MATTHAI 12

Khawlni tan thu

1Huchihlaiin, Jesu chu khawlni’n buhlei lai tawnin a chiah jel a; huleh a nungjuite a gil uh a kial a, buhvuite a sihtan va, a ne panta uh. 2Hizongleh Pharisaite’n hichu a muhun, a kawmvah, En ve, na nungjuite’n khawlni’n bawl siang louh a bawl uh, a chi va. 3Hizongleh ama’n a kawmvah, David in a gilkial laia a lawite toh a bawl uh simkha lou na hi u'maw? 4Huchia Pathian biahinn a, a luut a, amah leh a lawmte neeh siang louh, siampute chauh neeh theih, tanghou siah a neeh uh thu? 5Ahihlouhleh khawlni’n Pathian biahinn a siampute’n khawlni a suhbuah unzong siamlouh a tang sih uh chih, daanbu ah na sim sih u'maw? 6Hizongleh hi munah Pathian biahinn sanga loupizaw khat a um hi chih ka hung hilh ahi. 7Ahihvangin nangun, Kithoihna deih louin zahngaihna ka deih, chih umzia heta hileh u’chin, mohna nei lou chu siamlouh tangsah lou diing hi u’china. 8Mihing Tapa chu khawlni Lalpa ahi ngal a, a chi hi.

Khawlni a khutzeng suhdamna

9Huleh hutah apatin a chiah a, a kikhawpna inn vah a luut a. 10Huleh, ngai in, huah mi khutzeng khat a um a, Huleh amahun a heehsiat theihna diingun, Khawlni a suhdam a siang ei? chi'n amah a dong va. 11Huin ama’n a kawmvah, Na lahva kuan ahiai belaam, khat nei henla, khawlni’n kokhuuh ah keta leh, huchu vatu lou diing leh, kaidoh lou diing um? 12Huchi ahihchian belaam sanga mihing chu bangchitaha luulzaw a tai mah? Hujiahin khawlni’n bawlhoih a siang hi, a chi a. 13Huin hupa kawmah, Na khut zandoh in, a chi a. Huchi’n a zandoh a; a langkhat bangin ahung damsiangta hi.

Jesu thah diing sawmna

14Huzohin Pharisaite a pawt va, amah suhlup theihna diing ngaihtuahin a kihou va. 15Hizongleh Jesu’n hichu a heet in, hu apatin, a kihemmangta a; huleh mipi nasatah in amah a jui va, ana sudam veh hi. 16Huleh amah a soiphuang louhna diingun amahuh a khap a. 17Huchu zawlnei Isaiah in hichibanga ana soite ahung taangtun theihna diingin ahi. 18En in, ka suaah, ka teel: ka deihtah, amah ka lungkim mahmahna pa chu; ka Hagau a tungah ka koih diing a, huleh ama’n Jentelte kawmah vaihawmna thu a soi diing. 19Ama’n chu a nial sih diing a, a kikou sih diing; mi koimah in kholai dungah a aw a ja sih diing uh. 20Gualzou diing a vaihawmna dih ahung tut masiah sialluang gawpsa a sutan sih diing a, pat khu zong a sumit sih diing. 21Huleh amah min in Jentelte’n kinepna a nei diing uh, a chih.

Setan panpihna a natong ahi a chih uh Jesu’n a dawnna

22Huin, dawimat, mittaw haamthei lou khat a kawmah ahung pui va; ama’n ana sudam a, huchi’n haamthei lou chu hung haamthei in khua ahung muta hi. 23Huleh mipi zousiah in thum ah a sa va, Hipa hi David tapa hilou ahi maw? a chi va. 24Hizongleh Pharisaite'n hi thu a jah tahun, Hipa’n dawimangpa Beelzebul jiah loungal in dawite a nohdoh sih diing, a chi va. 25Huleh Jesu’n a ngaihtuah uh a he a, a kawmvah, Gam sung khat kilangkhen a amah leh amah kidou chu a mangthai veu a; huleh khopi sung aha, inn sung aha kilangkhen zong a dingdoh sih diing; 26Huleh Setan in Setan mah nohdohta leh, amah leh amah kidou ahita diing a; bangchi'n a gam a dingta diai? 27Huleh Beelzebul jiaha dawite nohdoh ka hih leh, na tate un koi jiahin ahiai a nohdoh uh? hujiahin amahuh chu nanguh hung vaihawmsah diingte ahi uhi. 28Hizongleh ke’n Pathian Hagau vanga dawite nohdoh ka hih leh, Pathian gam na kawmvah hung tung ahita hi. 29Ahihlouhleh, kuan mihaat chu a kaan masat louh leh, a inn a luut in, a neih a laahsah thei ngei ei mah? Ka an masa in huzohchiangin a inn chu a luhsah chauh diing ahi. 30Koipouh ka lama pang lou chu ahung dou ahi; huleh koipouh ahung khopkhawmpih lou chu a sudalh ahi.

Ngaihdam theih louh sual

31Hujiahin ka hung hilh ahi, Mi a sualna zousiah uleh Pathian a soisiatna zousiah vah ngaihdam ahi diing a; hizongleh Hagau Siangthou soisiatna chu ngaihdam ahi sih diing. 32Huleh koipouh mihing Tapa kalh chu, a kalhna uh ngaihdamsah ahi diing a, hizongleh koipouh Hagau Siangthou kalh chu, a kalhna uh hi khovel ah zong, huleh khovel hung um kiit diing ah zong ngaihdamsah ahi sih diing hi.

Thudih soi diing

33Sing chu a hoih, a gah zong a hoih na chih louhngal uleh sing chu a sia, a gah zong a sia chi ngal un; ajiahchu sing hi a gah in a kihe hi. 34Guul suante haw, na giitlouhna pum va bangchia thu hoih soi thei diing na hi viai? lungtang dolh val chu kam in a soi veu ahi ngal a. 35Mihoih in lungtang goubawm hoih apatin sil hoihte ahung ladoh a; huleh migilou in a goubawm hoihlou apatin sil hoihlou ahung ladoh jel hi. 36Hizongleh ka hung hilh ahi, Mite’n thulimlou a soi photmah uh, vaihawm ni chiangin a jiah a soi diing uhi. 37Ajiahchu na thu in siamtansah in na um diing a, na thu mahin siamlouh tansah in na um diing hi, a chi hi.

Chiamchihna pe diing a a ngetna uh a nialna

38Huin Pharisaite leh lehkhagialtute hunkhop in a dawng va, Houtupa, nangmah apatin chiamchihna ka mu nuam uh, a chi va. 39Hizongleh ama’n a dawng a, a kawmvah, Khangthah gilou leh aangkawm haatte’n chiamchihna a hawl uh; hizongleh zawlnei Jonah chiamchihna loungal a kawmvah, chiamchihna dang piah ahi sih diing; 40Ajiahchu Jonah suun thum leh jan thum ngapi gil sunga a um mahbangin mihing Tapa zong suun thum leh jan thum lei gil sungah a um diing hi. 41Nineveh khua mite chu vaihawmna ah tulai khang thahte toh ahung ding diing va, siamlouh a tangsah diing uh; amahuh Jonah thusoi jiahin a kisiih ngal va; en un, Jonah sanga loupizaw hi-ah a um hi. 42Huleh simlam kumpinu chu vaihawmna ah tulai khang thahte toh ahung thoukhawm diing a, siamlouh a tangsah diing: Solomon pilna ngaikhe diingin bawn kawlmong apat ahung ngal a; huleh en un, Solomon sanga loupizaw hi-ah a um hi.

Polam kisiamthahna phattuamlouhna

43Huleh dawiniin chu mi sung apat a pawt in tui umlouhna mun chinah khawlna hawl in a vaah lehleha, a mu ngal sih a. 44Huin ama’n, Ka pawtdohna inn mahah ka kiihkiit mai diing, a chi a; huchia a hungtahin huchu a awng a, phiatsiang leh zephoih in a mu a; 45Huin ava chiah a, amah sanga gilouzaw dawi dang sagih ava pui a, huah a luut va, a teengta uh; huin hupa umdan nunung chu a masa sangin a sezawsemta hi. Tulai khang thah giloutahte tungah zong hutobangin a um diing, a chi hi.

Kitanauna dih

46Huchia ama’n mipite kawma thu a soi laiin, ngai in, a nu leh a unaute chu amah houpih nuamin inn pua ah a ding va. 47Huin mi khat in a kawmah, Ngai in, na nu leh na unaute nang hung houpih nuamin inn pua ah a ding uhi, a chi a. 48Hizongleh ama’n a dawng a, amah hilhpa kawmah, Ka nu koi ahiai? huleh ka unaute zong koi ahiai? a chi a. 49Huin a nungjuite lamah a khut a jah a, En un, ka nu leh ka unaute! 50Ajiahchu koipouh vaan a um ka Pa deihzawng bawl taphot chu ka unaupa, ka unaunu, huleh ka nu ahi uh, a chi hi.

Currently Selected:

MATTHAI 12: SIMTBSI

Highlight

Copy