BOTHUBO 15

Abram sasu Puloshoqhi shi

1Hipa tikhau AMPEU tsa kungunhetsu lono Abram lau ighino pi, “Abram, musa kevilo, ino oshokha kulupu zuto ke ino ojume ighono kije shitsuni.” 2Ikemu Abram no pi, “AMPEU Alhou, noye kiu itsuniepi ania, niye anu kuhake eno imheghi kiyighiuye Damaska no ghami Eliazer likhi keku? 3Julepi, ixuthi piti nono tsumoe, eno iquaxemi ikilo no punukemino imheghi ighini chenie.” 4Tile AMPEU no pa putsaghi ishi pi, “Paye omheghi ighi pemo nani, ikemu ophi lono ipeghi keu pitino omheghi ighi nani.” 5Pano pasasu qhaghalei keu-alo saipe puzu pi, “Kunguu jupuku julo eno nono kihi kulupu aye ayepuqo kihi julo.” Pano pa vilo pi, “Opitiye tijejehi nani.” 6Abram no AMPEU shou pulubeluve kehu Abram no pa pulubeluve keu tiye amikuchoe pi AMPEU no kihiluvetsue. 7AMPEU no pa vilo pi, “Niye AMPEU ke, ino Khaldiami phughi Ur lono osasu ipeghi no aghakhu hipau otsu puzu ti omheghi shilupeniye ke.” 8Tile Abram no pi, “O AMPEU Alhou, hipauye imheghi shilu nanipi kishino ino ithini kya?” 9AMPEU no khochile pi, “Ilau hipaqo saghilo: amshi ali ampe kuthu shi akeu lakhi, anequ ampe kuthu shi akeu lakhi, bheri tsu ampe kuthu shi akeu lakhi, amqhi lakhi eno kobudar lakhi ishi.” 10Ike Abram no lhoxu hipaqo kumtsu AMPEU lau peighi eno tipaqo amta lono xapha kututa shino lakhino lakhi shou kuqabe pe qhie, ikemu pano aghau kumaye xaphamoe. 11Agha aluno ashikumo shou yeikughi kelo Abram no hapupove ae.

12Tsukinhe iloni chekelo, zuqeyi keu lakhi Abram shou ighie, eno akumsa kimshipu kije lakhi pashou ighie. 13AMPEU no Abram vilo pi, “Mtsuqheino hi ithilo, olaghaye kutami yeghilo inami shisusu wu nani, eno kutami qeuve nani eno ampe 400 kuto timino panongu kijipusa shikighime nani. 14Eno panonguno qeniye akeu shiayeh hu ghi ino ghimeqhi nani, eno tipathiuno panonguye kuakini kumzapu pususu tipa yeghi lono ipeghive nani. 15Ikemu noye alokughuno shi apu asuqo gholo wove nani eno kitemi shikutu kethiuno osukumo kutsuvetsu nani. 16Tiqheli abidiu lono olaghano hile ideghi nani, kughengu ti kutolo Amarimi qono alhoksa shikeu ghenguno shikighime qhinikeu tomono aghini aphike.”

17Tsukinhe ilove kethiu zughuyive kelo, amchhi kupho li lakhi eno akulu kughuqu lakhi ishi ipeghi puzu ashikumo xaphape puakeu muta zusu heche wuve. 18Tipani no AMPEU no Abram sasu puloshoqhi lakhi shi ghi pi, “Ino hipau yeghi olagha tsunikeu shi anie, ti Ijipmi ghoki lono aghoki akijeu Eufrati kuto 19eno timi hipaqo yeghi kumtsu: Qenimi, Qenizimi, Qadmonimi, 20Hatimi, Perizimi, Refami, 21Amarimi, Kananmi, Gargeshimi ngo Jebusimi ishie.”

Currently Selected:

BOTHUBO 15: SUMIBSI

Highlight

Copy