MATTHAI 6

A guuha kilungsiatna silpiah

1Na sil hoih bawlte uh mi muh diing a, a ma va bawl lou diingin pilvaang un; huchilou inchu na Pa uh vaan a um kawmah muh diing kipaahman na nei sih diing uh. 2Hujiahin mi kawma sil na piah chiangun milepchiahte’n, mi phat a loh theihna diing va kikhopna inn bang, kholai banga ahih veu bangun, na ma vah pengkuul muut sih un. Chihtahzetin ka hung hilh ahi, Amahun a kipaahman uh a mu zouta uh. 3Hizongleh nang chu mi kawma sil na piah chiangin, na khut jiatlam hih chu na khut veilam hesah sin: 4Huchi’n na silpiah chu a guuhin a um thei diing a; huleh na Pa a guuha hung mupa in phuanglaahtahin ahung dit diing hi.

A guuha haamteina

5Huleh na haamtei chiangun milepchiahte bangin na hih diing uh ahi sih; ajiahchu amahun mi’n a muh theihna diingin kikhopna innte, kotzing ningkawite banga dingin a haamtei ut sese uh; chihtahzetin ka hung hilh ahi, Amah un a kipaahman uh a muta uhi. 6Hizongleh nang chu na haamtei chiangin na pindan sungah luut inla, na kot khaah inla, a guuha um na Pa kawmah haamtei in; huchi'n na Pa a guuha hung mupa in phuanglaahtahin ahung dit diing hi. 7Hizongleh na haamtei chiangun Jentelte bang in soi nonnon sih un; amahun chu a haam tam jiah va zaaha um diingin a kingaihtuah uh. 8Hujiahin amahuh bang sih un: ajiahchu na Pa un amah na nget ma un bang silte ahiai na mamoh uh a he hi.

Lalpa haamteina

9Huleh nanguh chu hichibangin haamtei un: Ka Pa uh vaan a um, na min kizahtaat heh. 10Na lalgam hung tung heh. Na deihzawng vaan a a kibawl bangin, leiah zong kibawl heh. 11Ka niteng an neeh uh tuni in hung pia in. 12Ka leibate uh ka ngaihdam bangun ka batte uh hung ngaidam in. 13Heemna ah hung puiluut sinla, gilou lahah hung hunkhe zaw in: lalgamte, silbawltheihnate, loupinate, kumtuanga nanga ahih jiahin. Amen, chi'n. 14Mi a tatsualnate uh na ngaihdam uleh, na Pa uh vaan a um in zong nanguh ahung ngaidam diing hi. 15Hizongleh mi a tatsualnate uh na ngaihdamlouh uleh na Pa un zong na tatsualnate uh ahung ngaidam sih diing hi.

Angawl thu a hilhna

16Huchiangleh an na ngawl chiangun milepchiahte bangin ngui meel po sih un; amahun chu an ngawla a kilat theihna diingun a maaisuah uh a tuamsah veu uh; chihtahzetin ka hung hilh ahi, amahun a kipaahman uh a muta uhi. 17Hizongleh nang chu an na ngawl chiangin na lu sathau nuh inla, na maai phiat in. 18Huchi'n na Pa a guuha um mitmuh ah loungal mihing mitmuh a angawl na bat louhna diingin; huleh na Pa a guuha hung mupa in phuanglaahtahin ahung pethuh diing hi.

Hauhsatna dihtah chu

19Lei a leikha leh tui-eeh in a neehsiatna ah leh, gutate’n a pheet vang va a guuh theihna vah gou kikhol sih un; 20Hizongleh vaan ah, leikha leh tui-eeh in a neehsiat louhna leh, gutate’n a pheet vang va a guuh louhna vah gou kikhol zaw un. 21Ajiahchu na gou uh umna photah na lungsim u’zong a um diing hi.

Vaah leh mial

22Sapum vaahna chu mit ahi; hujiahin na mit a dih leh na sapum a vaah veh diing hi. 23Hizongleh na mit a dih louh inchu na sapum a mial veh diing hi. Hujiahin na sunga vaah chu mial hitaleh hu mial chu nasa na’n chia! 24Mi koimah in houtu nih nna a tongkhawm thei sih; ajiahchu khat mudahin khat a lungsiat diing a, ahihlouhleh khat gum in khat a simmoh diing hi. Pathian leh sum nna na tongkhawm thei sih diing uhi.

Lunghihmohna leh Pathian muanna

25Hujiahin ka hung hilh ahi, Bang ahiai ka neeh diing, bang ahiai ka dawn diing, chi'n na hinna uh diing leh bang ahiai ka silh a ka teen diing chi'n na tahsa uh diing lunghimoh sih un. Neeh diing sangin hinna a luulzaw sih eimah? huleh silh leh teen sangin tahsa a luulzaw sih eimah? 26Tungleeng vate en un, buh a tuh sih va, aat zong a aat sih uh, huleh buhinn ah zong a sunglut sih uh; ahihvangin na Pa uh vaan a um in amahuh a vaah hi. Nanguh chu amahuh sanga nasataha luulzaw hilou na hi viai mah? 27Nanguh lahah kua’n ahiai kingaihtuah jiaha a dung tongkhata behlap thei? 28Huleh silh leh teen thu a bang diinga lunghimoh na hi viai? gam a lili paahte khandan ngaihtuah un; tong laha tonggim sih va, pat zong a kheeh sih uh; 29Hizongleh ka hung hilh ahi, Solomon hilhial zong a loupina zousiaha a kizepin hite khat tuhin zong zep ahi zou sih hi. 30Huchi'n gam a hampa tunia hing a, zinga meikhuuh a paihluut diing bawn Pathian in a huchi zep leh, Aw nanguh gintawmte, ama’n, nanguh husangin ahung zeemzaw tham sih diai mah? 31Hujiahin bang ahiai i neeh diing a, bang ahiai i dawn diing; ahihlouhleh bang ahiai i silh diing, chi'n lunghimoh sih un. 32(Ajiahchu hi silte zousiah Jentelte’n a hawl uhi), hi silte zousiah na mamoh uh chih na Pa uh vaan um in a he hi. 33Hizongleh nangun chu Pathian gam leh a dihtatna hawl masa un; huleh hi silte zousiah piahbeh na hi diing uhi. 34Hujiahin zinga diingin lunghimoh sih un; ajiahchu jing in amah a diing ahung kingaihtuah tawm diing hi. Ni khat gimthuaah chu ni khat diingin a hun ahi.

Currently Selected:

MATTHAI 6: SIMTBSI

Highlight

Copy