APOSTOLMI 10

Pitor ngo Kornelia

1Kaisaria lo Rom ghushimi “Italia Ghushimi” ipikeu lojilo keptein Kornelia ache. 2Paye achineyehlo amlotsuqhiyi chekemi, pa eno pa kibo kumtsu Alhou sumsache. Pano Judami kumlhomi kumsano shishe kuphuche eno tamono Alhou vilo inikhu ache. 3Ghulo lakhi avelau ayi kuthu kihelo paye kungu nhetsu lono Alhou wu kungumi lakhi pa lau ighikeu pano mutsuqhei ithulu, eno pa vilo ishi pi, “Kornelia!” 4Pano akumsa launo kutuxope kungumi hu jupuzu pi, “Akijeu kiu kya?” Kungumi huno ishi pa vilo pi, “Okighini eno nono kumsano timi kuphuchekeu Alhou no ikhiluvetsua eno okumsulu ani. 5Noye Jopa lo timi puwu puzu tilau timi lakhi pa je Simon, khuu pesu Pitor ipicheni keno pa kuwu pelo. 6Pa ye ashiyiko kumlami lakhi Simon ipikeu gholo ani, eno pa kiye azughi phivilo anike.” 7Kungumi pa putsa akeuno wuve kethiu, Kornelia no pa qemi kini eno pa hikujumi gholo ghushimi lakhi achineyehlo amlo tsukemi ishi ku. 8Pano thwokha panoqo vilo lheveno Jopa lo panongu puwu.

9Thoghiu, timi tipaqono chesuwo Jopa toni chekelo, Pitor ye akighini shinike puchou aki kutsuqalo iku. 10Paye muzuthive eno kiuala chunishi ae. Timi no alibe kuto khe akelo paye kungunhetsu lakhi ithulu, 11eno atsutsu kiyeveno kiukela lakhi ayephu kije xachhokeu toike ashekumtsu bidi lono ayeghi kudau kughujupiqi keu pano ithulu. 12Tipaulo tughashi, itikiche lhoxu eno aghau jeli kumtsu ae. 13Pa lau asutsa lakhi ishi ighi, “Ithulo Pitor, hi heqhino chulo!” 14Ikemu Pitor no pi “Tiye khilemu tishimlae, Ampeu! kiu-kiumu mithemokeu momu kitiqevekeu niye khilemu chumphie.” 15Asutsa huno ghuthu akiniu pa vilo pi: “Alhou no kiu shikimtheve akeno kitiqeveakepi noye pikepu kumoe.” 16Ghuthu kuthu hi shipuzu thime huye atsutsulo pai ikhi sukuve.

17Pitor no kungunhetsu kiqi avehu kughuzushi akelo, Kornelia no timi puwukeqo huno Simon ki ighisusu khagholo ighieno puthugho. 18Panonguno timi ku puzu Simon Pitor ipikeu inami lakhi tile animapi iniju. 19Pitor no kungunhetsu kiqi kumsukutoju akelo, Aghungu no ishi pi, “Julo, timi kuthuno ophu cheni. 20Ithuno iqilo, panoqo gholo wunikeu vehu kunacho akevilo, kughengu ino panoqo puwu anike.” 21Ikehu Pitor no timiqo lau iqi puzu pi, “Nonguno phuchekeu timi hu nike. Nonguye kiu shi ighi ani kya?” Panonguno pi, 22“Keptein Kornelia no ningu puwue. Paye timi kivimi, Alhou sumsachekemi eno Judami kumtsuno gihu achekemi lakhi. Alhou wu kungumi kimthe lakhino pa kichepiye keuno opelo pa kilo ighikepushi eno nono kiu pikepushi aghini keno inikepushi no kupuwulo pike.” 23Ike panonguye Pitor no ku-sukeu inami shighi pa gholo ngoe.

Thoghiu Pitor no kuto puzu panoqo sasu cheve, eno Jopa lono athikuzumi khami pa gholo wu. 24Tishiwo akuthuni panonguno Kaisaria tolu. Kornelia ye pa bolomi ngo pawu shompami ku-kumqo sawo panoqo huqhe khe ake. 25Pitor no aki alou iloniye akelo Kornelia no pa sasu kusho, eno pa pukhu philo itsaqi puzu agigihu pa tsu. 26Ikemu Pitor no pa sunheputhu ghi pi, “Ithulo, kughengu nighi timi lakhi ke!” 27Pitor no Kornelia putsa ghi aki alou iloghikelo timi kutomo kumqo aghi. 28Pano panoqo vilo pi, “Nongu kumtsuno ithianike Judami lakhiye pa chineyehno pa pelo ashiayeh kutami putsawu momu xukutshukungo penikeu lakha puani. Ikemu niye timi khumu pesu mithemoke momu kitiqeveake ipikepu kumoe pi Alhou no ipiyevae. 29Ike kughou iku ighi keno, niye kiumu moepi mono ighivae. Ike nonguye kiu vehu ghenguno ikupuwu kela ino nongu iniju anike?”

30Ikelo Kornelia no pi, “Ishi bidi shiveake, hipau yikihedolo niye avelau ayi kuthu kihelo akighini shichekeu iki lono shiae. Phaikhavi timi lakhi metsughoike phimini pepuno izulo puthugho, 31eno pano pi, ‘Kornelia! Alhou no okighini chiluvetsua eno nono kumsano timi kuphuchekeu ikhiluvetsuae. 32Tighenguno Jopa lo timi puwu puzu Simon Pitor kuwu pelo, paye Simon ashiyiko kumlau kilo wuanike, tiye azughi phivilo ani.’ 33Ikehu okuwu penike ino mutazu timi puwu kelo nono ighitsukeu ghenguno alovae. Itehi Alhou zulo kumtsu hi ani, eno Ampeu no ovilo kiu pilo pi ahza tsukeno chilu nike ngokhe anie.”

Pitor Tsa

34Pitor no ishi pithu: “Kuchouno ino jupililu akeuno Alhou ye timi kumtsu aphi-phi lono peitha cheni. #Zaki 10.17 35Khunokhuno shiayeh shi aghimu khuno Alhou sumsa eno achipiu shicheghi nikeno Alhou ye tipano ikhilunikeuke. 36Jisu Khristo khuu timi kumtsu shou Ampeu keno pa vechewo Alhou no alokughunopu tsakiviu Israilmi lau asheshu pekeu tsa hu nonguno ithi ani. 37Baptiz shikepuepi Johan no asheshu chekethiu, Galil lono huthu puzu Judia qhalo kiu shivekeno nonguno ithi ani. 38Alhou no kishi Nazaret noghami Jisu shou Aghungu Kimthe eno akuka lepuku keno nonguno ithi ani. Alhou no pa gholo ake ghenguno pano aqha kumtsu wu puzu akivi kumla shi eno tughami kuka qholo aghikeqo kumtsu shipivitsu. 39Judami ghakhulo ngo Jerusalem lo pano kiu shichekeno tipau ninguno ithulupe puani eno thopimike. Panonguno asubolo pa kughape tuthuiju ghi pithi. 40Ikemu Alhou no akuthunino akithi lono pa xuputhuveno pa pelo timi zulo ipeghipiyepeke. 41Timi kumtsu lau ipeghipiyeke kumoe ikemu Alhou no kisheluvekeqo, ningu khunoqo thopimi keno tipaqo lau likhi ipeghi piyepeke. Pano akithilo xuchilethughi kethiu ninguno pa sasu kumtsa chu shoe. 42Pano ningu vilo atsakiviu timiqo lau vekuphawolopi ahzatsu, paye kuxumi ngo kithimi shou kughakuthau shipeniye Alhou no kishelukeu hu pa kepi ashepe shilo pie. 43Tungkupmi kumtsuno pa shepe shichekeuno, timi khunono pa puluni keno paje vechewo axine pevekulupu ithulue.”

Judakumomi shou Aghungu Kimthe Tsu

44Pitor no hi piaphi lono, atsa iniakemi kumtsu shou Aghungu Kimthe ikughive. 45Eno Jopa lono Judami kupulumi Pitor gholo ighikeqoye akichiqhive, kughengu Judakumomi shou ghi Aghungu Kimthe lepukutsu kehu. 46Kughengu pano qono pakutakeu milino piakeu eno Alhou ye kijekepi sheqhekeu panonguno chilu. 47Tile Pitor no pi, “Ningu shou ighike toi, timi hipaqo shou ghi Aghungu Kimthe ighivae. Imaye, panonguno baptiz lunikeulo khualano panoqo lakha kepu ani kesha?” 48Ike Ampeu Jisu Khristo jelono panoqo baptiz shilupenike pano ahza tsu. Tithiu panoqo gholo atsala hami panongu gholo aghilopi pa vilo iniju.

Currently Selected:

APOSTOLMI 10: SUMIBSI

Highlight

Copy