BOTHUBO 20

Abraham nqo Abimilek

1Abraham no hule-hile ngo susu Negeb lo iqesu wu no Kades ngo Shur kuma dolo acheke, eno Gerar lo inami shi izuche. 2Abraham no pa nipu Sara pesu “Liye ichepu ke,” ipiche, ike lo Gerar lo akukau Abimilek no timi puwu puzu Sara sawuvetsue. 3Ikemu putholo Abimilek samouno Alhou no ighieno pa vilo pi, “Julo, noye thini akene, totimi nono saghi keu hu timi nipu ke.” 4Abimilek ye li kupunu wumphi ikehu pano pi, “AMPEU, noye muzuchoi akemiqo#Ibrilo: “Ashiayehqo” ghi pithiveni kesha? 5Abraham no pikeuno liye pa chepue pike eno li ghi Abraham ye li peue pike. Imlolo kiumu kupuna kupugha keu kuha eno niye kiumu mthano li saghivae.” 6Alhou no asamouno pa vilo pi, “Iye, noye omlo kiumu kupuna kupugha keu kuhano li saghi kepi ino ithi anie, kughengu opelo ishou axine shipemoni aye nighi osuchileluve anike tighenguno ino opelo li bupe moveke. 7Mtazu totimi hu li kimi lau tsuchilevelo kughengu timi huye tungkupmi lakhie pano oghenguno inikhutsu aye noye thimo nani. Nono li tsuchileve monapi aye no eno ogholo akemi kumtsu thini putsa kepi ithilo.”

8Tighenguno Abimilek no inaqhe itheno ithu puzu pa qemi kumtsu ku kutsuno panongu vilo hipaqo kumtsu pike lauye panonguye shishe msave. 9Abimilek no Abraham ku saghi no ishi iniju, “Noye ni shou hiye kiu shivetsu ani kya? Niye oshou kiu kipimi shive keno noye aghimepu kije ilau eno ikukaqhalo saghi ani kya? Noye shimokepu kumlapu ishou shivae.” 10Abimilek no Abraham vilo highi pi, “Noye kiu ithulu keno hitoi shive kya?” 11Abraham no ishi khocile, “Hipa-a loye Alhou sumsachekemi khumu kuha eno inipu luveni aye iheqhi pithive nani kepi ino kumsuveke. 12Kuchouno pini aye, liye ichepuke, liye ipuno ngake, ikemu iza nga kumoe, ike ino li sasu akibo shike. 13Ike kughou Alhou no ipu kilono ipelo inami yeghilo itsu itsuwuvepe keno ino li vilo ishi pie, ‘Nono iqhoqhu keu ipiyeni aye hino kene: khilekhile wu namu niye opeu kepi nono pimayesa kene.’ ” 14Tile Abimilek no Sara sachile sawo Abraham tsuve eno tipa gholono bheri, amshi, aqepumi eno aqelimi ishi pesu Abraham tsue. 15Abimilek no pi, “Hi ithuluake qha kumtsu iyeghike, nono khile pulo keno tile kughuna lo.” 16Pano Sara vilo ishi pi, “Ino opeu ghuka 1000 tsuve ake, tishianguno nowu timiqo zulo noye kujomzakepu kuhae ipi ithive peniye ke eno noghi pimi puamopi kumtsupelono ithive peniyeke.”

17-18Abraham nipu Sara ghenguno Alhou no Abimilek kibo lo totimi akeqo kumtsu pelo mishi mla kepu shivetsuke. Ike Abraham no Alhou vilo inikhutsu kelono Alhou no Abimilek ngo pa nipu ngo pa qelimiqo shipivitsu eno panonguye atianuli punu luwuve.

Currently Selected:

BOTHUBO 20: SUMIBSI

Highlight

Copy