MARK 3

A-u Kithimi Lakhi

(Mt 12.9-14; Lk 6.6-11)

1Itaghi Jisu no Sinagog lo wu, ike tilehi timi a-u kithimi lakhi ae. 2Timi khamino Jisu ye Sabat tsalalo timi hu shipivi nani kemo kela tsaquyi Jisu juae, tishianguno pa pimi tsuniyeke. 3Jisu no a-u kithiu vilo pi, “Ithuno azuuno ighilo!” 4Tishino pano timiqo vilo iniju, “Sabat pinyeni ni Yezahlo ninguye kiu shikepu kya? Kuphu kepu keo, ghime kepu kya? Timi kuxu xalu kepu keo, ti kutsave kepu kya?” Ikemu panonguye kiumu pimono inaqhoive. 5Jisu ye panoqo lau pishipuwo jupuzu amlo ideve, tishipulaghi panongu mlo kiqhi eno vimokeu jupuzu pa mloimeve. Tishino pano a-u kithiu vilo pi, “O-u xachho lo.” Timi huno pa-u xachho, eno tiye vive. 6Farisimino ipeve puzu mtazu Herod kusamiqo sasu kushono panonguye Jisu pithive nike kughuve.

Ayizukucho Phivi lo Aqokitikhi

7Jisu no pa khopemi sasu Galil zughilo wuve eno timi aqokitikhino pa papesu wu. Timiqoye Galil, Judia, 8Jerusalem, Idumia, Jordan tuxauno eno Tur ngo Sidon phughi sukumxa lono ighi. Jisu no shikeu kumtsu timiqono chilu puzu pa lau ighie. 9Timi kumzapu kehu Jisu no pa khopemi vilo ashuka lakhi pa ghenguno kutope aghilo pive, tishianguno timiqono pa tsakibi pemoniyeke. 10Kughengu pano timi kutomo shipivive, ikehu kusukinimi kumtsuno pa diluniye pa koha ighi ae. #Mk 4.1; Lk 5.1-3 11Kughou tughakusa alolo akeqono Jisu ithulu nikeno, panonguno “Noye Alhou Nue.” 12Ikemu Jisu no tughakusa vilo paye Alhou Nu ke ipi khilemu pikevilopi hakhave.

Jisu no Chighikini Kishelu

(Mt 10.1-4; Lk 6.12-16)

13Tile Jisu no atoghi lakhilo iqho puzu, pano khunoqo kunishi keno tipaqo pa lau kulu, eno tipaqono pa lau ighi. 14Pano chighikini kishelue eno panoqo pesu apostolmi ipi aje kutsu; panoqo pelo pa gholo ape, asheshuwu pe, 15tughami haphelu pe eno akuka tsuniyeke. 16Pano hipano chighikini kishelu; Simon (Jisu no paje Pitor kuvetsu), 17Zebedi nu Jems ngo pa thikuzu-u Johan pama (Jisu no pama je pesu Boanerges ku-kithevetsu, tipau kiqiye “Tsutsukusu-timi”); 18Andrew, Filip, Bartholomi, Mathi, Thoma, Alfios, Jems, Thadius Simon aza yeghi kimiyekiniu, 19Judas Iskariot, Jisu jekuchuu ngo ishi.

Jisu eno Belzebul

(Mt 12.22-32; Lk 11.14-23; 12.10)

20Jisu no akilo wove, ike itaghi timi aqo kitikhi ighino kumqoluve, tishikehu Jisu ngo pa khopemiqo ye kuchu-kusho do ghi ithumlano ae. 21kughou Jisu nobolomino hi chilu keno panonguno pa sunheluve niye wue, kughengu timino, “Paye aqho-izuwuvae!” ipi pike.

22Jerusalem lo Ayezah kukutsumi iqighikeqono ishi pi, “Pa philo Belzebul ani, eno tughami shou atouno akuka pa tsukeu pesu tughami haphe chenie.” #Mt 9.34; 10.25 23Ike Jisu no timiqo kupuzu kimghikeu tsa hami pesu pi: “Satan no kishi puzu Satan hapheni kya? 24Akukaqha lakhiye pututa muqoshi kijetha puzu aghushi kile wuve aye, tipa ghakhuye ipopiniyive nani. 25Akibo lakhiye pututa muqo shi kijetha puzu aghushi kile wuve aye tipa kiboye ipopiniyive nani. 26Tihutoi Satan kukaqhaye pututa muqoshi kijethave aye tiye ngopushumla eno ashekhaloye pa kukaqha hauveni.

27“Khunomu akumtomi ki hepho ilo puzu pa nhemgha pukapuwuve mlae, atughushi akumtomi hu tshuve anguno tithiuno pa kilo akeu pukapuwulu nani.”

28“Kuchouno ino nongu vilo pini, timi xineqo kumtsu eno panonguno kixikila tsa piqhi puaghikeu kumtsu pevetsu kulupu shi nani. 29Ikemu khunono Aghungu Kimthe shou thaighakeu piqhi nikeno khilemu axine qhivetsu mla nani, kughengu paye alhokupuju xine shivae.” #Lk 12.10 30Jisu no hi pikeuye kutau lono kumo puzu khamino “Paye tughakusa lakhi pa philo anie” ipi kehue.

Jisu Paza ngo Pa Thikuzumi

(Mt 12.46-50; Lk 8.19-21)

31Tile Jisu paza ngo pa thikuzumi ighino aki khalau puthugho puzu aghinimi pelo pa kuwupe. 32Timi kumzapuno pa suhupe iqa-a, panonguno pa vilo ishi pi, “Oza ngo othikuzumiqo ye khalau anie eno panonguye oyighi anie.” 33Jisu no ishi khochile, “Iza ye khuno kya? Ithikuzumiye khuno kya?” 34Pa suhope iqa akeqo kudau jupuzu pi, “Julo! Iza ngo ithikuzumiye hipaqo ke: 35Khunono Alhou pulou shi cheni keno tipaqono ithikuzumi, ichelimi eno izake.”

Currently Selected:

MARK 3: SUMIBSI

Highlight

Copy