MATTHAI 16

Jesu’n chiamchihna nget a pe nuam sih

1Pharisaite zong Sadukaite toh a hung va, amah ze-etna diingin vaan a kipan chiamchihna amahuh ensah diingin a ngen va. 2Ama’n a dawng a, a kawmvah, Nitaahlam chiangin, khua a pha diing hi’nte mei san a suaah, na chi veu uhi. 3Huleh jingkal chiangin, tuni’n khua a se diing hi’nte mei san a suaah a, a ngiamkai, na chi veu uhi. Nanguh milepchiahte aw, vaan umdan na hesiam va; hizongleh hun chiamchihna na he sih uh. 4Khangthah gilou leh aangkawm haatte’n chiamchihna a hawl uh; hizongleh zawlnei Jonah chiamchihna loungal a dang a kipe sih diing, a chi a. Huleh amahuh a nusia a, a chiahta hi. 5Huleh a nungjuite’n gaallehlam a tun un, tanghou a po mangngilh va. 6Huin Jesu’n a kawmvah, Pharisaite leh Sadukaite tol lahah kiveeng unla pilvaang un, a chi a. 7Huleh amahun chu, Tanghou i puaah louh jiahin ahi ve, chi'n a kingaihtuah va. 8Jesu’n huchu a hedoh a, a kawmvah, Aw gintawmte, tanghou na neih louh jiah va bang diinga kingaihtuah na hi viai? 9Mi saangngaate vaahna tanghou ngaa leh, bawm bangzah aha na dimsah uh, chih tu nasan a hesiam nailoua, na lungsim va zong he zing lou na hi u'maw? 10Huleh mi saangli vaahna tanghou beu sagih leh na bawm dimzaat u’zong? 11Na kawmvah tanghou thu soi ka hi sih a, Pharisaite leh Sadukaite tol lahah kiveeng un chih soi ka hi zaw chih bang diinga hesiam lou na hi viai? a chi a. 12Huin amahun tanghou tol lahah kiveeng un chi hilouin Pharisaite leh Sadukaite thuhilhna lahah pilvaang diingin ahi zaw, chih ahung theita uhi.

Peter in Jesu chu Khrist ahi chia a phuanna

13Jesu chu Caesarea Philippi gam ahung tunin a nungjuite kawmah, Mite’n kei mihing Tapa hi koi ahi ahung chi viai? chi’n a dong a. 14Huleh amahun, Lawikhat in, Baptistu John ahi ahung chi va; lawikhat in Elijah huleh a dangte’n Jeremiah ahihlouhleh zawlneite laha khat ahi, ahung chi uhi, a chi va. 15Ama’n chu a kawmvah, Ahihleh nangun koi ahi na hung chi viai? a chi a. 16Huin Simon Peter in a dawng a, Khrist, Pathian hing Tapa chu na hi, a chi a. 17Huleh Jesu’n a dawng a, a kawmah, Simon Barjona na hampha hi, ajiahchu sa leh sisan in ahung heetsah na hi sih a, vaan a um ka Pa hung heetsah ahi zaw hi. 18Huleh ke'n zong na kawmah, Nang Peter na hi, chih ka hung hilh ahi; huleh hi suangpi tungah ka kouhtuam ka lemdoh diing hi; huchu misi kulh kotkhaahte’n bangmah a lohbut sih diing. 19Huleh na kawmah vaan lalgam chabite ka hung pe diing a, lei a na kaan photmah chu vaan ah kaan ahi diing a, huleh lei a na phel photmah chu vaan ah phel ahi diing, a chi a. 20Huin Khrist ahi chih koima hilhlou diingin a nungjuite dettahin thu a pia hi.

Jesu’n a sih diing leh a thohkiit diing a soilawh

21Hunungsiah chu Jesu’n Jerusalem a, a chiah diing bang, upate, siampu lalte huleh lehkhagialtute laha sil tampi a thuaah diingdan bang, thaha a um diing bang, huleh ni thum ni a, a thoh kiit diing bang a nungjuite a hesah panta hi. 22Huin Peter in amah a puituam a, Lalpa, hih in hung gamlaat heh; na tungah a tung hial sih diing, chi'n a taihilh a. 23Hizongleh amah chu a kihei a, Peter kawmah, Setan, ka nungah pai in; kei diingin puuhna na hi; nang Pathian silte ngaihtuah louin mihing silte na ngaihtuah zawh jiahin, a chi a.

Eimah leh eimah kihaw diing a hilhna

24Huin Jesu’n a nungjuite kawmah, Mi koipouh in ahung juih nuam leh mahni gimthuaah khawhsa louin, a kros pua in hung jui heh. 25Ajiahchu koipouh a hinna humbit nuamin a taan diing a; huleh koipouh keimah jiaha a hinna taan in a mu diing hi. 26Mi’n khovel a pum in nei henla, a hinna taan taleh amah diingin bang a phatuam diai? ahihlouhleh, mi’n a hinna luang in bang ahiai a piah diing? 27Mihing Tapa chu a Pa loupinna a angelte toh hung diing ahi ngal a; huchiangin michin a natoh bangjelin a thuh chiat diing hi. 28Chihtahzetin na kawmvah ka soi ahi, Hi a dingte a khen chu, mihing Tapa a lalgam a, a hung a muh masiah uh, sihna chiam lou diing a um uhi, a chi hi.

Currently Selected:

MATTHAI 16: SIMTBSI

Highlight

Copy