Solchah 14

Iconium Kho-a Paul Le Barnabas

1Chuin Iconium kho-a chun ahitin ahi, amani Juda ho kikhopna in'a alut lhonin, thu asei lhonin ahile, Juda miho le Greek mi atama tamin atahsan jengtan ahi. 2Ahivangin thua nunglou Juda hochun chidang namdangho atilseuvin, sopiho chu amuda sah taove. 3Hijeh chun sottah aum lhonin, alungsetna hettohsah-a akhut lhona thil kidangle melchihna bolsah Pakaiya chun hakattah-in thu aseiji lhonin ahi. 4Hichun khopi-a mipi chu akikeh khenun, akimkhat Juda ho lama, akimkhat solchah ho lama apangtauve.

5Chuin chidang namdangho le Juda hon avaipohou to kitho-a amani chu nahsahmo-a bola songa seding agouvin ahile, 6Hichu amanin ahedoh lhonin, Lycaonia gama Lystra le Derbe kho, chule akimvelah-a ajam lut lhonin, 7Chua chun Kipana Thupha agahil lhangle lhontai.

Lystra Leh Derbe Kho-a Paul Le Barnabas

8Lystra kho-a chun imatih chana lamjot lou, akenga tha himhim umlou, apena elbaija peng khat atouvin, Paul thusei angai jingin ahi. 9Chuin aman ama chu ave aven, boldama aum ding atahsan chu ahen, 10Hatah-in asamin, Nakengin pansan ding jangin, ati. Chuin ama akichomin adingin lam ajottai. 11Chutah chun mipi chun Paul thilbol chu amu phatnun, Lycaonia paovin, pathenho mihem lima ihenguva hung kumlha ahiuve, atitaove. 12Chuin amahon Barnaba chu Jupiter #14:12: Jupiter: Zeus jong kiti. asah-un, chule Paul chu thuseija apipui ahi jeh chun Mercury #14:12: Mercury: Hermes jong kiti. asah taove. 13Chuin khopi kotmaija a-houin uma Jupiter hou thempupa chun bongchal le pahchavui kotpi phunga ahin choijin, mipi chutoh amani houna-a chu tha dingin agotauvin ahi.

14Ahivangin solchah teni, Barnabas le Paul chun hichu ajah lhon phatnin, apon asat-eh lhonin, mipi heng lama chun alhaijel lhonin, asam lhonin, 15#Pot 20:11; Labu 146:6. Vo miho, ibola hitobang hi nabol uham? Keini jong nang hotoh kithakhat mihem kahilhon bouve; chule hiti mohthil ho-a kona hi vanle lei twikhanglen chule asunga thil um jouse sema Pathen hing henga nakiheina dinguva, Kipana Thupha kahung lhutpeh nahiuve. 16Hiche Pathen chun malaija chu namtin vaipi jouse hi aningnop cheh-a analhatsah ahi. 17Ahivangin ama hettohsahna beijin anaumpoi, Hitichun phatna abol jingin, van'a kon gotwi le ima ga phatle anneh eipeuvin, ilungthimu kipa thanop na-in adimsahjin ahi, ati lhone. 18Thu hicheng chu asei lhona konchun, nah nah-in amani houna-a gan tha ding go-a mipi chu akham jou lhonin ahi.

19Chuin Antioch le Iconium'a konin Juda mi phabep hilama chun ahungun, mipi ho chu atilseuvin, Paul chu songin asesah-un, athi ahitai tin, khopi pam lama akaidoh taove. 20Ahivangin seijui ho akimvela adin pettah-un, ama athoudoh-in, khopi sungah aluttai. Chuin ajing nikhon Barnabas toh Derbe jondin akipatdoh lhontai.

Syria Gam Antioch mun'a Akilekit Lhon

21Chuin amanin chuche khopi-a chu Kipana Thupha ahillhangle lhona, mi tamtah ahil lhon jouvin, Lystra, Iconium, chule Antioch lama akile kit lhonin, 22Genthei hesoh tamtah thoh-a Pathen lenggama ilut dingu ahi tin seijui ho chu tahsana aumdet jing dingun thu ahil lhonin, alungu aphut detpeh lhontai. 23Chule amanin houbung tina upaho apansah lhona, an angola atao jouvun, atahsanpao Pakai henga chun amahochu apedoh lhontai.

24Chuin Pisidia gam achonsoh lhon phatnin, Pamphylia'a ache lhonin, 25Perga-a thu ahil lhon jouvin, Attalia lama ache lhontai. 26Chuin chua kon chun kongin akitol lhonin, ahin tohchai lhon chu tong dinga Pathen lungsetna-a akipehdohna lhon Antioch kho-a chun ache lhontan ahi.

27Chukom alhun lhon phatnin, houbung miho akhom lhonin, Pathen'in amani mangcha-a athilbol jouse le chidang namdangho dinga tahsan kot ahonpeh umchanje chu ahetsah lhontan ahi. 28Chuin amani chu seijui ho toh sottah aumkhom lhontai.

Currently Selected:

Solchah 14: THADBSI

Highlight

Copy