JOHAN 3

Jisu ngo Nikodema Pama

1Farisimi gholo Nikodema ipikeu ache, paye Judami shou sakiphemi lakhi. 2Pano putho lono Jisu lau ighieno pa vilo pi: “Rabi, nino ithianike noye Alhou launo ighikemi akukutsuu lakhie. Alhou no timi lakhi gholo aghimokeloye timi khunomu nono amchipu kumla shilu akeqo shiluni chemoe.” 3Jisu no pa khochile, “Kuchouno ino ovilo pini, timi khukhumu punu kithemo keloye Alhou yehkipe ithumlae.” 4Tileno Nikodema no pa vilo ishi iniju, “Muchomi shivekemi lakhiye kishieno punu kithe luni kya? Mutsuqheyino paye khilemu akiniu paza polo ilo puzu punu kithepe mlae!” 5Jisu no pa khochile, “Kuchouno ino ovilo pini, timi khukhumu azu eno Aghungu Kimthe lono punu kithemo keloye Alhou yehkipelo ilomlae. 6Ashi lono kiu punu keno tiye ashie, eno Aghungu lono kiu punu keno tino Aghungue. 7Ino ovilo ‘Nongu kumtsu punu kithe masae’ ipikeu ghenguno akumzaqhiyi kevilo. 8Amlhuno khilau mulhuwu nishi keno tilau mulhuwu cheni eno nono tipau sutsa chilu cheni, ikemu tiye khilauno ighi momu khilau wuve cheni keno noye mthae. Aghungu lono punukithe luvekemiye titoike.” 9Nikodema no ishi iniju, “Hikithipuye kishino shiluni kya?” 10Jisu no khochile: “Noye Israilmi gholo akukutsuu keghi hipaqo ithikuthumo kesha? 11Kuchouno ino ovilo pini, nino kiu ithi ani keno tipau picheni eno nino kiu michiluvea keno tipau ashepe shitsu cheni, ikemu nonguno nino ashepe shitsukeu ikhilumoe. 12Ino ayeghilomi ghili pikelo thotsu nonguno pulumoe, tishiaye ino kungugha ghili pikeu nonguye kishino pululuni kya? 13Kungugha lono milakhi iqighikeu, Timi Nu thono khunomu kungughalo iku mphie.”

14Kiutoi Muse no timi kughunamoke alo ayino shikeu pighi ikhiqhepe piye keno tihutoi Timi Nu ikhiqhepe piye masae, #Akiki 21.9 15tishianguno pa pulukemi kumtsu lhokta kuxu anani. 16Kughengu Alhou ye ayeghilomi kimiyekutuke ghenguno pa Nu lakhi likhi akeu tsuke, tighenguno khunono pa shou pulube nikeno puhavemo nani, ikemu lhokta kuxu ithulu nani. 17Alhou ye ayeghilo akemi shou kughatha keu betsu nike ghenguno pa Nu puwuke kumoe, ikemu pa vechewo ayeghilo akemi xaluniye ke. 18Khunono Anu pulu nikeno kughakutha bemovae; khunono pulumo nikeno tipano shou kughakutha bevae, kughengu panonguye Alhou Nu lakhi likhi akeu shou pulubemoe. 19Kughakutha ye hike: ayeghiqhalo akuvu ighivae, ikemu timiqono akuvu kimiyekepuno akuzu kimiyeve, kughengu panonguno kusakugha kumla shikehue. 20Khunono alhoksa kumla shi cheni keno akuvu mithi eno pa kumla lhoksa ithuluvenosa kelauno akuvu lau ighi chemoe. 21Ikemu khunono kuchou shi cheni keno akuvu lau ighi cheni, tishianguno panongu kumlaye Alhou pukhubekeu lono mlapuani kepi akuvu pephe piyeniyeke.

Jisu eno Johan Baptist

22Hipa thiu Jisu ngo pa khopemi qoye Judia yeghilo wuve, paye tilau panoqo sasu ngove eno baptiz shitsue. 23Johan ghi Salim kupunulo akeu Ainon lono timi baptiz shitsu ae, kughengu tilauno azu boghi shi ake. Timiqono tilau ighieno baptiz shilu. 24Tiye Johan pe akughukilo khatha mphi lonoke.#Mt 14.3; Mk 6.17; Lk 3.19-20

25Johan khopemino Judami chine luvekemi lakhi sasu achineyeh lo qhukimthekeu vehu ghenguno kutsala ipeghi. 26Ike panonguno Johan lau wupuzu pa vilo pi, “Rabi, Jordan tuxau akelo milakhi ogholo akeuhu eno nono timi tipau shepe shitsu akeu hu, paye itehiye timi baptiz shitsu ani eno timi kumtsuno pa lau wuve anie!” 27Johan no khochile. “Timi khumu Alhou no pa tsumokeloye kiumu pe aghimo nanike. 28Ino ‘Niye Khristo kumoe, ikemu pa zuwuno ipuwuke’ ipi pichekeu nongu ampino iwu thopi ke. 29Kulapuuno kulaliu sa-anikeu ke; ikemu kulapuu kusau huye puthugho puzu ini acheni eno kughou kulapuu sutsa chilu nikeno paye alokivi shi cheni. Tihutoi ilokivi hipau shikupuvetsuae. 30Paye chuqumughayi ikuvemasa eno niye chuni-iqivemasae.”

Kungugha lono Ighikeu Timi

31Kunguuno ighikeu huye kumtsu nguno akiqheu; ayeghi launo ighikemi huye ayeghilomike eno ayeghi gholauno pichenie. Kungugha lono ighikeu huye kumtsu nguno akiqheu. 32Pano kiu ithulu eno kiu chilu keno tipau tsape shi, ikemu khumu pa tsape ikhilutsu moe. 33Pano atsape shikeu ikhilukemiye Alhou ye kuchou kepi mutsuqheyi shiluvae. 34Alhou no khuu puwukeno pano Alhou tsa pesu pitsu, kughengu Alhou no pa Ghungu kupukunoshi pesu pa tsuke. 35Apuhno pa Nu kimiyeke eno thwokha kumtsu pesu pa-ulo qhivetsuae. #Mt 11.27; Lk 10.22 36Khunono Anu shou pulube nikeno lhokta kuxu ani; khunono Anu gholumo nikeno tipanoye akuxupu kuhave nani, ikemu tipano shou Alhou loghu acheuve nani.

Currently Selected:

JOHAN 3: SUMIBSI

Highlight

Copy