JOHAN 7

Jisu Thikuzumi Kupulukumo

1Hipa thiu Jisu ye Galil lo izu ache. Paye Judia lo izuwu nishimoe kughengu tilau Judamiqoye pa pithive nikeu shi pa phuju ae. 2Judamino Apusholo ngokeu Ghulhu kupunuve, #Achine 23.34; Zaki 16.13 3ikelo Jisu thikuzumino pa vilo pi, “A-a hipau qhiveno Judia lo wulo, tishianguno nono kiu kumla shi ani keno okukutsu ikhilukemi qono ithulupenike. 4Kughengu timi kumtsu pelo ithipenishi aye timi khumu pano kiu mla ani keno kusuve chemoe. Nono hipaqo shilu ani keaye ayeghiqha pelo no ithi pelo.” 5(Pa thikuzumi ghi pa shou pulubemoe.) 6Jisu no panoqo vilo pi: “Ighenguye ado achipiu tomphie; nongu ghenguye kughokughomu ado achipike. 7Ayeghilomiye nongu mithi mlae ikemu imthi cheni, kughengu tipaqo kumla lhoksa ghili ino pitsu achenike. 8Nonguye aghulhulo wulo. Niye tipau ghulhulo wuni chemoe, kughengu ighenguno ado achipiu hu tomphie.” 9Panoqo vilo tishi pipuzu paye Galil lo ngoauve.

Jisu no Apusho Ghulhulo wu

10Ikemu pa thikuzumino aghulhulo suniye iqhove kethiuno Jisu ghi iqho, kutami pelo pa ithipemo nike kusuuno wue. 11Aghulhulo Jisu ighinimalaye Judamino pa phuju ae eno ishi iniju, “Pa khile ani kya?” 12Eno timi aqokitikhi gholo pa ghili ishi kughae. Khamino, “Paye timi kivimi lakhi,” ipiaye kutamino, “Tikumoe, pano timi sakughuzu chenie,” ipi piae. 13Ikemu khumu aqo zuloye pa ghili kuptsamoe, kughengu panonguye Judami musa kehu.

14Aghulhu shikeu tsalaqo tuxa shivekethiu Jisu no achinekilo wu eno timiqo kutsuthuve. 15Judamiqoye shishe akichiqhiveno pi,”Timi hipauye akiphikilo wumo keghi kishi no hijejehi ithi ani kya?” 16Ike Jisu no khochile, “Ino kiu pesu kutsucheni keno tiye iwu kumoe, ikemu Alhou ipuwu puakeu launo ighikeu ke. 17Khunono Alhou pulou shini shikeno tipanono ino kutsukeuye Alhou launo keo momu ilikhi ilotsu lono piani keno ithi nani. 18Timi khuuno pa likhi pa lotsu lono pini keno pa jekipipu phuchenie. Ikemu timi khuno pa puwupuakeu jekipipu phuni keno tiye akumzumi eno tipano qholoye akimki kumu kuhae. 19Muse no Ayezah nongu tsuke kumo kesha? Ikemu nongu lakhi mu Ayezah pemlae. Nonguye kushiye iheqhipithive nike phu cheni kya?” 20Timiqono pa khochile. “Noye tughami ololo anie! Oheqhi pithiveniye khuno ophu cheni kya?” 21Jisu no khochile, “Ino akumla lakhi shi eno nongu kumtsuno tipau jupe akichiqhie. 22Muse no nongu vilo nongu nuliqo yiko ghavelo pike ghenguno (tiye Muse no shilopikeu kumono nongu pu-asuno ti huthuke) nonguno Sabat tsala lono anu phighu yiko gha cheni. 23Muse yezah hexatsumoniaye Sabat tsala lono anu phighu yiko gha cheni aye, kushiye Sabat tsala lono ino timi lakhi vithayi shipivike ghenguno nonguye ishou amlo ide ani kya? 24Agi juno kughatha kevilo, ikemu achipiu kughakutha pesu xathalo.”

Paye Mesiya kya?

25Ikelo Jerusalem lo kuami khamino pi, “Panonguno heqhipithive niye phuchekeu timi huye hike kumo kesha? 26Juniwa, paye timiqo zulono atsa piani eno khumu pa shou kiumu piamoe! Khilehi nitimi sakiphemi qoye paye Mesiya kepi kuchouno ithivea kesha? 27Kughou Mesiya ighini keno khunomu paye khilano ighikeno mtha nanie, ikemu timi hipauye khilano ighikeno ninguno ithi anie.”

28Ike pano achinekilo kutsukelo asheshu ghi pi: “Nonguye kuchouno niithi ani eno niye khilano ighikeno ithi ani kesha? Ikemu niye ighopulou shi ighi anike kumoe. Khuno ipuwukeno paye kuchouke eno nonguye pa mthae, 29ikemu niye pa ithi anie, kughengu niye pa launo ighi eno pano ipuwuke.” 30Tileno panonguno pa kughaluveniye pukaputsa, tishimu khunomu pa shou a-u chhopuku moe, kughengu pa doye tomphi kehu. 31Timiqo gholo kutomono pa pululuveno pi, “Kughou Mesiya ighini keno paye timi hipau nguno alau amchipu kumla shilu nani kema?”

Akukughami Puwukeu

32Farisimi ngo achinetomino timiqono Jisu ghili kugha akeu chilu kelo, aghukhemi kijemi khami pelo Jisu kughalu penike puwue. 33Tile Jisu no pi, “Ino nongu gholo ado kitila aghini aphi eno tithiuno niye ipuwupuakeu lau wuve nani. 34Nonguno iphuju nani ikemu nonguye iphumla nani, kughengu ino khile wuni keno nonguye ighimla nani.” 35Judamiqono panongu dolono ishi piae, “Paye khilau wuveni cheni keno ninguye pa phumlave nani kepi anikya? Paye Grikmi phughi qolo Judami akeqo lau wupuzu Grikmiqo kutsuwuve nikeu shi ani kesha? 36Pano pikeuno, ‘Nonguno iphuju nani ikemu nonguye iphumla nani’ ipi, eno ‘Ino khile wuni keno nonguye ighimla nani’ ipike, tiye kiu kiqi kya?”

Akuxupu Zupuki

37Aghulhu shiakeulo atsala ashekhauno kumtsu nguno akhotou tsalake. Tipani Jisu no puthugho puzu ighamuku asheshu ghi pi: “Khukhumu tughuthi aghiaye, ilau ighieno yelulo. #Achine 23.36 38Kuchoyesulo pipuakeu toi, ‘Khunono ipulu nikeno pa mlo lono akuxupu zu qoipeghi nani.’ ” #Ezek 47.1; Zekha 14.8 39Jisu no hipau pikeuye timi khunoqono pa pulu nikeno tipaqono Aghungu Kimthe ithuluniye akeu ghili piake. Tikutolo Aghungu Kimthe ye tsumphike kughengu Jisu ye xuputhu pesu akimthejukuvu shive tsumphi kehu.

Timiqo dolo Aqo-kututashive

40Timi aqokitikhi gholo Jisu no hipatsa pikeu chilukemi qono ishipi, “Kuchouno timi hipauye tungkupu huke.” 41Khamino ishi pi, “Hipauye Mesiya ke!” Ikemu kutami khamino pi, “Mesiya ye Galil lono ighini kesha? 42Mesiya ye David laghami shi nani eno David no achekeu phu Bethlehem lono punu nani kepi kuchoyesulo pipuamo kesha?” #2 Samu 7.12; Mika 5.2 43Ikehu Jisu ghenguno timiqo dolo aqo-kututashive. 44Tipaqo khamino pa kughalu nishiae, ikemu timi khunomu pa shou a-u bemoe.

Judami Sakiphemi Kupulukumo

45Aghukhumi kijemi qono achinetomi ngo Farisimi lau idewove, ikelo panoqo vilo ishi iniju, “Nonguye kushiye pa kugha saghimo kya?” 46Kijemi qono pi, “Timi khumu pa toi atsakivi pikeu mtha aphie!” 47Farisimi no panoqo vilo iniju kithe, “Nongu ghi pano shikughuzuve kesha? 48Sakiphemi gholo eno Farisimi gholo lakhi nomu pa pulu chemokeu nonguye mtha kesha? 49Timi aqokitikhi hipaqoye Muse yezah mthake, ike panonguye Alhou no ghushove keulo anie!” 50Panoqo gholo Nikodema ghi lakhike, paye puzuu Jisu lau wukeu huke. Pano panoqo vilo pi, #Jn 3.1-2 51“Niyezah kiqiloye timi pa ampi launo chilumphi eno pano kiu shi puani keno phujumphi loye pa shou kughatha mlae.” 52Panonguno pa khochile, “Noghi Galil lono ighikemi kesha? Kuchoyesu phukide kudajulo, Galil lono tungkupu ighi puaghikeu noye ithulumo nani ke.”

Currently Selected:

JOHAN 7: SUMIBSI

Highlight

Copy