MARK 14

Jisu Thatnatu Amichaang

(Met 26:1–5; Luk 22:1–2; Jon 11:45–53)

1 # Met 26:1–5; Luk 22:1–2; Jon 11:47–53 Ipek chol jaonoh tol leh Laalna buhdoon nijannih avaatlaia akthloi thiimpu khatkho ringjih lulok eiin khatloh a amahta inruktea suura ithat umeta amijonpei; 2alamva anmah in anson, “Buhdoon suunga tlohnohrei, alamva mii in dirdir tihtuei.”

Jisu ta Bethani a Thao Atei

(Met 26:6–13; Jon 12:1–8)

3 # Met 26:6–13; Luk 7:36–38; Jon 12:1–8 Che amah in Bethani a reichi kop Simon inna a amlai, tebor kuunga anbok in, kumei khat in amrimtui aman khalmo chaal thao alabaster a anseem abuurkhat a thlenna thlengsa, che amah in akhumta amhoongche akangchunga apoihpei. 4Chuta arouin amilung inhaanga khatleh khat insonsei, “Jarella mah amanchaal inteiphu thaota ampaampeime? 5Alamva mah inteiphu thao i dinari reija inthum akralla ajurhche anran anriingta malanleva” ta anmah in kumeita anrilhpei. 6Chuta Jisu in asonei, “Amahta akroua mahve; jarelna nannih in amahta namilahme? Amah in akthra thlouta kikuunga atlohpei. 7Alamva anran anriingva nannihsoh injomma amjou tuei, che nannih in anmah kuunga akthra nantlohja laia nantlohtu; chuta nannihva keisoh injomma amnoh uchou. 8#Jon 19:40Amah in achekpot keikuunga atlohpei; keita kanhuihnoh maa a amah in kiruungta thao poih a keinuulpei. 9Che atak a keiin nankuunga kisonchou, tukleiram apumtea Akthra Trong ita anraan anraanna a, amah in atlohthlou ita intheihna veia anson usa.”

Jisu Jurhnatu Judas in Aja

(Met 26:14–16; Luk 22:3–6)

10 # Met 26:14–16; Luk 22:3–6 Cheva Judas Iskariot, somleinih ankaarna inkhat in, Jisu ta jurhnatu akthloi thiimpu kuunga sehsa. 11Che mahchu antheih in anroomthoksa, che baobeh malannatu trongchet anlohpei, che amah in ajurhnatu reipakthra amjonpei.

Jisu in Aroisoh Laalna Buh Asaakjou

(Met 26:17–25; Luk 22:7–14,21–23; Jon 13:21–30)

12 # Met 26:17–19; Luk 22:7–13 Che chol jaonoh tol doonna matsah aknia, anmah in khuldoon sadam ankatnia, aroi in amahkuunga anson, “Kannih in ramma seh a khuldoon buh saaknatu thlouraang kantloh ume?” 13Amah in aroi ankaarna innihta amthlah ei, che ankuunga asonei, “Khuuboom suunga sehve, che tuiipul tonga kupakhat nantuukpitu; amahta juihve, 14amah in aluutna innpuninga sonve, ‘Lulok in ason, kei rapkhei khumchu khome, ramma keiin kiroi eisoh khuldoon buh kisaak ume?’ 15Che amah in maseenga amchaangche achungnung khumkhat nanimmuhtu; mahchun inihturel thlouraang tlohve.” 16Che aroi eiin inthruh a che khuuboomma sehsei, che amah in ankuunga asonnanga antuukpipei; che mahchunna khuldoon buhdoonnatu thlouraang antlohpei.

17 # Met 26:20–25; Luk 22:14,21–23; Jon 13:21–30 Che khulouhram aphah in amah in somleinihsoh thlengsa. 18Che anmah in tebor a ansaaklaia, Jisu in asonei, “Atak a, keiin nankuunga kitihchou, nankaarna inkhat in keita keijurhtung, mah chuvah keisoh jouta aksaa mii khanna.” 19Che anmah in marhuui amithronpei, chuche amahkuunga inkhat khat a antihpei, “Mahchu keisangme?” 20Amah in ankuunga asonei, “Mahchu somleinih nankaarna inkhat, amah in tol alohnatu kama keisoh jouta akut apuurtu. 21Alamva miivaa Asa kupa in amah turelna injihche khananga sehtu, chuta miiva Asa kupata akjuur amahkhava lahnasa! Amah turelva anpoknoh in ralla thratuta.”

Akpu vaa Buhdoon

(Met 26:26–30; Luk 22:14–20; 1 Kor 11:23–25)

22 # Met 26:26–29; Mak 6:41; 8:6; Luk 22:17–19; 24:30; 1 Kor 11:23–26 Che anmah in ansaaksuunga, amah in tol loua doi amlan, mahchuta akhoihche ankuunga malanna asonei, “Louve, mah i kei kiruungsa.” 23#1 Kor 10:16Che amah in chapla alohpei, mahchuta ampaakcheva amah in ankuunga amlanei, mahche annaamte in mahchu an iinpei. 24#Hib 9:20Che amah in ankuunga asonei, “Mah i kei trongirhnavaa thiisa, miitam turella akluungsa. 25Atak a, keiin nankuunga kisonchou, keiin veikhat inlenga ngangli atuii i iinnoh usang Ringpu kurung huunna aknia akthar veia ki innohmiil.” 26#Met 26:30–35; Luk 22:33–34,39Che anmah in laa tlohjoua chorophol muulla sehsei.

Pitar in Andahsam Jisu in Matsah a Aphoong

(Met 26:31–35; Luk 22:31–34; Jon 13:36–38)

27 # Jon 16:32 Che Jisu in ankuunga asonei, “Nannih nannaamte in keita nanmah umang ang; alamva mah i injih a amsa, ‘Keiin sadamkemta kamrattu che sadam in inthek invorh usei.’ 28#Met 28:16; Mak 16:7Chuta keita kamringangche aknua, nannih nanmaa Kalili ah keiin lousehtung.” 29Pitar in akuunga ason, “Anmah annaamte in nangta nakmah a seh seilakho, keiva tiknikho nakmahnohtung.” 30#Mak 14:66–72; Jon 13:36–38; 18:17–18,25–27Che Jisu in akuunga ason, “Atak a, keiin nikuunga kisonche, mi in khulouh talla, aarkhong in veinih ankhuungnoh maa a, nangin keita veithumkhek kandah a inleem uche.” 31Chuta amah in karaang kanga ason, “Keiin nangsoh thijoutung, keiin nangta nandahnoh luungtung.” Che mahchunanga annaamte inkho intrimbenga ansonpei.

Ketsemani ah Jisu in Angen

(Met 26:36–46; Luk 22:39–46)

32 # Met 26:36–46; Luk 22:40–46; Hib 5:7–8 Che anmah in Kethsemani antih amunna sehsei; che amah in aroikuunga asonei, “Keiin kingensuunga, onna loubokve.” 33Che amah in Pitar leh Jems mahche John ta anruuipiei, che amah aril klah leh insuk inhal amthronpei, 34#Jon 12:27che amah in aroi ankuunga asonei, “Kei kikli i khalmo thisamma klahsang; onna louamve, che heithriilve.” 35Che ste inlah ah asehche, amah in tukleia intolh a angenpei, mah i vei ajaleva, amah akuungnata pungi masehro. 36#Rom 8:15; Kal 4:6; Mak 10:38; Jon 18:11Che amah in ason, “Abba, Pa, poot anaamte nikuunga veikir; mah kammi keiningnata louro; chuta keiin kamdon veinoh a nangin nimdon veiso.” 37Che amah in athlenglaia anmahva inna louamsei, che amah in Pitar kuunga ason, “Simon, in mangcheme? Nangin pung khatrukho innoh a doucheknoh cheme? 38#Met 6:13; Luk 11:4Nannih in madoina a nantlaknoh natu doutrangve che ngenve; li inva amdon chuta ruung invah marnopsa.” 39Che veikhatla amah in ngennatu sehsa, intrimbeng trongta sonna angen. 40Che amah in veikhat athlenglaikho anmah in inna louamsei, alamva an ihmuh hanga anmit khalmo klahsei; che anmah in akuunga khatloh a amisangtu tihkho romnohsei. 41Che amah in ankuunga veithum tihpi thlengsa; che ankuunga asonei, “Nannih in pekphah inna inngaia ammang choume? Ajapei, apungkha thlengsa; miivaa Asa kupakha alehvaa ankut a anjurh usa. 42Inthouvesa seh raseio, anve, keijuurtu miikha inihkuunga innaisa.”

Jisu ta Ansuur

(Met 26:47–65; Luk 22:47–53; Jon 18:3–12)

43 # Met 26:47–56; Luk 22:47–53; Jon 18:2–11 Che Kak hanga amah in atrong suunga, somleinih ankaarna inkhat, Judas in thlengsa, che amahsoh inruuia miitam chemthal mahche sungsoh inruuia thlengsei, anmahva akthloi thiimpu khatkho ringjih lulok che anparuul in amithlah ei. 44Ipek akjuurmii in ankuunga daang malanna atih ei, “Keiin kamchohmiikha Amahkhasa; Amahta suurchoulaia thra sella phurhvesa.” 45Che amah in athlengsoh kak hanga Jisu kuunga avache atihpei “Lulok!” cheva amahta amchohpei. 46Che anmah in akutkhit a ansuurpei. 47Chuta ankaar a akngir inkhat in chem akjuukche akthloi thiimpu vaa roijuih inkhatta amkuur apheklokpei. 48Che Jisu in ankuunga asonei, “Inru miita aksuursam nanga, chemthal khatkho sungsoh inruuia keita keisuur thleng sachoume? 49#Luk 19:47; 21:37; Jon 18:19–21Aknirel keiin nannihsoh inruuia mathruunna thlaamma nannihta nanimtheih a ammang, che mahlai nannih in keisuurnohchou, chuta ringjih trongkha athlungna veisa.” 50Che annaamte in amahta mathlah a tlaankirsei. 51Che intlangsa khat in amahta ajuihpei, jakhatkho injaonoh chuta bulaapuunna aruungta inthlomning; che anmah in ansuurpei, 52chuta bulaapuun alonche athlaia tlaansa.

Jisu in Jama Anmaikuunga

(Met 26:57–68; Luk 22:54–55,63–71; Jon 18:13–14,19–24)

53 # Met 26:57–68; Luk 22:54–55,63–71; Jon 18:12–24 Che anmah in Jisu ta akthloi thiimpu kuunga anphurhpei, che akthloi thiimpu annaam leh anparuul khatkho ringjih lulok in inchunna amsei. 54Che Pitar in amahta inlabeb a ajuih, akthloi thiimpu innmuk phah a; che amah in mei oh a akngaak raalmii eisoh inbok a am. 55Ipekva akthloi thiimpu mahche jama annaam in Jisu ta anthatna turella sakhi anjonpei, chuta anmah in jakhatkho tuuknohsei. 56Alamva aktam in amahrella chimnoh a sakhi amilanpei, che anmah sakhichu inchunnohsei. 57Che arouin ngirra amah turella chimnoh sakhi malanna anson, 58#Mak 13:2; 15:29; Noon 6:14; Jon 2:19amah in ason kantheih, “Keiin mah mathruunna thlaam kut a anseem ita kikthrit kirche nithum suunga aktleikhat kiseemtu, mah chuvah kut ah seemnohtung.” 59Chunna anmah sakhi luungkho intrimnohsei. 60Che akthloi thiimpu in alaitalla angirhche Jisu ta arui, “Nangin namsangtu amnohsame? Nangta nakjanoh a mii in sakhi amilanni khasame?” 61Chuta amah in jakhatkho masangnoh a rimta amsa, veikhatla akthloi thiimpu in akuunga anrui, “Doiphah Asa kupa Khrista kha nangcheme?” 62#Mak 9:1; 13:26Che Jisu in ason, “Keisang; che nannih in miivaa Asa kupakha tuuivaa akchangtong kut a inbok che ringramna raalmiisoh inruuia thleng nanmuhtu.” 63#Noon 14:14Che akthloi thiimpu in alungluutta akthritche atihpei, “Jarella mairella sakhi malannatu darkaar ammangme? 64Amah in Ringpu ta usitnoh a trong nantheihpei. Nannih in nanngirhnava khasame?” Che annaamte in indah a amahta thatnatu ngirsei. 65Che arouin amahta amichil, amai amikhum, che amahta marat amithronpei mahche akuunga anson, “Kanisonro!” Che amahta akngaak raalmii in suura anbengpei.

Pitar in Jisu ta Andahna

(Met 26:69–75; Luk 22:56–62; Jon 18:15–18,25–27)

66 # Met 26:69–75; Luk 22:56–62; Jon 18:16–18,25–27; Mak 14:30 Che Pitar in athlangtong innmuk a amsuunga, akthloi thiimpu vaa roijuih kumei khat thlengsa, 67che amah in a an inva Pitar mei oh a am amuh a akuunga ason, “Nangkho Najareth na Jisu soh inruui miinoh cheme.” 68Chuta amah in indah a ason, “Nangin nisonni keiin romkhonoh ang che louthleihnoh ang,” che amah in kolol kuunga inthruhsa. 69Che roijuih kumei in amahta amuhlapei, che akngir ankuunga veikhatla son amthronlapei, “Mah kupa i ankaarna inkhat.” 70Chuta amah in veikhat indahlasa. Che akomma akngir ei in veikhatla Pitar ninga anson, “Nangi inlitnoh a ankaarna inkhatche; alamva nangi Kalili na mii che,” 71Chuta amah in akroua phool inpesa che trongchet malanna, “Nannih in nantrongna mah kupa i keiin romnohluung ang.” 72Che kak hanga aarkhong in veinihtipi inkhuungsa, Jisu in Pitar kuunga asonta intheihkirsa, “Aarkhong in veinih ankhuungnoh amaa a nangin keita veithumkhek kandah uche.” Che amah in aril sok a ankhupche marhuuisa.

Currently Selected:

MARK 14: TARAOBSI

Highlight

Copy