LUK 21

Chimemino Alhou mllakeu Agho

(Mt 12.41-44)

1Jisu no tsughuwo ju kelo, khinimino panongu kumllagho achineki kini-khukilo pheqhisu akeu ithulu, 2pano topu chimemi ighono kumlhomi lakhino pisa kuhu kini pheqhisu akeu ghi ithulu. 3Tile pano pi: “Ino nongu vilo pini, topu chimemi kumlhomi hipauno kuchouno kutami kumtsu nguno alau suvae. 4Kughengu kutamiye pututano kupukuno shi akeu lono qhasu tsue, ikemu liye li kumlho lono pukhubepe akeu kumtsu tsuveke.”

Achineki Kutsavenikeu Tsa

(Mt 24.1-2; Mk 13.1-2)

5Timi khamino Achineki ghili pia, tiye kiutoi jukivi aghile kelapi— hiye atukivino shipua eno Alhou lau agho mllakeu pesu koghekughu shipe puake. Jisu no pi, 6“Hipaqo khikhi nonguno ithulu akhani keno, ghulo lakhiloye atu lakhinomu lakhi shou qhimove nani, ikemu kumtsu tukiqeve nani.”

Akupuna eno Shikimighi

(Mt 24.3-14; Mk 13.3-13)

7“Kutsuchekeu, kughono hi shive nani kya?” ipi panonguno iniju. “Hipau shini cheke zulo kiuno amchi shi nani kya?” 8Jisu no pi: “Jukuto alo, nongu pishive pekevilo. Kughengu timi kutomo ije lono ighi puzu, ‘Niye pake’ eno ‘Aghuloki hu tovae!’ ipi namu panongu papewu kevilo. 9Kughono aghukishi eno mutomushukeu sutsa chilu nikeno msa kevilo; tikithipu paghi shi nani, ikemu ashekha ghuloki kupunuve ake kumoe.” 10Tishi pi puzu pano panongu vilo pi, “Ashiayeh lakhino ashiayeh lakhi shou aghushi nani, eno akukaqha lakhino akukaqha lakhi le nani, 11eno ayeghi kughutha kije, puqumiye keu, pusa kusu aqha kumtsulo ighi nani; eno akichiqhipu kije eno timi shikughuthu kepu michipu kije atsutsu lono ipeghi nani.

12“Hipaqo kumtsu shimphi lono panonguno nongu kughaluve puzu shikighime nani, nongu kughape Sinagog tsakukugha zulo suvetsu nani eno akughukilo suve nani. Ighenguno nongu sasu kukami ngo ayehkipemi zulo wunani. 13Hino nongu pelo ashepe shilukepu dokivi shi nani. 14Nongu mlolo hipau mtsu mishei shilulo—hi shimphi lono kishi khochileni kela pi kumsukimghei monike 15kughengu noghumi lakhi nomu nonguno pikeulo puthugho mla momu lamla kepu tsa eno alokutsu ino nongu tsu nani. #Lk 12.11-12 16No-puaza, nothikuzumi, nobolomi eno shompami ghi nongu kughape kutami ulo suvetsu nani, eno nongu khamiye pithivepe nani. 17Kumtsuno ighenguno nongu mithi nani, 18Ikemu nongu kutsu-sa lakhimu puhamo nani. 19Mutotoi tsuqupelo, kughengu ishikeu lono nolikhi no-xalu nani.”

Jerusalem Kutsavenikeu Pi

(Mt 24.15-21; Mk 13.14-19)

20“Kughou ghushimino Jerusalem suhope aghikeu nonguno ithuluni keno, ti kutsave nikeu kupunuvea pi ithilo. 21Tilehi khunoqono Judia lo ani keno naghutolo povelo, khunono aphughilo ani keno ti qhivelo eno khunono aphulo ani keno aphughilo ilo pekevilo. 22Kughengu hiye amukhukulu tsala, kucho yesulo pi puakeu kumtsu kupuni kehu ke. #Hosi 9.7 23Tipa tsala lo mishi puchekemi eno akichhi kipinimi ghenguno ahakusapue! Aghime kitikhi hipau yeghilomi shou ighi nani, eno Alhou loghu pesu timi hipaqo shou be nani. 24Timi hipaqoye azutakihino ghiqhi nani, eno kutami shiayeh qholo akughumi shisasu sawuve nani, eno Jerusalem ye Juda kumomino nedaqoda nani, ti Juda kumomi ghuloki tomo ke kutolo.”

Timi Nu Ighinikeu

(Mt 24.29-31; Mk 13.14-27)

25“Tileno tsukinhelo, aqhilo eno ayepulo amchipu ipeghi nani, ayeghilo ashiayehqoye azughi ghugha eno azufukukuchono kutakihikeu lono pitipuzaqhi nani. #Isa 13.10; Ezek 32.7; Joyil 2.31; Piye 6.12-13 26Timiye ayeghiqha shou kiu cheni kela msaqhi kheakelo anguh yewuve nani, kughengu kungulo akuka jeli panongu-a lono kusulepe tukiqeve nani. 27Tithiu Timi Nu ipeghi nani, khungkusu lono akuka kije eno mulapuyi ighini. #Dane 7.13; Piye 1.7 28Kughono hipaqo shithuni keno puthugholo eno nongu kutsu peqhe lulo, kughengu nongu xachilekulupu kupunuvae.”

Khughuthibo launo Ithilulo

(Mt 24.32-35; Mk 13.28-31)

29Jisu no aholetsa lakhi panongu vilo pi. “Khughuthibo eno asubo kutauqo kumtsu kumsukutoju lo. 30Kughouno tipaqo nipa mini ipe chekeu ithulu nikeno mutsu tsala kupunu wochea kepi nonguno ithi cheni. 31Tihutoi, kughono hipaqo shi ipeghikeu nonguno ithulu nikeno Alhou yehkipeye kupunuva ipi nonguno ithi nani. 32Hi kumsululo! Kuchouno ino nongu vilo pini. Itehi timi xuakemi thi mphi lono hipaqo kumtsu shikupu nani. 33Atsutsu eno ayeghi ashekha shive nani, ikemu itsaye ashekha shivemo nani.

Jukuto kepu Avehupu shi Akeu

34“Nongu likhi nongu jukuto alo! Chumzu shomzu eno hipa kuxu sala phukeu lono nongu mlo sunheqhi auve pekevilo, ipuzu tipa tsala zuleno nongu shou ikughi pe kevilo. 35Kughengu tiye alichhe shipuakelo toi phayi ayeghi qhalo timi kumtsu shou ighi nani. 36Ike ado kumtsulo jukutokupui inikhu alo, tishianguno hipaqo kumtsulo ime mono hechewu kulupu kumto aghilu puzu Timi Nu zulo puthugho kulupu shilo.”

37Tipaqo tsalalo Jisu ye achinekilo kutsukeu lono ado puwo ae, eno kughono kijiliu shive nikeno paye wu puzu Oliv to lono putho tsala puwo che. #Lk 19.47 38Timi kumtsuno inaqhe itheno achinekilo wupuzu pa tsa ininike ighiche.

Currently Selected:

LUK 21: SUMIBSI

Highlight

Copy