MATTHAI 18

Kingaihngiamna a heet diing

1Hulai tahin nungjuite Jesu kawmah a hung va, vaan lalgam ah koi a lianpen diai? a chi va. 2Huin Jesu’n naupang neu khat a kawmah a kou a, amah chu a lahvah a dingsah a, 3Chihtahzetin ka hung hilh ahi, Na lamleet va, naupang neute bang na hung hih louh uleh, vaan lalgam ah na luut het sih diing uh. 4Hujiahin koipouh hi Naupang neu banga kingaingiam chu, hu mi ngei chu vaan gam ah a lianpen diing. 5Huleh koipouh hitobang naupang khat keimah min a kipaahpih chu kei hung kipaahpih ahi.

Midangte daal louh diing

6Hizongleh koipouh keimah hung gingta mi neute laha khat zong puuhsah chu a ngawng ah suang sumheeh lianpi awhsah in tui khang lian thuuhtah ah kheluut leuh amah diingin a hoihzaw hi. 7Puuhnate jiahin khovel tung a gih hi! puuhnate chu hung um diing mawng ahi a; hizongleh puuhna umsahtu tung a gih hi! 8Huleh na khut aha na keeng aha in ahung suhpuuh leh, saattan inla paaimang in; khut nih aha keeng nih aha nei a kumtuang mei a paih a um sangin, piangsual a, ahihlouhleh keengbaai a hinna a luut nang a diingin a hoihzaw hi. 9Huleh na mit in ahung suhpuuh leh kheikhia inla, paaimang in; mit nih nei a gawtmun mei a paih a na um sangin, mit khat nei a hinna a luut nang a diingin a hoihzaw hi. 10Hi mineute laha khat zong simmoh lou diingin pilvaang un; ajiahchu a angelte un vaan a um ka Pa meel a en zing uhi, chih ka hung hilh ahi. 11Mihing Tapa chu beimangte hundam diinga hung ahi ngal a.

Belaam mang tehkhinthu

12Bang na chi ngaih viai? Mi khat in belaam zakhat nei henla, a lahva khat vaahmang taleh, sawmkuaah leh kuaahte chu nusia in, taang a chiah in, a vaahmang pen va hawl lou diing ahiai mah? 13Huleh va mu kiitta henla hileh, chihtahzetin ka hung hilh ahi, sawmkuaah leh kuaah vaahmang loute tungah sangin, hu belaam pen tungah a kipaahzaw diing hi. 14Huchimah bangin hi mineute laha khat zong a manthai diing hi na Pa uh vaan a um deihlam ahi sih hi.

Silsual bawlte ngaihtuahdan diing

15Huleh na unau na tunga a tatleeh leh, chiah inla nang leh amah chauh heet in a khelhna chu va hilh in; ama'n na thu a ngaih leh na unau na zou ahi ding. 16Hizongleh a ngaihkhiah louh inchu, heetpihtu nih aha, thum aha kama thu a kichetna diingin, mi khat aha nih aha tonpih in. 17Huleh amahuh a ngaihkhiah nuam louha ahihleh, kouhtuamte kawmah tut in; huleh kouhtuamte thu zong a ngaihkhiah saam louh inchu amah chu nang a diingin ginglou leh siahdongmi bang hi heh. 18Chihtahzetin ka hung hilh ahi, Leitung a na kaan photmah u’chu vaan a zong kaan ahi diing a; huleh leitung a na phel photmah uh vaan ah phel ahi diing hi.

Kituaaha haamteina

19Huleh na kawmvah ka soi kiit hi, Leitung a na lahva mi nih a sil nget diing va a kithutuah uleh ka Pa vaan a um bawlsah in a um diing uhi. 20Ajiahchu mi nih aha, thum aha ka min a, a kikhopna photvah a lahvah ka um jel ahi, a chi hi.

Ngaihdamna natoh leh kipaahnadan he lou suaah tehkhinthu

21Huin Peter a kawmah a hung a, Lalpa, ka unau in bangzat vei ahiai ka tunga a khelh leh ka ngaihdam diing? Sagih vei tanin ahi diai? a chi a. 22Jesu’n a kawmah, Sagih vei chiang ka hung chi sih hi; sagih vei mun sawmsagih tanchiang ka hung chi zaw ahi. 23Hujiahin vaan lalgam chu kumpipa koi aha a suaahte kawma sum hisaap suhfel tum toh tehkhin ahi. 24Ahung suhfel pat a ahihleh, mi khat talent saangsawm ba a kawmah ahung pui va. 25Hizongleh ama’n piah diing a neih louh tahin a pu in chu amah, a ji leh a tate toh, huleh a neih zousiah toh zuah a dit diing thu a pia a. 26Hujiahin suaahpa’n chu khupboh in a bia a, Pu, ka tungah thuaahthei tadih inla, a bawn in ka hung dit diing, a chi a. 27Huin hu suaahpa pu in amah chu a hehpihta mahmah a, a hah a, a bat a ngaidamta hi. 28Hizongleh hu suaahpa chu a pawt a, a suaah hihpihte laha khat amah sum zakhat ba chu a va mu a, amah chu a man a, Na bat hung pia in chi'n a lawl a meeh a. 29Huchi'n a suaah hihpihpa chu a keeng bulaha puuh a, Ka tungah thuaahthei tadih in, ka hung dit veh diing, chi'n a ngen a. 30Ahihvangin amah a ut sih a; a bat a dit zoh masiah suangkul ah ava khumta a. 31A suaah hihpihte'n a silbawl chu a muh un, a lunghimoh mahmah va, huleh a hung va, sil umtan zousiah a pu uh ahung hilhta uhi. 32Huphetin a pu in amah chu a kou a, a kawmah, Aw suaah giloupa, na hung nget ngutngut jiaha na bat zousiah hung ngaidam hi’nga; 33Ke’n nang ka hung hehpih banga nang zong na suaah hihpihpa na hehpih sam diing hilou maw? a chi a. 34Huin a pu chu a thangtawmta a, a bat zousiah a ditzoh masiah migawtte kawmah a peta hi. 35Nanguh koipouh in na lungtang tah va na unaute a tatleehna uh na ngaihdamlouh uleh, Vaan a um ka Pa’n zong huchibangin na tungvah a bawl ve diing ahi, a chi hi.

Currently Selected:

MATTHAI 18: SIMTBSI

Highlight

Copy