chun avuitaovin ahi. 20Chuin Jacob'in alhan chunga chun songkhom aphutnin; hichu tuni geihin Rachel lhansongphu akiti jingin ahi. 21Chuin Israel achepeh-in, Edar insang kala chun apon in chu asongin ahi.

Jacob Chapate

(1 Thusm 2:1-2)

22 # Semt 49:4. Chuin ahitin ahi, Israel chuche gama achenlai chun Reuben achen, apa thaikemnu Bilhah chu aga luppitan; chuin Israel'in hichu ahetan ahi. Tun Jacob chapate chu somleni ahiuve. 23Leah chapate chu, Jacob chapa masapen Reuben, Simeon, Levi, Judah, Issachar chule Zebulun ahiuve. 24Rachel chapate chu, Joseph le Benjamin ahilhone. 25Chule Rachel sohnu Bilhah chapate chu, Dan le Naphtali ahilhone. 26Chule Leah sohnu Zilpah chapate chu, Gad le Asher ahilhone. Hichenghi Jacob chapate Padan-Aram gama pengho chu ahiuve.

Isaac Thi

27 # Semt 13:18. Chuin Jacob Arba khopi, hichu Hebron ahin, Abraham le Isaac pemna mun Mamre'a chun apa Isaac kom ahunglhun tan ahi. 28Chule Isaac damsung chu kum jakhat le kum somget ahi. 29Chuin Isaac'in alhagao alhan, upatah le teh bongsetnin athitan, amite toh gopkhomin aumtan ahi. Chuin achapa teni Esau le Jacob chun avuilhon tan ahi.

Currently Selected:

Semtilbu 35: THADBSI

Highlight

Copy