LUKE 6

Sabat Relna Anrui

(Met 12:1–8; Mak 2:23–28)

1 # Met 12:1–8; Mak 2:23–28 Nga tloh a sabatni inkhat a Jisu in loulaia asehlai, Jisu aroi in niim akrah abomta rit a ankut a chut a ansaak. 2Chuta Pharisi arouin anson, “Sabat nia trongsuur in ajanoh tlohphunoh thlou nannih in jarella nantlohme?” 3Jisu in amsangei, “Devit khatkho amah in anruuipi mii in antraamlai jangantlohme tihkha nannih in paanohchoume: 4mah chuvah amah in Ringpu mathruunna thlaamma khatloh a luutme mahche thiimpu noh a saa janoh amimuhna tolta amah in khatloh a loua asaakme, che amahsoh anruuipi miita khatloh a amlanme ta nannih in paanohchoume?” 5Mahche ankuunga asonei, “Miivaa Asa kupa in Sabat niva Akpu sa.”

Akutthi mii Inkhat

(Met 12:9–14; Mak 3:1–6)

6 # Met 12:9–14; Mak 3:1–6 Chunna aktlei sabatni inkhat a nga tloh a suuksa, Jisu in sinakok inkhat a thlenga amtheih ei, mahchunna akut akchangtong kthi mii khat am. 7Ringjih lulok leh Pharisi ei in Jisu amraal tuuknatu sabat nia akna amthrat umeta ruunga an anpei. 8Chuta Jisu in anmah anrilla amidonchuta aromma, akut inkhattong akthi kupakuunga ason, “Inthoua varo, che onna ngirro.” 9Cheva Jisu in ankuunga asonei, “Keiin nannihta nanirui tangchou, sabat nia akthra tloh nohle thranoh tloh, miipunsi kal nohle mamaang i trongsuura tlohphume chunoh a tlohphunohme?” 10Anmahta invella a aneiche asonei, “Nikutkha jamro.” Machunna akutta ajam inva thrasa. 11Chuta anmah amilung inhaanga Jisu ta kha itloh umeta anmah in khatleh khat trongsei.

Jisu in Aroi Somleinih Achar

(Met 10:1–4; Mak 3:13–19)

12 # Mak 3:13–19; Met 10:2–4; Noon 1:13 # Luk 3:21; 5:16; 9:18,28; 11:1 Mahlai achunna Jisu in muulla angennatu kalsa; mahche khulouhthlang Ringpu ting ngenna amsa. 13Kini avaar in, aroita akuunga aongei, mahche anmah somlei innihta achar ei che anmahta raangroi tih a anming athunnei. 14Anmahchuva, akming Pitar kho an ong Simon mahche anao Andriu, Jems khatkho John, Philip che Bartholomeu, 15Methiu che Thomas, Alphia asa kupa Jems che Jilot an ong Simon, 16Jems asa kupa Judas che Jisu ta indah a michang akvei Iskariot Judas anmah isei.

Jisu in Amtheih ei che Amthrat ei

(Met 4:23–25)

17 # Met 5:1–2; 4:24–25; Mak 3:7–12 Mahche Jisu in anmahsoh inruuia seh a anjolhna khat a ngirsei, mahche aroi anaamtea, Jerusalem na Tur che Sidon na tuiiboom apaalnata, miitam in Jisu trong rungeihnatu mahche annat ansatnata mathratnatu mah amunchunna thlengsei. 18Mahche akseengnoh li in anchut mii eita amthrat ei. 19#Mak 3:10; Met 9:21; 14:36; Luk 5:17Mahche miitam in amahta anpalnatu anjon, alamva amah atuui inthruh a miinaam aknata amthrat ei.

Aktlan Khatkho Lahna

(Met 5:1–12)

20 # Met 5:3–12 Cheva amah in aroita anna asonei, “Anran anriing nannihkha doi akphahsachou, alamva Ringpu va kurung huunnakha nannih nantasa. 21Ipek aktraam miichoukha doi akphahsachou, alamva nannihta nanimvahtu. Ipek aktrap miichoukha doi akphahsachou, alamva nannih in innui nanphahtu.

22 # 1 Pit 4:14; Jon 9:22; 16:2 “Miivaa Asa kupa rella nannihta mii in nantirh a, thloia nanisaal, che nanmingta nanitan laikhan doi akphahsachou! 23#Noon 7:52Mahni achunna tlanve mahche roomthok a inthomve, alamva anve, ringramma nannih nankhaan liinna am; alamva oinang jimma anpa anpuin ringraan eita anchut. 24#Met 6:2; Luk 10:13–15; 11:38–52; 16:25; 17:1; 21:23; 22:22; Jem 5:1–5Chuta akdoon nannihva lahnasachou! Alamva nannih in diltlan masoh nanphah. 25Ipek von anvah nannihva lahnasachou! Alamva nannih in traam uchou. Ipek annui nannihva lahnaschou! Alamva nannih in marhuui uchou mahche trap uchou.

26“Mii naamtein nannih turella akthra antronglai nannihva lahnaschou! Alamva oinang jimma anpa anpuin ringraan akveieita nga tloh a anchut.”

Nannih Jeknaeita Rilvolve

(Met 5:38–48; 7:12)

27 # Met 5:39–44; Rom 12:17; 1 Kor 6:7 “Chuta arungai nannihta kisonchou, nannih jeknaeita rilvolve, nannihta nantirh mii eita thra tlohve, 28nannihta phool nanitloh mii eita doi malanve, nannihta jakhatkho soonnoh a nanitloh anmah turella ngenve. 29Nangta nimaipii inkhat ah akbeengleh amahkuunga inkhat tongkho dohro. Mahche nisilh puun naksut amahta nilungluutkho naksutle indahnohro. 30Darkaar amma naninih miirelta malanve; nipoot aklou miikhannata veikhat inlenga lounohve. 31#Met 7:12Mahche miita nankuunga namitlohja khananga, nannih inkho mii kuungah tlohve.

32 # Met 5:44–48 “Che nannihta nanirilvol miita nannih inkho rilvol choule, nankuunga jaknang roomthok mamuhna am ume? Alamva alehchel miiluung inkho miita anringvol khame. 33Nannih nankuunga akthra aktloh miita akthra tlohchoule, nankuunga jaknang roomthokna am ume? Alamva alehchel miiluung inkho mahchunanga antlohkhame. 34Che nannih in inlenga kanphahtuta namidon ankuunga baobeh mapuchoule, nankuunga jaknang roomthokna am ume? Alamva aleh akchel miiluung inkho mahchuta inlenga phahnatu alehchel ankuung akho amipu khame. 35#Met 5:9Chuta nannihta jekna mii eita rilvolve, akthrakho tlohve, inlenga keisiintuta madonnoh a mapuve, mahchunna nannih nankhaan inroltu, che nannih in ankaangremva Asa veiuchou; alamva mii in atlohman akromnoh mahche thranoh mii eita amah in amchaalei. 36Nannih nanpa in nanirilvol nanga nannih inkho mii rilvol theihve.”

Aktlei Miita Pichaar tloh

(Met 7:1–5)

37 # Met 7:1–2; Rom 2:1 “Miita pichaar tlohnohve, mahche nannihkho pichaar nanitlohnoh tuei; miita malaal khonohve, che nannihkho tiknikho nanimlaal nohtuei; miita ipve, nannih namiraalkho nani iptu. 38#Mak 4:24; Noon 20:35Malanve, che nankuunga nanimlantu, akthra chaanga olla namma lok a pet holh a nannih buktiimma naniraangtu. Alamva nannih in nan olna chaangtal khanna nanioltu.

39 # Met 15:14 “Amah inkho ankuunga pandam khat asonei, mitcho khat in mitcho khatta lamching achekume? Annih a khursuunga tlanoh tueime? 40#Met 10:24–25; Jon 13:16; 15:20Aroi inkhat in amah lulok achunga amphunoh, chuta amahta mapungpha a matheih amtamche amah lulok nanga vei umang. 41#Met 7:3–5Nangtalva nimit a am thinglipta muhnoh a, niuh ninaovaa anmit a am thinglipta jarella nianme? 42Nang nimitalla thinglip ak amva muhnohchea a khatloh ani uh ninaota, ‘Unao o, nang nimit a ak am thinglipkha kei loutang ta son nichek ume?’ Akthra veisin nangin matsah a nang nimitna thinglipkha loumanro, mahche aknua niuh ninao anmit a am thinglipta nilohnatu seenga muh nichektu.”

Thing Khatkho Amah Akrah

(Met 7:16–20; 12:33–35)

43 # Met 7:18–19; 12:33–35; Jem 3:11–12 “Alamva akthra thingnata thranoh akrah inrahnoh, mahche akthranoh thingnata akthra akrah inrahnoh; 44#Met 12:33alamva thing anaamte i amah akrah ah inrom. Alamva mii in kuling thingnata thotthing louritnoh ei mahche kuling suun inchaam nata nganglirah louritnoh ei. 45#Met 12:34; Mak 7:20Akthra mii in amlungla akthra lalta amthruh, mahche akthranoh mii in amlungna akthranoh lalta amthruh; alamva amlunga ak amkhata anar in trong.”

Inn Innih Aktlohmii

(Met 7:24–27)

46 # Met 7:21 “Chunna keiin kisonta tlohnoh a nannih in keita ‘Akpu, Akpu,’ nan ong angi jarelname? 47#Met 7:24–27; Jem 1:22–25Keikuunga thlenga kitrongta arungeihche aktloh miikha tunangsoh intrimmme tihkha keiin nanimmuhtang. 48Mah chuvah amah in thuuk a achohche lungpii chunga innmun tholla inntloh mii khat nangsa; che tuiiliin athlenglai tuii masuur in inn khata amratpei, che mah innkha machek cheknohsa, alamva mahkha thratea atlohpei. 49Chuta trongta arungeihche aktlohnoh amahkhava innmun thratea tholnoh a philchunga inntloh mii khat nangsa; alamva tuii masuur in amrat in kak hanga inriilla puursa, che mah innkha khalmo tlik invuia maang veisa.”

Currently Selected:

LUKE 6: TARAOBSI

Highlight

Copy